Dzaw deuˆ 34
Yeˬhawˇbaˬ˗ahˇ gaˬ˗eu lehˇ aˬ joˆ˗ehˇ mˇ doˆ laꞈ nya˗eu nga?
Jaˇliꞈ dzaw dahˬ beh laˇ ngeh naˆ maˬ tseˇ, nymˬ˗mˇ nawˬ˗ahˇ Yeˬhawˇbaˬ Miˬyehˇ˗ahˇ gaˬ dzehˬ laˇ˗euˬ maˬ ngeuˇ nya loˇ? Aˬ yawꞈ nehˬ˗ehˇ heu naˆ maˬ tseˇ gʼoeˇ dzehˬ leˇ mawꞈ miˇ˗a laˬ? Yeˬhawˇbaˬ nawˇ aˬ yawꞈ˗ahˇ gaˬ gaˇ ngehˬ˗ehˇ ya mawˇ naˇ ngehˬ˗ehˇ, aˬ yawꞈ jiˇ ni nawˬ˗ahˇ gaˬ dzehˬ laˇ˗awˇ ngehˬ gʼeh nehˬ meh lehˇ noeˬ taˬ luꞈ˗uˇ. Toˆ˗ehˇ naˇ nawˇ Yeˬhawˇbaˬ˗ahˇ gaˬ˗eu lehˇ aˬ joˆ˗ehˇ mˇ doˆ laꞈ nya˗eu nga?
1. Aˬ dui Yeˬhawˇbaˬ˗ahˇ gaˬ˗eu lehˇ aˬ joˆ˗ehˇ bi mawˇ nya˗eu nga?
Aˬ dui Yeˬhawˇbaˬ˗euˬ ehˇ dawˬ naˇ haˬ˗eu heu neh aˬ yawꞈ˗ahˇ gaˬ˗eu lehˇ bi mawˇ nya˗eu meh. (1 Yoˇhaˬ 5:3-ahˇ gui.) Yeˬhawˇbaˬ aˬ yawꞈ˗euˬ ehˇ dawˬ naˇ haˬ lehˇ tiˬ gʼaˬ˗ahˇ˗iˬ maˬ ka tiˇ˗a. Aˬ yawꞈ aˬ dui yawˬ gʼaˬ na luꞈ˗ahˇ aˬ yawꞈ˗euˬ ehˇ dawˬ naˇ haˬ˗eu laˬ, maˬ naˇ haˬ˗eu laˬ lehˇ yawˬ ha naꞈ˗i bi tseˇ˗eu meh. Aˬ jeˬ miˇ neh nga? Aˬ yawꞈ aˬ dui˗ahˇ ‘nui ma laꞈ kʼoeˇ neh bi naˇ haˬ’ mawꞈ˗eu miˇ neh meh. (Loˇmaˆ 6:17) Heu naˇ aˬ yawꞈ˗euˬ ehˇ dawˬ maˬ naˇ haˬ˗ehˇ maˬ geuꞈ nya˗eu miˇ neh maˬ ngeuˇ˗eu, aˬ yawꞈ˗ahˇ gaˬ˗eu miˇ neh naˇ haˬ gaˇ ehˇ mawꞈ˗eu meh. Paˇ dmˬ heu dmˬ laꞈ kʼoeˇ˗euˬ Aˇ bymˇ 3 hawˇ˗eu 4 naˇ, aˬ dui Yeˬhawˇbaˬ˗ahˇ gaˬ˗eu lehˇ bi mawˇ˗eu gʼaˇ duˬ, aˬ yawꞈ nui ma tsaˬ˗eu jeˬ mˇ˗awˇ, aˬ yawꞈ maˬ ya leˇ˗eu jeˬ˗ahˇ yahˇ nya ni caw ba nehˬ laꞈ˗eu meh.
2. Yeˬhawˇbaˬ˗ahˇ gaˬ˗eu lehˇ mˇ doˆ laꞈ˗eu aˬ jeˬ miˇ neh yaw awˬ maˬ ngeuˇ nga?
‘Tsawˇ muiˬ shaˬ zahˬ myaˬ˗eu meh.’ (Ja ceuˬ 34:19) Aˬ dui yawˬ ha˗euˬ maˬ byah kuꞈ˗eu jeˬ˗ahˇ ya deuˆ ceh ceh˗eu uˬ taꞈ, mˇ dzaˬ kʼawꞈ dawˇ˗eu paw shaˬ˗eu kʼawꞈ pyeuꞈ nya˗awˇ, maˬ tsaˬ maˬ dawˇ˗eu jeˬ hawˇ˗eu shaˬ zahˬ nui jeˬ˗ahˇ ya tahˬ puˬ˗eu kʼawꞈ pyeuꞈ nya meh. Maˬ muiˬ˗eu jeˬ mˇ˗eu˗aˬ yaw awˬ gaˇ duˇ˗eu miˇ neh, aˬ dui shaˬ zahˬ˗ahˇ ya tahˬ puˬ ngeh, Yeˬhawˇbaˬ bi mˇ mawꞈ˗eu jeˬ˗ahˇ mˇ˗eu yaw shaˬ nya lehˇ kʼawꞈ noeˬ laˇ nya meh. Ehˇ kʼawꞈ aˬ dui aˬ myah luꞈ Yeˬhawˇbaˬ˗euˬ ehˇ dawˬ naˇ haˬ naˇ, aˬ dui yawˬ jeˬ na luꞈ˗ahˇ naˆ maˬ tseˇ Yeˬhawˇbaˬ˗ahˇ gaˬ˗awˇ, aˬ yawꞈ˗ahˇ saˇ jaˇ ziꞈ˗eu lehˇ mˇ doˆ laꞈ˗eu jeˬ pyeuꞈ meh. Toˆ˗ehˇ jahˇ naˇ Yeˬhawˇbaˬ jiˇ aˬ dui˗ahˇ saˇ jaˇ ziꞈ˗awˇ, aˬ dui˗ahˇ tiˬ jawˇ˗iˬ maˬ byehˇ dzeh˗a.—Ja ceuˬ 18:25-ahˇ gui.
Naꞈ suiˇ ni dzaw
Yeˬhawˇbaˬ aˬ dui aˬ yawꞈ˗euˬ ehˇ dawˬ naˇ haˬ ngeh aˬ jeˬ miˇ neh laˬ kʼaˬ cehˇ˗eu nga lehˇ haw˗awˇ, aˬ yawꞈ˗ahˇ saˇ jaˇ ziꞈ daˆ leꞈ nya ni caw ba nehˬ˗eu aˬ jeˬ nga lehˇ jiˇ haw.
3. Saˬdaˬ nawˬ˗ahˇ ja bu
Yawˇbaˆ˗euˬ sahˬ boꞈ˗ahˇ haw ngeh Saˬdaˬ Yawˇbaˆ˗ahˇ ja bu˗eu tehꞈ˗ehˇ maˬ ngeuˇ˗eu, Yeˬhawˇbaˬ˗euˬ gaˇ mˇ mawꞈ˗eu yawˬ gʼaˬ na luꞈ˗ahˇ jiˇ ja bu˗eu lehˇ siˬ laˇ˗eu meh. Yawˇbaˆ 1:1, 6–2:10˗ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yawˇbaˆ Yeˬhawˇbaˬ˗euˬ ehˇ dawˬ naˇ haˬ˗eu heu naˇ, aˬ jeˬ miˇ neh nga lehˇ Saˬdaˬ ehˇ˗eu nga? —Yawˇbaˆ 1:9-11-ahˇ haw.
-
Nawˇ hawˇ˗eu tsawˇ haˬ yawˬ gʼaˬ na luꞈ nehˬ˗ehˇ taꞈ leˇ˗awˇ Saˬdaˬ aˬ jeˬ ehˇ˗eu nga?—Yawˇbaˆ 2:4-ahˇ haw.
Yawˇbaˆ 23:11-12-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yawˇbaˆ Yeˬhawˇbaˬ˗ahˇ maˇ diˇ gaˬ˗eu lehˇ aˬ joˆ˗ehˇ siˬ laˇ˗eu nga?
Yawˇbaˆ Yeˬhawˇbaˬ˗ahˇ gaˬ˗eu lehˇ saˇ jaˇ ziꞈ˗eu heu neh bi mawˇ
Aˬ dui saˇ jaˇ ziꞈ˗eu heu naˇ, Yeˬhawˇbaˬ˗ahˇ gaˬ˗eu lehˇ bi siˬ bi mawˇ
4. Yeˬhawˇbaˬ˗ahˇ laˬ kʼaˬ bi cehˇ
Dawˬdaˬ 27:11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Aˬ dui zaˬ siˬ tsawˇ gahˇ ahˇ˗eu tsawˇ haˬ pyeuꞈ˗awˇ Yeˬhawˇbaˬ˗euˬ ehˇ dawˬ naˇ haˬ naˇ, Yeˬhawˇbaˬ˗ahˇ aˬ joˆ˗ehˇ gʼeh leˇ˗eu nga? Aˬ jeˬ miˇ neh?
5. Nawˇ Yeˬhawˇbaˬ˗ahˇ saˇ jaˇ ziꞈ nya
Aˬ dui Yeˬhawˇbaˬ˗ahˇ gaˬ naˇ, aˬ cawˬ˗ahˇ aˬ yawꞈ˗euˬ gaˇ kawˆ ja nehˬ mawꞈ˗eu meh. Aˬ dui Yeˬhawˇbaˬ˗ahˇ saˇ jaˇ ziꞈ˗eu heu jiˇ, yaw awˬ maˬ ngeuˇ kʼawꞈ, aˬ yawꞈ˗euˬ ehˇ dawˬ˗ahˇ naˇ haˬ ni caw ba nehˬ laꞈ˗eu meh. Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Nawˇ aˬ cawˬ˗ahˇ Yeˬhawˇbaˬ˗euˬ gaˇ kawˆ ja nehˬ˗eu heu naˇ, yaw awˬ maˬ ngeuˇ nya lehˇ noeˬ haw maˬ loˇ?
-
Biˬdiˬoˬ heu˗ahˇ haw ngeh, guˆ˗eu nui ma˗ahˇ gʼaˬ leˇ nya ni Geˬsahˬ˗ahˇ caw ba nehˬ˗euˬ aˬ jeˬ nga?
Aˬ dui Yeˬhawˇbaˬ gaˬ˗eu jeˬ˗ahˇ gaˬ˗awˇ aˬ yawꞈ bye˗eu jeˬ˗ahˇ bye naˇ, Yeˬhawˇbaˬ˗ahˇ saˇ jaˇ ziꞈ˗eu awˬ dzehˬ laˇ˗eu meh. Ja ceuˬ 97:10-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Nawˬ neh dzaw laꞈ˗euˬ gaˇ kawˆ deuˬ˗ahˇ haw ngeh, Yeˬhawˇbaˬ aˬ jeˬ jeˇ˗ahˇ gaˬ˗awˇ aˬ jeˬ jeˇ˗ahˇ bye˗eu nga?
-
Yaw muiˬ jeˬ˗ahˇ gaˬ˗awˇ maˬ muiˬ˗eu jeˬ˗ahˇ bye nya ni aˬ joˆ˗ehˇ ya jahˇ˗eu nga?
6. Yeˬhawˇbaˬ˗euˬ ehˇ dawˬ naˇ haˬ˗eu heu aˬ dui˗ahˇ gaˇ dahˇ tsoeˬ
Yeˬhawˇbaˬ˗euˬ ehˇ dawˬ naˇ haˬ˗eu heu naˇ, aˬ myah luꞈ kʼaˇ muiˬ˗eu jeˬ pyeuꞈ meh. Iˇsaˬyaˇ 48:17, 18-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Nawˬ˗ahˇ Yeˬhawˇbaˬ aˬ dui˗euˬ gʼaˇ duˬ kʼaˇ muiˬ˗eu jeˬ˗ahˇ siˬ nya meh lehˇ jah miˇ˗a loˇ? Aˬ jeˬ miˇ neh teu loꞈ˗ehˇ jah nya?
-
Jaˇliꞈ hawˇ˗eu maˇ maˇ ni gʼeh˗eu Yeˬhawˇbaˬ Miˬyehˇ˗ahˇ ya siˬ nya laˇ˗euˬ heu, nawˬ˗euˬ gʼaˇ duˬ aˬ jeˬ jeˇ gaˇ dahˇ tsoeˬ nya?
Tiˬ gʼaˬ na ehˇ˗eu: “Aˬ dui aˬ jeˬ mˇ kʼawꞈ shaˇ kʼawꞈ, Miˬyehˇ myaˆ haw maˬ cawˬ˗a.”
-
Aˬ dui neh mˇ˗euˬ shaˇ˗euˬ jeˬ Yeˬhawˇbaˬ˗ahˇ laˬ kʼaˬ bi cehˇ leˇ nya˗eu loꞈ˗ehˇ nui ma jiˇ bi cawˆ leˇ nya˗eu lehˇ bi haw˗eu gʼaˇ duˬ, nawˇ Jaˇliꞈ aˇ deuˆ aˬ geu deuˆ pah nehˬ de?
Kawˆ shawˆ
Yaw awˬ maˬ ngeuˇ kʼawꞈ aˬ dui Yeˬhawˇbaˬ˗euˬ ehˇ dawˬ naˇ haˬ˗awˇ aˬ myah luꞈ aˬ yawꞈ˗ahˇ saˇ jaˇ ziꞈ naˇ, aˬ dui Yeˬhawˇbaˬ˗ahˇ gaˬ˗eu lehˇ mˇ doˆ laꞈ˗eu jeˬ pyeuꞈ meh.
Ja sawˇ poˆ˗eu
-
Nawˇ Yawˇbaˆ˗euˬ gaˇ kawˆ˗ahˇ neh aˬ jeˬ ya dzaw geuꞈ deˬ?
-
Nawˇ Yeˬhawˇbaˬ˗ahˇ gaˬ˗eu lehˇ aˬ joˆ˗ehˇ mˇ doˆ laꞈ nya˗eu nga?
-
Aˬ myah luꞈ Yeˬhawˇbaˬ˗ahˇ saˇ jaˇ ziꞈ nya ni nawˬ˗ahˇ caw ba nehˬ nya˗eu aˬ jeˬ nga?
Haw lahˬ
Aˬ dui Yeˬhawˇbaˬ hawˇ˗eu aˇ muˇ˗ahˇ saˇ jaˇ aˬ joˆ˗ehˇ ziꞈ nya˗eu nga lehˇ haw.
‘Nawˬ˗ahˇ saˇ jaˇ ziꞈ˗eu deuˬ˗ahˇ nawˇ saˇ jaˇ ziꞈ meh’ (16:49)
Saˬdaˬ tsawˇ haˬ zaˬ˗ahˇ aˬ joˆ˗ehˇ ja bu˗eu nga lehˇ haw.
“Yawˇbaˆ aˬ myah luꞈ saˇ jaˇ ziꞈ” (Jaˇliꞈ laꞈ kʼoeˇ aˬ jeˬ˗euˬ gaˇ kawˆ ahˇ˗eu nga? aˇ bymˇ 6)
Zaˬ deuˬ kʼawꞈ ni Yeˬhawˇbaˬ˗ahˇ gaˬ˗eu lehˇ aˬ joˆ˗ehˇ mˇ doˆ laꞈ nya˗eu nga lehˇ haw.
Zaˬ guˬ deuˬ cawˬ deuˬ ka tiˇ laˇ gaˇ ya daˬ kʼawꞈ, aˬ myah luꞈ Miˬyehˇ˗ahˇ aˬ joˆ˗ehˇ saˇ jaˇ ziꞈ daˆ leꞈ nya˗eu nga lehˇ haw.
