Dzaw deuˆ 41
Yuꞈ taꞈ jawˇ taꞈ˗eu jeˬ nehˬ˗ehˇ taꞈ leˇ˗awˇ Jaˇliꞈ aˬ joˆ˗ehˇ ehˇ˗eu nga?
Tsawˇ haˬ gʼawˬ mya gʼaˬ yuꞈ taꞈ jawˇ taꞈ˗eu gaˇ kawˆ˗ahˇ maˬ ngehˬ keuˆ shaꞈ˗a. Ehˇ kʼawꞈ Jaˇliꞈ laꞈ kʼoeˇ gaˇ kawˆ heu˗ahˇ bya cehˆ ni yaw zeu baw laˇ paˬ˗ehˇ ehˇ taˬ˗euˬ meh. Jaˇliꞈ mehˬ˗eu jeˬ, aˬ dui˗ahˇ gaˇ dahˇ tsoeˬ meh. Jaˇliꞈ˗aˬ Beh˗euˬ yaw sahˇ pyeuꞈ˗eu Yeˬhawˇbaˬ jawˇ gaˇ neh oe˗eu miˇ neh, aˬ yawꞈ aˬ dui˗euˬ gʼaˇ duˬ aˬ jeˬ muiˬ dzehˬ˗eu lehˇ siˬ nya meh. Aˬ yawꞈ aˬ dui˗ahˇ aˬ yawꞈ nui kʼahˇ shiˇ ni aˬ joˆ˗ehˇ ya dehꞈ˗eu lehˇ mehˬ nehˬ˗awˇ, aˬ dui mˬ maˬ maˬ byaˆ zaˇ ziˇ laˬ kaˬ tiˬ cehˇ dehꞈ nya˗eu gʼaˇ duˬ, aˬ jeˬ ya jahˇ˗eu lehˇ jiˇ mehˬ nehˬ taˬ˗euˬ meh.
1. Yeˬhawˇbaˬ yuꞈ taꞈ jawˇ taꞈ˗eu jeˬ˗ahˇ aˬ joˆ˗ehˇ noeˬ˗eu nga?
Yuꞈ taꞈ jawˇ taꞈ˗eu jeˬ˗aˬ, Yeˬhawˇbaˬ neh biꞈ˗euˬ laꞈ sawˬ pyeuꞈ meh. Aˬ yawꞈ sheuˬ dahˬ dzaˬ dzeuˇ˗euˬ zaˬ miˬ zaˬ hawˇ˗eu kʼaˬ dzeˇ zaˬ˗ahˇ laˬ kʼaˬ bi cehˇ mawꞈ˗eu meh. Laꞈ sawˬ heu zaˬ bi jawˇ le˗eu gʼaˇ duˬ tehꞈ maˬ ngeuˇ˗a. Tiˬ gʼaˬ tiˇ gʼaˬ nui gaˬ bi mˇ mawˇ˗eu gʼaˇ duˬ jiˇ pyeuꞈ meh. Teu miˇ neh Jaˇliꞈ˗ahˇ “nawˬ neh sheuˬ dahˬ dzaˬ˗euˬ gʼaˬ nehˬ˗ehˇ byawˬ gʼa˗awˬ” lehˇ ehˇ taˬ˗euˬ meh. (Dawˬdaˬ 5:18, 19) Yeˬhawˇbaˬ sheuˬ dahˬ dzaˬ dzeuˇ˗euˬ Ka li zaˬ deuˬ˗ahˇ yawˬ ha˗euˬ nymˇ dahˬ˗ahˇ saˇ jaˇ bi ziꞈ mawꞈ˗eu meh. Teu miˇ neh aˬ yawꞈ maꞈ aˬ cawˬ nehˬ˗ehˇ maˬ ya bahˬ˗a.—Heˬbyehˇ 13:4-ahˇ gui.
2. Dehꞈ bahˬ dehꞈ muˆ˗eu heu naˇ, aˬ jeˬ˗ahˇ ehˇ mawꞈ˗eu nga?
‘Dehꞈ bahˬ dehꞈ muˆ˗eu tsawˇ haˬ Miˬyehˇ Miˇkʼahˬ laꞈ kʼoeˇ maˬ ya uˇ leˇ˗a’ lehˇ Jaˇliꞈ ehˇ˗eu meh. (1 Gawˇliˬtu 6:9, 10) Jaˇliꞈ boꞈ˗euˬ deuˬ dehꞈ bahˬ dehꞈ muˆ˗eu lehˇ ehˇ˗eu dawˬ heu dawˬ˗ahˇ Gaˬliˇ dawˬ, pawˇneˬ˗yaˬ lehˇ geuꞈ taˬ˗euˬ meh. Dawˬ heu naˇ, (1) maˬ sheuˬ dahˬ dzaˬ˗euˬ gaˇ yuꞈ taꞈ jawˇ taꞈ˗eu a (2) aˬ li aˬ buˇ cawˬ cawˬ yuꞈ taꞈ jawˇ taꞈ˗eu (3) jeˬ zaˬ nehˬ˗ehˇ yuꞈ taꞈ jawˇ taꞈ˗eu, heu deuˬ˗ahˇ ehˇ mawꞈ˗eu meh. Aˬ dui “maˬ bahˬ maˬ muˆ ni dehꞈ” naˇ, Yeˬhawˇbaˬ aˬ dui˗ahˇ nui kʼahˇ shiˇ˗awˇ yawˬ ha˗ahˇ jiˇ gaˇ dahˇ tsoeˬ meh.—1 Teˇsaˬloˇni 4:3.
Naꞈ suiˇ ni dzaw
Aˬ dui dehꞈ bahˬ dehꞈ muˆ˗eu jeˬ˗ahˇ aˬ joˆ˗ehˇ yahˇ nya˗eu nga lehˇ haw˗awˇ, yaw muiˬ yaw shawˇ shawˇ˗ehˇ dehꞈ˗eu heu naˇ aˬ dui˗ahˇ aˬ joˆ˗ehˇ gaˇ dahˇ tsoeˬ˗eu nga lehˇ jiˇ haw.
3. Dehꞈ bahˬ dehꞈ muˆ˗eu jeˬ˗ahˇ yahˇ
Saˇ jaˇ ziꞈ˗eu Yoˇsehˆ yaw muiˬ yaw shawˇ shawˇ˗ehˇ dehꞈ nya ni leh jeh˗euˬ meh. Aˇdahˬbeh˗eu 39:1-12-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yoˇsehˆ aˬ jeˬ miˇ neh coeˬ doˆ gʼeh˗euˬ nga?—Aˇ deuˆ 9˗ahˇ haw.
-
Yoˇsehˆ neh mˇ˗euˬ teu tsaˬ ngaˇ lehˇ noeˬ miˇ˗a laˬ? Aˬ jeˬ miˇ neh?
Nymˬ˗mˇ iˬ nah˗euˬ zaˬ guˬ deuˬ, Yoˇsehˆ˗ahˇ dzaw geuꞈ˗eu laꞈ kʼoeˇ dehꞈ bahˬ dehꞈ muˆ˗eu jeˬ˗ahˇ aˬ joˆ˗ehˇ yahˇ nya˗eu nga? Biˬdiˬoˬ pah.
Yeˬhawˇbaˬ aˬ dui˗ahˇ dehꞈ bahˬ dehꞈ muˆ˗eu yawˬ jeˬ na luꞈ˗ahˇ bi yahˇ mawꞈ˗eu meh. 1 Gawˇliˬtu 6:18-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Tsawˇ haˬ tiˬ gʼaˬ aˬ jeˬ jeˇ˗euˬ baˬ da neh dehꞈ bahˬ dehꞈ muˆ laˇ nya˗eu nga?
-
Aˬ dui dehꞈ bahˬ dehꞈ muˆ˗eu jeˬ˗ahˇ aˬ joˆ˗ehˇ yahˇ nya˗eu nga?
4. Aˬ dui lawˬ haw laˇ˗eu jeˬ˗ahˇ gʼaˬ leˇ nya
Dehꞈ bahˬ dehꞈ muˆ ni lawˬ haw laˇ˗eu jeˬ˗ahˇ gʼaˬ leˇ˗eu heu naˇ, aˬ jeˬ miˇ neh maˬ awˬ˗eu kʼawꞈ pyeuꞈ nya nga? Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Biˬdiˬoˬ heu laꞈ kʼoeˇ˗euˬ mehˇ nmˇ heu gʼaˬ, aˬ yawꞈ neh noeˬ˗awˇ mˇ˗euˬ jeˬ aˬ yawꞈ˗euˬ miˬ zaˬ˗ahˇ saˇ jaˇ peuˬ˗eu jeˬ pyeuꞈ˗iˇ nya˗eu lehˇ ya siˬ ngeh aˬ jeˬ jahˇ˗euˬ nga?
Saˇ jaˇ ziꞈ˗eu Ka li zaˬ deuˬ kʼawꞈ, yawˬ ha˗euˬ nui noeˬ bi muiˬ bi shawˇ˗eu gʼaˇ duˬ ya leh jeh˗eu meh. Dehꞈ bahˬ dehꞈ muˆ˗eu jeˬ˗ahˇ maˬ shaˇ noeˬ ni aˬ joˆ˗ehˇ yahˇ nya˗eu nga? Piˇliˇpiˆ 4:8-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Aˬ dui aˬ jeˬ˗euˬ gaˇ kawˆ shaˇ noeˬ paˬ˗ehˇ gʼeh˗eu nga?
-
Jaˇliꞈ gui˗eu hawˇ˗eu Miˬyehˇ˗euˬ gaˇ˗ahˇ leh jeh˗awˇ mˇ˗eu heu naˇ, iˬ baˇ mˇ ni lawˬ haw laˇ˗eu jeˬ˗ahˇ gʼaˬ leˇ nya ni aˬ joˆ˗ehˇ caw ba nehˬ nya˗eu nga?
5. Yeˬhawˇbaˬ˗euˬ zahˇ dawˬ aˬ dui˗ahˇ gaˇ dahˇ tsoeˬ
Yeˬhawˇbaˬ aˬ dui˗euˬ gʼaˇ duˬ muiˬ dzehˬ˗eu jeˬ˗ahˇ siˬ nya˗eu meh. Aˬ yawꞈ aˬ dui˗ahˇ yaw muiˬ yaw shawˇ shawˇ˗ehˇ aˬ joˆ˗ehˇ dehꞈ nya˗eu lehˇ mehˬ nehˬ laꞈ˗awˇ, teu loꞈ˗ehˇ dehꞈ˗eu teu aˬ dui˗ahˇ aˬ joˆ˗ehˇ gaˇ dahˇ tsoeˬ˗eu lehˇ jiˇ mehˬ nehˬ taˬ˗euˬ meh. Dawˬdaˬ 7:7-27-ahˇ gui. Maˬ ngeuˇ naˇ, biˬdiˬoˬ pah. Kʼoeˇ naˇ, naˇ haˬ˗eu jeˬ heu˗ahˇ ja sawˇ.
-
Aˬ li zaˬ guˬ teu gʼaˬ, aˬ yawꞈ˗ahˇ lawˬ haw laˇ paˬ˗ehˇ gʼeh˗eu jawˇ duˬ˗ahˇ aˬ joˆ˗ehˇ iˇ keuˆ˗euˬ nga?—Dawˬdaˬ 7:8, 9-ahˇ haw.
-
Dawˬdaˬ 7:23, 26-ahˇ haw ngeh, dehꞈ bahˬ dehꞈ muˆ˗eu teu naˇ aˬ dui˗ahˇ maˬ muiˬ˗eu doeˇ dui dui˗eu jeˬ bi keuˆ le nya˗eu lehˇ siˬ laˇ˗eu meh. Aˬ dui yaw muiˬ yaw shawˇ shawˇ˗ehˇ dehꞈ naˇ, aˬ jeˬ jeˇ˗euˬ shaˬ zahˬ˗ahˇ yahˇ pyawˇ nya˗eu nga?
-
Yaw muiˬ yaw shawˇ shawˇ˗ehˇ dehꞈ˗eu heu naˇ, aˬ dui˗ahˇ mˬ maˬ maˬ byaˆ zaˇ ziˇ laˬ kʼaˬ tiˬ cehˇ dehꞈ nya ni aˬ joˆ˗ehˇ caw ba nehˬ˗eu nga?
Tiˬ gʼaˬ na aˬ li aˬ buˇ cawˬ cawˬ kʼaˬ miˬ sheu˗eu jeˬ nehˬ˗ehˇ taꞈ leˇ˗awˇ Jaˇliꞈ mehˬ˗eu jeˬ teu aˇ dzehˬ dzeuˇ nya lehˇ noeˬ˗eu meh. Ehˇ kʼawꞈ gʼoeˇ˗eu gaˬ˗eu jeˬ pyeuꞈ˗eu Miˬyehˇ Yeˬhawˇbaˬ, aˬ dui yawˬ gʼaˬ na luꞈ˗ahˇ mˬ maˬ maˬ byaˆ zaˇ ziˇ laˬ kʼaˬ tiˬ cehˇ bi dehꞈ mawꞈ˗eu meh. Aˬ dui teu loꞈ˗ehˇ dehꞈ nya˗eu gʼaˇ duˬ, Miˬyehˇ˗euˬ zahˇ dawˬ˗ahˇ ya mˇ caw˗eu meh. 1 Gawˇliˬtu 6:9-11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Miˬyehˇ˗euˬ mehˬ shi maˬ tsaˬ˗eu jeˬ naˇ, aˬ li aˬ buˇ cawˬ cawˬ kʼaˬ miˬ sheu˗eu heu tiˬ jeˬ tehꞈ nga laˬ?
Miˬyehˇ aˬ dui˗ahˇ nui kʼahˇ bi shiˇ˗eu gʼaˇ duˬ, aˬ dui yawˬ gʼaˬ na luꞈ ya dehꞈ poˆ ya dehꞈ paˇ˗eu meh. Teu naˇ leh jeh poeˬ kʼoꞈ ngaˇ laˬ? Ja ceuˬ 19:8, 11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yuꞈ taꞈ jawˇ taꞈ˗eu jeˬ nehˬ˗ehˇ taꞈ leˇ˗awˇ Yeˬhawˇbaˬ˗euˬ zahˇ dawˬ heu naˇ tsaˬ ngaˇ lehˇ noeˬ miˇ˗a laˬ? Aˬ jeˬ miˇ neh?
Yeˬhawˇbaˬ aˬ yawꞈ˗euˬ zahˇ dawˬ˗ahˇ mˇ caw nya ni tsawˇ haˬ gʼawˬ mya ni˗ahˇ caw ba nehˬ˗euˬ meh. Nawˬ˗ahˇ jiˇ caw ba nehˬ nya meh
Tiˬ gʼaˬ na ehˇ˗eu: “Nyiˬ gʼaˬ luꞈ gaˬ naˇ yuꞈ taꞈ jawˇ taꞈ neh˗aˬ aˬ jeˬ paˇ bahˬ˗a.”
-
Nawˬ˗ahˇ tawˇ neh aˬ joˆ˗ehˇ noeˬ nya?
Kawˆ shawˆ
Yuꞈ taꞈ jawˇ taꞈ˗eu jeˬ heu naˇ, kʼaˬ dzeˇ zaˬ hawˇ˗eu miˬ zaˬ˗ahˇ laˬ kʼaˬ bi cehˇ˗eu gʼaˇ duˬ, Yeˬhawˇbaˬ neh biꞈ˗euˬ laꞈ sawˬ pyeuꞈ meh.
Ja sawˇ poˆ˗eu
-
Deh bahˬ dehꞈ muˆ˗eu heu naˇ, aˬ jeˬ jeˇ˗ahˇ ehˇ mawꞈ˗eu nga?
-
Dehꞈ bahˬ dehꞈ muˆ˗eu jeˬ˗ahˇ aˬ joˆ˗ehˇ yahˇ nya˗eu nga?
-
Yuꞈ taꞈ jawˇ taꞈ˗eu jeˬ nehˬ˗ehˇ taꞈ leˇ˗awˇ Yeˬhawˇbaˬ˗euˬ zahˇ dawˬ˗ahˇ mˇ caw˗eu heu naˇ, gaˇ dahˇ aˬ joˆ˗ehˇ tsoeˬ˗eu nga?
Haw lahˬ
Miˬyehˇ tiˬ kawˆ loꞈ˗ehˇ dehꞈ gʼeh mawꞈ˗eu zaˬ yo aˬ li hawˇ˗eu zaˬ miˬ aˬ buˇ deuˬ˗ahˇ aˬ jeˬ miˇ neh bi sheuˬ dahˬ dzaˬ mawꞈ˗eu nga lehˇ haw.
Aˬ li aˬ buˇ cawˬ cawˬ kʼaˬ miˬ sheu˗eu deuˬ˗ahˇ bye lehˇ Jaˇliꞈ ehˇ ngaˇ laˬ?
Yuꞈ taꞈ jawˇ taꞈ˗eu jeˬ nehˬ˗ehˇ taꞈ˗eu Miˬyehˇ˗euˬ zahˇ dawˬ heu naˇ, aˬ dui˗ahˇ aˬ joˆ˗ehˇ haw piˇ nehˬ˗eu nga lehˇ haw.
Aˬ li cawˬ cawˬ kʼaˬ miˬ sheu haw˗euˬ zaˬ yo aˬ li tiˬ gʼaˬ Miˬyehˇ nui kʼahˇ shiˇ ni aˬ jeˬ miˇ neh dehꞈ poˆ dehꞈ paˇ˗euˬ nga lehˇ haw˗eu gʼaˇ duˬ, “Aˬ yawꞈ maꞈ ngaˬ˗ahˇ yaw zeu baw nehˬ laꞈ˗euˬ meh” lehˇ ehˇ˗eu gaˇ kawˆ˗ahˇ haw.
“Jaˇliꞈ tsawˇ haˬ˗euˬ dehꞈ ziˇ˗ahˇ laˆ paˇ” (Loꞈ˗eu nymˇgoˇ, 2011 Oeˬ siˬ ba la 1)
a Kʼoeˇ naˇ, aˬ myah myah loꞈ˗ehˇ yuꞈ taꞈ jawˇ taꞈ˗eu jeˬ hawˇ˗eu kʼaˬ meh paw neh maˬ ehˇ, dawˬ byoe paw neh maˬ ehˇ, yuꞈ taꞈ jawˇ taꞈ gaˇ jiˇ ehˇ mawꞈ˗awˇ, yawˬ ha˗euˬ nymˇ dahˬ maˬ ngeuˇ˗eu deuˬ˗euˬ aˇ sehˇ˗ahˇ nyehꞈ gaˇ jiˇ ehˇ mawꞈ˗eu meh.
