Dzaw deuˆ 15
Yeˬsuˇ aˬ suˇ gʼaˬ nga?
Yeˬsuˇ˗aˬ, dehꞈ laꞈ jawˇ laꞈ˗euˬ tsawˇ haˬ deuˬ laꞈ kʼoeˇ neh tsawˇ myahˇ kʼaˇ doˆ˗eu tiˬ gʼaˬ pyeuꞈ meh. Tsawˇ haˬ deuˬ Yeˬsuˇ˗euˬ tsawˇ myahˇ˗ahˇ siˬ nya kʼawꞈ, aˬ yawꞈ˗euˬ gaˇ kawˆ˗ahˇ yaw kʼaˆ˗ehˇ maˬ siˬ nya˗a. Maˇ maˇ ni naˇ Yeˬsuˇ aˬ suˇ gʼaˬ pyeuꞈ˗eu gaˇ kawˆ, tiˬ gʼaˬ tiˇ gʼaˬ noeˬ˗eu maˬ duˇ leˇ˗a. Jaˇliꞈ Yeˬsuˇ nehˬ˗ehˇ taꞈ leˇ˗awˇ aˬ jeˬ ehˇ taˬ˗euˬ nga?
1. Yeˬsuˇ aˬ suˇ gʼaˬ nga?
Yeˬsuˇ mˬ kʼoeˇ taˆ jawˇ˗eu baoˬ huiˬ˗eu yaw sahˇ tiˬ gʼaˬ pyeuꞈ˗eu meh. Yeˬhawˇbaˬ tiˬ jeˬ˗ahˇ˗iˬ maˬ beh mi naˆ˗ehˇ Yeˬsuˇ˗ahˇ jeˬ hu beh˗euˬ miˇ neh, aˬ yawꞈ˗ahˇ ‘kʼaˇ beh taˬ˗euˬ jeˬ dawˬ tawˆ luꞈ kʼoeˇ taˆ dehꞈ beh beh le˗euˬ gʼaˬ’ lehˇ kuˇ˗eu meh. (Gawˇlawˇsehˇ 1:15) Yeˬhawˇbaˬ˗euˬ aˬ laꞈ neh do lehˇ beh˗euˬ gʼaˬ naˇ Yeˬsuˇ tiˬ gʼaˬ tehꞈ miˇ neh, Jaˇliꞈ Yeˬsuˇ˗ahˇ “Zaˬmaˇ tiˬ gʼaˬ tehꞈ” lehˇ jiˇ kuˇ˗eu meh. (Yoˇhaˬ 3:16) Yeˬsuˇ aˬ yawꞈ Aˬda˗euˬ dawˬ peh jawˇ˗awˇ, boeˬ boeˬ luˆ luˆ yawˬ jeˬ na luꞈ˗ahˇ beh gaˇ caw ba˗euˬ meh. (Dawˬdaˬ 8:30-ahˇ gui.) Yeˬsuˇ Yeˬhawˇbaˬ nehˬ˗ehˇ aˬ myah luꞈ gʼoeˇ˗eu meh. Aˬ yawꞈ saˇ jaˇ ziꞈ˗eu laꞈ kʼoeˇ Miˬyehˇ˗euˬ dawˬ hawˇ˗eu dawˬ mehˬ dawˬ tsoˆ tsaꞈ gaˬ˗eu miˇ neh, Yeˬsuˇ˗ahˇ “Dawˬ” lehˇ jiˇ kuˇ˗eu meh.—Yoˇhaˬ 1:14.
2. Yeˬsuˇ miˇ tsaˬ kʼoeˇ taˆ aˬ jeˬ miˇ neh oe˗euˬ nga?
Dzeuˇ yaꞈ˗euˬ 2,000 kʼoꞈ heu kaˬ˗ahˇ Yeˬhawˇbaˬ aˬ yawꞈ˗euˬ baoˬ˗ahˇ zmˬ˗awˇ, mˬ kʼoeˇ taˆ jawˇ˗eu Yeˬsuˇ˗euˬ dehꞈ ziˇ˗ahˇ Maˬliˇ lehˇ kuˇ˗eu miˬ daꞈ daꞈ shuiꞈ tiˬ gʼaˬ˗euˬ uˬ maˆ˗ahˇ zahˬ leˇ paˬ˗ehˇ dawˆ˗ahˇ˗euˬ meh. Teu miˇ neh Yeˬsuˇ tsawˇ haˬ tiˬ gʼaˬ loꞈ˗ehˇ dehꞈ le˗euˬ meh. (Luˇkaꞈ 1:34, 35-ahˇ gui.) Aˬ yawꞈ miˇ tsaˬ kʼoeˇ taˆ oe˗euˬ heu naˇ, saˇ jaˇ dzaˬ taˬ˗euˬ jaˆ˗eu loꞈ˗ehˇ Meˬsiˇya (Ka li) pyeuꞈ˗eu gʼaˇ duˬ, hawˇ˗eu tsawˇ haˬ zaˬ˗ahˇ ka kʼoꞈ˗eu gʼaˇ duˬ meh. a Meˬsiˇya nehˬ˗ehˇ taꞈ leˇ˗awˇ Jaˇliꞈ laꞈ kʼoeˇ maˬ keuˆ laˇ miˇ ehˇ taˬ˗euˬ dawˬ dawˬ tawˆ luꞈ Yeˬsuˇ˗ahˇ byah laˇ jiˇ˗euˬ miˇ neh, Yeˬsuˇ naˇ, “dehꞈ luꞈ˗eu Miˬyehˇ˗euˬ Zaˬmaˇ pyeuꞈ˗eu Meˬsiˇya meh” lehˇ siˬ laˇ˗eu meh.—Maꞈtehˬ 16:16.
3. Nymˬ˗mˇ Yeˬsuˇ aˬ gaˇ jawˇ˗eu nga?
Yeˬsuˇ tsawˇ haˬ˗euˬ dehꞈ ziˇ jiˇ˗awˇ, yaw sahˇ mawˇ do neh gʼoꞈ dehꞈ laˇ gʼaˬ naˇ, mˬ kʼoeˇ taꞈ gʼoꞈ daˆ leˇ˗euˬ meh. Koeˇ naˇ Miˬyehˇ Yeˬsuˇ˗ahˇ “goˇ dui dui gaˇ ciˬ nuiˇ˗euˬ meh.” (Piˇliˇpiˆ 2:9) Nymˬ˗mˇ naˇ Yeˬsuˇ Yeˬhawˇbaˬ jiˇ naˇ baoˬ kʼaˇ huiˬ˗eu gʼaˬ pyeuꞈ meh.
Naꞈ suiˇ ni dzaw
Maˇ maˇ ni naˇ Yeˬsuˇ aˬ suˇ gʼaˬ nga, aˬ yawꞈ˗euˬ gaˇ kawˆ˗ahˇ yaw muiˬ˗ehˇ siˬ nya˗eu heu aˬ jeˬ miˇ neh aˇ yeˇ huiˬ dui dui˗eu nga lehˇ haw.
4. Yeˬsuˇ baoˬ kʼaˇ huiˬ˗eu Miˬyehˇ maˬ ngeuˇ˗a
Yeˬsuˇ mˬ kʼoeˇ taˆ baoˬ huiˬ dui dui˗eu yaw sahˇ tiˬ gʼaˬ pyeuꞈ kʼawꞈ, aˬ yawꞈ˗euˬ Aˬda Yeˬhawˇbaˬ˗euˬ ehˇ dawˬ˗ahˇ naˇ haˬ˗eu meh lehˇ Jaˇliꞈ ehˇ˗eu meh. Aˬ jeˬ miˇ neh teu loꞈ˗ehˇ ehˇ nya˗eu nga? Yeˬsuˇ hawˇ˗eu baoˬ kʼaˇ huiˬ˗eu Miˬyehˇ aˬ joˆ˗ehˇ beu gaˇ˗eu nga lehˇ Jaˇliꞈ mehˬ˗eu jeˬ˗ahˇ haw˗eu gʼaˇ duˬ, biˬdiˬoˬ pah.
Jaˇliꞈ aˇ deuˆ heu deuˬ naˇ Yeˬsuˇ hawˇ˗eu Yeˬhawˇbaˬ aˬ joˆ˗ehˇ beu gaˇ˗eu nga lehˇ bi siˬ laˇ˗eu meh. Jaˇliꞈ aˇ deuˆ aˬ yawꞈ deuˆ yawꞈ˗ahˇ gui gʼaˬ naˇ, naˇ haˬ˗eu jeˬ˗ahˇ ja sawˇ.
Luˇkaꞈ 1:30-32-ahˇ gui.
-
“Huiˬ˗eu mahˇ˗eu Miˬyehˇ” Yeˬhawˇbaˬ hawˇ˗eu Yeˬsuˇ beu gaˇ˗eu gaˇ kawˆ nehˬ˗ehˇ taꞈ leˇ˗awˇ, mˬ taˆ gʼaˬ kʼehˇ aˬ joˆ˗ehˇ ehˇ˗eu nga?
Maꞈtehˬ 3:16, 17-ahˇ gui.
-
Yeˬsuˇ iˇ cuꞈ shawˇ ngeh mˬ˗ahˇ neh doˆ le˗euˬ teˇ saˇ kʼoeˇ aˬ jeˬ lehˇ ehˇ˗eu nga?
-
Teu aˬ suˇ gʼaˬ˗euˬ teˇ saˇ nga?
Yoˇhaˬ 14:28-ahˇ gui.
-
Aˬ suˇ gʼaˬ aˇ kʼoꞈ kʼawˆ dzehˬ˗awˇ baoˬ huiˬ dzehˬ˗eu nga? Aˬ da gʼaˬ laˬ, zaˬ gʼaˬ laˬ?
-
Yeˬsuˇ Yeˬhawˇbaˬ˗ahˇ Aˬda lehˇ kuˇ˗eu teu naˇ, aˬ dui˗ahˇ aˬ jeˬ bi siˬ laꞈ˗eu nga?
Yoˇhaˬ 12:49-ahˇ gui.
-
Yeˬsuˇ aˬ yawꞈ nyaꞈ da zaˬ aˬ yawꞈ tiˬ gʼaˬ tehꞈ ma lehˇ noeˬ ngaˇ loˇ? Nawˬ˗ahˇ tawˇ neh aˬ joˆ˗ehˇ noeˬ nya?
5. Yeˬsuˇ Meˬsiˇya pyeuꞈ˗eu lehˇ siˬ laˇ
Tsawˇ haˬ zaˬ˗ahˇ ka kʼoꞈ˗eu gʼaˇ duˬ Miˬyehˇ neh tseˇ taˬ˗euˬ Meˬsiˇya aˬ suˇ gʼaˬ pyeuꞈ˗eu lehˇ siˬ laˇ ni caw ba nehˬ˗eu gʼaˇ duˬ, Jaˇliꞈ laꞈ kʼoeˇ maˬ keuˆ laˇ miˇ ehˇ taˬ˗euˬ dawˬ gʼawˬ mya ni ahˇ˗eu meh. Yeˬsuˇ miˇ tsaˬ kʼoeˇ taˆ jawˇ ngeh, aˬ yawꞈ nehˬ˗ehˇ taꞈ˗eu maˬ keuˆ laˇ miˇ ehˇ taˬ˗euˬ dawˬ deuˬ byah laˇ˗euˬ meh. Aˬ jeˬ jeˇ nga lehˇ haw˗eu gʼaˇ duˬ, biˬdiˬoˬ pah.
Maˬ keuˆ laˇ miˇ ehˇ taˬ˗euˬ dawˬ heu˗ahˇ gui˗awˇ naˇ haˬ˗eu jeˬ˗ahˇ ja sawˇ.
Meˬsiˇya aˬ gaˇ dehꞈ le˗euˬ nga lehˇ haw˗eu gʼaˇ duˬ, Miˇkaˬ 5:2-ahˇ gui. b
-
Yeˬsuˇ dehꞈ le ngeh maˬ keuˆ laˇ miˇ ehˇ taˬ˗euˬ dawˬ heu byah laˇ ngaˬ˗aˇ laˬ?—Maꞈtehˬ 2:1.
Meˬsiˇya shiˇ˗eu gaˇ kawˆ nehˬ˗ehˇ taꞈ leˇ˗awˇ aˬ joˆ˗ehˇ ehˇ taˬ˗euˬ nga lehˇ Ja ceuˬ 34:20 hawˇ˗eu Zaˬkaˬliˇ 12:10-ahˇ gui.
-
Maˬ keuˆ laˇ miˇ ehˇ taˬ˗euˬ dawˬ heu byah laˇ ngaˬ˗aˇ loˇ?—Yoˇhaˬ 19:33-37.
-
Yeˬsuˇ aˬ yawꞈ nehˬ˗ehˇ taꞈ˗eu maˬ keuˆ laˇ miˇ ehˇ taˬ˗euˬ dawˬ deuˬ byah laˇ ni, mehˬ hu paw neh lehˬ hmˬ taˬ dzeuˇ ngaˬ laˬ?
-
Maˬ keuˆ laˇ miˇ ehˇ taˬ˗euˬ dawˬ heu deuˬ˗ahˇ haw ngeh, Yeˬsuˇ aˬ suˇ gʼaˬ pyeuꞈ˗eu lehˇ bi siˬ laꞈ˗eu nga?
6. Yeˬsuˇ˗euˬ gaˇ kawˆ˗ahˇ siˬ nya˗eu heu aˬ dui˗ahˇ gaˇ dahˇ tsoeˬ
Yeˬsuˇ˗euˬ gaˇ kawˆ hawˇ˗eu aˬ yawꞈ mˇ˗eu gaˇ˗ahˇ siˬ nya˗eu heu naˇ, aˇ yeˇ huiˬ dui dui˗eu meh lehˇ Jaˇliꞈ ehˇ˗eu meh. Yoˇhaˬ 14:6 hawˇ˗eu 17:3˗ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬsuˇ˗euˬ gaˇ kawˆ˗ahˇ yaw muiˬ˗ehˇ siˬ nya˗eu heu aˬ jeˬ miˇ neh aˇ yeˇ huiˬ˗eu nga?
Yeˬsuˇ aˬ dui˗ahˇ Miˬyehˇ nehˬ˗ehˇ cawˬ cawˬ nya ni gaˇ ma pah dahˇ nehˬ laꞈ˗awˇ, Yeˬhawˇbaˬ nehˬ˗ehˇ taꞈ˗eu yaw tsaˬ yaw dawˇ jeˬ mehˬ˗eu uˬ taꞈ, aˬ yawꞈ baˬ da neh aˬ dui mˬ maˬ maˬ byaˆ zaˇ ziˇ dehꞈ˗eu jeˬ za nya
Tiˬ gʼaˬ na ehˇ˗eu: “Yeˬhawˇbaˬ˗euˬ Saˇ kiˇ deuˬ˗aˬ, Yeˬsuˇ˗ahˇ maˬ jah˗a.”
-
Teu loꞈ˗ehˇ ehˇ laˇ naˇ, nawˇ aˬ joˆ˗ehˇ ehˇ kʼoꞈ nehˬ de?
Kawˆ shawˆ
Yeˬsuˇ˗aˬ, baoˬ huiˬ˗eu yaw sahˇ tiˬ gʼaˬ pyeuꞈ˗awˇ, Miˬyehˇ˗euˬ Zaˬmaˇ pyeuꞈ˗eu uˬ taꞈ, Meˬsiˇya jiˇ pyeuꞈ˗eu meh.
Ja sawˇ poˆ˗eu
-
Yeˬsuˇ˗ahˇ ‘kʼaˇ beh taˬ˗euˬ jeˬ kʼoeˇ taˆ dehꞈ beh beh le˗euˬ gʼaˬ’ lehˇ aˬ jeˬ miˇ neh kuˇ˗eu nga?
-
Yeˬsuˇ miˇ tsaˬ kʼoeˇ taˆ maˬ oe mi naˆ˗ehˇ aˬ jeˬ jahˇ˗euˬ nga?
-
Yeˬsuˇ Meˬsiˇya pyeuꞈ˗eu lehˇ aˬ joˆ˗ehˇ siˬ laˇ˗eu nga?
Haw lahˬ
Yeˬsuˇ Meˬsiˇya pyeuꞈ˗eu lehˇ aˬ joˆ˗ehˇ siˬ laˇ˗eu nga lehˇ haw.
Miˬyehˇ Yeˬsuˇ˗euˬ Aˬda pyeuꞈ meh lehˇ Jaˇliꞈ ehˇ˗eu meh. Teu aˬ jeˬ˗ahˇ ehˇ mawꞈ˗eu nga lehˇ haw.
“Yeˬsuˇ˗ahˇ Miˬyehˇ˗euˬ Zaˬmaˇ lehˇ aˬ jeˬ miˇ neh kuˇ˗eu nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)
Smˇ gʼaˬ tiˬ poeˬ miˬ yehˇ˗euˬ gaˇ kawˆ, aˬ jeˬ miˇ neh Jaˇliꞈ mehˬ˗eu jeˬ maˬ ngeuˇ˗eu nga lehˇ haw.
“Yeˬsuˇ˗aˬ Miˬyehˇ ngaˇ laˬ?” (Loꞈ˗eu nymˇgoˇ, 2009 Oeˬ siˬ ba la 1)
Zaˬ miˬ aˬ buˇ tiˬ gʼaˬ Yeˬsuˇ˗euˬ gaˇ kawˆ nehˬ˗ehˇ taꞈ leˇ˗awˇ Jaˇliꞈ mehˬ˗eu jeˬ˗ahˇ siˬ nya laˇ ngeh, aˬ yawꞈ˗euˬ dehꞈ ziˇ aˬ joˆ˗ehˇ paˇ˗iˇ˗euˬ nga lehˇ haw.
a Dzaw deuˆ 26 hawˇ˗eu 27˗ahˇ tsawˇ haˬ zaˬ aˬ jeˬ miˇ neh ka kʼoꞈ˗eu jeˬ˗ahˇ loˬ˗eu nga, Yeˬsuˇ aˬ joˆ˗ehˇ ka kʼoꞈ˗euˬ nga lehˇ ja sawˇ ma.
b Yeˬsuˇ miˇ tsaˬ kʼoeˇ taˆ aˬ geu ngeh oe˗eu lehˇ maˬ keuˆ laˇ miˇ yaw duˬ duˬ˗ehˇ ehˇ taˬ˗euˬ dawˬ˗ahˇ haw˗eu gʼaˇ duˬ, Dzaw lahˬ 2˗ahˇ haw.
