Dzaw deuˆ 02
Jaˇliꞈ aˬ dui˗ahˇ noeˬ tmˬ˗eu jeˬ biꞈ
Tsawˇ haˬ zaˬ shaˬ zahˬ baˬ da neh nui ma cawˆ˗eu jeˬ, noeˬ shaˬ kʼahˬ lahˇ˗eu jeˬ, naˇ˗eu gawˇ˗eu jeˬ˗ahˇ ya tahˬ puˬ luꞈ˗eu meh. Nawˇ tawˇ neh, nawˬ˗ahˇ heu loꞈ˗ehˇ bi gʼeh laˇ˗eu gaˇ kawˆ˗ahˇ tahˬ puˬ haw maˬ loˇ? Nawˇ naˇ˗eu gawˇ˗eu miˇ neh maˬ ehˇ, gaˬ˗eu gʼaˬ bi shiˇ˗euˬ miˇ neh maˬ ehˇ, noeˬ shaˬ luꞈ˗eu kʼawꞈ pyeuꞈ nya meh. ‘Dehꞈ ziˇ heu naˆ maˬ tseˇ muiˬ laˇ˗eu maˬ siˬ ngaˇ’ lehˇ kʼawꞈ shaˇ noeˬ haw˗euˬ paˬ. Jaˇliꞈ laꞈ kʼoeˇ gaˇ kawˆ heu˗ahˇ gʼaˬ ahˇ laˇ paˬ˗ehˇ ehˇ nehˬ taˬ˗euˬ meh.
1. Jaˇliꞈ aˬ joˆ˗ehˇ gʼeh˗eu noeˬ tmˬ˗eu jeˬ biꞈ˗eu nga?
Jaˇliꞈ laꞈ kʼoeˇ miˇ tsaˬ kʼoeˇ taˆ aˬ jeˬ miˇ neh shaˬ zahˬ tehꞈ˗ehˇ byah jiˇ taˬ˗euˬ lehˇ ehˇ nehˬ taˬ˗euˬ uˬ taꞈ, gʼawˬ myahˇ maˬ gʼeh˗ehˇ shaˬ zahˬ byoˆ˗iˇ jiˇ meh lehˇ jiˇ ehˇ nehˬ taˬ˗euˬ meh. Kʼoeˇ naˇ aˬ dui “mehˬ hu paw yaw muiˬ˗ehˇ ya dehꞈ˗awˇ noeˬ tmˬ˗eu jeˬ” jiˇ jaˆ meh lehˇ saˇ jaˇ dzaˬ taˬ˗euˬ meh. (Yeˬlaˬmiˇ 29:11, 12-ahˇ gui.) Jaˇliꞈ laꞈ kʼoeˇ˗euˬ saˇ jaˇ dawˬ aˬ dui˗ahˇ nymˬ˗mˇ˗euˬ shaˬ zahˬ˗ahˇ kamˬ daˬ coeˇ ni maˬ ehˇ, yaw muiˬ paw dzeˇ dzaˬ˗ahˇ noeˬ nya ni maˬ ehˇ, laˬ kʼaˬ cehˇ˗eu jeˬ za nya ni maˬ ehˇ, caw ba nehˬ˗eu meh.
2. Mehˬ hu paw nehˬ˗ehˇ taꞈ leˇ˗awˇ Jaˇliꞈ aˬ jeˬ lehˇ saˇ jaˇ dzaˬ taˬ˗euˬ nga?
Mehˬ hu paw “shiˇ˗eu jeˬ maˬ paˇ jaˆ˗ehˇ, noeˬ shaˬ noeˬ zahˬ˗eu jeˬ, ngoeˇ˗eu jeˬ hawˇ˗eu naˇ˗eu gawˇ˗eu jeˬ maˬ paˇ jaˆ meh” lehˇ Jaˇliꞈ laꞈ kʼoeˇ saˇ jaˇ dzaˬ taˬ˗euˬ meh. (Pah mehˬ˗eu 21:4-ahˇ gui.) Nymˬ˗mˇ iˬ nah noeˬ tmˬ kʼaˇ maˬ za ni pyeuꞈ luꞈ˗eu iˇ shaˬ shaˬ˗eu jeˬ, maˬ tsaˬ maˬ dawˇ˗eu jeˬ, naˇ˗eu gawˇ˗eu jeˬ, shiˇ˗eu jeˬ, gʼawˬ myahˇ maˬ gʼeh˗ehˇ byoˆ˗iˇ jiˇ˗eu meh. Tsawˇ haˬ zaˬ miˇ tsaˬ kʼoeˇ taˆ muiˬ dui dui˗eu jawˇ duˬ pyeuꞈ˗eu Baˬlaˬdiˇsuˆ˗ahˇ laˬ kʼaˬ tiˬ cehˇ ya dehꞈ gʼeh meh lehˇ Jaˇliꞈ laꞈ kʼoeˇ saˇ jaˇ dzaˬ taˬ˗euˬ meh.
3. Jaˇliꞈ laꞈ kʼoeˇ˗euˬ saˇ jaˇ dawˬ˗ahˇ jah laˇ ni aˬ joˆ˗ehˇ ya jahˇ˗eu nga?
Tsawˇ haˬ deuˬ mehˬ hu paw yaw muiˬ jeˬ pyeuꞈ laˇ gaˇ noeˬ tmˬ˗eu meh. Ehˇ kʼawꞈ, aˬ yawꞈ maꞈ neh noeˬ˗euˬ loꞈ˗ehˇ pyeuꞈ laˇ˗eu lehˇ maˬ duˬ˗a. Jaˇliꞈ laꞈ kʼoeˇ˗euˬ saˇ jaˇ dawˬ teu loꞈ˗ehˇ maˬ gʼeh˗a. Aˬ dui ‘siˬ duˬ laˇ ni Jaˇliꞈ˗ahˇ gui’ naˇ, saˇ jaˇ dawˬ deuˬ˗ahˇ jah nya laˇ˗eu meh. (Gʼaˬkʼehˇ 17:11) Jaˇliꞈ dzaw naˇ mehˬ hu paw nehˬ˗ehˇ taꞈ˗eu saˇ jaˇ dawˬ jah nya ngaˇ laˬ, maˬ jah nya nga laˬ lehˇ ya siˬ duˬ˗eu meh.
Naꞈ suiˇ ni dzaw
Mehˬ hu paw nehˬ˗ehˇ taꞈ leˇ˗awˇ Jaˇliꞈ aˬ joˆ˗ehˇ saˇ jaˇ dzaˬ taˬ˗euˬ nga lehˇ haw˗awˇ, Jaˇliꞈ laꞈ kʼoeˇ boꞈ taˬ˗euˬ noeˬ tmˬ˗eu jeˬ nymˬ˗mˇ tsawˇ haˬ deuˬ˗ahˇ aˬ joˆ˗ehˇ gaˇ dahˇ tsoeˬ nga lehˇ haw.
4. Shaˬ zahˬ maˬ jaˆ ni mˬ maˬ maˬ byaˆ zaˇ ziˇ dehꞈ gʼeh nya meh lehˇ Jaˇliꞈ laꞈ kʼoeˇ saˇ jaˇ dzaˬ taˬ
Laꞈ oˆ saˇ jaˇ dawˬ deuˬ˗ahˇ ngehˬ keuˆ taˬ˗euˬ meh. Nawˬ˗ahˇ aˬ geu hmˬ˗ahˇ ya leˇ dzehˬ nya? Aˬ jeˬ miˇ neh?
Saˇ jaˇ dawˬ˗ahˇ ngehˬ keuˆ taˬ˗euˬ Jaˇliꞈ aˇ deuˆ deuˬ˗ahˇ gui˗awˇ, naˇ haˬ˗eu jeˬ heu˗ahˇ ja sawˇ.
-
Jaˇliꞈ aˇ deuˆ heu deuˬ nawˬ˗ahˇ noeˬ tmˬ˗eu jeˬ biꞈ miˇ˗a laˬ? Nawˬ˗euˬ nymˇ jiˇ hawˇ˗eu cawˬ deuˬ jiˇ Jaˇliꞈ aˇ deuˆ heu deuˬ˗ahˇ neh gaˇ dahˇ tsoeˬ˗eu jeˬ za nya ngaˇ laˬ?
Miˇ tsaˬ kʼoeˇ taˆ heu loꞈ˗ehˇ gʼeh gaˇ jawˇ luꞈ˗eu lehˇ shaˇ noeˬ haw sheˇ.
|
Heu deuˬ maˬ paˇ jaˆ |
Heu deuˬ jaˆ laˇ |
|---|---|
|
|
|
|
|
|
|
|
|
|
5. Jaˇliꞈ laꞈ kʼoeˇ˗euˬ noeˬ tmˬ˗eu jeˬ dehꞈ ziˇ˗ahˇ bi paˇ laˇ nya
Tsawˇ haˬ gʼawˬ mya gʼaˬ yawˬ ha˗euˬ gaˇ dzeˇ gaˇ taw maˬ muiˬ˗eu jeˬ tehꞈ˗ehˇ jaˆ luꞈ gaˇ ya mawˇ˗eu miˇ neh, nui daˆ daˆ˗awˇ nui ma cawˆ luꞈ˗eu meh. Teu miˇ neh tiˬ gʼaˬ na bi muiˬ bi paˇ laˇ˗eu gʼaˇ duˬ, yaw kʼaˆ˗ehˇ leh jeh˗eu meh. Yawˬ jeˬ na luꞈ muiˬ daˆ laˇ meh lehˇ Jaˇliꞈ laꞈ kʼoeˇ saˇ jaˇ dzaˬ taˬ˗euˬ jeˬ, nymˬ˗mˇ tsawˇ haˬ deuˬ˗ahˇ aˬ joˆ˗ehˇ caw ba˗eu nga lehˇ haw. Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Biˬdiˬoˬ laꞈ kʼoeˇ˗euˬ Laˇpiˇkaꞈ, aˬ jeˬ baˬ da neh nui ma maˬ saˇ maˇ saˇ˗ehˇ gʼeh˗eu nga?
-
Laˇpiˇkaꞈ ya mawˇ luꞈ˗eu maˬ tsaˬ maˬ dawˇ˗eu jeˬ maˬ byoˆ˗iˇ jiˇ kʼawꞈ, Jaˇliꞈ aˬ yawꞈ˗ahˇ aˬ joˆ˗ehˇ caw ba nehˬ˗euˬ nga?
Jaˇliꞈ laꞈ kʼoeˇ˗euˬ noeˬ tmˬ˗eu jeˬ aˬ dui˗ahˇ nui ma maˬ bi cawˆ ni maˬ ehˇ, nymˬ˗mˇ jaˆ luꞈ˗eu shaˬ zahˬ˗ahˇ kamˬ daˬ coeˇ ni maˬ ehˇ, caw ba nehˬ˗eu meh. Dawˬdaˬ 17:22 hawˇ˗eu Loˇmaˆ 12:12-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Jaˇliꞈ laꞈ kʼoeˇ˗euˬ noeˬ tmˬ˗eu jeˬ nymˬ˗mˇ iˬ nah nawˬ˗euˬ dehꞈ ziˇ˗ahˇ bi muiˬ daˆ laˇ nya meh lehˇ noeˬ miˇ˗a laˬ? Aˬ jeˬ miˇ toˆ˗ehˇ noeˬ nya?
Tiˬ gʼaˬ na ehˇ˗eu: “Mehˬ hu paw nehˬ˗ehˇ taꞈ leˇ˗awˇ Jaˇliꞈ laꞈ kʼoeˇ˗euˬ saˇ jaˇ dawˬ teu˗aˬ, maˬ pyeuꞈ leˇ nya gaˇ ehˇ taˬ nga.”
-
Gaˇ kawˆ teu˗ahˇ yawˬ haˇ yawˬ ha yaw duˬ duˬ lehˇ poˆ tseˇ˗eu aˬ jeˬ miˇ neh aˇ yeˇ huiˬ˗eu nga?
Kawˆ shawˆ
Jaˇliꞈ laꞈ kʼoeˇ mehˬ hu paw laˬ kʼaˬ cehˇ laˇ paˬ˗ehˇ gʼeh˗eu jeˬ jaˆ laˇ meh lehˇ saˇ jaˇ dzaˬ taˬ˗euˬ meh. Heu aˬ dui˗ahˇ noeˬ tmˬ˗eu jeˬ biꞈ˗awˇ, shaˬ zahˬ˗ahˇ kʼawꞈ kamˬ daˬ coeˇ ni caw ba nehˬ˗eu meh.
Ja sawˇ poˆ˗eu
-
Aˬ dui aˬ jeˬ miˇ neh noeˬ tmˬ˗eu jeˬ loˬ˗eu nga?
-
Mehˬ hu paw nehˬ˗ehˇ taꞈ leˇ˗awˇ Jaˇliꞈ˗ahˇ aˬ jeˬ ehˇ taˬ˗euˬ nga?
-
Mehˬ hu paw noeˬ tmˬ˗eu jeˬ teu, nymˬ˗mˇ aˬ dui˗ahˇ aˬ joˆ˗ehˇ caw ba˗eu nga?
Haw lahˬ
Noeˬ tmˬ˗eu jeˬ, naˇ myahˇ laꞈ˗euˬ deuˬ˗ahˇ aˬ joˆ˗ehˇ caw ba nehˬ nga lehˇ haw.
“Naˇ myahˇ laꞈ˗euˬ deuˬ˗ahˇ Jaˇliꞈ caw ba nya ngaˇ laˬ?” (Iˇteuꞈnehꞈ laꞈ kʼoeˇ˗euˬ gaˇ kawˆ)
Dawˬ caˇ heu bymˇ˗ahˇ haw ngeh, nawˬ˗euˬ nymˇ jiˇ Jaˇliꞈ laꞈ kʼoeˇ saˇ jaˇ dzaˬ taˬ˗euˬ, mehˬ hu paw muiˬ dui dui˗eu jawˇ duˬ˗ahˇ jawˇ luꞈ˗eu lehˇ shaˇ noeˬ haw.
Miˇ tsaˬ kʼoeˇ taˆ˗euˬ maˬ muiˬ˗eu jeˬ˗ahˇ laˆ paˇ˗eu lehˇ yaw kʼaˆ˗ehˇ leh jeh˗euˬ zaˬ yo aˬ li tiˬ gʼaˬ, Jaˇliꞈ laꞈ kʼoeˇ˗euˬ noeˬ tmˬ˗eu jeˬ˗ahˇ siˬ nya laˇ ngeh, aˬ yawꞈ˗euˬ dehꞈ ziˇ aˬ joˆ˗ehˇ paˇ laˇ˗euˬ nga lehˇ haw.
“Ngaˇ miˇ tsaˬ˗ahˇ laˆ paˇ˗eu lehˇ maˬ paˇ noeˬ miˬ˗aˇ” (Loꞈ˗eu nymˇgoˇ, 2013 Shiꞈ siˬ ba la 1)
