Dzaw deuˆ 06
Dehꞈ˗eu jeˬ aˇ dahˬ aˬ joˆ˗ehˇ beh˗euˬ nga?
‘Yawˬ jeˬ na luꞈ Miˬyehˇ neh beh˗euˬ’ meh. (Pah mehˬ˗eu 4:11) Nawˇ teu loꞈ˗ehˇ jah ma loˇ? Tiˬ deuˬ na Beh˗euˬ yaw sahˇ maˬ jawˇ ni dehꞈ˗eu jeˬ aˬ yawˇ yawꞈ pyeuꞈ doˆ laˇ ngaˬ lehˇ noeˬ˗eu meh. Toˆ˗ehˇ ngeuˇ naˇ, aˬ dui maˬ yehˆ maˇ yehꞈ˗ehˇ pyeuꞈ doˆ laˇ˗aˬ lehˇ ehˇ luꞈ gaˇ duˇ˗eu meh. Ehˇ kʼawꞈ Yeˬhawˇbaˬ Miˬyehˇ dehꞈ˗eu jeˬ˗ahˇ beh˗euˬ naˇ jiˇ, aˬ yawꞈ tiˬ jeˬ paˬ noeˬ taˬ˗awˇ beh˗euˬ meh. a Dehꞈ˗eu jeˬ dahˬ beh laˇ˗euˬ gaˇ kawˆ˗ahˇ Jaˇliꞈ aˬ joˆ˗ehˇ ehˇ taˬ˗euˬ nga, aˬ dui teu˗ahˇ aˬ jeˬ miˇ jah nya˗eu nga lehˇ haw.
1. Boeˬ boeˬ luˆ luˆ aˇ dahˬ aˬ joˆ˗ehˇ beh˗euˬ nga?
“Aˇ dahˬ beh ngeh, mˬ hawˇ˗eu miˇ˗ahˇ Miˬyehˇ beh˗euˬ meh” lehˇ Jaˇliꞈ laꞈ kʼoeˇ ehˇ taˬ˗euˬ meh. (Aˇdahˬbeh˗eu 1:1) Zaˬ siˬ nui gahˇ ahˇ˗eu deuˬ myaˬ tiˬ paˆ, boeˬ boeˬ luˆ luˆ aˇ dahˬ beh˗euˬ baw ngaˇ lehˇ nui ma tsaˬ˗eu meh. Miˬyehˇ aˬ joˆ˗ehˇ beh˗euˬ nga? Miˬyehˇ ‘aˬ yaw˗euˬ baoˬ’ pyeuꞈ˗eu muiˬ˗eu shawˇ˗eu yaw sahˇ˗ahˇ zmˬ˗awˇ yawˬ jeˬ na luꞈ˗ahˇ beh˗euˬ meh. Teu naˇ miˇ tsaˬ tahˬ kʼawˇ, nahˇ ma ba la aˬ guiˇ hawˇ˗eu nui jeˬ˗ahˇ jiˇ ehˇ mawꞈ˗eu meh.—Aˇdahˬbeh˗eu 1:2.
2. Miˬyehˇ aˬ jeˬ miˇ neh miˇ tsaˬ heu siˬ˗ahˇ beh˗euˬ nga?
Yeˬhawˇbaˬ “miˇ tsaˬ˗ahˇ yawꞈ ngehꞈ˗ehˇ beh taˬ˗euˬ maˬ ngeuˇ˗ehˇ, tsawˇ haˬ bi jawˇ˗eu gʼaˇ duˬ beh˗euˬ meh.” (Iˇsaˬyaˇ 45:18) Miˬyehˇ miˇ tsaˬ heu siˬ˗ahˇ zawˇ˗ehˇ beh muiˬ taˬ˗awˇ, aˬ dui mˬ maˬ maˬ byaˆ zaˇ ziˇ dehꞈ nya ni kʼaˇ loˬ˗eu yawˬ jeˬ na luꞈ beh nehˬ taˬ˗euˬ meh. (Iˇsaˬyaˇ 40:28; 42:5-ahˇ gui.) Miˇ tsaˬ heu siˬ˗aˬ zahˬ leˇ paˬ˗ehˇ gʼeh˗awˇ, tsawˇ haˬ zaˬ yaw dehꞈ dehꞈ nya˗eu jawˇ duˬ˗aˬ, heu gaˇ jaˆ˗eu tehꞈ ngaˇ lehˇ zaˬ siˬ nui gahˇ ahˇ˗eu deuˬ ehˇ˗eu meh.
3. Tsawˇ haˬ jeˬ zaˬ nehˬ˗ehˇ aˬ joˆ˗ehˇ beu gaˇ˗eu nga?
Yeˬhawˇbaˬ miˇ tsaˬ tahˬ kʼawˇ beh gʼaˬ naˇ, kʼaˇ dehꞈ kʼaˇ jawˇ˗eu yawˬ jeˬ na luꞈ˗ahˇ beh˗euˬ meh. Aˬ yawꞈ sahˬ lahˬ aˇ bawˇ hawˇ˗eu jeˬ zaˬ deuˬ˗ahˇ beh gʼaˬ naˇ, ‘tsawˇ haˬ zaˬ˗ahˇ aˬ yawꞈ˗ahˇ duˇ ni beh˗euˬ meh.’ (Aˇdahˬbeh˗eu 1:27-ahˇ gui.) Tsawˇ haˬ zaˬ jeˬ zaˬ nehˬ˗ehˇ aˬ joˆ˗ehˇ beu gaˇ˗eu nga? Miˬyehˇ aˬ dui˗ahˇ aˬ yawꞈ˗ahˇ duˇ ni beh taˬ˗euˬ miˇ neh, aˬ dui jiˇ Miˬyehˇ loꞈ˗ehˇ nui gaˬ hawˇ˗eu yaw tsaˬ yaw dawˇ jeˬ ahˇ˗eu meh. Miˬyehˇ aˬ dui˗ahˇ dawˬ yaw shuiꞈ dzaw nya ni maˬ ehˇ, aˇ bawˇ aˇ yehˆ hawˇ˗eu dawˬ caˇ˗ahˇ laˬ kʼaˬ cehˇ nya ni maˬ ehˇ, beh nehˬ taˬ˗euˬ meh. Aˬ dui jeˬ zaˬ˗ahˇ maˬ duˇ˗a, aˬ dui Beh˗euˬ yaw sahˇ˗ahˇ uˬ duˬ tahˬ nya meh.
Naꞈ suiˇ ni dzaw
Dehꞈ ziˇ˗ahˇ Beh˗euˬ yaw sahˇ jawˇ˗awˇ, beh˗euˬ gaˇ kawˆ nehˬ˗ehˇ taꞈ leˇ˗awˇ Jaˇliꞈ mehˬ˗eu jeˬ˗ahˇ jah nya˗eu lehˇ bi siˬ laˇ jeˬ˗ahˇ haw. Kʼoeˇ naˇ tsawˇ haˬ zaˬ˗euˬ seuˆ dzeuꞈ aˇ gʼehˇ deuˬ, Miˬyehˇ nehˬ˗ehˇ taꞈ leˇ˗awˇ aˬ jeˬ bi siˬ laꞈ˗eu nga lehˇ jiˇ haw.
4. Dehꞈ˗eu jeˬ˗ahˇ Beh˗euˬ yaw sahˇ jawˇ
Tsawˇ haˬ zaˬ beh taˬ˗euˬ jeˬ˗ahˇ dzaw geuꞈ˗awˇ myawˬ gahˬ hawˇ˗eu caˆ keu ka deuˬ jahˇ doˆ laꞈ ngeh, ciˬ huiˬ ciˬ mahˇ˗eu jeˬ˗ahˇ za˗eu meh. Toˆ˗ehˇ naˇ, dehꞈ˗eu jeˬ˗ahˇ beh˗euˬ aˬ suˇ gʼaˬ˗ahˇ ciˬ huiˬ ciˬ mahˇ paˬ nga? Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Tsawˇ haˬ deuˬ beh taˬ˗euˬ jeˬ˗ahˇ haw˗awˇ aˬ jeˬ jeˇ jahˇ doˆ laꞈ˗euˬ nga?
Nymˇ yawˬ nymˇ na luꞈ˗ahˇ tiˬ gʼaˬ paˬ neh tsoˆ˗euˬ yaw duˬ baw meh. Toˆ˗ehˇ naˇ, kʼaˇ dehꞈ kʼaˇ jawˇ˗eu yawˬ jeˬ na luꞈ˗ahˇ aˬ suˇ gʼaˬ neh beh˗euˬ nga? Heˬbyehˇ 3:4-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Beh taˬ˗euˬ jeˬ laꞈ kʼoeˇ neh nawˬ˗ahˇ aˬ geu jeˬ˗ahˇ zahˬ leˇ nya?
-
Boeˬ boeˬ luˆ luˆ hawˇ˗eu kʼaˇ dehꞈ kʼaˇ jawˇ˗eu yawˬ jeˬ na luꞈ˗ahˇ beh˗euˬ lehˇ nawˬ˗ahˇ jah miˇ˗a laˬ? Aˬ jeˬ miˇ neh?
Nawˇ siˬ nya ma loˇ?
Gaˇ kawˆ heu hawˇ˗eu biˬdiˬoˬ deuˬ, jw.org gʼoeˇsaiˇ laꞈ kʼoeˇ “Beh˗euˬ nga loˇ?” lehˇ ehˇ˗eu uˬ dzah hawˇ˗eu “Dehꞈ ziˇ pyeuꞈ doˆ laˇ duˬ” lehˇ ehˇ˗eu uˬ dzah˗ahˇ haw nya meh.
“Nymˇ yawˬ nymˇ na luꞈ tsoˆ˗euˬ yaw sahˇ baw˗eu meh. Yawˬ jeˬ na luꞈ˗ahˇ tsoˆ˗euˬ gʼaˬ˗aˬ, Miˬyehˇ meh.”
5. Beh˗euˬ gaˇ kawˆ nehˬ˗ehˇ taꞈ leˇ˗awˇ Jaˇliꞈ mehˬ˗eu jeˬ˗ahˇ aˬ dui jah nya
Aˇdahˬbeh˗eu sahˬ boꞈ yaw huiˬ 1-ahˇ miˇ tsaˬ hawˇ˗eu miˇ tsaˬ kʼoeˇ taˆ kʼaˇ dehꞈ kʼaˇ jawˇ˗eu yawˬ jeˬ na luꞈ˗ahˇ beh˗euˬ gaˇ kawˆ˗ahˇ ngehˬ keuˆ taˬ˗euˬ meh. Gaˇ kawˆ teu˗ahˇ aˬ dui jah nya ngaˇ loˇ? Teu aˬ poeˬ dawˬ oeˇ tehꞈ nga laˬ? Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Tiˬ nah naˬ liˬ 24 laꞈ ga leˇ˗eu koꞈ nah aˇ yamˬ laꞈ kʼoeˇ, miˇ tsaˬ hawˇ˗eu miˇ tsaˬ kʼoeˇ taˆ kʼaˇ dehꞈ kʼaˇ jawˇ˗eu yawˬ jeˬ na luꞈ˗ahˇ beh˗euˬ lehˇ Jaˇliꞈ mehˬ ngaˇ laˬ?
-
Beh˗euˬ gaˇ kawˆ nehˬ˗ehˇ taꞈ leˇ˗awˇ Jaˇliꞈ mehˬ˗eu jeˬ gaˇ kʼahˇ dahˇ˗awˇ jah coeˇ paˬ˗ehˇ gʼeh ngaˇ laˬ? Aˬ jeˬ miˇ neh toˆ˗ehˇ noeˬ nya?
Aˇdahˬbeh˗eu 1:1-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Miˇ tsaˬ˗euˬ nui gahˇ ahˇ˗eu deuˬ boeˬ boeˬ luˆ luˆ aˇ dahˬ beh˗euˬ baw meh lehˇ ehˇ˗eu meh. Aˬ yawꞈ maꞈ ehˇ˗eu jeˬ nymˬ˗mˇ hawˇ˗eu gui gʼaˬ˗euˬ Jaˇliꞈ aˇ deuˆ nehˬ˗ehˇ tsaˬ leˇ ngaˇ laˬ?
Miˬyehˇ dehꞈ˗eu jeˬ˗ahˇ beh˗eu gʼaˇ duˬ, tiˬ jeˬ˗ahˇ neh tiˬ jeˬ bi pyeuꞈ laˇ˗euˬ meh lehˇ tiˬ deuˬ na noeˬ˗eu meh. Aˇdahˬbeh˗eu 1:21, 25, 27-ahˇ gui gʼaˬ naˇ, naˇ haˬ˗eu jeˬ heu ahˇ ja sawˇ.
-
Miˬyehˇ yaw awˬ awˬ lehˇ gʼeh˗eu dehꞈ˗eu jeˬ tiˬ jeˬ˗ahˇ beh˗awˇ tsawˇ haˬ hawˇ˗eu jeˬ zaˬ bi pyeuꞈ laˇ˗euˬ lehˇ Jaˇliꞈ mehˬ ngaˇ laˬ? Maˬ ngeuˇ naˇ, yaw beh ngeh neh dehꞈ˗eu jeˬ aˬ yawꞈ jeˬ yawꞈ˗ahˇ beh˗euˬ nga loˇ?
6. Tsawˇ haˬ zaˬ Miˬyehˇ neh beh˗euˬ nui jeˬ nehˬ˗ehˇ maˬ duˇ leˇ
Aˬ dui Yeˬhawˇbaˬ neh beh˗euˬ jeˬ zaˬ˗ahˇ maˬ duˇ˗a. Aˇdahˬbeh˗eu 1:26-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Miˬyehˇ˗ahˇ duˇ ni beh taˬ˗euˬ tsawˇ haˬ zaˬ, aˬ cawˬ˗ahˇ gʼoeˇ nya gaˬ nya gaˇ haw ngeh, Miˬyehˇ nehˬ˗ehˇ taꞈ leˇ˗awˇ aˬ jeˬ bi siˬ laꞈ˗eu nga?
Tiˬ gʼaˬ na ehˇ˗eu: “Beh˗euˬ gaˇ kawˆ nehˬ˗ehˇ taꞈ leˇ˗awˇ Jaˇliꞈ mehˬ˗eu jeˬ˗aˬ, aˬ poeˬ dawˬ oeˇ tehꞈ˗aˬ.”
-
Nawˇ tawˇ neh aˬ joˆ˗ehˇ noeˬ nya? Aˬ jeˬ miˇ neh?
Kawˆ shawˆ
Yeˬhawˇbaˬ boeˬ boeˬ luˆ luˆ hawˇ˗eu kʼaˇ dehꞈ kʼaˇ jawˇ˗eu yawˬ jeˬ na luꞈ˗ahˇ beh˗euˬ meh.
Ja sawˇ poˆ˗eu
-
Boeˬ boeˬ luˆ luˆ aˇ dahˬ beh˗euˬ gaˇ kawˆ nehˬ˗ehˇ taꞈ leˇ˗awˇ, Jaˇliꞈ˗ahˇ aˬ jeˬ lehˇ ehˇ taˬ˗euˬ nga?
-
Miˬyehˇ yaw awˬ awˬ lehˇ gʼeh˗eu dehꞈ˗eu jeˬ tiˬ jeˬ˗ahˇ beh˗awˇ, tiˬ jeˬ˗ahˇ neh tiˬ jeˬ bi pyeuꞈ laˇ˗euˬ nga laˬ, maˬ ngeuˇ naˇ yaw beh ngeh neh aˬ yawꞈ jeˬ yawꞈ˗ahˇ beh˗euˬ nga loˇ?
-
Tsawˇ haˬ zaˬ dehꞈ˗eu jeˬ nui deuˬ nehˬ˗ehˇ aˬ joˆ˗ehˇ beu gaˇ˗eu nga?
Haw lahˬ
Beh˗euˬ yaw sahˇ jawˇ˗eu lehˇ bi siˬ laꞈ˗eu, aˬ dui tiˬ jawˬ jaˆ˗eu jeˬ˗ahˇ haw.
“Aˬ dui tiˬ jawˬ jaˆ˗eu jeˬ aˬ dui˗ahˇ aˬ jeˬ mehˬ˗eu nga?” (Noeˬlaˇ˗awˬ!, 2006 Gʼoeˬ siˬ ba la)
Aˬ da tiˬ gʼaˬ beh˗euˬ gaˇ kawˆ aˬ yawꞈ˗euˬ aˬ li˗ahˇ aˬ joˆ˗ehˇ mehˬ nehˬ˗eu nga lehˇ haw.
Tiˬ jeˬ˗ahˇ neh tiˬ jeˬ pyeuꞈ laˇ˗euˬ lehˇ mehˬ˗eu jeˬ heu, Jaˇliꞈ mehˬ˗eu jeˬ nehˬ˗ehˇ tsaˬ leˇ ngaˇ laˬ lehˇ haw.
Dehꞈ˗eu jeˬ˗ahˇ beh˗euˬ nga laˬ, maˬ ngeuˇ naˇ, maˬ yehˆ maˇ yehꞈ˗ehˇ pyeuꞈ laˇ˗euˬ nga loˇ? Aˇ hu ba neh koˆ leˇ gʼahˇ leˇ peuˬ˗iˇ taˬ˗euˬ jeˬ, hawˇ˗eu miˇ tsaˬ˗euˬ nui gahˇ ahˇ˗eu deuˬ neh poˆ mawˇ˗euˬ jeˬ, aˬ dui˗ahˇ aˬ jeˬ bi siˬ laꞈ˗eu nga lehˇ haw.
Dehꞈ ziˇ dahˬ beh duˬ—Shaˇ noeˬ paˬ˗ehˇ gʼeh˗eu ngaˬ kawˆ (Paˇ dmˬ)
a Dzaw deuˆ 25˗ahˇ Miˬyehˇ tsawˇ haˬ zaˬ˗ahˇ beh˗euˬ heu naˇ, aˬ jeˬ˗euˬ gʼaˇ duˬ nga lehˇ ja sawˇ taˬ˗euˬ meh.
