Yeˬhawˇbaˬ˗euˬ Saˇ kiˇ deuˬ neh boꞈ doˆ jahˇ doˆ taˬ˗euˬ jeˬ, aˬ jeˬ miˇ neh gʼoeˇsaiˇ nui deuˬ hawˇ˗eu soˇsho miˇdiˬ˗yaˬ˗ahˇ maˬ bi dawˆ ahˇ˗eu nga?

Tiˬ gʼaˬ na aˬ dui˗euˬ boꞈ doˆ jahˇ doˆ taˬ˗euˬ jeˬ yaw ngehˬ˗ehˇ bi gui bi haw˗eu miˇ neh, aˬ dui˗euˬ gʼoeˇsaiˇ laꞈ kʼoeˇ ahˇ˗eu jeˬ, gʼoeˇsaiˇ nui deuˬ hawˇ˗eu soˇsho miˇdiˬ˗yaˬ˗ahˇ dawˆ ahˇ iˇ nya ngaˇ lehˇ noeˬ˗eu meh. Ehˇ kʼawꞈ, teu loꞈ˗ehˇ jahˇ˗eu teu naˇ, gaˇ kawˆ doˆ laˇ nya˗awˇ, aˬ dui˗euˬ gʼoeˇsaiˇ Zmˬ nya˗eu aˇ tiˆ˗ahˇ bahˬ˗eu jeˬ pyeuꞈ meh. a (Ehˇ lahˬ˗ahˇ haw.) Zmˬ nya˗eu aˇ tiˆ laꞈ kʼoeˇ, “gʼoeˇsaiˇ heu laꞈ kʼoeˇ˗euˬ aˇ baˇ deuˬ maˬ ehˇ, eˆleꞈtawˇniꞈ paw neh boꞈ doˆ jahˇ doˆ taˬ˗euˬ jeˬ maˬ ehˇ, gʼoeˇsaiˇ˗euˬ tsawˇ myahˇ maˬ ehˇ, dawˬ caˇ maˬ ehˇ, biˬdiˬoˬ maˬ ehˇ, gaˇ kawˆ deuˬ maˬ ehˇ, iˇteuꞈnehꞈ laꞈ kʼoeˇ taˬ dawˆ ahˇ iˇ lehˇ maˇ jawˆ ni ehˇ taˬ˗euˬ meh. Teu naˇ, gʼoeˇsaiˇ deuˬ, soˇsho neˇgʼoꞈ, biˬdiˬoˬ hawˇ˗eu gaˇ kawˆ biˇ kʼawˬ˗eu gʼoeˇsaiˇ, heu deuˬ pyeuꞈ meh.” Zahˇ sahˇ kʼoꞈ heu aˬ jeˬ miˇ neh aˇ yeˇ huiˬ˗eu nga?

Aˬ dui˗euˬ gʼoeˇsaiˇ laꞈ kʼoeˇ ahˇ˗eu yawˬ jeˬ na luꞈ yaw sahˇ baw˗awˇ, zahˇ sahˇ kʼoꞈ neh haw piˇ taˬ˗euˬ meh. Gaˇ kawˆ heu naˇ, gʼoeˇsaiˇ laꞈ kʼoeˇ ahˇ˗eu jeˬ˗ahˇ maˬ ngeuˇ jeˬ˗ehˇ maˬ bi zmˬ iˇ ni haw piˇ˗eu miˇ neh aˇ yeˇ huiˬ˗eu meh. Miˬyehˇ˗ahˇ puiˬ˗eu deuˬ hawˇ˗eu aˬ dui˗euˬ gaˇ˗ahˇ laˆ tsoeˬ mawꞈ˗eu deuˬ, aˬ dui neh jahˇ doˆ taˬ˗euˬ jeˬ aˬ yawꞈ maꞈ˗euˬ gʼoeˇsaiˇ˗ahˇ dawˆ ahˇ˗awˇ, Yeˬhawˇbaˬ˗euˬ Saˇ kiˇ deuˬ hawˇ˗eu tsawˇ haˬ nui deuˬ˗ahˇ mehˇ shuiˇ shuiˇ˗eu meh. Aˬ yawꞈ maꞈ˗euˬ gʼoeˇsaiˇ deuˬ naˇ, haw iˇ˗eu deuˬ˗ahˇ nui ma bi poˆ bi paˇ laˇ˗eu gʼaˇ duˬ jahˇ doˆ taˬ˗euˬ meh. (Ja ceuˬ 26:4; Dawˬdaˬ 22:5) Tiˬ gʼaˬ na naˇ kʼawꞈ, aˬ dui neh jahˇ doˆ taˬ˗euˬ jeˬ hawˇ˗eu jw.org aˇ baˇ˗ahˇ myawˬ ahˬ gaˇ maˬ ehˇ, naˬ gaˬ˗euˬ ehˆ˗ahˇ maˬ ehˇ, zmˬ iˇ˗eu meh. Ehˇ kʼawꞈ, heu naˇ zahˇ sahˇ kʼoꞈ haw piˇ˗eu laꞈ kʼoeˇ jaˆ˗eu jeˬ pyeuꞈ˗eu miˇ neh, aˬ cawˬ maˬ ngeuˇ˗eu jeˬ˗ehˇ zmˬ ngeh yaˇ kʼaˬ ja nya˗eu meh. (Dawˬdaˬ 27:12) Ehˇ kʼawꞈ, saˇ naˇ aˬ dui tsawˇ haˬ tiˬ gʼaˬ na˗ahˇ maˬ ehˇ, mehˇ nmˇ tiˬ gʼaˬ na˗ahˇ maˬ ehˇ, jw.org gʼoeˇsaiˇ laꞈ kʼoeˇ ahˇ˗eu jeˬ hawˇ˗eu jw.org aˇ baˇ gʼoeˇsaiˇ nui deuˬ˗ahˇ bi dawˆ ahˇ˗awˇ, myawˬ ahˬ gaˇ maˬ siˬ˗ehˇ bi zmˬ naˇ, saˇ naˇ daˆ leˇ ngeh, aˬ yawꞈ maꞈ aˬ dui˗ahˇ jiˇ maˬ taˬ nehˬ laꞈ˗eu kʼawꞈ pyeuꞈ nya meh.

Aˬ dui neh boꞈ doˆ jahˇ doˆ taˬ˗euˬ jeˬ jw.org gʼoeˇsaiˇ˗ahˇ maˬ ngeuˇ˗eu, gʼoeˇsaiˇ nui deuˬ˗ahˇ daoˇloˆ iˇ naˇ, lehˬ laˇ ca laˇ nya meh. Yeˬhawˇbaˬ “saˇ jaˇ ziꞈ˗awˇ noeˬ dahˇ doe˗eu zaˬ kʼaˆ”˗ahˇ tehꞈ˗ehˇ zmˬ˗awˇ aˬ dui˗ahˇ nui jah paw˗euˬ dzaˇ bi biꞈ˗eu meh. (Maꞈtehˬ 24:45) “Zaˬ kʼaˆ” naˇ, aˬ dui˗ahˇ nui jah paw˗euˬ dzaˇ biꞈ˗eu gʼaˇ duˬ, www.pr418.com, tv.pr418.com, hawˇ˗eu wol.pr418.com gʼoeˇsaiˇ heu 3 hmˬ˗ahˇ zmˬ˗eu tehꞈ meh. Kʼoeˇ naˇ aˬ dui maˇ maˇ ni gʼeh˗eu ehˆ 3 hmˬ jaˆ˗eu tehꞈ meh. Teu naˇ, JW Lehˇgoiꞈ (JW Language^®), JW Laiˇbaˬliˬ (JW Library^®), JW Laiˇbaˬliˬ Saiˆ Lehˇgoiꞈ (JW Library Sign Language^®) heu deuˬ pyeuꞈ meh. Aˬ dui˗euˬ gʼoeˇsaiˇ hawˇ˗eu ehˆ heu deuˬ laꞈ kʼoeˇ, myawˬ ahˬ˗eu gaˇ kawˆ hawˇ˗eu Saˬdaˬ˗euˬ miˇ tsaˬ˗euˬ nui noeˬ maˬ ahˇ˗a. Ehˇ kʼawꞈ, aˬ dui neh boꞈ doˆ jahˇ doˆ taˬ˗euˬ jeˬ gʼoeˇsaiˇ hawˇ˗eu ehˆ nui deuˬ˗ahˇ neh laˬ iˇ naˇ, tiˬ jeˬ na laˆ paˇ˗euˬ kʼawꞈ pyeuꞈ nya˗eu miˇ neh, lehˬ laˇ ca laˇ nya˗eu meh.—Ja ceuˬ 18:26; 19:8.

Kʼoeˇ uˬ taꞈ, aˬ dui aˬ dui neh boꞈ doˆ jahˇ doˆ taˬ˗euˬ jeˬ, yaw ha˗euˬ nui noeˬ nui duˇ boꞈ ahˇ nya˗eu gʼoeˇsaiˇ˗ahˇ dawˆ ahˇ˗iˇ naˇ, Miˬyehˇ˗ahˇ puiˬ˗eu deuˬ hawˇ˗eu aˬ cawˬ deuˬ Yeˬhawˇbaˬ˗euˬ aˇ maꞈ aˇ muˇ˗ahˇ ja bu ja doeˇ laˇ nya˗eu meh. Teu gaˇ mehˇ nmˇ tiˬ gʼaˬ na aˬ yawꞈ maꞈ nehˬ˗ehˇ tsawˇ pyehˇ pyehˇ iˇ˗awˇ, Yeˬhawˇbaˬ˗euˬ tsawˇ myahˇ˗ahˇ laˆ cawˆ gaˇ keuˆ˗eu meh. Iˇteuꞈnehꞈ laꞈ kʼoeˇ heu loꞈ˗ehˇ jaˬ˗eu heu naˇ, tsawˇ haˬ tiˬ gʼaˬ na˗euˬ nui noeˬ˗ahˇ laˆ paˇ nya˗awˇ yaw tsaˬ yaw dawˇ˗ahˇ gʼoˆ shaw laˇ ni caw ba nehˬ nya˗eu jeˬ maˬ ngeuˇ˗a. (1 Tiˆmoˇseˬ 6:3-5; 2 Tiˆmoˇseˬ 2:23-25) Kʼoeˇ naˇ, tiˬ gʼaˬ na aˇ maꞈ aˇ muˇ hawˇ˗eu Uˆ lahˇ˗eu aˇ muˇ laꞈ kʼoeˇ˗euˬ tiˬ gʼaˬ na˗euˬ gaˇ duˇ˗eu tsawˇ myahˇ neh, gʼoeˇsaiˇ hawˇ˗eu soˇsho miˇdiˬ˗yaˬ jahˇ doˆ˗eu meh. Heu naˇ jaˬ myawꞈ mehˇ shuiˇ tehꞈ meh. Uˆ lahˇ˗eu aˇ muˇ tiˬ gʼaˬ˗iˬ yawˬ ha˗euˬ gʼoeˇsaiˇ maˬ jaˆ˗eu uˬ taꞈ, soˇsho miˇdiˬ˗yaˬ laꞈ kʼoeˇ jiˇ tsawˇ myahˇ maˬ dawˆ taˬ˗aˬ.

Tiˬ gʼaˬ paˬ˗ahˇ jw.org gʼoeˇsaiˇ ehˇ nehˬ˗eu heu naˇ, “laˬ kʼaˬ cehˇ˗eu guiˬ lahˬ dawˬ” tsaꞈ gaˬ˗eu gaˇ˗ahˇ gʼaˬ biꞈ˗eu jeˬ pyeuꞈ meh. (Maꞈtehˬ 24:14) Aˬ dui˗euˬ gʼoeˇsaiˇ hawˇ˗eu ehˆ deuˬ, muiˬ dzehˬ laˇ luꞈ meh. Aˬ dui keu ka heu deuˬ˗ahˇ neh yawˬ gʼaˬ na luꞈ˗ahˇ gaˇ dahˇ tsoeˬ˗eu jeˬ bi za mawꞈ˗eu ma. Teu miˇ neh, aˬ dui neh boꞈ doˆ jahˇ doˆ taˬ˗euˬ jeˬ, iˇ˗meˬ˗oˬ paw neh aˬ cawˬ˗ahˇ biˇ nehˬ nya˗awˇ, aˬ dui˗euˬ gʼoeˇsaiˇ˗ahˇ bi ahˇ laˇ˗eu gʼaˇ duˬ, aˬ cawˬ˗ahˇ liˆ˗kuiꞈ sha nehˬ nya meh. Heu loꞈ˗ehˇ jahˇ˗eu heu naˇ, aˬ cawˬ deuˬ˗ahˇ Yeˬhawˇbaˬ neh nui jah paw˗euˬ dzaˇ bi biꞈ˗euˬ “saˇ jaˇ ziꞈ˗awˇ noeˬ dahˇ doe˗eu zaˬ kʼaˆ”˗ahˇ bi siˬ nya laˇ˗eu jeˬ pyeuꞈ meh.