Shiˇ˗eu jeˬ aˬ dui˗euˬ nui ma˗ahˇ zawˇ˗ehˇ deuˬ laˇ˗awˇ bi noeˬ shaˬ laꞈ dui dui˗eu meh. Teu miˇ neh Jaˇliꞈ shiˇ˗eu jeˬ˗ahˇ muiˇ˗eu gʼaˬ lehˇ kuˇ taˬ˗euˬ meh. (1 Gawˇliˬtu 15:26) Gʼawˬ myahˇ maˬ gʼeh˗ehˇ Yeˬhawˇbaˬ muiˇ˗eu gʼaˬ pyeuꞈ˗eu shiˇ˗eu jeˬ˗ahˇ laˆ cawˆ meh lehˇ aˬ dui dzaw deuˆ 27˗ahˇ ya dzaw˗euˬ ma. Toˆ˗ehˇ naˇ shiˇ dzeuˇ taˬ˗euˬ deuˬ˗ahˇ aˬ jeˬ pyeuꞈ laˇ˗eu nga? Aˬ dui heu kawˆ laꞈ kʼoeˇ Yeˬhawˇbaˬ shiˇ dzeuˇ taˬ˗euˬ gʼawˬ mya lam gʼaˬ˗ahˇ bi gʼoꞈ dehꞈ laˇ˗awˇ, mˬ maˬ maˬ byaˆ zaˇ ziˇ laˬ kʼaˬ tiˬ cehˇ bi dehꞈ ma lehˇ ehˇ˗eu muiˬ dui dui˗eu saˇ jaˇ dawˬ˗ahˇ ja sawˇ ma. Heu maˇ diˇ pyeuꞈ leˇ nya ngaˇ laˬ? Shiˇ dzeuˇ˗euˬ deuˬ gʼoꞈ dehꞈ laˇ ngeh, mˬ kʼoeˇ taˆ ya jawˇ˗eu nga laˬ, maˬ ngeuˇ naˇ miˇ tsaˬ kʼoeˇ taˆ ya jawˇ˗eu nga loˇ?

1. Yeˬhawˇbaˬ shiˇ dzeuˇ˗euˬ aˬ dui gaˬ˗eu deuˬ˗ahˇ, aˬ jeˬ jahˇ nehˬ mawꞈ˗eu nga?

Yeˬhawˇbaˬ shiˇ dzeuˇ taˬ˗euˬ deuˬ˗ahˇ tiˬ poˆ paˇ bi gʼoꞈ dehꞈ laˇ mawꞈ˗eu meh. Miˬyehˇ˗ahˇ saˇ jaˇ ziꞈ˗eu Yawˇbaˆ lehˇ kuˇ˗eu zaˬ yo aˬ li tiˬ gʼaˬ, aˬ yawꞈ shiˇ˗euˬ kʼawꞈ, Miˬyehˇ aˬ yawꞈ˗ahˇ maˬ ngehˇ byoˆ˗a lehˇ jah˗eu meh. Aˬ yawꞈ Miˬyehˇ˗ahˇ “Nawˇ ngaˬ˗ahˇ kuˇ naˇ [lmˬ bymˇ laꞈ kʼoeˇ neh] ngaˇ oˬ toˬ ma” lehˇ ehˇ nehˬ˗euˬ meh.—Yawˇbaˆ 14:13-15-ahˇ gui.

2. Shiˇ˗euˬ deuˬ paˇ gʼoꞈ dehꞈ laˇ nya˗eu lehˇ aˬ dui aˬ joˆ˗ehˇ siˬ nya˗eu nga?

Yeˬsuˇ miˇ tsaˬ kʼoeˇ taˆ jawˇ ngeh, Miˬyehˇ aˬ yawꞈ˗ahˇ shiˇ˗euˬ tsawˇ haˬ˗ahˇ laˆ dehꞈ nya˗eu baoˬ biꞈ nehˬ˗euˬ meh. Yeˬsuˇ 12 kʼoꞈ kʼawˆ laˇ˗euˬ aˬ buˇ zaˬ tiˬ gʼaˬ˗ahˇ laˆ dehꞈ nehˬ˗awˇ, miˬ coeˬ miˬ ma tiˬ gʼaˬ˗euˬ aˬ li˗ahˇ jiˇ laˆ dehꞈ nehˬ˗euˬ meh. (Maˬkuˆ 5:41, 42; Luˇkaꞈ 7:12-15) Aˇ nah naˇ Yeˬsuˇ˗euˬ cawˬ Laˬzaˬluˇ shiˇ˗euˬ meh. Laˬzaˬluˇ shiˇ˗awˇ baꞈ pahˬ˗euˬ oeˬ nah byah laˇ˗euˬ kʼawꞈ, Yeˬsuˇ aˬ yawꞈ˗ahˇ laˆ dehꞈ nehˬ˗euˬ meh. Yeˬsuˇ Miˬyehˇ˗ahˇ guiˬ lahˬ shaˇ˗awˇ, “Laˬzaˬluˇ˗oˇ, doˆ le˗awˬ” lehˇ yaw kʼaˆ˗ehˇ guˇ ngeh, “Laˬzaˬluˇ doˆ le˗euˬ meh.” Aˬ yawꞈ gʼoꞈ dehꞈ laˇ˗euˬ meh. (Yoˇhaˬ 11:43, 44) Laˬzaˬluˇ˗euˬ nymˇ jiˇ hawˇ˗eu aˬ yawꞈ˗euˬ cawˬ deuˬ, laˬ kʼaˬ aˇ naˆ ni cehˇ paˬ nga lehˇ shaˇ noeˬ haw sheˇ.

3. Shiˇ dzeuˇ˗euˬ aˬ dui gaˬ˗eu deuˬ aˬ jeˬ noeˬ tmˬ kʼaˇ za˗eu nga?

Shiˇ dzeuˇ˗euˬ deuˬ˗ahˇ “paˇ bi gʼoꞈ dehꞈ laˇ tehꞈ˗a” lehˇ Jaˇliꞈ laꞈ kʼoeˇ saˇ jaˇ dzaˬ taˬ˗euˬ meh. (Gʼaˬkʼehˇ 24:15) Gaˇ hu Yeˬsuˇ neh laˆ dehꞈ nehˬ˗euˬ deuˬ mˬ kʼoeˇ taˆ ya jawˇ leˇ˗euˬ maˬ ngeuˇ˗a. (Yoˇhaˬ 3:13) Aˬ yawꞈ maꞈ miˇ tsaˬ kʼoeˇ taˆ ya gʼoꞈ dehꞈ laˇ˗euˬ miˇ neh laˬ kʼaˬ cehˇ˗eu meh. Teu gaˇ duˇ ni gʼawˬ myahˇ maˬ gʼeh˗ehˇ Yeˬsuˇ gʼawˬ mya lam gʼaˬ˗ahˇ bi gʼoꞈ dehꞈ laˇ˗awˇ, miˇ tsaˬ kʼoeˇ taˆ Baˬlaˬdiˇsuˆ˗ahˇ mˬ maˬ maˬ byaˆ zaˇ ziˇ laˬ kʼaˬ tiˬ cehˇ bi jawˇ˗eu meh. Shiˇ dzeuˇ taˬ˗euˬ deuˬ˗ahˇ tsawˇ haˬ zaˬ ngehˇ byoˆ˗euˬ kʼawꞈ, Miˬyehˇ neh noeˬ taˬ˗euˬ shiˇ dzeuˇ˗euˬ tsawˇ haˬ dawˬ tawˆ luꞈ˗ahˇ bi gʼoꞈ dehꞈ laˇ meh lehˇ Yeˬsuˇ ehˇ˗eu meh.—Yoˇhaˬ 5:28, 29.

 Naꞈ suiˇ ni dzaw

4. Yeˬsuˇ shiˇ˗euˬ tsawˇ haˬ˗ahˇ laˆ dehꞈ nehˬ nya

Yeˬsuˇ aˬ yawꞈ˗euˬ cawˬ Laˬzaˬluˇ˗euˬ gʼaˇ duˬ aˬ jeˬ jahˇ nehˬ˗euˬ nga lehˇ haw. Yoˇhaˬ 11:14, 38-44-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Laˬzaˬluˇ maˇ diˇ shiˇ˗euˬ lehˇ aˬ joˆ˗ehˇ siˬ laˇ˗eu nga?—Aˇ deuˆ 39˗ahˇ haw.

• Laˬzaˬluˇ mˬ kʼoeˇ taˆ jawˇ leˇ˗euˬ jeˬ miˇ, Yeˬsuˇ aˬ yawꞈ˗ahˇ miˇ tsaˬ kʼoeˇ taˆ tiˬ poˆ paˇ kuˇ ka leꞈ paˬ˗ehˇ gʼeh ngaˇ laˬ?

Biˬdiˬoˬ pah.

5. Tsawˇ haˬ gʼawˬ mya ni tiˬ poˆ paˇ ya gʼoꞈ dehꞈ laˇ

Ja ceuˬ 37:29 hawˇ˗eu Maꞈtehˬ 5:5-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Tsawˇ haˬ gʼawˬ mya lam gʼaˬ gʼoꞈ dehꞈ laˇ ngeh, aˬ yawꞈ maꞈ aˬ gaˇ ya jawˇ˗eu nga?

Yeˬsuˇ Yeˬhawˇbaˬ˗ahˇ uˬ duˬ tahˬ˗eu deuˬ˗ahˇ tehꞈ˗ehˇ maˬ ngeuˇ˗eu, tsawˇ haˬ gʼawˬ mya ni˗ahˇ laˆ dehꞈ nehˬ˗eu meh. Gʼaˬkʼehˇ 24:15-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Nawˇ aˬ suˇ suˇ gʼaˬ˗ahˇ paˇ bi gʼoꞈ dehꞈ laˇ mawꞈ nya?

• Gʼoꞈ dehꞈ laˇ meh lehˇ noeˬ tmˬ˗eu jeˬ, Piˇliˇsaꞈtiꞈ˗euˬ aˬ da aˬ ma˗ahˇ nui ma aˬ joˆ˗ehˇ bi saˇ laˇ˗awˇ gʼaˬ aˬ joˆ˗ehˇ bi ahˇ laˇ˗euˬ nga?

 Kawˆ shawˆ

Shiˇ˗euˬ tsawˇ haˬ gʼawˬ mya lam gʼaˬ˗ahˇ bi gʼoꞈ dehꞈ laˇ meh lehˇ Jaˇliꞈ laꞈ kʼoeˇ saˇ jaˇ dzaˬ taˬ˗euˬ meh. Yeˬhawˇbaˬ shiˇ˗euˬ tsawˇ haˬ˗ahˇ tiˬ poˆ paˇ bi gʼoꞈ dehꞈ laˇ mawꞈ˗awˇ, Yeˬsuˇ˗ahˇ shiˇ˗euˬ tsawˇ haˬ˗ahˇ laˆ dehꞈ nya˗eu baoˬ biꞈ nehˬ taˬ˗euˬ meh.

Ja sawˇ poˆ˗eu

• Yeˬhawˇbaˬ hawˇ˗eu Yeˬsuˇ shiˇ˗euˬ tsawˇ haˬ deuˬ˗ahˇ bi gʼoꞈ dehꞈ laˇ˗eu gaˇ kawˆ˗ahˇ aˬ joˆ˗ehˇ noeˬ˗eu nga?

• Gʼawˬ mya lam gʼaˬ gʼoꞈ dehꞈ laˇ ngeh aˬ gaˇ ya jawˇ˗eu nga? Mˬ kʼoeˇ taˆ laˬ? Miˇ tsaˬ kʼoeˇ taˆ laˬ? Nawˬ˗ahˇ aˬ jeˬ miˇ neh teu loꞈ˗ehˇ noeˬ nya?

• Nawˇ gaˬ˗eu deuˬ tiˬ poˆ paˇ gʼoꞈ dehꞈ laˇ meh lehˇ aˬ jeˬ miˇ neh jah nya?