Dzaw deuˆ 17
Yeˬsuˇ aˬ joˆ˗ehˇ gʼeh˗eu tiˬ gʼaˬ nga?
Yeˬsuˇ miˇ tsaˬ kʼoeˇ taˆ jawˇ ngeh, ngehˬ yaꞈ mˇ yaꞈ˗euˬ jeˬ˗ahˇ haw ngeh, aˬ yawꞈ aˬ joˆ˗ehˇ gʼeh˗eu tiˬ gʼaˬ pyeuꞈ˗eu lehˇ siˬ laˇ˗eu meh. Teu miˇ neh aˬ dui Yeˬsuˇ hawˇ˗eu aˬ yawꞈ˗euˬ Aˬda˗euˬ dawˬ peh jiˆ peh leˇ mawꞈ˗eu meh. Toˆ˗ehˇ naˇ, Yeˬsuˇ aˬ joˆ˗ehˇ gʼeh˗eu tiˬ gʼaˬ nga? Aˬ dui aˬ yawꞈ˗ahˇ aˬ joˆ˗ehˇ dzaw geuꞈ nya˗eu nga?
1. Yeˬsuˇ aˬ yawꞈ˗euˬ Aˬda nehˬ˗ehˇ aˬ joˆ˗ehˇ duˇ leˇ˗eu nga?
Yeˬsuˇ mˬ kʼoeˇ taˆ aˬ yawꞈ gaˬ˗eu Aˬda nehˬ˗ehˇ gʼawˬ mya lam kʼoꞈ jawˇ laꞈ˗euˬ miˇ neh, gʼawˬ mya jeˬ ya dzaw geuꞈ˗euˬ meh. Teu miˇ neh aˬ yawꞈ noeˬ˗eu jeˬ hawˇ˗eu mˇ˗eu jeˬ aˬ yawꞈ˗euˬ Aˬda˗ahˇ duˇ leˇ˗eu meh. (Yoˇhaˬ 5:19-ahˇ gui.) Yeˬsuˇ aˬ yawꞈ˗euˬ Aˬda˗ahˇ tiˬ byah tiˬ loꞈ dzaw geuꞈ˗eu miˇ neh, “Ngaˬ˗ahˇ kʼaˇ ya mawˇ˗euˬ tsawˇ haˬ˗aˬ, Aˬda˗ahˇ ya mawˇ˗euˬ gaˇ duˇ meh” lehˇ ehˇ˗eu meh. (Yoˇhaˬ 14:9) Aˬ dui Yeˬsuˇ aˬ joˆ˗ehˇ gʼeh˗eu tiˬ gʼaˬ pyeuꞈ˗eu lehˇ siˬ nya laˇ ngeh, Yeˬhawˇbaˬ˗ahˇ jiˇ yaw muiˬ˗ehˇ siˬ nya laˇ˗eu meh. Yaw jeˬ ma jeˬ, Yeˬsuˇ tsawˇ haˬ deuˬ˗ahˇ ngehˬ gʼeh nehˬ gaˇ haw ngeh, Yeˬhawˇbaˬ jiˇ aˬ dui˗ahˇ aˇ naˆ ni ngehˬ gʼeh˗eu lehˇ siˬ laˇ˗eu meh.
2. Yeˬsuˇ Yeˬhawˇbaˬ˗ahˇ gaˬ˗eu lehˇ aˬ joˆ˗ehˇ mˇ doˆ laꞈ˗euˬ nga?
“Ngaˇ Aˬda Miˬyehˇ˗ahˇ gaˬ˗eu nga lehˇ miˇ tsaˬ zaˬ ya siˬ ya mawˇ ni, Aˬda Miˬyehˇ ngaˬ˗ahˇ dawˬ biꞈ laꞈ˗euˬ loꞈ˗ehˇ ngaˇ mˇ ma” lehˇ Yeˬsuˇ ehˇ˗eu meh. (Yoˇhaˬ 14:31, Jaˇliꞈ yaw shuiꞈ 1997) Yeˬsuˇ miˇ tsaˬ kʼoeˇ taˆ jawˇ ngeh, aˬ geu jeˬ˗ahˇ ya tahˬ puˬ kʼawꞈ, aˬ yawꞈ˗euˬ Aˬda˗euˬ ehˇ dawˬ naˇ haˬ˗awˇ, aˬ yawꞈ˗euˬ Aˬda˗ahˇ gaˬ dui dui˗eu lehˇ mˇ mawˇ yaꞈ˗euˬ meh. Kʼoeˇ naˇ tsawˇ haˬ deuˬ˗ahˇ aˬ yawꞈ˗euˬ Aˬda˗euˬ gaˇ kawˆ ja nehˬ mawꞈ˗awˇ, aˬ yawꞈ˗euˬ Aˬda nehˬ˗ehˇ cawˬ cawˬ nya laˇ ni jiˇ caw ba nehˬ mawꞈ˗eu meh.—Yoˇhaˬ 14:23.
3. Yeˬsuˇ tsawˇ haˬ zaˬ˗ahˇ gaˬ˗eu lehˇ aˬ joˆ˗ehˇ mˇ doˆ laꞈ˗euˬ nga?
Yeˬsuˇ ‘tsawˇ haˬ zaˬ˗ahˇ nui kʼahˇ shiˇ˗eu’ meh lehˇ Jaˇliꞈ ehˇ˗eu meh. (Dawˬdaˬ 8:31) Aˬ yawꞈ tsawˇ haˬ deuˬ˗ahˇ gaˬ dui dui˗eu miˇ neh, gʼaˬ biꞈ˗awˇ yawˬ ha˗euˬ gʼaˇ duˬ maˬ shaˇ noeˬ ni caw ba nehˬ˗euˬ meh. Aˬ yawꞈ zahˬ leˇ paˬ˗ehˇ gʼeh˗eu jeˬ jahˇ˗euˬ heu naˇ, baoˬ ahˇ˗eu lehˇ bi mawˇ˗eu gʼaˇ duˬ tehꞈ maˬ ngeuˇ˗a, gʼawˬ shaˬ gaˬ˗eu miˇ neh jahˇ˗euˬ meh. (Maˬkuˆ 1:40-42) Aˬ yawꞈ myaˆ pyawˬ huiˬ nyiˇ maˬ tseˇ ni yawˬ gʼaˬ na luꞈ˗ahˇ yaw muiˬ˗ehˇ mˇ nehˬ˗euˬ meh. Aˬ yawꞈ˗euˬ dawˬ˗ahˇ naˇ haˬ˗eu nui ma dawˇ coeˇ ni gʼeh˗eu deuˬ˗ahˇ gʼaˬ biꞈ˗awˇ noeˬ tmˬ˗eu jeˬ jiˇ biꞈ˗euˬ meh. Yeˬsuˇ tsawˇ haˬ zaˬ˗ahˇ gaˬ˗eu miˇ neh, nui ma keuˆ˗eu laꞈ kʼoeˇ naˇ dui gawˇ dui dui˗eu jeˬ˗ahˇ daˬ˗awˇ shiˇ dah nehˬ˗euˬ meh. Aˬ yawꞈ mehˬ˗eu jeˬ˗ahˇ caw teh˗eu deuˬ˗ahˇ ngehˬ˗ehˇ dzehˬ gaˬ dui dui˗eu meh.—Yoˇhaˬ 15:13, 14-ahˇ gui.
Naꞈ suiˇ ni dzaw
Yeˬsuˇ aˬ joˆ˗ehˇ gʼeh˗eu tiˬ gʼaˬ pyeuꞈ˗eu gaˇ kawˆ˗ahˇ heu naˆ maˬ tseˇ haw˗awˇ, aˬ dui jiˇ aˬ yawꞈ loꞈ˗ehˇ nui gaˬ ahˇ˗awˇ tsawˇ tsiˇ maˬ tsiˇ˗eu tsawˇ haˬ aˬ joˆ˗ehˇ pyeuꞈ nya˗eu nga lehˇ haw.
4. Yeˬsuˇ aˬ yawꞈ˗euˬ Aˬda˗ahˇ gaˬ
Aˬ dui Miˬyehˇ˗ahˇ gaˬ˗eu lehˇ aˬ joˆ˗ehˇ mˇ doˆ laꞈ nya˗eu gaˇ kawˆ, Yeˬsuˇ mˇ mehˬ yaꞈ˗euˬ meh. Luˇkaꞈ 6:12 hawˇ˗eu Yoˇhaˬ 15:10; 17:26-ahˇ gui. Jaˇliꞈ tiˬ deuˆ˗ahˇ kʼaˇ gui gʼaˬ ngeh, naˇ haˬ˗eu jeˬ heu˗ahˇ tiˬ poˆ naˇ haˬ.
-
Aˬ dui Yeˬsuˇ˗ahˇ dzaw geuꞈ˗eu laꞈ kʼoeˇ Yeˬhawˇbaˬ˗ahˇ gaˬ˗eu lehˇ aˬ joˆ˗ehˇ mˇ doˆ laꞈ nya˗eu nga?
Yeˬsuˇ mˬ taˆ Aˬda˗ahˇ gaˬ˗eu miˇ neh, guiˬ lahˬ shaˇ˗awˇ tiˬ kʼehˬ maˬ taˬ ngehˬ cawˬ
5. Yeˬsuˇ tsawˇ haˬ deuˬ loˬ˗eu jeˬ˗ahˇ ngehˬ gʼeh nehˬ
Yeˬsuˇ yawˬ ha˗euˬ gʼaˇ duˬ naˆ maˬ tseˇ, aˬ cawˬ˗euˬ gʼaˇ duˬ shaˇ noeˬ˗eu meh. Aˬ yawꞈ gʼaˬ doeˇ doeˇ ngeh kʼawꞈ, tsawˇ haˬ deuˬ˗ahˇ aˇ yamˬ biꞈ˗awˇ leh jeh˗awˇ caw ba nehˬ˗euˬ meh. Maˬkuˆ 6:30-44-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Heu gaˇ haw ngeh Yeˬsuˇ tsawˇ haˬ deuˬ˗ahˇ aˬ joˆ˗ehˇ ngehˬ gʼeh nehˬ˗euˬ nga?—Aˇ deuˆ 31, 34, 41 hawˇ˗eu 42˗ahˇ haw.
-
Yeˬsuˇ tsawˇ haˬ deuˬ˗ahˇ aˬ jeˬ miˇ neh caw ba˗euˬ nga?—Aˇ deuˆ 34˗ahˇ haw.
-
Yeˬsuˇ Yeˬhawˇbaˬ˗ahˇ dzaw geuꞈ˗eu miˇ neh, gaˇ kawˆ heu naˇ Yeˬhawˇbaˬ nehˬ˗ehˇ taꞈ leˇ˗awˇ aˬ jeˬ bi siˬ laꞈ˗eu nga?
-
Yeˬsuˇ tsawˇ haˬ deuˬ˗ahˇ ngehˬ gʼeh nehˬ gaˇ neh, aˬ dui aˬ jeˬ dzaw geuꞈ nya˗eu nga?
6. Yeˬsuˇ tsawˇ tsiˇ maˬ tsiˇ˗a
Yeˬsuˇ pyuˇ shuiˇ myawˬ gahˬ yaw kʼaˆ˗ehˇ maˬ jaˆ kʼawꞈ tsawˇ tsiˇ maˬ tsiˇ˗a. Aˬ dui˗ahˇ jiˇ tsawˇ tsiˇ taˬ tsiˇ lehˇ gʼaˬ biꞈ˗eu meh. Gʼaˬkʼehˇ 20:35-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬsuˇ˗euˬ dawˬ˗ahˇ haw ngeh, aˬ dui aˬ joˆ˗ehˇ laˬ kʼaˬ cehˇ nya˗eu nga?
Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Aˬ dui pyuˇ shuiˇ myawˬ gahˬ yaw kʼaˆ˗ehˇ maˬ jaˆ kʼawꞈ, biꞈ nya˗eu tiˬ jeˬ na naˇ aˬ jeˬ nga?
Nawˇ siˬ nya ma laˇ?
Aˬ dui Yeˬhawˇbaˬ˗ahˇ guiˬ lahˬ shaˇ ngeh, Yeˬsuˇ˗euˬ tsawˇ myahˇ laꞈ kʼoeˇ shaˇ lehˇ Jaˇliꞈ mehˬ˗eu meh. (Yoˇhaˬ 16:23, 24-ahˇ gui.) Heu loꞈ˗ehˇ jahˇ naˇ Yeˬhawˇbaˬ nehˬ˗ehˇ cawˬ cawˬ nya laˇ ni, Yeˬsuˇ neh mˇ nehˬ laꞈ˗euˬ jeˬ˗ahˇ guiˬ lahˬ huiˬ˗eu jeˬ pyeuꞈ meh.
Tiˬ gʼaˬ na ehˇ˗eu: “Miˬyehˇ aˬ dui˗euˬ shaˬ zahˬ˗ahˇ myaˆ haw maˬ cawˬ˗a.”
-
Yeˬsuˇ aˬ yawꞈ˗euˬ Aˬda˗ahˇ dzaw geuꞈ˗eu miˇ neh, aˬ yawꞈ neh mˇ˗euˬ jeˬ heu naˇ, Yeˬhawˇbaˬ aˬ dui˗ahˇ ngehˬ gʼeh˗eu lehˇ aˬ joˆ˗ehˇ siˬ laˇ˗eu nga?
Kawˆ shawˆ
Yeˬsuˇ Yeˬhawˇbaˬ˗ahˇ gaˬ˗awˇ tsawˇ haˬ zaˬ˗ahˇ jiˇ gaˬ˗eu meh. Aˬ yawꞈ aˬ yawꞈ˗euˬ Aˬda˗ahˇ duˇ˗eu miˇ neh, aˬ dui Yeˬsuˇ˗ahˇ ngehˬ˗ehˇ siˬ nya laˇ naˇ ngehˬ˗ehˇ, Yeˬhawˇbaˬ˗ahˇ jiˇ siˬ nya dzehˬ laˇ˗eu meh.
Ja sawˇ poˆ˗eu
-
Aˬ dui Yeˬsuˇ loꞈ˗ehˇ Yeˬhawˇbaˬ˗ahˇ gaˬ˗eu lehˇ aˬ joˆ˗ehˇ mˇ doˆ laꞈ nya˗eu nga?
-
Aˬ dui Yeˬsuˇ loꞈ˗ehˇ tsawˇ haˬ deuˬ˗ahˇ gaˬ˗eu lehˇ aˬ joˆ˗ehˇ mˇ doˆ laꞈ nya˗eu nga?
-
Yeˬsuˇ˗euˬ seuˆ dzeuꞈ aˇ gʼehˇ deuˬ laꞈ kʼoeˇ neh nawˬ˗ahˇ kʼaˇ ya leˇ˗eu aˬ geu jeˬ nya?
Haw lahˬ
Aˬ dui dzaw geuꞈ nya˗eu Yeˬsuˇ˗euˬ seuˆ dzeuꞈ aˇ gʼehˇ tiˬ hmˬ na˗ahˇ ja sawˇ.
“Yeˬsuˇ˗ahˇ dzaw geuꞈ˗awˬ” (Yeˬsuˇ—Gaˇ ma, Yaw tsaˬ yaw dawˇ, Dehꞈ˗eu jeˬ, sahˬ boꞈ myaˆ pyawˬ 317)
Aˬ dui guiˬ lahˬ shaˇ ngeh Yeˬsuˇ˗euˬ tsawˇ myahˇ˗ahˇ gʼoe˗eu heu naˇ, aˬ jeˬ miˇ neh aˇ yeˇ huiˬ˗eu nga lehˇ haw.
Yeˬsuˇ˗euˬ aˇ gʼehˇ aˬ joˆ˗ehˇ gʼeh˗eu lehˇ Jaˇliꞈ laꞈ kʼoeˇ ehˇ taˬ ngaˬ˗aˇ laˬ?
“Yeˬsuˇ˗euˬ aˇ gʼehˇ aˬ joˆ˗ehˇ gʼeh˗eu nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)
Yeˬsuˇ neh zaˬ miˬ aˬ buˇ deuˬ˗ahˇ mˇ nehˬ˗euˬ jeˬ˗ahˇ neh, aˬ dui aˬ jeˬ ya siˬ˗euˬ nga?
Miˬyehˇ neh bi ngehˬ gʼeh˗eu deuˬ yaw zeu baw˗eu jeˬ˗ahˇ za (Loꞈ˗eu nymˇgoˇ, 2012 Gʼoeˬ siˬ ba la 1)
