Dzaw deuˆ 07
Yeˬhawˇbaˬ aˬ joˆ˗ehˇ gʼeh˗eu Miˬyehˇ nga?
Nawˬ˗ahˇ Yeˬhawˇbaˬ aˬ joˆ˗ehˇ gʼeh˗eu Miˬyehˇ nga lehˇ noeˬ nya? Aˬ yawꞈ huiˬ dui mahˇ dui dui˗eu miˇ neh, aˬ yawꞈ nehˬ˗ehˇ gʼoeˇ˗eu heu naˇ maˬ pyeuꞈ leˇ nya˗a lehˇ noeˬ miˇ˗a laˬ? Maˬ ngeuˇ naˇ Miˬyehˇ˗aˬ baoˬ huiˬ dui dui meh, ehˇ kʼawꞈ tsawˇ haˬ zaˬ˗ahˇ maˬ haw cawˬ˗a lehˇ noeˬ nya loˇ? Maˇ diˇ naˇ Yeˬhawˇbaˬ aˬ joˆ˗ehˇ gʼeh˗eu Miˬyehˇ nga? Jaˇliꞈ laꞈ kʼoeˇ Yeˬhawˇbaˬ˗euˬ seuˆ dzeuꞈ aˇ gʼehˇ deuˬ ehˇ nehˬ taˬ˗awˇ, aˬ yawꞈ aˬ dui˗ahˇ kʼahˬ lahˇ˗eu lehˇ jiˇ ehˇ nehˬ taˬ˗euˬ meh.
1. Aˬ dui Miˬyehˇ˗ahˇ aˬ jeˬ miˇ neh maˬ mawˇ nya˗eu nga?
“Miˬyehˇ˗aˬ, yaw sahˇ meh.” (Yoˇhaˬ 4:24) Miˬyehˇ˗euˬ gʼawˇ mawˇ aˬ dui tsawˇ haˬ zaˬ loꞈ˗ehˇ shiˬ shaˬ jiˇ gʼawˇ mawˇ maˬ ngeuˇ˗a. Aˬ yawꞈ˗aˬ, yaw sahˇ pyeuꞈ˗awˇ aˬ dui maˬ mawˇ nya˗eu mˬ kʼoeˇ taˆ jawˇ˗eu meh.
2. Yeˬhawˇbaˬ aˬ joˆ˗ehˇ gʼeh˗eu Miˬyehˇ nga?
Aˬ dui Yeˬhawˇbaˬ˗ahˇ maˬ mawˇ nya kʼawꞈ, aˬ yawꞈ maˇ diˇ jawˇ˗awˇ, aˬ yawꞈ˗ahˇ yaw muiˬ˗ehˇ siˬ nya laˇ ngeh, aˬ yawꞈ˗ahˇ gaˬ nya laˇ˗eu meh. ‘Yaw tsaˬ yaw dawˇ jeˬ keuˆ le ni, Yeˬhawˇbaˬ gaˬ˗eu miˇ neh, muiˬ˗eu shawˇ˗eu tsawˇ haˬ deuˬ˗ahˇ, aˬ yawꞈ byehˇ dzeh˗eu maˬ baw˗a’ lehˇ Jaˇliꞈ ehˇ˗eu meh. (Ja ceuˬ 37:28) Aˬ yawꞈ “gʼawˬ shaˬ gaˬ˗eu jeˬ tiˬ byah ni ahˇ”˗awˇ, shaˬ zahˬ˗ahˇ ya puˬ luꞈ˗eu deuˬ˗ahˇ ngehˬ˗ehˇ dzehˬ yaw kʼaˆ˗ehˇ ngehˬ gʼeh˗eu meh. (Yaˬkoˆ 5:11) ‘Nui ma tsawˬ paˆ˗euˬ deuˬ dawˬ peh, Yeˬhawˇbaˬ jawˇ luꞈ˗eu meh. Nui ma cawˆ˗eu tsawˇ haˬ deuˬ˗ahˇ, aˬ yawꞈ ka kʼoꞈ doˆ nehˬ˗eu meh.’ (Ja ceuˬ 34:18) Aˬ dui neh mˇ˗euˬ jeˬ Miˬyehˇ˗euˬ nui ma˗ahˇ tiˬ jeˬ na bi gʼeh leˇ˗eu lehˇ nawˇ siˬ nya ma loˇ? Aˬ dui maˬ muiˬ˗eu jeˬ mˇ naˇ, aˬ yawꞈ nui ma cawˆ meh. (Ja ceuˬ 78:40, 41) Ehˇ kʼawꞈ yaw muiˬ jeˬ mˇ naˇ, aˬ yawꞈ laˬ kʼaˬ cehˇ meh.—Dawˬdaˬ 27:11-ahˇ gui.
3. Yeˬhawˇbaˬ aˬ dui˗ahˇ gaˬ˗eu lehˇ aˬ joˆ˗ehˇ siˬ laˇ˗eu nga?
Yeˬhawˇbaˬ˗euˬ seuˆ dzeuꞈ aˇ gʼehˇ dawˬ pehˬ hmˬ naˇ, nui gaˬ meh. “Miˬyehˇ˗aˬ, gʼoeˇ˗eu gaˬ˗eu jeˬ pyeuꞈ meh.” (1 Yoˇhaˬ 4:8) Yeˬhawˇbaˬ˗euˬ nui gaˬ Jaˇliꞈ˗ahˇ neh mawˇ laˇ˗awˇ, beh taˬ˗euˬ jeˬ˗ahˇ neh jiˇ mawˇ laˇ˗eu meh. (Gʼaˬkʼehˇ 14:17-ahˇ gui.) Aˬ yawꞈ aˬ dui˗ahˇ aˬ joˆ˗ehˇ beh taˬ˗euˬ nga lehˇ shaˇ noeˬ haw sheˇ. Yeˬhawˇbaˬ aˬ dui˗ahˇ laˬ kʼaˬ tiˬ cehˇ bi dehꞈ mawꞈ˗eu miˇ neh, yaw pyuˇ yaw neˇ lawˬ muˇ mawˇ nya ni maˬ ehˇ, dawˬ caˇ naˇ haˬ byawˬ nya˗awˇ dzaˇ kuiˇ dzaˇ mehˇ tseˇ paˆ nya ni maˬ ehˇ, beh nehˬ taˬ˗euˬ meh.
Naꞈ suiˇ ni dzaw
Yeˬhawˇbaˬ zahˬ leˇ paˬ˗ehˇ gʼeh˗eu jeˬ mˇ˗eu gʼaˇ duˬ, aˬ jeˬ˗ahˇ zmˬ˗eu nga lehˇ haw˗awˇ, aˬ yawꞈ˗euˬ muiˬ dui dui˗eu seuˆ dzeuꞈ aˇ gʼehˇ deuˬ aˬ joˆ˗ehˇ mˇ doˆ laꞈ˗euˬ nga lehˇ jiˇ haw.
4. Muiˬ˗eu shawˇ˗eu yaw sahˇ heu naˇ, Miˬyehˇ˗euˬ baoˬ pyeuꞈ
Aˬ dui aˬ laꞈ neh gaˇ mˇ˗eu loꞈ˗ehˇ, Yeˬhawˇbaˬ jiˇ aˬ yawꞈ˗euˬ muiˬ˗eu shawˇ˗eu yaw sahˇ neh mˇ˗eu meh. Muiˬ˗eu shawˇ˗eu yaw sahˇ naˇ, miˬ yehˇ tiˬ gʼaˬ maˬ ngeuˇ˗a. Tiˬ jeˬ na˗ahˇ mˇ˗eu gʼaˇ duˬ, Miˬyehˇ zmˬ˗eu baoˬ pyeuꞈ meh lehˇ Jaˇliꞈ ehˇ˗eu meh. Luˇkaꞈ 11:13 hawˇ˗eu Gʼaˬkʼehˇ 2:17-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Miˬyehˇ muiˬ˗eu shawˇ˗eu yaw sahˇ kʼaˇ shaˇ˗eu deuˬ˗ahˇ “shehˆ daˆ nehˬ” ma lehˇ ehˇ taˬ˗euˬ meh. Toˆ˗ehˇ naˇ muiˬ˗eu shawˇ˗eu yaw sahˇ, miˬ yehˇ tiˬ gʼaˬ pyeuꞈ nga laˬ, maˬ ngeuˇ naˇ Miˬyehˇ˗euˬ baoˬ pyeuꞈ nga laˬ, nawˬ˗ahˇ aˬ joˆ˗ehˇ noeˬ nya? Aˬ jeˬ miˇ neh?
Yeˬhawˇbaˬ aˬ yawꞈ˗euˬ muiˬ˗eu shawˇ˗eu yaw sahˇ˗ahˇ zmˬ˗awˇ zahˬ leˇ paˬ˗ehˇ gʼeh˗eu gʼawˬ mya jeˬ mˇ˗euˬ meh. Ja ceuˬ 33:6 a hawˇ˗eu 2 Beˬtuˆluˆ 1:20, 21-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬhawˇbaˬ muiˬ˗eu shawˇ˗eu yaw sahˇ˗ahˇ zmˬ˗awˇ aˬ jeˬ jeˇ mˇ˗euˬ nga?
5. Yeˬhawˇbaˬ˗euˬ zawˇ˗ehˇ muiˬ˗eu seuˆ dzeuꞈ aˇ gʼehˇ deuˬ
Moˇseˬ saˇ jaˇ ziꞈ˗eu Miˬyehˇ˗euˬ gaˇ mˇ zaˬ tiˬ gʼaˬ pyeuꞈ luꞈ kʼawꞈ, Beh˗euˬ yaw sahˇ˗ahˇ heu naˆ maˬ tseˇ siˬ nya mawꞈ˗eu meh. Teu miˇ neh aˬ yawꞈ Miˬyehˇ˗ahˇ “Nawˬ˗euˬ gaˇ ngaˇ mˇ˗eu gʼaˇ duˬ, nawˬ neh lehˬ hmˬ taˬ˗euˬ gaˇ kawˆ deuˬ ngaˬ˗ahˇ ehˇ mehˬ nehˬ laꞈ” lehˇ shaˇ˗euˬ meh. (Doˆ˗iˇ˗eu 33:13) Yeˬhawˇbaˬ jiˇ aˬ yawꞈ aˬ joˆ˗ehˇ gʼeh˗eu Miˬyehˇ pyeuꞈ˗eu lehˇ Moˇseˬ˗ahˇ ehˇ nehˬ˗euˬ meh. Doˆ˗iˇ˗eu 34:4-6-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬhawˇbaˬ aˬ yawꞈ aˬ joˆ˗ehˇ gʼeh˗eu Miˬyehˇ pyeuꞈ˗eu lehˇ Moˇseˬ˗ahˇ ehˇ nehˬ˗euˬ nga?
-
Nawˬ˗ahˇ Yeˬhawˇbaˬ˗euˬ seuˆ dzeuꞈ aˇ gʼehˇ aˬ geu jeˬ˗ahˇ ya leˇ dzehˬ nya?
6. Yeˬhawˇbaˬ tsawˇ haˬ zaˬ˗ahˇ ngehˬ gʼeh
Aˇ hu Miˬyehˇ˗euˬ tsawˇ haˬ pyeuꞈ˗eu Heˬbyehˇ tsawˇ haˬ deuˬ, Iˇjiˇtuˆ miˇ kʼahˬ˗ahˇ zaˬ kʼaˆ ya geuꞈ˗euˬ meh. Aˬ yawꞈ˗euˬ tsawˇ haˬ deuˬ shaˬ luꞈ zahˬ luꞈ ngeh, Yeˬhawˇbaˬ˗ahˇ aˬ joˆ˗ehˇ gʼeh leˇ˗euˬ nga? Teˇ saˇ pah˗awˇ gui caw. Maˬ ngeuˇ naˇ, Doˆ˗iˇ˗eu 3:1-10-ahˇ gui. Kʼoeˇ naˇ, naˇ haˬ˗eu jeˬ heu˗ahˇ ja sawˇ.
-
Tsawˇ haˬ zaˬ shaˬ zahˬ˗ahˇ ya tahˬ puˬ ngeh, Yeˬhawˇbaˬ˗ahˇ aˬ joˆ˗ehˇ gʼeh leˇ˗eu nga?—Aˇ deuˆ 7 hawˇ˗eu 8-ahˇ haw.
-
Yeˬhawˇbaˬ tsawˇ haˬ zaˬ˗ahˇ maˇ maˇ ni caw ba nehˬ mawꞈ ngaˇ laˬ, aˬ yawꞈ caw ba nehˬ nya ngaˇ loˇ? Nawˬ˗ahˇ aˬ joˆ˗ehˇ noeˬ nya? Aˬ jeˬ miˇ neh?
7. Beh taˬ˗euˬ jeˬ˗ahˇ neh Yeˬhawˇbaˬ˗euˬ seuˆ dzeuꞈ aˇ gʼehˇ deuˬ mawˇ laˇ
Yeˬhawˇbaˬ beh taˬ˗euˬ jeˬ˗ahˇ neh aˬ yawꞈ˗euˬ seuˆ dzeuꞈ aˇ gʼehˇ deuˬ bi mawˇ laꞈ˗eu meh. Biˬdiˬoˬ pah. Kʼoeˇ naˇ, Loˇmaˆ 1:20-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Beh taˬ˗euˬ jeˬ˗ahˇ haw ngeh, nawˬ˗ahˇ Yeˬhawˇbaˬ˗euˬ seuˆ dzeuꞈ aˇ gʼehˇ aˬ jeˬ jeˇ˗ahˇ mawˇ laˇ nya?
Tiˬ gʼaˬ na ehˇ˗eu: “Maˬ mawˇ nya˗eu Miˬyehˇ˗ahˇ siˬ nya laˇ˗eu lehˇ ehˇ˗eu teu˗aˬ maˬ pyeuꞈ leˇ nya˗a.”
-
Nawˬ˗ahˇ aˬ joˆ˗ehˇ noeˬ nya?
-
Aˬ jeˬ miˇ neh?
Kawˆ shawˆ
Yeˬhawˇbaˬ yaw sahˇ gʼawˇ mawˇ pyeuꞈ meh. Aˬ yawꞈ muiˬ dui dui˗eu seuˆ dzeuꞈ aˇ gʼehˇ gʼawˬ mya jeˬ ahˇ˗awˇ, nui gaˬ ngehˬ˗ehˇ dzehˬ meh.
Ja sawˇ poˆ˗eu
-
Aˬ dui Yeˬhawˇbaˬ˗ahˇ aˬ jeˬ miˇ neh maˬ mawˇ nya˗eu nga?
-
Muiˬ˗eu shawˇ˗eu yaw sahˇ heu naˇ, aˬ jeˬ nga?
-
Yeˬhawˇbaˬ˗euˬ seuˆ dzeuꞈ aˇ gʼehˇ aˬ jeˬ jeˇ ahˇ˗eu nga?
Haw lahˬ
Yeˬhawˇbaˬ˗ahˇ siˬ nya dzehˬ laˇ ni, aˇ yeˇ huiˬ˗eu seuˆ dzeuꞈ aˇ gʼehˇ oeˬ jeˬ˗ahˇ haw.
“Miˬyehˇ aˬ joˆ˗ehˇ gʼeh nga?” (Loꞈ˗eu nymˇgoˇ, 2019 Dahˬ beh˗eu dmˬ)
Yeˬhawˇbaˬ yawˬ gaˇ na luꞈ maˬ jawˇ˗eu lehˇ aˬ joˆ˗ehˇ siˬ laˇ˗eu nga lehˇ haw.
“Miˬyehˇ yawˬ gaˇ na luꞈ jawˇ ngaˇ laˬ?” (Iˇteuꞈnehꞈ laꞈ kʼoeˇ˗euˬ gaˇ kawˆ)
Jaˇliꞈ muiˬ˗eu shawˇ˗eu yaw sahˇ˗ahˇ Miˬyehˇ˗euˬ aˬ laꞈ lehˇ aˬ jeˬ miˇ neh kuˇ˗eu nga lehˇ haw.
“Muiˬ˗eu shawˇ˗eu yaw sahˇ aˬ jeˬ nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)
Myaˆ nuiˆ myaˆ behꞈ tiˬ gʼaˬ Miˬyehˇ aˬ yawꞈ˗ahˇ myaˆ haw maˬ cawˬ˗a lehˇ noeˬ haw˗euˬ meh. Ehˇ kʼawꞈ aˬ yawꞈ˗euˬ nui noeˬ aˬ jeˬ baˬ da neh paˇ iˇ˗euˬ nga lehˇ haw.
“Nymˬ˗mˇ ngaˇ aˬ cawˬ˗ahˇ caw ba nya laˇ shaw” (Loꞈ˗eu nymˇgoˇ, 2015 Tseˇ siˬ ba la 1)
a Ja ceuˬ 33:6 laꞈ kʼoeˇ ahˇ˗eu “saꞈ” lehˇ ehˇ˗eu Heˬbyehˇ dawˬ naˇ, “muiˬ˗eu shawˇ˗eu baoˬ”˗ahˇ jiˇ ehˇ mawꞈ˗eu meh.
