Dzaw deuˆ 56
Aˇ muˇ laꞈ kʼoeˇ mehˬ bawˬ gm ni leh jeh
Aˬ dui mehˇ nmˇ deuˬ nehˬ˗ehˇ tiˬ kawˆ loꞈ˗ehˇ jawˇ ngeh sahˬ paˬ Daˬbiˇ loꞈ˗ehˇ “Miˬyehˇ˗euˬ tsawˇ haˬ deuˬ nui ma taꞈ˗awˇ dehꞈ˗eu jeˬ, aˇ naˆ ni zahˬ leˇ paˬ˗ehˇ gʼeh˗awˇ, aˇ naˆ ni laˬ kʼaˬ cehˇ paˬ˗ehˇ gʼeh˗eu nga” lehˇ noeˬ˗eu paˬ. (Ja ceuˬ 133:1) Aˬ dui mehˬ bawˬ gm˗eu heu naˇ aˬ yawˇ yawꞈ pyeuꞈ laˇ nya˗eu jeˬ maˬ ngeuˇ˗a. Mehˬ bawˬ gm˗eu gʼaˇ duˬ aˬ dui yawˬ gʼaˬ na luꞈ ya leh jeh˗eu meh.
1. Miˬyehˇ˗euˬ tsawˇ haˬ deuˬ mehˬ bawˬ aˇ naˆ ni gm˗eu nga?
Nawˇ miˇ kʼahˬ yawˬ kʼahˬ yawˬ˗ahˇ gʼa iˇ˗awˇ aˇ muˇ˗euˬ mehˬ bawˬ˗ahˇ iˇ ngeh, aˬ yawꞈ maꞈ ngehˬ˗eu dawˬ maˬ gʼoˆ shaw laˇ kʼawꞈ, yawˬ ha˗euˬ jawˇ kʼahˬ˗ahˇ jawˇ luꞈ˗eu loꞈ˗ehˇ nawˬ˗ahˇ nui ma bi saˇ laˇ˗eu gʼawˬ mya jeˬ jaˆ˗eu meh. Aˬ jeˬ miˇ neh ehˇ naˇ, aˬ dui aˬ geu gaˇ˗ahˇ iˇ kʼawꞈ, Jaˇliꞈ dzaw˗eu paˇ dmˬ deuˬ duˇ leˇ˗awˇ, tiˬ gʼaˬ tiˇ gʼaˬ maˇ maˇ ni gaˬ˗eu miˇ neh meh. Aˬ dui aˬ geu gaˇ jawˇ˗eu maˬ kaˬ “Yeˬhawˇbaˬ˗euˬ tsawˇ myahˇ˗ahˇ kuˇ˗awˇ, mehˬ bawˬ gm˗eu laꞈ kʼoeˇ aˬ yawꞈ˗ahˇ uˬ duˬ tahˬ˗eu ma.”—Zeˬpaˬniˇ 3:9 ehˇ lahˬ, Miˇ shuiꞈ dawˬ paˇ Jaˇliꞈ.
2. Mehˬ bawˬ gm ni aˬ dui aˬ jeˬ jahˇ nya˗eu nga?
“Tiˬ gʼaˬ tiˇ gʼaˬ nui ma laꞈ kʼoeˇ keuˆ ni ziꞈ dah ni gaˬ˗awˬ.” (1 Beˬtuˆluˆ 1:22) Aˬ dui dawˬ heu˗ahˇ aˬ joˆ˗ehˇ mˇ caw nya˗eu nga? Aˬ dui aˬ cawˬ˗euˬ gʼaˬ baˬ˗eu jeˬ˗ahˇ maˬ haw ni, aˬ yawꞈ maꞈ˗euˬ yaw muiˬ jeˬ˗ahˇ ya haw˗eu meh. Aˬ dui nehˬ˗ehˇ duˇ leˇ˗eu mehˇ nmˇ deuˬ nehˬ˗ehˇ tehꞈ˗ehˇ maˬ ngeuˇ˗eu, aˬ dui nehˬ˗ehˇ beu gaˇ˗eu deuˬ nehˬ˗ehˇ jiˇ cawˬ cawˬ paˬ˗ehˇ gʼeh˗eu meh. Kʼoeˇ naˇ, myaˆ pyawˬ huiˬ nyiˇ maˬ tseˇ ni jiˇ ya leh jeh˗eu meh.—1 Beˬtuˆluˆ 2:17-ahˇ gui. a
3. Mehˇ nmˇ tiˬ gʼaˬ na nehˬ˗ehˇ gaˇ kawˆ jaˆ naˇ aˬ joˆ˗ehˇ ya jahˇ˗eu nga?
Aˬ dui˗aˬ mehˬ bawˬ gm kʼawꞈ, byah kuꞈ˗eu tsawˇ haˬ maˬ ngeuˇ. Tiˬ poˆ na aˬ dui tiˬ gʼaˬ tiˇ gʼaˬ nui ma laˆ cawˆ laˆ naˇ nya˗eu meh. Teu miˇ neh Jaˇliꞈ aˬ dui˗ahˇ aˬ myah luꞈ “tiˬ gʼaˬ tiˇ gʼaˬ iˬ baˇ pyehˬ˗awˬ” lehˇ ehˇ˗awˇ, ‘Yeˬhawˇbaˬ naw maꞈ˗ahˇ iˬ baˇ pyehˬ nehˬ laꞈ˗euˬ loꞈ˗ehˇ, tiˬ gʼaˬ tiˇ gʼaˬ iˬ baˇ pyehˬ˗awˬ’ lehˇ ehˇ˗eu meh. (Gawˇlawˇsehˇ 3:13-ahˇ gui.) Aˬ dui Yeˬhawˇbaˬ˗ahˇ nui ma gʼawˬ mya poˆ laˆ cawˆ nehˬ˗euˬ kʼawꞈ, aˬ yawꞈ aˬ dui˗ahˇ iˬ baˇ pyehˬ nehˬ laꞈ˗eu meh. Teu miˇ neh aˬ yawꞈ aˬ dui jiˇ mehˇ nmˇ deuˬ˗ahˇ iˬ baˇ pyehˬ nehˬ meh lehˇ noeˬ tmˬ˗eu meh. Nawˇ tiˬ gʼaˬ na˗ahˇ nui ma laˆ naˇ nehˬ˗euˬ lehˇ ya siˬ naˇ, yawˬ ha paw neh dahˬ beh˗awˇ laˆ tsaˬ˗eu leh jeh luꞈ˗uˇ.—Maꞈtehˬ 5:23, 24-ahˇ gui. b
Naꞈ suiˇ ni dzaw
Aˇ muˇ laꞈ kʼoeˇ mehˬ bawˬ gm˗awˇ bi tsaˬ bi dzoeˇ leˇ˗eu gʼaˇ duˬ, aˬ jeˬ jeˇ jahˇ nya˗eu nga lehˇ haw.
Laˆ tsaˬ laˆ dzoeˇ˗eu gʼaˇ duˬ aˬ jeˬ ya jahˇ˗eu nga?
4. Myaˆ pyawˬ huiˬ nyiˇ taˬ tseˇ
Aˬ dui mehˇ nmˇ yawˬ gʼaˬ na luꞈ˗ahˇ gaˬ˗eu ma. Ehˇ kʼawꞈ aˬ dui nehˬ˗ehˇ maˬ duˇ leˇ˗eu deuˬ˗ahˇ ha geuꞈ˗eu heu naˇ yaw shaˬ kʼawꞈ pyeuꞈ nya meh. Toˆ˗ehˇ naˇ aˬ dui aˬ jeˬ ya jahˇ˗eu nga? Gʼaˬkʼehˇ 10:34, 35-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬhawˇbaˬ tsawˇ jeuˬ aˬ geu jeuˬ˗ahˇ maˬ kaˬ aˬ yawꞈ˗euˬ Saˇ kiˇ bi pyeuꞈ laˇ˗eu meh. Toˆ˗ehˇ naˇ nawˇ nawˬ nehˬ˗ehˇ beu gaˇ˗eu deuˬ˗ahˇ aˬ joˆ˗ehˇ noeˬ paˬ˗ehˇ gʼeh˗eu nga?
-
Nawˬ˗euˬ jawˇ kʼahˬ˗ahˇ myaˆ pyawˬ huiˬ nyiˇ tseˇ˗eu aˬ jeˬ jeˇ jaˆ˗eu nga? Nawˇ teu˗ahˇ aˬ jeˬ miˇ ya yahˇ˗eu nga?
2 Gawˇliˬtu 6:11-13-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yawˬ ha nehˬ˗ehˇ beu gaˇ˗eu mehˇ nmˇ deuˬ nehˬ˗ehˇ gʼoeˇ dzehˬ leˇ ni aˬ joˆ˗ehˇ ya jahˇ˗eu nga?
5. Nui ma keuˆ˗eu laꞈ kʼoeˇ iˬ baˇ pyehˬ˗awˇ tsaˬ leˇ dzoeˇ leˇ ni leh jeh
Yeˬhawˇbaˬ tiˬ jawˇ˗iˬ maˬ mˇ lehˬ haw˗euˬ miˇ neh iˬ baˇ shaˇ pyehˬ˗eu maˬ loˬ˗a. Ehˇ kʼawꞈ aˬ yawꞈ nui ma keuˆ˗eu laꞈ kʼoeˇ aˬ dui˗ahˇ iˬ baˇ pyehˬ nehˬ˗eu meh. Iˇsaˬyaˇ 55:7-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬhawˇbaˬ aˇ naˆ˗ahˇ keuˆ ni iˬ baˇ pyehˬ nehˬ˗eu nga?
-
Nawˇ Yeˬhawˇbaˬ neh iˬ baˇ pyehˬ nehˬ laꞈ˗euˬ jeˬ˗ahˇ, aˬ jeˬ miˇ neh guiˬ lahˬ huiˬ mawꞈ nya?
-
Aˬ geu ngeh aˬ cawˬ nehˬ˗ehˇ tsaˬ leˇ dzoeˇ leˇ˗eu yaw shaˬ nga?
Yeˬhawˇbaˬ˗ahˇ dzaw geuꞈ˗eu laꞈ kʼoeˇ mehˇ nmˇ deuˬ nehˬ˗ehˇ tsaˬ leˇ dzoeˇ leˇ ni aˬ joˆ˗ehˇ ya jahˇ˗eu nga? Dawˬdaˬ 19:11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Tiˬ gʼaˬ na aˬ dui˗ahˇ nui ma laˆ pehˇ laˇ ngeh, aˬ joˆ˗ehˇ jahˇ naˇ muiˬ dzehˬ nga?
Tiˬ poˆ na aˬ dui aˬ cawˬ˗ahˇ nui ma laˆ pehˇ nya˗eu meh. Toˆ˗ehˇ pyeuꞈ laˇ ngeh aˬ dui aˬ joˆ˗ehˇ jahˇ paˬ˗ehˇ gʼeh˗eu nga? Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Biˬdiˬoˬ laꞈ kʼoeˇ˗euˬ mehˇ nmˇ heu gʼaˬ laˆ tsaˬ laˆ dzoeˇ˗eu gʼaˇ duˬ, aˬ jeˬ jahˇ˗euˬ nga?
6. Mehˇ nmˇ deuˬ˗euˬ yaw muiˬ jeˬ˗ahˇ poˆ
Aˬ dui mehˇ nmˇ deuˬ nehˬ˗ehˇ gʼoeˇ leˇ ngeh, aˬ yawꞈ maꞈ˗euˬ yaw muiˬ jeˬ˗ahˇ kʼawꞈ mawˇ laˇ˗awˇ gʼaˬ baˬ˗eu jeˬ˗ahˇ kʼawꞈ mawˇ laˇ˗eu meh. Aˬ yawꞈ maꞈ˗euˬ yaw muiˬ jeˬ˗ahˇ tehꞈ˗ehˇ haw nya ni aˬ joˆ˗ehˇ ya jahˇ˗eu nga? Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Aˬ dui mehˇ nmˇ deuˬ˗euˬ yaw muiˬ jeˬ˗ahˇ mawˇ nya ni aˬ jeˬ ya jahˇ˗eu nga?
Yeˬhawˇbaˬ aˬ dui˗euˬ yaw muiˬ jeˬ˗ahˇ tehꞈ˗ehˇ haw˗eu meh. 2 Laˬsaˬbaˬ 16:9a-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Yeˬhawˇbaˬ aˬ dui˗euˬ yaw muiˬ jeˬ˗ahˇ tehꞈ˗ehˇ haw˗eu lehˇ ya siˬ ngeh nawˬ˗ahˇ aˬ joˆ˗ehˇ gʼeh laˇ nya?
Sehˇ maˇ byawꞈ baw kʼawꞈ aˇ poeˬ baw dui dui˗eu loꞈ˗ehˇ, mehˇ nmˇ deuˬ jiˇ maˬ byah kuꞈ kʼawꞈ Yeˬhawˇbaˬ˗euˬ mehˬ shi aˇ poeˬ baw dui dui meh
Tiˬ gʼaˬ na ehˇ˗eu: “Aˬ yawꞈ maˬ tahˬ shaˇ laˇ naˇ iˬ baˇ maˬ pyehˬ nehˬ.”
-
Aˬ dui aˬ jeˬ miˇ neh nui ma keuˆ˗eu laꞈ kʼoeˇ tiˬ gʼaˬ tiˇ gʼaˬ iˬ baˇ pyehˬ paˬ˗ehˇ gʼeh˗eu nga?
Kawˆ shawˆ
Tiˬ gʼaˬ tiˇ gʼaˬ iˬ baˇ pyehˬ nehˬ˗awˇ yawˬ gʼaˬ na luꞈ˗ahˇ gaˬ˗eu heu naˇ, aˇ muˇ laꞈ kʼoeˇ mehˬ bawˬ gm ni leh jeh˗eu jeˬ pyeuꞈ meh.
Ja sawˇ poˆ˗eu
-
Aˬ dui myaˆ pyawˬ huiˬ nyiˇ maˬ tseˇ˗eu gʼaˇ duˬ, aˬ joˆ˗ehˇ ya jahˇ˗eu nga?
-
Mehˇ nmˇ tiˬ gʼaˬ na nehˬ˗ehˇ gaˇ kawˆ jaˆ ngeh aˬ joˆ˗ehˇ ya jahˇ˗eu nga?
-
Nawˬ˗ahˇ Yeˬhawˇbaˬ iˬ baˇ pyehˬ nehˬ˗eu jeˬ˗ahˇ aˬ jeˬ miˇ neh dzaw geuꞈ mawꞈ nya?
Haw lahˬ
Yeˬsuˇ neh ja˗euˬ yaw jeˬ ma jeˬ, aˬ cawˬ˗ahˇ yaw lehˬ maˬ bi poˆ ni aˬ joˆ˗ehˇ caw ba nehˬ˗eu nga lehˇ haw.
Yawˬ ha maˬ mˇ lehˬ˗aˬ lehˇ noeˬ naˇ tawˇ neh, tahˬ shaˇ paˬ˗ehˇ gʼeh ngaˇ laˬ?
“Tahˬ shaˇ˗eu jeˬ bi tsaˬ bi dzoeˇ leˇ” (Loꞈ˗eu nymˇgoˇ, 2002 Tseˇ tiꞈ siˬ ba la 1)
Shaˬ jiˇ yaw naˆ yaw ba biˇ paˆ˗eu miˇ kʼahˬ˗ahˇ huiˬ laˇ˗euˬ zaˬ yo aˬ li nyiˬ gʼaˬ, aˬ joˆ˗ehˇ tsaˬ leˇ dzoeˇ leˇ nya˗euˬ nga lehˇ haw.
Juˇniˬ hawˇ˗eu Giˇdoˬ: Yaw beh ngeh tiˬ gʼaˬ tiˇ gʼaˬ muiˇ kʼawꞈ nymˬ˗mˇ naˇ mehˇ nmˇ pyeuꞈ (6:42)
Tiˬ gʼaˬ paˬ nehˬ˗ehˇ gaˇ kawˆ jaˆ ngeh, aˇ muˇ laꞈ kʼoeˇ mehˬ bawˬ gm˗eu jeˬ˗ahˇ maˬ bi deuˬ leˇ ni aˬ joˆ˗ehˇ ya jahˇ˗eu nga lehˇ haw.
“Maˬ tsaˬ maˬ dzoeˇ leˇ˗eu jeˬ˗ahˇ nui gaˬ neh laˆ tsaˬ” (Loꞈ˗eu nymˇgoˇ, 2016 Ngaˬ siˬ ba la)
a Nyawˬ˗iˇ nya˗eu naˇ gawˇ naˇ luꞈ˗eu Ka li zaˬ deuˬ aˬ cawˬ˗ahˇ maˬ bi nyawˬ˗iˇ˗eu gʼaˇ duˬ, nui gaˬ aˬ yawꞈ maꞈ˗ahˇ aˬ jeˬ jahˇ ni laˆ noeˬ nehˬ˗eu nga lehˇ Dzaw lahˬ 6˗ahˇ ja sawˇ nehˬ taˬ˗euˬ meh.
b Jeˬ gaꞈ jeˬ ka mˇ˗eu hawˇ˗eu miˇ kʼahˬ˗euˬ zahˇ sahˇ kʼoꞈ nehˬ˗ehˇ taꞈ˗eu gaˇ kawˆ doˆ laˇ ngeh, aˬ joˆ˗ehˇ ya jahˇ˗eu lehˇ Dzaw lahˬ 7˗ahˇ ja sawˇ nehˬ taˬ˗euˬ meh.
