Dzaw deuˆ 33
Miˬyehˇ Miˇkʼahˬ aˬ dui˗euˬ gʼaˇ duˬ aˬ jeˬ jeˇ jahˇ nehˬ laꞈ˗eu nga?
Nymˬ˗mˇ Miˬyehˇ Miˇkʼahˬ mˬ kʼoeˇ taˆ uˆ lahˇ shaw˗euˬ meh. Gʼawˬ myahˇ maˬ gʼeh˗ehˇ miˇ tsaˬ heu siˬ˗ahˇ uˆ lahˇ le˗awˇ, yawˬ jeˬ na luꞈ muiˬ daˆ laˇ ni gʼawˬ mya jeˬ laˆ poˆ laˆ paˇ˗eu meh. Miˬyehˇ Miˇkʼahˬ uˆ lahˇ le ngeh aˬ jeˬ jeˇ muiˬ daˆ laˇ˗eu nga?
1. Miˬyehˇ Miˇkʼahˬ miˇ tsaˬ kʼoeˇ taˆ yaw tsaˬ yaw dawˇ jeˬ hawˇ˗eu nui saˇ oꞈ˗eu jeˬ jaˆ laˇ ni aˬ joˆ˗ehˇ jahˇ˗eu nga?
Miˬyehˇ Miˇkʼahˬ˗euˬ Sahˬ paˬ pyeuꞈ˗eu Yeˬsuˇ, yaw haiˬ yaw doeˇ deuˬ hawˇ˗eu tsawˇ haˬ zaˬ uˆ lahˇ˗eu jeˬ˗ahˇ Aˬmaˬgeˬdoˬ guiˇ mˇ ngeh laˆ cawˆ jiˇ˗eu meh. (Pah mehˬ˗eu 16:14, 16) Teu ngeh “aˇ yamˬ tiˬ kʼehˇ laˇ kʼehˬ laꞈ kʼoeˇ, haiˬ˗eu tsawˇ haˬ byoˆ jiˇ tehꞈ˗a” lehˇ Jaˇliꞈ laꞈ kʼoeˇ saˇ jaˇ dzaˬ taˬ˗euˬ dawˬ byah laˇ˗eu meh. (Ja ceuˬ 37:10) Miˬyehˇ Miˇkʼahˬ˗euˬ Sahˬ paˬ Yeˬsuˇ, miˇ tsaˬ tiˬ siˬ siˬ lah ni˗ahˇ nui saˇ oꞈ˗eu jeˬ hawˇ˗eu yaw tsaˬ yaw dawˇ jeˬ tehꞈ˗ehˇ jaˆ laˇ ni mˇ nehˬ˗eu meh.—Iˇsaˬyaˇ 11:4-ahˇ gui.
2. Miˇ tsaˬ kʼoeˇ taˆ Miˬyehˇ neh noeˬ taˬ˗euˬ jeˬ byah laˇ ngeh, aˬ dui aˬ joˆ˗ehˇ gʼeh gaˇ ya dehꞈ˗eu nga?
Miˬyehˇ Miˇkʼahˬ uˆ lahˇ le ngeh ‘tsawˇ muiˬ deuˬ˗ahˇ miˇ kʼahˬ oꞈ˗awˇ, mˬ maˬ maˬ byaˆ zaˇ ziˇ ya jawˇ’ meh. (Ja ceuˬ 37:29) Yawˬ gʼaˬ na luꞈ yaw tsaˬ yaw dawˇ jeˬ tehꞈ˗ehˇ mˇ˗awˇ, Yeˬhawˇbaˬ˗ahˇ gaˬ˗eu uˬ taꞈ, tiˬ gʼaˬ tiˇ gʼaˬ gaˬ˗awˇ, tiˬ gʼaˬ˗iˬ maˬ naˇ maˬ gawˇ ni miˇ tsaˬ kʼoeˇ taˆ mˬ maˬ maˬ byaˆ zaˇ ziˇ dehꞈ luꞈ˗eu lehˇ shaˇ noeˬ haw sheˇ.
3. Yaw haiˬ yaw doeˇ deuˬ˗ahˇ laˆ cawˆ gʼaˬ naˇ, Miˬyehˇ Miˇkʼahˬ aˬ jeˬ jeˇ jahˇ˗eu nga?
Yaw haiˬ yaw doeˇ deuˬ˗ahˇ laˆ cawˆ gʼaˬ naˇ, Sahˬ paˬ Yeˬsuˇ 1,000 kʼoꞈ uˆ lahˇ˗eu meh. Teu ngeh Yeˬsuˇ hawˇ˗eu aˬ yawꞈ nehˬ˗ehˇ uˆ lahˇ˗eu 144,000 gʼaˬ, miˇ tsaˬ kʼoeˇ taˆ˗euˬ tsawˇ haˬ deuˬ˗ahˇ byah kuꞈ˗eu tsawˇ haˬ pyeuꞈ kʼoꞈ laˇ ni caw ba nehˬ˗eu meh. Yeˬsuˇ uˆ lahˇ˗eu 1,000 kʼoꞈ byah laˇ ngeh, miˇ tsaˬ heu siˬ muiˬ dui dui˗eu Baˬlaˬdiˇsuˆ pyeuꞈ kʼoꞈ laˇ˗awˇ, Yeˬhawˇbaˬ˗euˬ zahˇ dawˬ˗ahˇ dehꞈ caw˗eu miˇ neh, laˬ kʼaˬ cehˇ˗eu tsawˇ haˬ deuˬ tehꞈ˗ehˇ jawˇ˗eu meh. Kʼoeˇ naˇ Yeˬsuˇ uˆ lahˇ˗eu jeˬ aˬ yawꞈ˗euˬ Aˬda Yeˬhawˇbaˬ˗ahˇ a kʼoꞈ nehˬ˗eu meh. Aˇ saˬ saˬ leˇ ngeh˗aˬ, Miˬyehˇ˗euˬ “tsawˇ myahˇ˗ahˇ yaw zeu baw” laˇ meh. (Maꞈtehˬ 6:9, 10) Kʼoeˇ uˬ taꞈ, Yeˬhawˇbaˬ naˇ aˬ yawꞈ˗euˬ tsawˇ haˬ deuˬ˗ahˇ ngehˬ gʼeh haw piˇ nehˬ˗eu muiˬ dui dui˗eu Uˆ lahˇ˗eu gʼaˬ pyeuꞈ˗eu lehˇ siˬ duˬ laˇ˗eu meh. Kʼoeˇ naˇ, Yeˬhawˇbaˬ Saˬdaˬ hawˇ˗eu nehꞈ deuˬ uˬ taꞈ, aˬ yawꞈ uˆ lahˇ˗eu jeˬ˗ahˇ laꞈ maˬ daˬ˗eu yawˬ gʼaˬ na luꞈ˗ahˇ laˆ cawˆ jiˇ˗eu meh. (Pah mehˬ˗eu 20:7-10) Miˬyehˇ Miˇkʼahˬ neh mˇ˗euˬ yaw muiˬ yawˬ jeˬ na luꞈ, mˬ maˬ maˬ byaˆ zaˇ ziˇ jaˆ gʼeh˗eu meh.
Naꞈ suiˇ ni dzaw
Miˬyehˇ aˬ yawꞈ˗euˬ Miˇkʼahˬ neh mehˬ hu paw nehˬ˗ehˇ taꞈ leˇ˗awˇ saˇ jaˇ kʼaˇ dzaˬ taˬ˗euˬ yawˬ jeˬ na luꞈ˗ahˇ mˇ byah meh lehˇ, aˬ dui aˬ jeˬ miˇ neh jah nya˗eu nga lehˇ haw.
4. Miˬyehˇ Miˇkʼahˬ tsawˇ haˬ zaˬ uˆ lahˇ˗eu jeˬ˗ahˇ laˆ cawˆ jiˇ
“Tsawˇ haˬ zaˬ tiˬ gʼaˬ tiˇ gʼaˬ nawˬ dzaˬ kʼaˆ dzaˬ luꞈ˗eu” meh. (Dawˬtsoˆ 8:9) Yeˬhawˇbaˬ aˬ yawꞈ˗euˬ Miˇkʼahˬ neh maˬ tsaˬ maˬ dawˇ˗eu yawˬ jeˬ na luꞈ˗ahˇ laˆ byoˆ jiˇ˗eu meh.
Daˬyeˬlaˇ 2:44 hawˇ˗eu 2 Teˇsaˬloˇni 1:6-8-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬhawˇbaˬ hawˇ˗eu Yeˬsuˇ tsawˇ haˬ zaˬ uˆ lahˇ˗eu jeˬ hawˇ˗eu, teu˗ahˇ gʼaˬ biꞈ˗eu deuˬ˗ahˇ aˬ jeˬ jahˇ˗eu lehˇ gʼeh˗eu nga?
-
Nawˬ neh ya dzaw laꞈ˗euˬ gaˇ kawˆ deuˬ˗ahˇ haw ngeh, Yeˬhawˇbaˬ hawˇ˗eu Yeˬsuˇ neh mˇ˗euˬ jeˬ, tsaˬ meh dawˇ meh lehˇ aˬ jeˬ miˇ neh jah nya˗eu nga?
5. Yeˬsuˇ kʼaˇ muiˬ˗eu Sahˬ paˬ pyeuꞈ
Miˬyehˇ Miˇkʼahˬ˗ahˇ Sahˬ paˬ pyeuꞈ˗eu Yeˬsuˇ, miˇ tsaˬ kʼoeˇ taˆ jawˇ˗eu aˬ yawꞈ˗euˬ zaˬ lahˇ deuˬ˗ahˇ yaw muiˬ jeˬ gʼawˬ mya ni mˇ nehˬ˗eu meh. Yeˬsuˇ tsawˇ haˬ deuˬ˗ahˇ caw ba nehˬ mawꞈ˗eu nui ma ahˇ˗awˇ, caw ba nehˬ nya˗eu baoˬ jiˇ Miˬyehˇ neh biꞈ taˬ˗euˬ lehˇ haw˗eu gʼaˇ duˬ, biˬdiˬoˬ pah.
Yeˬsuˇ miˇ tsaˬ kʼoeˇ taˆ jawˇ ngeh mˇ˗euˬ jeˬ˗ahˇ haw ngeh, mehˬ hu paw Miˬyehˇ Miˇkʼahˬ aˬ jeˬ jeˇ mˇ nehˬ˗eu lehˇ siˬ laˇ˗eu meh. Nawˬ˗ahˇ aˬ geu hmˬ˗ahˇ bi pyeuꞈ laˇ mawꞈ dzehˬ nya? Yaw muiˬ aˬ jeˬ jeˇ jaˆ laˇ˗eu nga lehˇ ehˇ nehˬ taˬ˗euˬ Jaˇliꞈ aˇ deuˆ deuˬ˗ahˇ gui.
|
Yeˬsuˇ miˇ tsaˬ kʼoeˇ taˆ jawˇ ngeh mˇ˗euˬ jeˬ |
Yeˬsuˇ mˬ kʼoeˇ taˆ jawˇ˗awˇ mˇ˗eu lehˇ gʼeh˗eu jeˬ |
|---|---|
|
|
|
|
|
|
|
|
6. Miˬyehˇ Miˇkʼahˬ mehˬ hu paw muiˬ dui dui˗eu jeˬ bi jaˆ laˇ
Miˬyehˇ Miˇkʼahˬ yaw beh tsawˇ haˬ zaˬ˗euˬ gʼaˇ duˬ Miˬyehˇ neh noeˬ taˬ˗euˬ jeˬ˗ahˇ mˇ pyeuꞈ˗eu meh. Aˬ dui miˇ tsaˬ Baˬlaˬdiˇsuˆ˗ahˇ mˬ maˬ maˬ byaˆ zaˇ ziˇ ya jawˇ meh. Yeˬhawˇbaˬ aˬ yawꞈ neh noeˬ taˬ˗euˬ jeˬ, Yeˬsuˇ˗ahˇ neh aˬ joˆ˗ehˇ mˇ pyeuꞈ˗eu nga lehˇ haw˗eu gʼaˇ duˬ, biˬdiˬoˬ pah.
Ja ceuˬ 145:16-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬhawˇbaˬ dehꞈ˗eu jeˬ “dawˬ tawˆ luꞈ˗ahˇ kʼaˇ loˬ˗eu jeˬ biꞈ nehˬ˗eu meh” lehˇ ya siˬ˗eu heu naˇ, nawˬ˗ahˇ aˬ joˆ˗ehˇ gʼeh laˇ nya?
Tiˬ gʼaˬ na ehˇ˗eu: “Aˬ dui yawˬ gʼaˬ na luꞈ mehˬ bawˬ gm naˇ, miˇ tsaˬ kʼoeˇ taˆ˗euˬ shaˬ zahˬ˗ahˇ laˆ piˇ nya meh.”
-
Miˬyehˇ Miˇkʼahˬ tsawˇ haˬ zaˬ maˬ laˆ piˇ nya˗eu aˬ jeˬ jeˇ˗euˬ shaˬ zahˬ˗ahˇ laˆ piˇ nehˬ le˗eu nga?
Kawˆ shawˆ
Miˬyehˇ aˬ yawꞈ˗euˬ Miˇkʼahˬ˗ahˇ zmˬ˗awˇ, aˬ yawꞈ neh noeˬ taˬ˗euˬ jeˬ mˇ byah˗awˇ, miˇ tsaˬ tiˬ siˬ siˬ lah ni˗ahˇ Baˬlaˬdiˇsuˆ bi pyeuꞈ kʼoꞈ laˇ˗eu meh. Teu gaˇ mˬ maˬ maˬ byaˆ zaˇ ziˇ Yeˬhawˇbaˬ˗ahˇ uˬ duˬ tahˬ˗eu tsawˇ muiˬ deuˬ tehꞈ˗ehˇ ya jawˇ˗eu meh.
Ja sawˇ poˆ˗eu
-
Miˬyehˇ˗euˬ tsawˇ myahˇ˗ahˇ yaw zeu baw laˇ ni Miˬyehˇ Miˇkʼahˬ aˬ joˆ˗ehˇ jahˇ˗eu nga?
-
Miˬyehˇ Miˇkʼahˬ Jaˇliꞈ laꞈ kʼoeˇ ehˇ taˬ˗euˬ saˇ jaˇ dawˬ deuˬ˗ahˇ mˇ byah meh lehˇ aˬ dui aˬ jeˬ miˇ neh jah nya nga?
-
Nawˇ Miˬyehˇ Miˇkʼahˬ mˇ nehˬ le˗eu lehˇ gʼeh˗eu aˬ geu hmˬ˗ahˇ bi pyeuꞈ laˇ mawꞈ dzehˬ nya?
Haw lahˬ
Aˬmaˬgeˬdoˬ lehˇ ehˇ˗eu heu naˇ, aˬ jeˬ nga lehˇ haw.
“Aˬmaˬgeˬdoˬ guiˇ heu naˇ aˬ jeˬ nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)
Yeˬsuˇ uˆ lahˇ˗eu 1,000 kʼoꞈ laꞈ kʼoeˇ hawˇ˗eu 1,000 kʼoꞈ byah laˇ ngeh, aˬ jeˬ jeˇ pyeuꞈ laˇ˗eu nga lehˇ haw.
“Yaˇ kʼaˬ daˇ˗eu aˇ nah˗ahˇ aˬ jeˬ jeˇ pyeuꞈ laˇ˗eu nga?” (Loꞈ˗eu nymˇgoˇ, 2012 Gʼoeˬ siˬ ba la 1)
Miˬyehˇ Miˇkʼahˬ uˆ lahˇ˗eu uˬ moˆ jawˇ ngeh, aˬ joˆ˗ehˇ gʼeh paˬ nga lehˇ nymˇ jiˇ laꞈ kʼoeˇ˗euˬ deuˬ nehˬ˗ehˇ shaˇ noeˬ luꞈ gaˇ haw.
Maˬ tsaˬ maˬ dawˇ˗eu jeˬ˗ahˇ laˆ piˇ nehˬ nya˗eu gaˇ ma˗ahˇ mawˇ˗euˬ zaˬ yo aˬ li tiˬ gʼaˬ, “Ngaˬ˗ahˇ gʼawˬ mya jeˬ siˬ nya mawꞈ nya” lehˇ ehˇ˗eu meh. Aˬ yawꞈ˗euˬ gaˇ kawˆ˗ahˇ haw.
“Jaˇliꞈ tsawˇ haˬ˗euˬ dehꞈ ziˇ˗ahˇ laˆ paˇ” (Loꞈ˗eu nymˇgoˇ, 2012 Tiˬ siˬ ba la 1)
