Zaˬ˗ahˇ zawˇ˗ehˇ gaˬ˗eu aˬ ma tiˬ gʼaˬ aˬ yawꞈ˗euˬ aˬ li zaˬ˗ahˇ sahˬ boꞈ bi dzaw˗iˇ˗eu gʼaˇ duˬ, lehˬ hmˬ nehˬ luꞈ˗eu aˇ baˇ˗ahˇ shaˇ noeˬ haw sheˇ. Aˬ ma teu gʼaˬ aˬ yawꞈ˗euˬ aˬ li˗ahˇ iˇ cuꞈ bi dzuiꞈ˗awˇ, buˇ coeˆ ni zawˇ˗ehˇ muiˬ˗eu mehˬ tsoeˬ bi dm˗euˬ meh. Heu naˇ zaˬ˗ahˇ jawˇ saˇ bi doˆ˗awˇ, aˬ da aˬ ma aˬ yawꞈ˗ahˇ yaw muiˬ˗ehˇ ngehˬ gʼeh˗eu lehˇ jiˇ siˬ laˇ˗eu meh. Teu gaˇ duˇ ni aˬ dui˗ahˇ gaˬ˗eu Aˬda Yeˬhawˇbaˬ jiˇ aˬ dui˗euˬ mawˇ do maˬ ehˇ, aˬ dui neh noeˬ˗awˇ mˇ˗euˬ jeˬ maˬ ehˇ, aˬ dui neh ngehˬ˗euˬ jeˬ˗ahˇ maˬ ehˇ, shawˇ jehˆ ni bi gʼeh mawꞈ˗eu meh. Aˬ dui yaw muiˬ yaw shawˇ shawˇ˗ehˇ dehꞈ naˇ, yawˬ ha˗ahˇ kʼawꞈ muiˬ˗awˇ Miˬyehˇ˗ahˇ jiˇ ciˬ huiˬ ciˬ mahˇ˗eu jeˬ pyeuꞈ meh.

1. Aˬ dui˗euˬ mawˇ do buˇ coeˆ ni bi gʼeh˗eu gʼaˇ duˬ, aˬ joˆ˗ehˇ ya jahˇ˗eu nga?

Yeˬhawˇbaˬ aˬ dui˗ahˇ ‘naw maꞈ ya bi muiˬ ya bi shawˇ meh’ lehˇ ehˇ˗eu meh. (1 Beˬtuˆluˆ 1:16) Yaw muiˬ yaw shawˇ shawˇ lehˇ gʼeh˗eu deuˬ naˇ, mawˇ do maˬ ehˇ, nui ma maˬ ehˇ, shawˇ jehˆ ni gʼeh˗eu meh. Aˬ dui˗euˬ mawˇ do shawˇ jehˆ ni bi gʼeh˗eu gʼaˇ duˬ, iˇ cuꞈ tiˬ kʼehˬ maˬ taˬ ya dzuiꞈ˗awˇ, mehˬ tsoeˬ ya lehˬ tsiˬ˗eu uˬ taꞈ, iˇ kahˇ hawˇ˗eu lawˬ liˬ lawˬ muˇ jiˇ ya laˆ luiˆ ya laˆ buˇ˗eu meh. Aˬ dui Bawˬdzaˬnymˇ˗ahˇ jiˇ ya laˆ luiˆ ya laˆ buˇ˗eu meh. Mawˇ do buˇ coeˆ ni dehꞈ˗eu heu naˇ, Yeˬhawˇbaˬ˗ahˇ ciˬ huiˬ ciˬ mahˇ˗eu jeˬ pyeuꞈ meh.—2 Gawˇliˬtu 6:3, 4.

2. Yaw shawˇ shawˇ˗ehˇ dehꞈ˗eu gʼaˇ duˬ, aˬ joˆ˗ehˇ gʼeh˗eu mˇ jeˬ shaˇ kawˆ˗ahˇ ya yahˇ˗eu nga?

Jaˇliꞈ “aˬ dui˗euˬ gʼawˇ mawˇ hawˇ˗eu nui ma˗ahˇ bi jawꞈ laˇ nya˗eu yawˬ jeˬ na luꞈ˗ahˇ tsiˬ shawˇ” lehˇ gʼaˬ biꞈ˗eu meh. (2 Gawˇliˬtu 7:1, Jaˇliꞈ yaw shuiˬ 1997) Teu miˇ neh aˬ dui yawˬ ha˗euˬ gʼawˇ mawˇ hawˇ˗eu nui ma˗ahˇ bi jawꞈ laˇ nya˗eu yawˬ jeˬ na luꞈ˗ahˇ yahˇ˗eu ma. Aˬ dui noeˬ˗eu jeˬ˗ahˇ Yeˬhawˇbaˬ nui kʼahˇ bi shiˇ˗eu gʼaˇ duˬ, aˬ dui maˬ muiˬ˗eu nui noeˬ deuˬ˗ahˇ yaw kʼaˆ˗ehˇ yahˇ˗eu ma. (Ja ceuˬ 19:14) Kʼoeˇ naˇ, aˬ dui maˬ muiˬ maˬ shawˇ˗eu dawˬ jiˇ maˬ ngehˬ.—Gawˇlawˇsehˇ 3:8-ahˇ gui.

Aˬ dui˗euˬ mawˇ do hawˇ˗eu nui ma˗ahˇ bi jawꞈ laˇ nya˗eu aˬ jeˬ paˇ jaˆ nga siˬ? Aˬ dui neh dzaˬ ahˇ dawˇ ahˇ˗euˬ tiˬ jeˬ na, aˬ dui˗euˬ mawˇ do˗ahˇ deuˬ laˇ nya˗eu meh. Yaw jeˬ ma jeˬ, paꞈ yoˆ dawˇ˗eu, lu paꞈ gʼoˬ˗eu, ya piˇ ya maˇ lawˬ muˇ dawˇ˗eu, jaˆ gʼaˬ tiˬ jeˬ na˗ahˇ maˬ ngeuˇ gaˇ zmˬ˗eu, heu meh. Aˬ dui heu deuˬ˗ahˇ yahˇ naˇ yaw muiˬ jawˇ saˇ doˆ˗awˇ, Miˬyehˇ neh biꞈ˗euˬ laꞈ sawˬ pyeuꞈ˗eu dehꞈ ziˇ˗ahˇ jiˇ aˇ poeˬ taˬ baw˗eu jeˬ pyeuꞈ meh. Yawˬ ha˗euˬ nui ma shawˇ jehˆ ni bi gʼeh˗eu gʼaˇ duˬ, yawˬ ha˗euˬ aˇ sehˇ˗ahˇ niˇ gʼa niˇ gʼa˗ehˇ yawˬ ha˗euˬ nui kʼahˇ mˇ byah˗eu jeˬ˗ahˇ maˬ ehˇ, maˬ muiˬ˗eu aˇ baˇ˗ahˇ haw˗eu jeˬ˗ahˇ maˬ ehˇ, yahˇ˗eu ma. (Ja ceuˬ 119:37; Eˇpeˇsu 5:5) Mˇ jeˬ shaˇ kawˆ heu deuˬ˗ahˇ byehˇ dzeh˗eu yaw shaˬ kʼawꞈ, byehˇ dzeh nya ni Yeˬhawˇbaˬ caw ba nehˬ nya meh.—Iˇsaˬyaˇ 41:13-ahˇ gui.

 Naꞈ suiˇ ni dzaw

3. Aˬ dui buˇ coeˆ ni dehꞈ naˇ, Yeˬhawˇbaˬ˗ahˇ ciˬ huiˬ ciˬ mahˇ˗eu jeˬ pyeuꞈ

Yeˬhawˇbaˬ neh Iˇsaˬleˬlaˆ deuˬ˗ahˇ biꞈ˗euˬ zahˇ dawˬ˗ahˇ haw ngeh, Yeˬhawˇbaˬ buˇ coeˆ ni gʼeh˗eu jeˬ˗ahˇ aˬ joˆ˗ehˇ noeˬ˗eu lehˇ siˬ laˇ˗eu meh. Doˆ˗iˇ˗eu 19:10 hawˇ˗eu 30:17-19˗ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Jaˇliꞈ aˇ deuˆ heu deuˬ˗ahˇ haw ngeh, Yeˬhawˇbaˬ buˇ coeˆ ni gʼeh˗eu jeˬ˗ahˇ aˬ joˆ˗ehˇ noeˬ˗eu nga?

• Aˬ dui buˇ coeˆ ni dehꞈ˗eu gʼaˇ duˬ, aˬ jeˬ jeˇ ya jahˇ˗eu nga?

Aˬ dui buˇ coeˆ ni dehꞈ˗eu gʼaˇ duˬ, aˇ yamˬ zmˬ˗awˇ ya leh jeh˗eu meh. Smˇ muiˬ iˇ shaˬ maˬ ehˇ, aˬ geu gaˇ jawˇ˗eu maˬ kaˬ yaw luiˆ yaw buˇ buˇ lehˇ dehꞈ nya meh. Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui neh tsaꞈ gaˬ˗euˬ tsawˇ haˬ deuˬ aˬ dui˗euˬ mˇ myawˬ yaw luiˆ yaw buˇ buˇ˗ehˇ gʼeh gaˇ ya mawˇ ngeh, aˬ jeˬ miˇ neh Yeˬhawˇbaˬ˗ahˇ yaw zeu baw dzehˬ laˇ˗eu nga?

4. Maˬ muiˬ˗eu mˇ jeˬ shaˇ kawˆ˗ahˇ byehˇ dzeh

Paꞈ yoˆ, ya piˇ ya maˇ lawˬ muˇ dawˇ˗eu deuˬ, teu˗ahˇ daˇ˗eu aˇ naˆ ni shaˬ˗eu lehˇ siˬ nya˗eu meh. Ehˇ kʼawꞈ aˬ joˆ˗ehˇ daˇ nya˗eu nga? Maˬ muiˬ˗eu mˇ jeˬ shaˇ kawˆ heu, aˬ dui˗ahˇ aˇ naˆ ni deuˬ˗eu nga lehˇ ya shaˇ noeˬ ya shaˇ sawˇ˗eu meh. Maꞈtehˬ 22:37-39-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Paꞈ yoˆ, ya piˇ ya maˇ lawˬ muˇ dawˇ˗eu heu naˇ, Yeˬhawˇbaˬ nehˬ˗ehˇ cawˬ cawˬ˗eu jeˬ˗ahˇ aˬ joˆ˗ehˇ deuˬ˗eu nga?

• Paꞈ yoˆ, ya piˇ ya maˇ lawˬ muˇ dawˇ˗eu heu naˇ, nymˇ jiˇ hawˇ˗eu aˬ cawˬ˗ahˇ aˬ joˆ˗ehˇ deuˬ˗eu nga?

Maˬ muiˬ˗eu mˇ jeˬ shaˇ kawˆ˗ahˇ byehˇ nya˗eu gʼaˇ duˬ, aˬ jeˬ jeˇ ya jahˇ˗eu nga? a Biˬdiˬoˬ pah.

1 Gawˇliˬtu 10:13-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Tiˬ kʼehˬ maˬ kaˬ guiˬ lahˬ shaˇ˗eu, Jaˇliꞈ gui˗eu, mehˬ bawˬ˗ahˇ iˇ˗eu heu naˇ, maˬ muiˬ˗eu mˇ jeˬ shaˇ kawˆ˗ahˇ byehˇ nya ni gʼaˬ aˬ joˆ˗ehˇ biꞈ laꞈ˗eu nga?

 5. Maˬ muiˬ maˬ shawˇ˗eu nui noeˬ hawˇ˗eu mˇ jeˬ shaˇ kawˆ˗ahˇ deuˆ ceh ceh

Gawˇlawˇsehˇ 3:5-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Maˬ muiˬ˗eu aˇ baˇ hawˇ˗eu sehˇsaꞈ˗tiˬ b maˬ ehˇ, yawˬ ha˗euˬ aˇ sehˇ˗ahˇ niˇ gʼa niˇ gʼa˗ehˇ yawˬ ha˗euˬ nui kʼahˇ mˇ byah˗eu jeˬ maˬ ehˇ, Yeˬhawˇbaˬ˗euˬ mehˬ shi maˬ muiˬ maˬ shawˇ˗eu jeˬ pyeuꞈ˗eu lehˇ aˬ joˆ˗ehˇ siˬ laˇ˗eu nga?

• Yeˬhawˇbaˬ aˬ dui˗ahˇ nui ma shawˇ jehˆ ni dehꞈ lehˇ ehˇ˗eu teu gaˇ dahˇ tsoeˬ ngaˇ lehˇ noeˬ miˇ˗a laˬ? Aˬ jeˬ miˇ neh?

Maˬ muiˬ maˬ shawˇ˗eu nui noeˬ˗ahˇ aˬ joˆ˗ehˇ deuˆ ceh ceh nya˗eu nga lehˇ haw. Biˬdiˬoˬ pah.

Yaw muiˬ yaw shawˇ shawˇ˗ehˇ dehꞈ nya˗eu gʼaˇ duˬ, kʼaˇ jahˇ nya˗eu jeˬ ya jahˇ˗eu lehˇ Yeˬsuˇ yaw jeˬ ma jeˬ tiˬ hmˬ˗ahˇ neh bi siˬ laꞈ˗euˬ meh. Maꞈtehˬ 5:29, 30-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬsuˇ aˬ dui˗euˬ mawˇ do˗ahˇ laˆ tahˬ laˆ naˇ lehˇ ehˇ luꞈ˗eu maˬ ngeuˇ˗a. Tiˬ jeˬ na yaw tsehˆ tsehˆ˗ehˇ ya mˇ meh lehˇ ehˇ mawꞈ˗eu meh. Maˬ muiˬ maˬ shawˇ˗eu nui noeˬ maˬ bi ahˇ laˇ ni aˬ dui aˬ jeˬ ya jahˇ˗eu nga? c

Maˬ muiˬ maˬ shawˇ˗eu nui noeˬ˗ahˇ byehˇ nya ni leh jeh luꞈ˗eu deuˬ˗ahˇ, Yeˬhawˇbaˬ aˇ poeˬ taˬ baw dui dui˗eu meh. Ja ceuˬ 103:13, 14-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Nawˇ maˬ muiˬ˗eu mˇ jeˬ shaˇ kawˆ tiˬ jeˬ na˗ahˇ byehˇ dzeh˗eu lehˇ leh jeh luꞈ naˇ, Jaˇliꞈ heu deuˆ nawˬ˗ahˇ gʼaˬ aˬ joˆ˗ehˇ bi ahˇ laˇ nya?

 Kawˆ shawˆ

Aˬ dui˗euˬ mawˇ do hawˇ˗eu nui ma maˬ ehˇ, mˇ jeˬ shaˇ kawˆ maˬ ehˇ, shawˇ jehˆ ni gʼeh naˇ Yeˬhawˇbaˬ nui kʼahˇ shiˇ meh.

Ja sawˇ poˆ˗eu

• Yaw muiˬ yaw shawˇ shawˇ˗ehˇ dehꞈ˗eu heu naˇ, aˬ jeˬ miˇ neh aˇ yeˇ huiˬ˗eu nga?

• Aˬ dui buˇ coeˆ ni dehꞈ nya˗eu gʼaˇ duˬ, aˬ jeˬ jeˇ ya jahˇ˗eu nga?

• Aˬ dui˗euˬ nui noeˬ hawˇ˗eu mˇ jeˬ shaˇ kawˆ shawˇ jehˆ ni gʼeh nya˗eu gʼaˇ duˬ, aˬ jeˬ jeˇ ya jahˇ˗eu nga?