Jaˇliꞈ˗aˬ Yeˬhawˇbaˬ neh aˬ dui˗ahˇ biꞈ˗euˬ muiˬ dui dui˗eu laꞈ sawˬ pyeuꞈ meh. Teu laꞈ kʼoeˇ paˇ dmˬ dmˬ zaˬ 66 dmˬ ahˇ˗eu meh. Ehˇ kʼawꞈ nawˇ ‘Jaˇliꞈ aˬ gaˇ neh oe˗euˬ nga? Teu laꞈ kʼoeˇ˗euˬ dawˬ aˬ suˇ gʼaˬ˗euˬ nui noeˬ nga?’ lehˇ siˬ nya mawꞈ paˬ. Gaˇ kawˆ heu˗ahˇ siˬ nya˗eu gʼaˇ duˬ, Jaˇliꞈ laꞈ kʼoeˇ aˬ joˆ˗ehˇ ehˇ taˬ˗euˬ nga lehˇ haw ma.

1. Jaˇliꞈ˗ahˇ tsawˇ haˬ neh boꞈ˗euˬ gaˇ neh, Miˬyehˇ˗euˬ nui noeˬ pyeuꞈ˗eu lehˇ aˬ jeˬ miˇ ehˇ nya nga?

Jaˇliꞈ˗ahˇ tsawˇ haˬ 40 gʼaˬ ehˇ gʼaˬ ni boꞈ˗euˬ meh. B.C. 1513-ahˇ neh A.D. 98 heu kaˬ˗ahˇ boꞈ˗awˇ, aˇ yamˬ 1,600 kʼoꞈ ehˇ gʼaˬ ni ga leˇ˗euˬ meh. Jaˇliꞈ boꞈ˗euˬ tsawˇ haˬ deuˬ yaw myaˬ jeˬ beu gaˇ kʼawꞈ, aˬ yawꞈ maꞈ neh boꞈ˗euˬ jeˬ tiˬ gaˇ tsaˬ leˇ jiˇ˗eu meh. Aˬ joˆ˗ehˇ pyeuꞈ leˇ nya˗eu nga? Jaˇliꞈ˗aˬ Miˬyehˇ˗euˬ dawˬ pyeuꞈ˗eu miˇ neh meh. (1 Teˇsaˬloˇni 2:13-ahˇ gui.) Jaˇliꞈ boꞈ˗euˬ deuˬ yawˬ ha˗euˬ nui noeˬ boꞈ˗euˬ maˬ ngeuˇ˗a, ‘aˬ yawꞈ maꞈ˗ahˇ muiˬ˗eu shawˇ˗eu yaw sahˇ uˆ lahˇ˗awˇ bi ngehˬ˗euˬ meh.’ a (2 Beˬtuˆluˆ 1:21) Miˬyehˇ aˬ yawꞈ˗euˬ muiˬ˗eu shawˇ˗eu yaw sahˇ˗ahˇ zmˬ˗awˇ, tsawˇ haˬ deuˬ˗ahˇ bi noeˬ doˆ leˇ˗awˇ aˬ yawꞈ˗euˬ nui noeˬ bi boꞈ˗euˬ meh.—2 Tiˆmoˇseˬ 3:16.

2. Aˬ suˇ suˇ gʼaˬ Jaˇliꞈ˗ahˇ neh gaˇ dahˇ tsoeˬ˗eu jeˬ za nya nga?

“Miˇ kʼahˬ tsawˇ jeuˬ tsawˇ ca dawˬ tawˆ luꞈ” Jaˇliꞈ laꞈ kʼoeˇ˗euˬ laˬ kʼaˬ cehˇ˗eu guiˬ lahˬ dawˬ˗ahˇ neh gaˇ dahˇ tsoeˬ˗eu jeˬ za nya meh. (Pah mehˬ˗eu 14:6-ahˇ gui.) Jaˇliꞈ˗aˬ gaˇ hu ba neh paˇ dmˬ nui deuˬ naˆ maˬ tseˇ tsawˇ jeuˬ gʼawˬ mya jeuˬ˗euˬ dawˬ neh yuˇ doˆ taˬ˗euˬ meh. Yawˬ gʼaˬ na luꞈ ehˇ gʼaˬ ni Jaˇliꞈ za nya˗awˇ, aˬ gaˇ jawˇ kʼawꞈ, aˬ jeˬ˗euˬ dawˬ ngehˬ kʼawꞈ, Jaˇliꞈ˗ahˇ neh gaˇ dahˇ tsoeˬ˗eu jeˬ za nya meh.

3. Yeˬhawˇbaˬ Jaˇliꞈ˗ahˇ aˬ joˆ˗ehˇ haw piˇ˗euˬ nga?

Gaˇ hu Jaˇliꞈ˗ahˇ boꞈ ngeh, peuˬ˗iˇ cawˆ˗iˇ nya˗eu jeˬ kʼoeˇ taˆ boꞈ taˬ˗euˬ meh. Ehˇ kʼawꞈ Jaˇliꞈ˗ahˇ gaˬ˗eu deuˬ Jaˇliꞈ˗ahˇ yaw muiˬ˗ehˇ haw haw˗ehˇ aˬ laꞈ neh paˇ boꞈ poˆ˗euˬ meh. Baoˬ jaˆ˗eu deuˬ Jaˇliꞈ˗ahˇ laˆ byoˆ˗eu lehˇ leh jeh kʼawꞈ, shiˇ gaˇ maˬ guˆ ni Jaˇliꞈ˗ahˇ haw piˇ˗eu deuˬ jiˇ jawˇ˗eu meh. Yeˬhawˇbaˬ aˬ yawꞈ aˬ dui˗ahˇ ehˇ nehˬ mawꞈ˗eu jeˬ˗ahˇ tiˬ jeˬ neh˗iˬ, tiˬ gʼaˬ neh˗iˬ maˬ bi laˆ tsoeˬ˗a. “Miˬyehˇ˗euˬ dawˬ mˬ maˬ maˬ byaˆ zaˇ ziˇ gmˬ meh” lehˇ Jaˇliꞈ ehˇ˗eu meh.—Iˇsaˬyaˇ 40:8.

 Naꞈ suiˇ ni dzaw

5. Jaˇliꞈ˗ahˇ laˆ byoˆ nya˗eu tiˬ gʼaˬ˗iˬ maˬ jawˇ˗a

 6. Yawˬ gʼaˬ na luꞈ˗euˬ paˇ dmˬ

Jaˇliꞈ˗aˬ aˇ hu ba neh paˇ dmˬ nui deuˬ naˆ maˬ tseˇ dawˬ yuˇ paˇ˗awˇ, biˇ kʼawˬ˗eu paˇ dmˬ pyeuꞈ meh. Gʼaˬkʼehˇ 10:34, 35-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Miˬyehˇ aˬ jeˬ miˇ neh Jaˇliꞈ˗ahˇ paˇ dmˬ nui deuˬ naˆ maˬ tseˇ, dawˬ bi yuˇ paˇ mawꞈ˗awˇ bi biˇ kʼawˬ mawꞈ˗eu nga?

• Jaˇliꞈ nehˬ˗ehˇ taꞈ leˇ˗awˇ nawˬ˗ahˇ aˬ geu tsahˇ˗ahˇ ya leˇ nya?

 Kawˆ shawˆ

Jaˇliꞈ˗aˬ Miˬyehˇ˗euˬ dawˬ pyeuꞈ˗awˇ, tsawˇ haˬ yawˬ gʼaˬ na luꞈ jaˆ nya ni Miˬyehˇ lehˬ hmˬ nehˬ taˬ˗euˬ meh.

Ja sawˇ poˆ˗eu

• Miˬyehˇ tsawˇ haˬ deuˬ˗ahˇ bi noeˬ doˆ leˇ˗awˇ, Jaˇliꞈ bi boꞈ˗euˬ lehˇ ehˇ˗eu heu naˇ aˬ jeˬ˗ahˇ ehˇ mawꞈ˗eu nga?

• Jaˇliꞈ maˬ bi byoˆ˗iˇ ni haw piˇ laꞈ˗euˬ gaˇ kawˆ˗ahˇ maˬ ehˇ, gʼawˬ mya jeˬ˗euˬ dawˬ yuˇ paˇ˗awˇ biˇ kʼawˬ˗euˬ gaˇ kawˆ˗ahˇ maˬ ehˇ, nawˬ˗ahˇ aˬ geu jeˬ˗ahˇ ya leˇ nya?

• Miˬyehˇ nawˬ nehˬ˗ehˇ ngehˬ cawˬ˗eu gʼaˇ duˬ, gʼawˬ mya jeˬ leh jeh˗euˬ lehˇ ya siˬ˗eu heu naˇ, nawˬ˗ahˇ aˬ joˆ˗ehˇ gʼeh laˇ nya?