Dzaw deuˆ 04
Miˬyehˇ aˬ suˇ gʼaˬ nga?
Gaˇ hu ba neh tsawˇ haˬ zaˬ miˬ yehˇ gʼawˬ mya gʼaˬ˗ahˇ uˬ duˬ tahˬ˗eu meh. Ehˇ kʼawꞈ Jaˇliꞈ laꞈ kʼoeˇ “miˬ yehˇ dawˬ tawˆ luꞈ naˆ maˬ tseˇ huiˬ˗eu mahˇ˗eu” Miˬyehˇ tiˬ gʼaˬ˗ahˇ ngehˬ keuˆ taˬ˗euˬ meh. (2 Laˬsaˬbaˬ 2:5) Teu gʼaˬ naˇ aˬ suˇ gʼaˬ nga? Aˬ yawꞈ tsawˇ haˬ deuˬ uˬ duˬ tahˬ luꞈ˗eu miˬ yehˇ dawˬ tawˆ luꞈ naˆ maˬ tseˇ aˬ jeˬ miˇ neh huiˬ dzehˬ mahˇ dzehˬ˗eu nga? Miˬyehˇ aˬ yawꞈ nehˬ˗ehˇ taꞈ leˇ˗awˇ aˬ jeˬ jeˇ ehˇ nehˬ taˬ˗euˬ nga lehˇ heu kawˆ laꞈ kʼoeˇ haw ma.
1. Miˬyehˇ˗euˬ tsawˇ myahˇ aˬ joˆ˗ehˇ kuˇ˗eu nga? Miˬyehˇ aˬ dui˗ahˇ aˬ yawꞈ˗euˬ tsawˇ myahˇ bi siˬ nya mawꞈ˗eu lehˇ aˬ joˆ˗ehˇ siˬ laˇ˗eu nga?
Miˬyehˇ aˬ yawꞈ˗euˬ tsawˇ myahˇ Jaˇliꞈ laꞈ kʼoeˇ ehˇ nehˬ taˬ˗euˬ meh. Aˬ yawꞈ “Ngaˇ˗aˬ Yeˬhawˇbaˬ ma. Heu˗aˬ ngaˬ˗euˬ tsawˇ myahˇ ma” lehˇ ehˇ˗eu meh. (Iˇsaˬyaˇ 42:8, Miˇ shuiꞈ dawˬ paˇ Jaˇliꞈ) “Yeˬhawˇbaˬ” lehˇ ehˇ˗eu tsawˇ myahˇ heu Heˬbyehˇ dawˬ pyeuꞈ˗awˇ, dawˬ tsuiꞈ˗aˬ, “Aˬ yawꞈ bi pyeuꞈ meh” lehˇ ehˇ mawꞈ gaˇ duˇ˗eu meh. Yeˬhawˇbaˬ aˬ dui˗ahˇ aˬ yawꞈ˗euˬ tsawˇ myahˇ bi siˬ nya mawꞈ˗eu meh. (Doˆ˗iˇ˗eu 3:15) Aˬ joˆ˗ehˇ siˬ laˇ nga? Jaˇliꞈ laꞈ kʼoeˇ Miˬyehˇ˗euˬ tsawˇ myahˇ 7,000 poˆ dzehˬ ni ahˇ˗eu meh. a Yeˬhawˇbaˬ lehˇ ehˇ˗eu heu naˇ, “mˬ kʼoeˇ taˆ maˬ ehˇ, miˇ tsaˬ kʼoeˇ taˆ maˬ ehˇ, Miˬyehˇ pyeuꞈ˗eu” gʼaˬ˗euˬ tsawˇ myahˇ meh.—Dawˬmehˬmehˬ˗eu 4:39.
2. Jaˇliꞈ Yeˬhawˇbaˬ nehˬ˗ehˇ taꞈ leˇ˗awˇ aˬ jeˬ jeˇ ehˇ nehˬ taˬ˗euˬ nga?
Tsawˇ haˬ deuˬ uˬ duˬ tahˬ luꞈ˗eu miˬ yehˇ gʼawˬ mya jawˇ kʼawꞈ, Yeˬhawˇbaˬ tiˬ gʼaˬ tehꞈ˗ehˇ maˇ diˇ Miˬyehˇ pyeuꞈ meh lehˇ Jaˇliꞈ ehˇ˗eu meh. Aˬ jeˬ miˇ neh nga? Yeˬhawˇbaˬ huiˬ dui mahˇ dui dui˗awˇ, aˬ yawꞈ tiˬ gʼaˬ tehꞈ˗ehˇ “miˇ tsaˬ dawˬ tawˆ luꞈ kʼoeˇ taˆ huiˬ dzehˬ˗eu uˆ lahˇ˗eu gʼaˬ pyeuꞈ˗eu” miˇ neh meh. (Ja ceuˬ 83:18-ahˇ gui.) Kʼoeˇ naˇ, Miˬyehˇ˗aˬ ‘Baoˬ huiˬ dui dui˗eu’ Miˬyehˇ pyeuꞈ˗awˇ, aˬ yawꞈ kʼaˇ mˇ mawꞈ˗eu jeˬ mˇ nya˗eu baoˬ ahˇ˗eu meh. Aˬ yawꞈ mˬ taˆ maˬ ehˇ, miˇ tsaˬ kʼoeˇ taˆ maˬ ehˇ, kʼaˇ jawˇ kʼaˇ jaˆ˗eu ‘yawˬ jeˬ na luꞈ˗ahˇ beh˗euˬ’ meh. (Pah mehˬ˗eu 4:8, 11) Kʼoeˇ uˬ taꞈ, Yeˬhawˇbaˬ tiˬ gʼaˬ tehꞈ˗ehˇ aˬ myah luꞈ jawˇ laꞈ˗awˇ, mˬ maˬ maˬ byaˆ zaˇ ziˇ jawˇ gʼeh˗eu meh.—Ja ceuˬ 90:2.
Naꞈ suiˇ ni dzaw
Miˬyehˇ˗euˬ aˇ yaˬ hawˇ˗eu aˬ yawꞈ˗euˬ tsawˇ myahˇ aˬ joˆ˗ehˇ beu gaˇ˗eu nga lehˇ haw˗awˇ, Miˬyehˇ aˬ yawꞈ˗euˬ tsawˇ myahˇ aˬ joˆ˗ehˇ ehˇ nehˬ˗awˇ aˬ jeˬ miˇ neh ehˇ nehˬ taˬ˗euˬ nga lehˇ jiˇ haw.
3. Miˬyehˇ aˇ yaˬ yaw myaˬ jaˆ kʼawꞈ tsawˇ myahˇ tiˬ myahˇ tehꞈ˗ehˇ jaˆ
Aˇ yaˬ hawˇ˗eu tsawˇ myahˇ aˬ joˆ˗ehˇ beu gaˇ˗eu nga lehˇ siˬ nya˗eu gʼaˇ duˬ, biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Miˬyehˇ˗euˬ aˇ yaˬ hawˇ˗eu Miˬyehˇ˗euˬ tsawˇ myahˇ aˬ joˆ˗ehˇ beu gaˇ˗eu nga?
Tsawˇ haˬ deuˬ miˬ yehˇ hawˇ˗eu sahˬ paˬ gʼawˬ mya ni˗ahˇ uˬ duˬ tahˬ meh lehˇ Jaˇliꞈ ehˇ˗eu meh. Ja ceuˬ 136:1-3-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
“Miˬ yehˇ dawˬ tawˆ luꞈ kʼoeˇ taˆ huiˬ˗eu Miˬyehˇ” “sahˬ paˬ dawˬ tawˆ luꞈ kʼoeˇ taˆ baoˬ huiˬ˗eu Sahˬpaˬ” aˬ suˇ gʼaˬ nga?
4. Yeˬhawˇbaˬ aˬ dui˗ahˇ aˬ yawꞈ˗euˬ tsawˇ myahˇ bi siˬ nya mawꞈ˗awˇ bi zmˬ mawꞈ
Yeˬhawˇbaˬ aˬ dui˗ahˇ aˬ yawꞈ˗euˬ tsawˇ myahˇ bi siˬ nya mawꞈ˗eu lehˇ aˬ joˆ˗ehˇ siˬ laˇ˗eu nga? Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬhawˇbaˬ aˬ dui˗ahˇ aˬ yawꞈ˗euˬ tsawˇ myahˇ˗ahˇ bi siˬ nya mawꞈ ngaˇ lehˇ noeˬ miˇ˗a loˇ? Aˬ jeˬ miˇ neh toˆ˗ehˇ noeˬ nya?
Yeˬhawˇbaˬ tsawˇ haˬ deuˬ˗ahˇ aˬ yawꞈ˗euˬ tsawˇ myahˇ bi zmˬ mawꞈ˗eu meh. Loˇmaˆ 10:13-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬhawˇbaˬ lehˇ kuˇ˗eu Miˬyehˇ˗euˬ tsawˇ myahˇ˗ahˇ zmˬ˗eu heu naˇ, aˬ jeˬ miˇ neh aˇ yeˇ huiˬ˗eu nga?
-
Tiˬ gʼaˬ paˬ nawˬ˗euˬ tsawˇ myahˇ˗ahˇ noeˬ taˬ˗awˇ kuˇ ngeh, nawˬ˗ahˇ aˬ joˆ˗ehˇ gʼeh laˇ nya?
-
Aˬ dui Miˬyehˇ˗euˬ tsawˇ myahˇ˗ahˇ zmˬ ngeh, aˬ yawꞈ˗ahˇ aˬ joˆ˗ehˇ gʼeh leˇ paˬ nga?
5. Yeˬhawˇbaˬ nawˬ˗ahˇ aˬ yawꞈ nehˬ˗ehˇ bi gʼoeˇ mawꞈ
Soˇtaꞈ lehˇ kuˇ˗eu Kamˬboˬdiˬ˗yaˬ miˇ kʼahˬ˗ahˇ˗euˬ zaˬ miˬ aˬ buˇ tiˬ gʼaˬ, Miˬyehˇ˗euˬ tsawˇ myahˇ˗ahˇ siˬ nya laˇ ngeh, maˬ ehˇ jiˇ coeˇ ni laˬ kʼaˬ cehˇ nya lehˇ ehˇ˗eu meh. Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Biˬdiˬoˬ laꞈ kʼoeˇ˗euˬ Soˇtaꞈ Miˬyehˇ˗euˬ tsawˇ myahˇ˗ahˇ ya siˬ ngeh, aˬ yawꞈ˗ahˇ aˬ joˆ˗ehˇ gʼeh leˇ˗euˬ nga?
Tiˬ gʼaˬ paˬ nehˬ˗ehˇ cawˬ cawˬ nya˗eu gʼaˇ duˬ, aˬ yawꞈ˗euˬ tsawˇ myahˇ˗ahˇ jeˬ hu ya siˬ nya˗eu meh. Yaˬkoˆ 4:8-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬhawˇbaˬ nawˬ˗ahˇ aˬ jeˬ bi jahˇ mawꞈ˗eu nga?
-
Miˬyehˇ˗euˬ tsawˇ myahˇ˗ahˇ siˬ nya˗awˇ, tsawˇ myahˇ heu˗ahˇ zmˬ˗eu heu naˇ, aˬ jeˬ miˇ neh aˬ yawꞈ nehˬ˗ehˇ bi gʼoeˇ dzehˬ leˇ˗eu nga?
Tiˬ gʼaˬ na ehˇ˗eu: “Miˬyehˇ tiˬ gʼaˬ jawˇ˗eu tehꞈ˗a, aˬ jeˬ lehˇ kuˇ kʼawꞈ aˇ yeˇ maˬ huiˬ˗a.”
-
Yeˬhawˇbaˬ lehˇ ehˇ˗eu heu Miˬyehˇ˗euˬ tsawˇ myahˇ pyeuꞈ˗eu lehˇ nawˇ jah ma laˬ?
-
Miˬyehˇ aˬ dui˗ahˇ aˬ yawꞈ˗euˬ tsawˇ myahˇ bi zmˬ mawꞈ˗eu lehˇ aˬ joˆ˗ehˇ siˬ laˇ˗eu nga?
Kawˇ shawˆ
Yeˬhawˇbaˬ lehˇ ehˇ˗eu heu aˬ diˇ aˬ maˇ Miˬyehˇ˗euˬ tsawˇ myahˇ pyeuꞈ˗eu meh. Miˬyehˇ aˬ dui˗ahˇ aˬ yawꞈ˗euˬ tsawˇ myahˇ bi siˬ mawꞈ˗awˇ, bi zmˬ mawꞈ˗eu meh. Heu loꞈ˗ehˇ jahˇ naˇ, aˬ yawꞈ nehˬ˗ehˇ gʼoeˇ dzehˬ leˇ˗eu meh.
Ja sawˇ poˆ˗eu
-
Yeˬhawˇbaˬ tsawˇ haˬ deuˬ uˬ duˬ tahˬ luꞈ˗eu miˬ yehˇ nui deuˬ nehˬ˗ehˇ aˬ joˆ˗ehˇ beu gaˇ˗eu nga?
-
Aˬ dui Miˬyehˇ˗euˬ tsawˇ myahˇ˗ahˇ aˬ jeˬ miˇ neh zmˬ paˬ˗ehˇ gʼeh˗eu nga?
-
Yeˬhawˇbaˬ nawˬ˗ahˇ aˬ yawꞈ nehˬ˗ehˇ bi gʼoeˇ mawꞈ˗eu lehˇ aˬ joˆ˗ehˇ siˬ laˇ˗eu nga?
Haw lahˬ
Miˬyehˇ maˇ diˇ jawˇ˗eu lehˇ bi siˬ laˇ˗eu ngaˬ jeˬ˗ahˇ haw.
“Miˬyehˇ maˇ diˇ jawˇ ngaˇ laˬ?” (Iˇteuꞈnehꞈ laꞈ kʼoeˇ˗euˬ gaˇ kawˆ)
Miˬyehˇ aˬ myah luꞈ jawˇ meh lehˇ aˬ jeˬ miˇ neh jah nya˗eu nga lehˇ ja sawˇ.
“Miˬyehˇ˗ahˇ aˬ suˇ gʼaˬ neh beh˗euˬ nga?” (Loꞈ˗eu nymˇgoˇ, 2014 Yehꞈ siˬ ba la 1)
Gaˇ hu Miˬyehˇ˗euˬ tsawˇ myahˇ kawˬ sheu teˇ saˇ aˬ joˆ˗ehˇ zmˬ yaꞈ˗euˬ lehˇ maˬ siˬ nya kʼawꞈ, aˬ jeˬ miˇ neh Miˬyehˇ˗euˬ tsawˇ myahˇ˗ahˇ zmˬ paˬ˗ehˇ gʼeh˗eu nga?
“Yeˬhawˇbaˬ aˬ suˇ gʼaˬ nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)
Miˬyehˇ˗ahˇ aˬ jeˬ lehˇ kuˇ kʼawꞈ geuꞈ nya ngaˇ laˬ? Aˬ yawꞈ˗euˬ tsawˇ myahˇ tiˬ myahˇ tehꞈ˗ehˇ jaˆ meh lehˇ aˬ jeˬ miˇ neh ehˇ nya nga lehˇ haw.
“Miˬyehˇ˗euˬ tsawˇ myahˇ aˇ myaˆ myahˇ jaˆ˗eu nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)
a Miˬyehˇ˗euˬ tsawˇ myahˇ˗euˬ dawˬ tsuiꞈ gaˇ kawˆ hawˇ˗eu Jaˇliꞈ yaw myaˬ dmˬ˗ahˇ neh Miˬyehˇ˗euˬ tsawˇ myahˇ siˆ byoˆ˗euˬ gaˇ kawˆ˗ahˇ heu naˆ maˬ tseˇ siˬ nya mawꞈ naˇ, Miˇ shuiꞈ dawˬ paˇ Jaˇliꞈ laꞈ kʼoeˇ˗euˬ Dzaw lahˬ A4˗ahˇ haw.
