Dzaw deuˆ 23
Iˇ cuꞈ shawˇ˗eu lehˇ noeˬ tsoˆ taˬ˗eu heu naˇ, aˇ yeˇ huiˬ dui dui
Yeˬsuˇ Ka li zaˬ deuˬ iˇ cuꞈ ya shawˇ meh lehˇ mehˬ˗eu meh. (Maꞈtehˬ 28:19, 20-ahˇ gui.) Iˇ cuꞈ shawˇ˗eu heu naˇ aˬ jeˬ nga? Iˇ cuꞈ shawˇ nya˗eu gʼaˇ duˬ aˬ jeˬ jeˇ ya jahˇ˗eu nga?
1. Iˇ cuꞈ shawˇ˗eu heu naˇ aˬ jeˬ nga?
“Iˇ cuꞈ shawˇ˗eu” lehˇ ehˇ˗eu heu dawˬ naˇ, iˇ cuꞈ˗ahˇ “dehˬ nuiꞈ˗eu” lehˇ ehˇ˗eu Gaˬliˇ dawˬ˗ahˇ neh oe˗euˬ meh. Yeˬsuˇ Yawˇdaˬ lawˇ baˬ˗ahˇ iˇ cuꞈ shawˇ ngeh, mawˇ do do lah ni iˇ cuꞈ˗ahˇ nuiꞈ iˇ˗awˇ ‘iˇ cuꞈ laꞈ kʼoeˇ neh doˆ laˇ˗euˬ’ meh. (Maˬkuˆ 1:9, 10) Teu loꞈ˗ehˇ duˇ ni Ka li zaˬ maˇ diˇ deuˬ jiˇ iˇ cuꞈ shawˇ ngeh mawˇ do do lah ni iˇ cuꞈ˗ahˇ ya dehˬ nuiꞈ˗eu meh.
2. Iˇ cuꞈ shawˇ˗eu heu naˇ, aˬ jeˬ˗ahˇ bi siˬ bi mawˇ˗eu nga?
Tiˬ gʼaˬ paˬ iˇ cuꞈ shawˇ ngeh, aˬ yawꞈ Yeˬhawˇbaˬ Miˬyehˇ˗ahˇ a nehˬ dzeuˇ˗euˬ lehˇ tsawˇ haˬ deuˬ˗ahˇ bi siˬ bi mawˇ˗eu jeˬ pyeuꞈ meh. Yeˬhawˇbaˬ˗ahˇ aˬ joˆ˗ehˇ ya a nehˬ˗eu nga? Iˇ cuꞈ shawˇ˗eu lehˇ gʼeh˗eu deuˬ iˇ cuꞈ maˬ shawˇ mi naˆ˗ehˇ yawˬ ha tiˬ gʼaˬ tehꞈ˗ehˇ jawˇ˗awˇ guiˬ lahˬ shaˇ ngeh, Yeˬhawˇbaˬ˗ahˇ mˬ maˬ maˬ byaˆ zaˇ ziˇ nawˬ˗euˬ gaˇ mˇ ma, nawˇ tiˬ gʼaˬ˗ahˇ tehꞈ˗ehˇ uˬ duˬ tahˬ ma, dehꞈ ziˇ laꞈ kʼoeˇ nawˇ nui kʼahˇ shiˇ˗eu jeˬ˗ahˇ naˬ ba tiꞈ taˬ ma lehˇ saˇ jaˇ ya dzaˬ˗eu meh. Kʼoeˇ naˇ Yeˬsuˇ neh mehˬ˗euˬ jeˬ hawˇ˗eu mˇ˗euˬ jeˬ˗ahˇ dehꞈ caw nya˗eu gʼaˇ duˬ, ‘yawˬ ha˗euˬ nui kʼahˇ ya byehˇ dzeh˗awˇ Yeˬsuˇ˗euˬ mehˬ nah’ caw teh˗eu lehˇ ya noeˬ tsehˆ˗eu meh. (Maꞈtehˬ 16:24) Yeˬhawˇbaˬ˗ahˇ a nehˬ˗awˇ iˇ cuꞈ shawˇ˗eu heu naˇ, Yeˬhawˇbaˬ nehˬ˗ehˇ gʼoeˇ dzehˬ laˇ˗eu uˬ taꞈ, aˬ yawꞈ˗ahˇ uˬ duˬ tahˬ˗eu deuˬ nehˬ˗ehˇ jiˇ gʼoeˇ laˇ˗eu meh.
3. Iˇ cuꞈ shawˇ˗eu aˇ tiˆ˗ahˇ le keuˆ nya˗eu gʼaˇ duˬ, aˬ jeˬ jeˇ ya jahˇ˗eu nga?
Aˬ dui iˇ cuꞈ maˬ shawˇ mi naˆ˗ehˇ Yeˬhawˇbaˬ˗euˬ gaˇ kawˆ ya siˬ nya˗awˇ, aˬ yawꞈ˗ahˇ nui jah ya ahˇ˗eu meh. (Heˬbyehˇ 11:6-ahˇ gui.) Aˬ dui zaˬ siˬ nui gahˇ hawˇ˗eu nui jah ngehˬ˗ehˇ myaˬ laˇ naˇ ngehˬ˗ehˇ, Yeˬhawˇbaˬ˗ahˇ gaˬ dzehˬ laˇ˗awˇ aˬ yawꞈ˗euˬ gaˇ kawˆ aˬ cawˬ˗ahˇ ja nehˬ mawꞈ laˇ˗eu uˬ taꞈ, aˬ yawꞈ˗euˬ zahˇ dawˬ˗ahˇ jiˇ dehꞈ caw mawꞈ laˇ˗eu meh. (2 Tiˆmoˇseˬ 4:2; 1 Yoˇhaˬ 5:3) Kʼoeˇ naˇ, Yeˬhawˇbaˬ Miˬyehˇ ‘bi dehꞈ mawꞈ˗eu loꞈ˗ehˇ dehꞈ nya laˇ˗awˇ aˬ yawꞈ nui kʼahˇ shiˇ˗eu jeˬ˗ahˇ mˇ nya laˇ’ ngeh, aˬ dui˗euˬ dehꞈ ziˇ Miˬyehˇ˗ahˇ a nehˬ˗awˇ iˇ cuꞈ shawˇ mawꞈ laˇ˗eu meh.—Gawˇlawˇsehˇ 1:9, 10. a
Naꞈ suiˇ ni dzaw
Yeˬsuˇ neh iˇ cuꞈ shawˇ˗euˬ jeˬ˗ahˇ neh aˬ dui aˬ jeˬ dzaw geuꞈ nya˗eu nga? Iˇ cuꞈ shawˇ˗eu aˇ yeˇ huiˬ˗eu aˇ tiˆ heu˗ahˇ le keuˆ nya ni, aˬ dui aˬ jeˬ jeˇ ya jahˇ˗eu nga lehˇ haw.
4. Aˬ dui Yeˬsuˇ neh iˇ cuꞈ shawˇ˗euˬ jeˬ˗ahˇ neh dzaw geuꞈ nya
Yeˬsuˇ neh iˇ cuꞈ shawˇ˗euˬ gaˇ kawˆ˗ahˇ yaw duˬ duˬ˗ehˇ siˬ nya˗eu gʼaˇ duˬ, Maꞈtehˬ 3:13-17-ahˇ gui. Kʼoeˇ naˇ, naˇ haˬ˗eu jeˬ heu˗ahˇ ja sawˇ.
-
Yeˬsuˇ iˇ cuꞈ shawˇ ngeh, zaˬ nahˬ tehꞈ nga siˬ laˬ?
-
Yeˬsuˇ iˇ cuꞈ aˬ joˆ˗ehˇ shawˇ˗euˬ nga? Iˇ cuꞈ byaˆ shehˬ˗euˬ tehꞈ nga loˇ?
Yeˬsuˇ iˇ cuꞈ shawˇ gʼaˬ˗awˇ miˇ tsaˬ kʼoeˇ taˆ Miˬyehˇ neh biꞈ˗euˬ gaˇ˗ahˇ mˇ dahˬ beh˗euˬ meh. Luˇkaꞈ 3:21-23 hawˇ˗eu Yoˇhaˬ 6:38-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬsuˇ iˇ cuꞈ shawˇ gʼaˬ naˇ, dehꞈ ziˇ laꞈ kʼoeˇ aˬ jeˬ˗euˬ gaˇ˗ahˇ naˬ ba tiꞈ taˬ˗awˇ mˇ˗euˬ nga?
5. Nawˇ jiˇ iˇ cuꞈ shawˇ˗eu aˇ tiˆ˗ahˇ le keuˆ nya
Aˬ dui Miˬyehˇ˗ahˇ a nehˬ˗awˇ iˇ cuꞈ shawˇ˗eu heu naˇ, pyeuꞈ leˇ nya˗eu maˬ siˬ ngaˇ lehˇ kʼahˬ lahˇ nya meh. Ehˇ kʼawꞈ aˬ dui Yeˬhawˇbaˬ˗euˬ gaˇ kawˆ dzaw daˆ leꞈ˗awˇ aˬ yawꞈ˗ahˇ yaw muiˬ˗ehˇ siˬ nya laˇ naˇ, aˇ yeˇ huiˬ˗eu gaˇ kawˆ heu˗ahˇ noeˬ tsehˆ peuˬ laˇ˗eu meh. Teu loꞈ˗ehˇ jahˇ˗euˬ tiˬ gʼaˬ na˗euˬ gaˇ kawˆ˗ahˇ haw˗eu gʼaˇ duˬ, biˬdiˬoˬ pah.
Yoˇhaˬ 17:3 hawˇ˗eu Yaˬkoˆ 1:5-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Iˇ cuꞈ shawˇ nya laˇ˗eu gʼaˇ duˬ, aˬ jeˬ ya jahˇ˗eu nga?
-
1. Aˬ dui Yeˬhawˇbaˬ˗ahˇ nawˬ˗euˬ gaˇ mˬ maˬ maˬ byaˆ zaˇ ziˇ mˇ ma lehˇ guiˬ lahˇ shaˇ ngeh, aˬ yawꞈ˗ahˇ a nehˬ˗eu jeˬ pyeuꞈ
-
2. Iˇ cuꞈ shawˇ ngeh, tsawˇ haˬ deuˬ˗ahˇ aˬ dui Miˬyehˇ˗ahˇ a nehˬ dzeuˇ˗euˬ lehˇ bi mawˇ˗eu jeˬ pyeuꞈ
6. Iˇ cuꞈ shawˇ˗euˬ deuˬ Yeˬhawˇbaˬ˗euˬ nymˇ jiˇ laꞈ kʼoeˇ˗euˬ tiˬ gʼaˬ pyeuꞈ laˇ
Aˬ dui iˇ cuꞈ shawˇ ngeh, miˇ tsaˬ kʼoeˇ taˆ mehˬ bawˬ gm˗eu huiˬ˗eu nymˇ jiˇ laꞈ kʼoeˇ˗euˬ tiˬ gʼaˬ pyeuꞈ laˇ˗eu meh. Iˇ cuꞈ shawˇ dzeuˇ˗euˬ Yeˬhawˇbaˬ˗euˬ Saˇ kiˇ deuˬ aˬ gaˇ jawˇ˗awˇ aˬ joˆ˗ehˇ dehꞈ yaꞈ˗euˬ kʼawꞈ, aˬ yawꞈ maꞈ jah˗eu jeˬ hawˇ˗eu dehꞈ caw mˇ caw luꞈ˗eu jeˬ tiˬ gaˇ duˇ leˇ˗eu meh. Ja ceuˬ 25:14 hawˇ˗eu 1 Beˬtuˆluˆ 2:17-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Iˇ cuꞈ shawˇ˗eu heu naˇ, Yeˬhawˇbaˬ hawˇ˗eu aˬ yawꞈ˗ahˇ uˬ duˬ tahˬ deuˬ nehˬ˗ehˇ aˬ joˆ˗ehˇ bi gʼoeˇ leˇ˗eu nga?
Tiˬ gʼaˬ na ehˇ˗eu: “Ngaˬ˗ahˇ iˇ cuꞈ shawˇ˗eu maˬ dah laˇ nyaˬ siˬ.”
-
Nawˇ jiˇ teu loꞈ˗ehˇ noeˬ luꞈ˗eu tiˬ gʼaˬ pyeuꞈ naˇ, iˇ cuꞈ shawˇ˗eu aˇ tiˆ˗ahˇ le keuˆ nya ni leh jeh mawꞈ miˇ˗a laˬ?
Kawˆ shawˆ
Ka li zaˬ deuˬ iˇ cuꞈ ya shawˇ meh lehˇ Yeˬsuˇ mehˬ˗eu meh. Aˬ dui iˇ cuꞈ shawˇ nya˗eu gʼaˇ duˬ, Yeˬhawˇbaˬ˗ahˇ nui jah ahˇ laˇ ni ya leh jeh˗awˇ, aˬ yawꞈ˗euˬ zahˇ dawˬ˗ahˇ ya dehꞈ caw˗eu uˬ taꞈ, aˬ dui˗euˬ dehꞈ ziˇ aˬ yawꞈ˗ahˇ ya a nehˬ˗eu meh.
Ja sawˇ poˆ˗eu
-
Iˇ cuꞈ shawˇ˗eu heu naˇ, aˬ jeˬ˗ahˇ ehˇ mawꞈ˗eu nga? Iˇ cuꞈ shawˇ˗eu heu naˇ, aˬ jeˬ miˇ neh aˇ yeˇ huiˬ˗eu nga?
-
A nehˬ˗eu jeˬ hawˇ˗eu iˇ cuꞈ shawˇ˗eu jeˬ heu naˇ, aˬ joˆ˗ehˇ taꞈ˗eu nga?
-
A nehˬ˗awˇ iˇ cuꞈ shawˇ nya laˇ˗eu gʼaˇ duˬ, jeˬ hu aˬ jeˬ jeˇ ya jahˇ˗eu nga?
Haw lahˬ
Iˇ cuꞈ shawˇ˗eu heu naˇ, aˬ jeˬ˗ahˇ ehˇ mawꞈ˗awˇ, aˬ jeˬ˗ahˇ maˬ ehˇ mawꞈ˗eu nga lehˇ haw.
“Iˇ cuꞈ shawˇ˗eu heu naˇ, aˬ jeˬ nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)
Iˇ cuꞈ shawˇ˗eu aˇ tiˆ˗ahˇ le keuˆ nya ni aˬ jeˬ jeˇ ya jahˇ˗eu nga lehˇ haw.
Zaˬ yo aˬ li tiˬ gʼaˬ aˬ jeˬ miˇ neh iˇ cuꞈ shawˇ mawꞈ˗eu nga lehˇ haw.
Iˇ cuꞈ shawˇ˗eu heu naˇ aˬ jeˬ miˇ neh aˇ yeˇ huiˬ dui dui˗eu nga lehˇ haw˗awˇ, iˇ cuꞈ shawˇ nya ni aˬ joˆ˗ehˇ ya lehˬ hmˬ˗eu nga lehˇ haw.
a Zahˇ yawˬ zahˇ yawˬ tawˬ ngeh iˇ cuꞈ shawˇ dzeuˇ˗euˬ deuˬ kʼawꞈ, iˇ cuꞈ paˇ ya shawˇ paˇ˗eu meh. Aˬ jeˬ miˇ neh nga? Zahˇ teu deuˬ naˇ, maˇ maˇ ni Jaˇliꞈ mehˬ˗eu jeˬ maˬ mehˬ˗eu miˇ neh meh.—Gʼaˬkʼehˇ 19:1-5 hawˇ˗eu Dzaw deuˆ 13˗ahˇ haw.
