Dzaw deuˆ 46
Aˬ dui aˬ jeˬ miˇ neh a nehˬ˗awˇ iˇ cuꞈ shawˇ paˬ˗ehˇ gʼeh˗eu nga?
Aˬ dui Yeˬhawˇbaˬ˗ahˇ a nehˬ˗eu gʼaˇ duˬ, guiˬ lahˬ shaˇ ngeh nawˇ tiˬ gʼaˬ˗ahˇ tehꞈ˗ehˇ uˬ duˬ tahˬ ma, dehꞈ ziˇ laꞈ kʼoeˇ nawˇ nui kʼahˇ shiˇ˗eu jeˬ˗ahˇ naˬ ba tiꞈ taˬ˗awˇ mˇ ma lehˇ saˇ jaˇ dzaˬ˗eu meh. (Ja ceuˬ 40:8) Kʼoeˇ naˇ aˬ dui Miˬyehˇ˗ahˇ a nehˬ dzeuˇ˗euˬ lehˇ aˬ cawˬ˗ahˇ bi siˬ˗eu gʼaˇ duˬ, iˇ cuꞈ shawˇ˗eu meh. Yeˬhawˇbaˬ˗ahˇ a nehˬ˗eu lehˇ noeˬ tsehˆ˗eu heu naˇ, aˬ dui ya noeˬ tsehˆ˗eu jeˬ laꞈ kʼoeˇ neh aˇ yeˇ kʼaˇ huiˬ˗eu tiˬ jeˬ pyeuꞈ meh. Dehꞈ ziˇ˗ahˇ bi paˇ˗iˇ˗eu gaˇ kawˆ heu˗ahˇ aˬ dui aˬ jeˬ miˇ neh noeˬ tsehˆ peuˬ˗eu nga?
1. Aˬ dui aˬ jeˬ miˇ neh Yeˬhawˇbaˬ˗ahˇ a nehˬ mawꞈ˗eu nga?
Aˬ dui Yeˬhawˇbaˬ Miˬyehˇ˗ahˇ gaˬ˗eu miˇ neh, aˬ yawꞈ˗ahˇ a nehˬ mawꞈ˗eu ma. (1 Yoˇhaˬ 4:10, 19) Jaˇliꞈ aˬ dui˗ahˇ ‘Nawˬ˗euˬ nui ma dawˬ tawˆ luꞈ, nawˬ˗euˬ saꞈ laˇ dawˬ tawˆ luꞈ, nawˬ˗euˬ nui noeˬ nui duˇ dawˬ tawˆ luꞈ, nawˬ˗euˬ gʼaˬ dawˬ tawˆ luꞈ, nawˬ˗euˬ Miˬyehˇ pyeuꞈ˗eu Yeˬhawˇbaˬ˗ahˇ gaˬ˗awˬ’ lehˇ ehˇ˗eu meh. (Maˬkuˆ 12:30) Aˬ dui Miˬyehˇ˗ahˇ gaˬ˗eu lehˇ kʼaˬ meh mehˬ boeˬ neh tehꞈ˗ehˇ maˬ ngeuˇ˗eu, mˇ jeˬ shaˇ kawˆ neh ya bi mawˇ˗eu meh. Tiˬ gʼaˬ tiˇ gʼaˬ maˇ maˇ ni gaˬ˗eu miˇ neh, sheuˬ dahˬ dzaˬ˗eu deuˬ loꞈ˗ehˇ duˇ ni, aˬ dui jiˇ Yeˬhawˇbaˬ˗ahˇ gaˬ˗eu miˇ neh aˬ yawꞈ˗ahˇ a nehˬ˗awˇ iˇ cuꞈ shawˇ˗eu ma.
2. Yeˬhawˇbaˬ iˇ cuꞈ shawˇ dzeuˇ˗euˬ deuˬ˗ahˇ aˬ jeˬ jeˇ guiˬ lahˬ biꞈ˗eu nga?
Nawˇ iˇ cuꞈ shawˇ dzeuˇ˗euˬ naˇ, Yeˬhawˇbaˬ˗euˬ laˬ kʼaˬ cehˇ˗eu nymˇ jiˇ laꞈ kʼoeˇ˗euˬ tiˬ gʼaˬ pyeuꞈ laˇ˗eu meh. Kʼoeˇ naˇ Miˬyehˇ˗euˬ nui gaˬ˗ahˇ gʼawˬ mya paw dzeˇ dzaˬ˗ahˇ neh ya mawˇ˗awˇ, yaw beh naˆ maˬ tseˇ Miˬyehˇ nehˬ˗ehˇ gʼoeˇ dzehˬ laˇ˗eu meh. (Maˬlaˬkiˇ 3:16-18-ahˇ gui.) Yeˬhawˇbaˬ˗ahˇ Aˬda tiˬ gʼaˬ loꞈ˗ehˇ gʼoeˇ laˇ˗awˇ, Miˬyehˇ hawˇ˗eu nawˬ˗ahˇ gaˬ˗eu miˇ tsaˬ kʼoeˇ taˆ jawˇ˗eu mehˇ nmˇ deuˬ nehˬ˗ehˇ jiˇ nymˇ jiˇ tiˬ jiˇ loꞈ˗ehˇ pyeuꞈ laˇ˗eu meh. (Maˬkuˆ 10:29, 30-ahˇ gui.) Ehˇ kʼawꞈ aˬ dui iˇ cuꞈ maˬ shawˇ mi naˆ˗ehˇ ya mˇ˗eu jeˬ jaˆ meh. Aˬ dui Yeˬhawˇbaˬ˗euˬ gaˇ kawˆ ya dzaw˗awˇ, aˬ yawꞈ˗ahˇ ya gaˬ˗eu uˬ taꞈ, aˬ yawꞈ˗euˬ Zaˬmaˇ˗ahˇ jiˇ ya jah˗eu meh. Kʼoeˇ naˇ, yawˬ ha˗euˬ dehꞈ ziˇ Yeˬhawˇbaˬ˗ahˇ ya a nehˬ˗eu meh. Heu deuˬ jahˇ gʼaˬ˗awˇ iˇ cuꞈ shawˇ ngeh, aˬ dui mˬ maˬ maˬ byaˆ zaˇ ziˇ laˬ kʼaˬ cehˇ˗eu gaˇ ma˗ahˇ cah nya laˇ˗eu meh. ‘Iˇ cuꞈ shawˇ˗eu kʼoeˇ˗aˬ, ka kʼoꞈ˗eu jeˬ pyeuꞈ˗eu meh’ lehˇ Jaˇliꞈ ehˇ˗eu meh.—1 Beˬtuˆluˆ 3:21-ahˇ gui.
Naꞈ suiˇ ni dzaw
Yeˬhawˇbaˬ˗ahˇ a nehˬ˗awˇ iˇ cuꞈ shawˇ˗eu heu naˇ, aˬ jeˬ miˇ neh aˇ yeˇ huiˬ˗eu nga lehˇ haw.
3. Aˬ dui yawˬ gʼaˬ na luꞈ aˬ suˇ gʼaˬ˗ahˇ uˬ duˬ tahˬ˗eu lehˇ ya tseˇ
Gaˇ hu˗euˬ Iˇsaˬleˬlaˆ tsawˇ haˬ tiˬ deuˬ na Yeˬhawˇbaˬ˗ahˇ uˬ duˬ tahˬ luꞈ kʼawꞈ, maˇ diˇ miˬ yehˇ maˬ ngeuˇ˗eu Baˬlaˇ˗ahˇ jiˇ uˬ duˬ tahˬ nya meh lehˇ noeˬ˗eu meh. Teu miˇ neh Yeˬhawˇbaˬ bawˇlawˇpeh Eˇliˇyaˆ˗ahˇ kʼehˇ gʼeh˗awˇ maˬ tsaˬ˗eu nui noeˬ teu˗ahˇ bi laˆ paˇ˗iˇ˗euˬ meh. 1 Sahˬpaˬ 18:21-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Iˇsaˬleˬlaˆ deuˬ aˬ jeˬ˗euˬ gaˇ kawˆ˗ahˇ ya noeˬ tsehˆ˗eu nga?
Iˇsaˬleˬlaˆ deuˬ loꞈ˗ehˇ duˇ ni aˬ dui jiˇ aˬ suˇ gʼaˬ˗ahˇ uˬ duˬ tahˬ˗eu lehˇ ya noeˬ tsehˆ˗eu meh. Luˇkaꞈ 16:13-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Aˬ dui Yeˬhawˇbaˬ hawˇ˗eu yawˬ jeˬ yawˬ˗ahˇ maˬ ehˇ, yawˬ gʼaˬ yawˬ˗ahˇ maˬ ehˇ, aˬ jeˬ miˇ neh tiˬ kawˆ loꞈ˗ehˇ uˬ duˬ tahˬ˗eu maˬ za˗eu nga?
-
Aˬ dui Yeˬhawˇbaˬ˗ahˇ tehꞈ˗ehˇ uˬ duˬ tahˬ˗eu lehˇ aˬ joˆ˗ehˇ bi mawˇ nya˗eu nga?
4. Yeˬhawˇbaˬ nawˬ˗ahˇ aˇ naˆ ni gaˬ˗eu nga lehˇ shaˇ noeˬ haw
Yeˬhawˇbaˬ aˬ dui˗ahˇ muiˬ dui dui˗eu laꞈ sawˬ gʼawˬ mya ni biꞈ laꞈ˗euˬ meh. Aˬ dui aˬ yawꞈ˗ahˇ aˬ jeˬ biꞈ nehˬ nya˗eu nga? Biˬdiˬoˬ pah.
Yeˬhawˇbaˬ nawˬ˗ahˇ gaˬ˗eu lehˇ aˬ joˆ˗ehˇ siˬ laˇ˗eu nga? Ja ceuˬ 104:14, 15 hawˇ˗eu 1 Yoˇhaˬ 4:9, 10-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬhawˇbaˬ neh biꞈ nehˬ laꞈ˗euˬ laꞈ sawˬ deuˬ laꞈ kʼoeˇ neh, nawˬ˗ahˇ aˬ geu hmˬ˗ahˇ ya leˇ dzehˬ nya?
-
Laꞈ sawˬ heu deuˬ biꞈ nehˬ laꞈ˗euˬ baˬ da neh, nawˬ˗ahˇ Yeˬhawˇbaˬ˗ahˇ aˬ joˆ˗ehˇ noeˬ nya?
Aˬ dui yawˬ ha ya leˇ dui dui˗eu laꞈ sawˬ za ngeh, laꞈ sawˬ teu biꞈ nehˬ laꞈ˗euˬ gʼaˬ˗ahˇ guiˬ lahˬ huiˬ dui dui˗eu maˬ ngeuˇ nya loˇ? Dawˬmehˬmehˬ˗eu 16:17-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬhawˇbaˬ neh nawˬ˗ahˇ biꞈ nehˬ laꞈ˗euˬ yawˬ jeˬ na luꞈ˗ahˇ shaˇ noeˬ haw ngeh, nawˬ˗ahˇ tawˇ neh Yeˬhawˇbaˬ˗ahˇ aˬ jeˬ biꞈ nehˬ mawꞈ nya?
5. Yeˬhawˇbaˬ˗ahˇ a nehˬ naˇ, guiˬ lahˬ gʼawˬ mya ni za
Tsawˇ haˬ deuˬ tsawˇ myahˇ doˆ naˇ, gaˇ yaw muiˬ jaˆ naˇ, pyuˇ jaˆ naˇ laˬ kʼaˬ cehˇ meh lehˇ noeˬ˗eu meh. Teu maˇ diˇ ngeuˇ ngaˇ laˬ? Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Biˬdiˬoˬ laꞈ kʼoeˇ˗euˬ baw duiˇ behˆ zaˬ heu gʼaˬ, baw duiˇ behˆ gaˇ ya leˇ dui dui kʼawꞈ, aˬ jeˬ miˇ neh byehˇ dzeh˗euˬ nga?
-
Aˬ yawꞈ dehꞈ ziˇ dawˬ tawˆ luꞈ baw duiˇ behˆ gaˇ maˬ ngeuˇ˗eu, Yeˬhawˇbaˬ˗ahˇ a nehˬ˗eu lehˇ noeˬ tsehˆ˗euˬ meh. Aˬ yawꞈ neh noeˬ tsehˆ˗euˬ teu tsaˬ ngaˇ lehˇ noeˬ miˇ˗a laˬ? Aˬ jeˬ miˇ neh?
Gʼaˬ kʼehˇ Pawˇluˆ Ka li zaˬ maˬ pyeuꞈ laˇ ngeh, myaˆ pyawˬ naˇ mehˇ jaˆ˗eu gaˇ za taˬ˗awˇ, tsawˇ myahˇ doˆ dui dui˗eu saˬ laˬ tiˬ gʼaˬ nehˬ˗ehˇ Yuˇdaˆ˗euˬ zahˇ sahˇ kʼoꞈ ya dzaw˗euˬ meh. Ehˇ kʼawꞈ aˬ yawꞈ Ka li zaˬ pyeuꞈ laˇ˗eu gʼaˇ duˬ, teu deuˬ dawˬ tawˆ luꞈ˗ahˇ byehˇ dzeh jiˇ˗euˬ meh. Aˬ yawꞈ teu˗ahˇ gʼawˬ cawˇ cawˆ˗ehˇ gʼeh ngaˇ laˬ? Piˇliˇpiˆ 3:8-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Pawˇluˆ Ka li zaˬ maˬ pyeuꞈ laˇ ngeh yawˬ ha neh jaˆ yaꞈ˗euˬ jeˬ˗ahˇ, aˬ jeˬ miˇ neh “jaˆ guˬ jaˆ meuˬ” lehˇ sawˇ˗eu nga?
-
Aˬ yawꞈ teu deuˬ˗ahˇ byehˇ dzeh jiˇ ngeh, aˇ poeˬ baw˗eu aˬ jeˬ za˗euˬ nga?
-
Nawˬ˗euˬ dehꞈ ziˇ˗ahˇ bi muiˬ dzehˬ laˇ˗eu aˬ geu jeˬ nya? Yeˬhawˇbaˬ˗euˬ gaˇ mˇ˗eu laˬ? Yawˬ jeˬ yawˬ mˇ˗eu loˇ?
Pawˇluˆ Ka li zaˬ pyeuꞈ laˇ˗awˇ neh za˗euˬ jeˬ, aˬ yawꞈ neh byehˇ dzeh yaꞈ˗euˬ jeˬ naˆ maˬ tseˇ aˇ poeˬ baw
Tiˬ gʼaˬ na ehˇ˗eu: “Yawˬ ha˗euˬ dehꞈ ziˇ Miˬyehˇ˗ahˇ aˬ jeˬ miˇ ya a nehˬ˗a. Yawˬ ha kʼaˇ byawˬ˗eu loꞈ˗ehˇ dehꞈ kʼawꞈ gʼaˬ˗aˇ.”
-
Aˬ dui˗euˬ dehꞈ ziˇ Yeˬhawˇbaˬ˗ahˇ a nehˬ paˬ˗ehˇ gʼeh ngaˇ laˬ? Aˬ jeˬ miˇ neh?
Kawˆ shawˆ
Aˬ dui Yeˬhawˇbaˬ˗ahˇ gaˬ˗eu miˇ neh, aˬ yawꞈ˗ahˇ a nehˬ˗awˇ iˇ cuꞈ shawˇ˗eu ma.
Ja sawˇ poˆ˗eu
-
Aˬ dui Yeˬhawˇbaˬ˗ahˇ aˬ jeˬ miˇ neh nui ma gʼawˇ mawˇ dawˬ tawˆ luꞈ gaˬ˗awˇ uˬ duˬ ya tahˬ˗eu nga?
-
Yeˬhawˇbaˬ iˇ cuꞈ shawˇ dzeuˇ˗euˬ deuˬ˗ahˇ aˬ jeˬ jeˇ biꞈ˗eu nga?
-
Nawˬ˗ahˇ Yeˬhawˇbaˬ˗ahˇ a nehˬ mawꞈ miˇ˗a laˬ?
Haw lahˬ
Dawˬ caˇ caˇ zaˬ tiˬ gʼaˬ hawˇ˗eu baw duiˇ behˆ zaˬ tiˬ gʼaˬ, Yeˬhawˇbaˬ˗ahˇ a nehˬ˗eu lehˇ aˬ jeˬ miˇ neh noeˬ tsehˆ˗euˬ nga lehˇ haw.
Aˬ dui˗euˬ dehꞈ ziˇ Miˬyehˇ˗ahˇ a nehˬ paˬ˗ehˇ gʼeh˗eu, aˬ jeˬ jeˇ baˬ da neh nga lehˇ haw.
“Aˬ jeˬ miˇ neh Yeˬhawˇbaˬ˗ahˇ ya a nehˬ˗eu nga?” (Loꞈ˗eu nymˇgoˇ, 2010 Tiˬ siˬ ba la 15)
Yeˬhawˇbaˬ˗ahˇ a nehˬ˗eu deuˬ laˬ kʼaˬ aˇ naˆ ni cehˇ˗eu nga lehˇ dawˬ caˇ biˬdiˬoˬ˗ahˇ haw.
Zaˬ miˬ aˬ buˇ tiˬ gʼaˬ aˬ yawꞈ neh aˇ yeˇ taˬ huiˬ˗euˬ jeˬ˗ahˇ aˬ jeˬ miˇ neh tiˬ poˆ paˇ shaˬ noeˬ poˆ˗euˬ nga lehˇ haw˗eu gʼaˇ duˬ, “‘Aˬ dui aˬ jeˬ miˇ dehꞈ le˗euˬ nga?’ lehˇ ngaˇ siˬ nya mawꞈ˗eu dza laˇ maˬ” lehˇ ehˇ˗eu gaˇ kawˆ˗ahˇ haw.
“Jaˇliꞈ tsawˇ haˬ˗euˬ dehꞈ ziˇ˗ahˇ laˆ paˇ” (Loꞈ˗eu nymˇgoˇ, 2012 Tseˇ tiꞈ siˬ ba la 1)
