Moˇseˬ-euˬ Zahˇ dawˬ laꞈ k’oeˇ tsawˇ haˬ deuˬ “Ngaˇ Miˬyehˇ laꞈ k’oeˇ kamˬ-eu ma Ngaˇ Yeˬhawˇbaˬ-euˬ tsawˇ myahˇ laꞈ k’oeˇ kamˬ-eu ma” lehˇ kamˬ nya-eu meh. Ehˇ k’awꞈ Yeˬsuˇ-euˬ saˇ ka-ahˇ naˇ kamˬ-eu jeˬ tiˬ jeˬ maˬ ngeuˇ-eu loꞈ-ehˇ pyeuꞈ iˇ taˬ-euˬ meh. Yuˇdaˆ tsawˇ jeuˬ deuˬ k’aˇ ngeuˇ jeˬ-ahˇ kamˬ-eu meh. Aˬ yawꞈ maꞈ yawˬ ha neh ngehˬ-eu jeˬ-ahˇ aˬ cawˬ bi jah dzehˬ laˇ-eu g’aˇ duˬ teu loꞈ-ehˇ jahˇ-euˬ meh. Ehˇ k’awꞈ gaˇ dahˇ maˬ tsoeˬ gaˇ kamˬ-eu jeˬ-ahˇ Yeˬsuˇ nyiˬ poˆ dehˬ-euˬ meh. “Ngeuˇ naˇ ‘Ngeuˇ ma’ maˬ ngeuˇ naˇ ‘Maˬ ngeuˇ’ lehˇ tehꞈ-ehˇ ehˇ-awˬ” lehˇ Yeˬsuˇ mehˬ-eu meh.—Maꞈtehˬ 5:33-37; 23:16-22.

Paˇ dmˬ tiˬ dmˬ laꞈ k’oeˇ (Theological Dictionary of the New Testament) Tawˇmuꞈ paˇ dmˬ heu naˇ Yuˇdaˆ tsawˇ jeuˬ deuˬ yawˬ ha-euˬ dawˬ maˇ maˇ ni g’eh meh lehˇ g’aˬ biꞈ-eu g’aˇ duˬ tiˬ jeˬ maˬ ngeuˇ-eu loꞈ-ehˇ kamˬ meh lehˇ aˬ dui-ahˇ bi siˬ laꞈ-eu meh. Aˬ jeˬ miˇ neh ehˇ naˇ Tawˇmuꞈ paˇ dmˬ laꞈ k’oeˇ kamˬ-eu aˬ geu jeˬ-ahˇ ya mˇ caw-eu aˬ jeˬ-ahˇ maˬ ya mˇ caw-eu lehˇ duꞈ yawˇ ni ja sawˇ taˬ-euˬ miˇ neh meh.

Yeˬsuˇ gaˇ kawˆ heu-ahˇ maˬ ya leˇ-eu tiˬ g’aˬ tehꞈ maˬ ngeuˇ-a. Yaw jeˬ ma jeˬ gaˇ hu gaˇ kawˆ-ahˇ pyehˆ tseˇ-eu Yuˇdaˆ tsawˇ jeuˬ pyeuꞈ-eu Peˇbiˬ-ya Joˇsiˇpehꞈ kamˬ-eu jeˬ-ahˇ yahˇ-eu Yuˇdaˆ tsawˇ jeuˬ tiˬ muˇ-euˬ gaˇ kawˆ boꞈ taˬ-euˬ meh. Teu muˇ naˇ kamˬ-eu jeˬ-aˬ jaˬ myawꞈ myawꞈ-eu jeˬ naˆ maˬ tseˇ bahˬ nga lehˇ jah-eu meh. Aˬ yawꞈ maꞈ yawˬ ha neh ngehˬ-eu jeˬ-ahˇ aˬ cawˬ bi jah-eu g’aˇ duˬ kamˬ naˇ jaˬ myawꞈ ya myawꞈ meh lehˇ jah-eu meh. Siˆlaˆ-euˬ zaˬ siˬ tsawˇ gahˇ boꞈ-euˬ Yuˇdaˆ tsawˇ jeuˬ-euˬ paˇ dmˬ maˬ ngeuˇ naˇ Dawˬtsoˆtsoˆ-eu sahˬ boꞈ (23:11) laꞈ k’oeˇ k’awꞈ ni “Kamˬ-eu deuˬ haiˬ-eu tsawˇ haˬ pyeuꞈ meh” lehˇ ehˇ-eu meh. Yeˬsuˇ aˇ yeˇ maˬ huiˬ-eu gaˇ kawˆ-ahˇ kamˬ gaˇ maˬ ya leˇ-a. Aˬ dui aˬ myah luꞈ maˇ maˇ ni g’eh-eu jeˬ tehꞈ-ehˇ ngehˬ naˇ aˬ dui neh ngehˬ-eu jeˬ-ahˇ aˬ cawˬ bi jah dzehˬ laˇ-eu g’aˇ duˬ kamˬ-eu maˬ loˬ-a.