Dzaw deuˆ 38
Dehꞈ ziˇ˗ahˇ aˇ poeˬ taˬ baw
Aˬ dui yaw dehꞈ dehꞈ luꞈ˗eu miˇ neh, aˬ dui˗ahˇ laˬ kʼaˬ bi cehˇ laˇ˗eu gʼawˬ mya jeˬ mˇ nya˗eu meh. Aˬ dui shaˬ zahˬ˗ahˇ ya tahˬ puˬ kʼawꞈ, dehꞈ ziˇ laꞈ kʼoeˇ laˬ kʼaˬ bi cehˇ laˇ˗eu tiˬ jeˬ na jaˆ luꞈ˗a siˬ. Toˆ˗ehˇ naˇ laꞈ sawˬ pyeuꞈ˗eu dehꞈ ziˇ˗ahˇ aˬ dui aˇ poeˬ aˬ joˆ˗ehˇ taˬ baw nya˗eu nga? Aˬ dui teu loꞈ˗ehˇ jahˇ paˬ˗ehˇ gʼeh˗eu aˇ yeˇ kʼaˇ huiˬ˗eu jeˬ naˇ aˬ jeˬ nga?
1. Dehꞈ ziˇ˗ahˇ aˬ jeˬ miˇ neh aˇ poeˬ taˬ baw paˬ˗ehˇ gʼeh˗eu nga?
Dehꞈ ziˇ˗aˬ, aˬ dui˗ahˇ gaˬ˗eu Aˬda Yeˬhawˇbaˬ neh biꞈ˗euˬ laꞈ sawˬ pyeuꞈ˗eu miˇ neh, aˇ poeˬ taˬ baw paˬ˗ehˇ gʼeh˗eu meh. Yeˬhawˇbaˬ dehꞈ˗eu jeˬ biꞈ˗eu gʼaˬ pyeuꞈ˗awˇ dehꞈ˗eu jeˬ dawˬ tawˆ luꞈ˗ahˇ beh˗euˬ meh. (Ja ceuˬ 36:9) “Tsawˇ haˬ dawˬ tawˆ luꞈ˗ahˇ, dehꞈ˗eu jeˬ, saꞈ gʼawˇ nya˗eu jeˬ hawˇ˗eu, yawˬ jeˬ na luꞈ biꞈ˗eu gʼaˬ˗aˬ, aˬ yawꞈ meh.” (Gʼaˬkʼehˇ 17:25, 28) Yeˬhawˇbaˬ aˬ dui yaw dehꞈ dehꞈ nya˗eu gʼaˇ duˬ, kʼaˇ loˬ˗eu yawˬ jeˬ na luꞈ beh nehˬ taˬ˗euˬ tehꞈ˗ehˇ maˬ gʼaˬ ni, aˬ dui laˬ kʼaˬ tiˬ cehˇ dehꞈ nya ni jiˇ gʼawˬ mya jeˬ beh nehˬ taˬ˗euˬ meh.—Gʼaˬkʼehˇ 14:17-ahˇ gui.
2. Laꞈ sawˬ pyeuꞈ˗eu dehꞈ ziˇ˗ahˇ aˬ dui aˇ poeˬ taˬ baw˗eu lehˇ Yeˬhawˇbaˬ˗ahˇ aˬ joˆ˗ehˇ bi mawˇ nya˗eu nga?
Aˬ dui aˬ ma˗euˬ uˬ maˆ laꞈ kʼoeˇ ahˇ ngeh neh, Yeˬhawˇbaˬ aˬ dui˗ahˇ ngehˬ gʼeh nehˬ˗eu meh. “Ngaˇ maˬ dehꞈ doˆ le mi naˆ˗ehˇ ngaˬ˗ahˇ nawˇ siˬ nya˗euˬ meh” lehˇ Yeˬhawˇbaˬ˗ahˇ uˬ duˬ tahˬ˗eu tsawˇ haˬ tiˬ gʼaˬ pyeuꞈ˗eu Daˬbiˇ ehˇ˗eu meh. (Ja ceuˬ 139:16) Yeˬhawˇbaˬ aˬ dui˗euˬ dehꞈ ziˇ˗ahˇ aˇ poeˬ taˬ baw dui dui˗eu meh. (Maꞈtehˬ 10:29-31-ahˇ gui.) Teu miˇ neh tiˬ gʼaˬ paˬ diˇ daˬ˗ehˇ aˬ cawˬ shiˇ gaˇ keuˆ ni maˬ ehˇ, yawˬ ha shiˇ gaˇ keuˆ ni maˬ ehˇ, jahˇ naˇ Miˬyehˇ nui ma cawˆ dui dui˗eu meh. a (Doˆ˗iˇ˗eu 20:13) Kʼoeˇ naˇ aˬ dui yawˬ ha˗ahˇ maˬ ehˇ, aˬ cawˬ˗ahˇ maˬ ehˇ, laˆ tahˬ laˆ naˇ˗eu jeˬ˗ahˇ maˬ yahˇ naˇ jiˇ Miˬyehˇ nui ma cawˆ˗eu meh. Aˬ dui yawˬ ha˗euˬ dehꞈ ziˇ˗ahˇ yaw muiˬ˗ehˇ ngehˬ gʼeh˗awˇ aˬ cawˬ˗euˬ dehꞈ ziˇ˗ahˇ aˇ poeˬ taˬ baw naˇ, Yeˬhawˇbaˬ neh biꞈ˗euˬ laꞈ sawˬ heu˗ahˇ aˇ poeˬ taˬ baw˗eu jeˬ pyeuꞈ meh.
Naꞈ suiˇ ni dzaw
Aˬ dui laꞈ sawˬ pyeuꞈ˗eu dehꞈ ziˇ˗ahˇ aˬ jeˬ jeˇ lehˇ aˇ poeˬ taˬ baw nya˗eu nga lehˇ haw.
3. Yawˬ ha˗euˬ mawˇ do˗ahˇ ngehˬ gʼeh
Yeˬhawˇbaˬ˗ahˇ a nehˬ dzeuˇ˗euˬ Ka li zaˬ deuˬ˗aˬ, dehꞈ ziˇ laꞈ kʼoeˇ yawˬ paw na luꞈ Yeˬhawˇbaˬ bi dehꞈ mawꞈ loꞈ˗ehˇ dehꞈ˗eu meh. Heu naˇ yawˬ ha˗euˬ mawˇ do jiˇ Miˬyehˇ˗ahˇ lawˇ nehˬ˗euˬ gaˇ duˇ˗eu meh. Loˇmaˆ 12:1, 2-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Aˬ dui yaw muiˬ jawˇ saˇ doˆ ni yawˬ ha˗euˬ mawˇ do˗ahˇ aˬ jeˬ miˇ neh ngehˬ gʼeh paˬ˗ehˇ gʼeh˗eu nga?
-
Aˬ dui yaw muiˬ jawˇ saˇ doˆ ni aˬ jeˬ jeˇ jahˇ nya˗eu nga?
4. Aˬ jeˬ mˇ˗awˇ aˬ jeˬ jahˇ˗eu maˬ kaˬ, maˬ laˆ tahˬ maˬ laˆ naˇ ni yahˇ
Jaˇliꞈ aˬ dui˗ahˇ laˆ tahˬ laˆ naˇ laˇ paˬ˗ehˇ gʼeh˗eu mˇ jeˬ shaˇ kawˆ˗ahˇ yahˇ lehˇ ehˇ˗eu meh. Maˬ bi lehˬ maˬ bi ca laˇ ni aˬ joˆ˗ehˇ yahˇ nya˗eu nga lehˇ haw˗eu gʼaˇ duˬ, biˬdiˬoˬ pah. Kʼoeˇ naˇ, naˇ haˬ˗eu jeˬ heu˗ahˇ ja sawˇ.
Dawˬdaˬ 22:3-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ. Aˬ dui maˬ laˆ tahˬ maˬ laˆ naˇ ni aˬ joˆ˗ehˇ yahˇ nya˗eu nga?
-
Iˇ kahˇ˗ahˇ jawˇ ngeh
-
Gaˇ mˇ ngeh
-
Mui niˇ gʼa ngeh
-
Lawˬ liˬ yeuꞈ ngeh maˬ ngeuˇ naˇ, aˬ cawˬ nehˬ˗ehˇ dziˬ luꞈ ngeh
5. Uˬ maˆ laꞈ kʼoeˇ ahˇ˗eu zaˬ deuˬ˗euˬ dehꞈ ziˇ˗ahˇ aˇ poeˬ taˬ baw
Yeˬhawˇbaˬ aˬ ma˗euˬ uˬ maˆ laꞈ kʼoeˇ ahˇ˗eu zaˬ deuˬ nehˬ˗ehˇ taꞈ leˇ˗awˇ yawˬ jeˬ na luꞈ˗ahˇ nui ma ahˇ meh lehˇ Daˬbiˇ boꞈ taˬ˗euˬ meh. Ja ceuˬ 139:13-15, 17-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬhawˇbaˬ˗euˬ mehˬ shi tsawˇ haˬ tiˬ gʼaˬ˗euˬ dehꞈ ziˇ, aˬ geu ngeh dahˬ beh˗eu nga, aˬ ma˗euˬ uˬ maˆ laꞈ kʼoeˇ ahˇ ngeh laˬ, baw gʼaˬ˗awˇ neh laˬ?
Yeˬhawˇbaˬ neh gaˇ hu Iˇsaˬleˬlaˆ deuˬ˗ahˇ biꞈ˗euˬ zahˇ dawˬ, aˬ ma gʼaˬ hawˇ˗eu uˬ maˆ laꞈ kʼoeˇ ahˇ˗eu zaˬ˗ahˇ haw piˇ nehˬ˗eu meh. Doˆ˗iˇ˗eu 21:22, 23 (Miˇ shuiꞈ dawˬ paˇ Jaˇliꞈ b) gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Uˬ maˆ laꞈ kʼoeˇ ahˇ˗eu zaˬ˗ahˇ maˬ yehˆ maˇ yehꞈ˗ehˇ laˆ sehꞈ naˇ, Yeˬhawˇbaˬ˗ahˇ aˬ joˆ˗ehˇ gʼeh leˇ˗eu nga?
-
Diˇ daˬ˗ehˇ laˆ sehꞈ naˇ tawˇ neh, aˬ yawꞈ˗ahˇ aˬ joˆ˗ehˇ gʼeh leˇ paˬ nga? c
-
Gaˇ kawˆ heu nehˬ˗ehˇ taꞈ leˇ˗awˇ Miˬyehˇ noeˬ˗eu jeˬ˗ahˇ ya siˬ ngeh, nawˬ˗ahˇ aˬ joˆ˗ehˇ gʼeh laˇ nya?
Dehꞈ ziˇ˗ahˇ aˇ poeˬ taˬ baw˗eu zaˬ miˬ aˬ buˇ deuˬ kʼawꞈ, zaˬ laˆ dzeh˗eu maˬ ngeuˇ naˇ tiˬ jeˬ˗iˬ maˬ paˇ jahˇ nya ngaˇ lehˇ noeˬ laˇ nya meh. Iˇsaˬyaˇ 41:10-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Zaˬ pi luꞈ˗eu deuˬ, zaˬ laˆ dzeh ni nyehꞈ suꞈ laˇ gaˇ ya daˬ ngeh, aˬ suˇ gʼaˬ˗ahˇ shaˇ ju˗iˇ paˬ˗ehˇ gʼeh˗eu nga? Aˬ jeˬ miˇ neh?
Tiˬ gʼaˬ na ehˇ˗eu: “Zaˬ laˆ dzeh˗eu hawˇ˗eu maˬ laˆ dzeh˗eu heu naˇ, yawˬ ha naꞈ˗i jaˆ meh. Heu naˇ yawˬ ha˗euˬ mawˇ do beu.”
-
Yeˬhawˇbaˬ aˬ ma gʼaˬ hawˇ˗eu uˬ maˆ laꞈ kʼoeˇ ahˇ˗eu zaˬ gʼaˬ˗ahˇ kʼawꞈ aˇ poeˬ taˬ baw˗eu lehˇ, nawˬ˗ahˇ aˬ jeˬ miˇ neh jah nya?
Kawˆ shawˆ
Jaˇliꞈ aˬ dui˗ahˇ Yeˬhawˇbaˬ neh biꞈ˗euˬ laꞈ sawˬ pyeuꞈ˗eu yawˬ ha hawˇ˗eu aˬ cawˬ˗euˬ dehꞈ ziˇ˗ahˇ gaˬ˗awˇ aˇ poeˬ taˬ baw˗eu uˬ taꞈ, maˬ laˆ tahˬ maˬ laˆ naˇ ni yahˇ lehˇ mehˬ˗eu meh.
Ja sawˇ poˆ˗eu
-
Tsawˇ haˬ zaˬ˗euˬ dehꞈ ziˇ aˬ jeˬ miˇ neh Yeˬhawˇbaˬ˗euˬ gʼaˇ duˬ aˇ poeˬ baw˗eu nga?
-
Shiˇ gaˇ keuˆ ni diˇ daˬ˗ehˇ jahˇ˗eu deuˬ˗ahˇ Yeˬhawˇbaˬ aˬ joˆ˗ehˇ noeˬ˗eu nga?
-
Nawˇ laꞈ sawˬ pyeuꞈ˗eu dehꞈ ziˇ˗ahˇ aˬ jeˬ miˇ neh aˇ poeˬ taˬ baw de?
Haw lahˬ
Laꞈ sawˬ pyeuꞈ˗eu dehꞈ ziˇ biꞈ nehˬ laꞈ˗euˬ Yeˬhawˇbaˬ˗ahˇ guiˬ lahˬ aˬ joˆ˗ehˇ huiˬ nya˗eu nga?
Miˬyehˇ zaˬ laˆ dzeh haw˗euˬ zaˬ miˬ aˬ buˇ tiˬ gʼaˬ˗ahˇ iˬ baˇ pyehˬ nehˬ ngaˇ laˬ lehˇ haw.
“Zaˬ laˆ dzeh˗eu jeˬ˗ahˇ Jaˇliꞈ aˬ joˆ˗ehˇ ehˇ taˬ˗euˬ nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)
Aˬ geu jeˬ mui niˇ gʼa˗eu lehˇ noeˬ tsehˆ ngeh, Miˬyehˇ dehꞈ ziˇ˗ahˇ aˇ poeˬ taˬ baw˗eu gaˇ kawˆ˗ahˇ aˬ jeˬ miˇ neh shaˇ noeˬ paˬ˗ehˇ gʼeh˗eu nga?
Yawˬ haˇ yawˬ ha sehꞈ˗eu lehˇ noeˬ˗eu deuˬ˗ahˇ Jaˇliꞈ aˬ joˆ˗ehˇ caw ba nehˬ nya˗eu nga?
a Yeˬhawˇbaˬ nui ma tsawˬ paˆ˗euˬ deuˬ˗ahˇ kʼahˬ lahˇ dui dui˗eu meh. (Ja ceuˬ 34:18) Miˬyehˇ tiˬ gʼaˬ na aˬ jeˬ miˇ neh yawˬ haˇ yawˬ ha sehꞈ mawꞈ˗eu lehˇ gʼoˆ shaw nehˬ˗awˇ, aˬ yawꞈ maꞈ˗ahˇ caw ba nehˬ mawꞈ˗eu meh. Aˬ yawꞈ teu loꞈ˗ehˇ gʼeh luꞈ˗eu tiˬ gʼaˬ na˗ahˇ aˬ joˆ˗ehˇ caw ba˗euˬ nga lehˇ haw˗eu gʼaˇ duˬ, “Yawˬ haˇ yawˬ ha sehꞈ mawꞈ˗eu nui ma˗ahˇ gʼaˬ leˇ ni, Jaˇliꞈ caw ba nehˬ nya ngaˇ laˬ?” lehˇ ehˇ˗eu gaˇ kawˆ˗ahˇ haw. Gaˇ kawˆ teu naˇ heu kawˆ laꞈ kʼoeˇ˗euˬ Haw lahˬ laꞈ kʼoeˇ ahˇ meh.
b Doˆ˗iˇ˗eu 21:22, 23 (MS): “Tsawˇ haˬ tiˬ gʼaˬ tiˇ gʼaˬ dawꞈ ngeh ceh ngeh, maˬ yehˆ maˇ yehꞈ˗ehˇ aˬ nyiˇ pi luꞈ˗eu zaˬ miˬ zaˬ tiˬ gʼaˬ˗ahˇ laˆ tahˬ˗awˇ, zaˬ maˬ baw deˇ le˗euˬ gaˇ baw˗euˬ lehˇ ehˇ˗awˬ. Aˬ ma gʼaˬ hawˇ˗eu zaˬ gʼaˬ shiˇ˗eu aˇ tiˆ˗ahˇ maˬ keuˆ naˇ, laˆ tahˬ laˆ naˇ nehˬ˗euˬ tsawˇ haˬ kʼoeˇ gʼaˬ, zaˬ miˬ zaˬ kʼoeˇ gʼaˬ˗euˬ kʼaˬ dzeˇ zaˬ gʼaˬ kʼaˇ shaˇ˗eu myaˆ ni, yaˇ kʼaˬ daˇ˗eu deuˬ neh guiˇ oꞈ tiꞈ nehˬ˗eu loꞈ˗ehˇ ya doˆ meh. Ehˇ kʼawꞈ tiˬ gʼaˬ shiˇ naˇ, dehꞈ ziˇ˗euˬ dah zaˇ dehꞈ ziˇ ya tsoeˬ kʼoꞈ nehˬ meh.”
c Zaˬ laˆ dzeh haw˗euˬ deuˬ nui ma aˇ dzehˬ dzeuˇ ni cawˆ˗eu maˬ loˬ˗a. Yeˬhawˇbaˬ aˬ yawꞈ maꞈ˗ahˇ iˬ baˇ pyehˬ nehˬ nya˗eu meh. Gaˇ kawˆ heu˗ahˇ heu naˆ maˬ tseˇ siˬ nya mawꞈ naˇ, “Zaˬ laˆ dzeh˗eu jeˬ˗ahˇ Jaˇliꞈ aˬ joˆ˗ehˇ ehˇ taˬ˗euˬ nga?” lehˇ ehˇ˗eu gaˇ kawˆ˗ahˇ haw. Gaˇ kawˆ teu heu kawˆ laꞈ kʼoeˇ˗euˬ Haw lahˬ laꞈ kʼoeˇ ahˇ meh.
