Uˆ lahˇ˗eu aˇ muˇ˗euˬ sahˬ boꞈ
“Naw maꞈ˗aˬ, aˬ cawˬ˗ahˇ mehˬ nya tsoˆ nya deˇ laˇ˗euˬ meh.” (Heˬbyehˇ 5:12) Shaˇ noeˬ haw sheˇ, boeˬ boeˬ luˆ luˆ laꞈ kʼoeˇ neh kʼaˇ mehˬ kʼaˇ tsoˆ nya˗eu gʼaˬ pyeuꞈ˗eu Yeˬhawˇbaˬ, aˬ dui˗ahˇ kuˇ˗awˇ, aˬ yawꞈ˗euˬ gaˇ kawˆ bi mehˬ˗eu meh. Gaˇ heu naˇ, muiˬ dui dui˗awˇ poeˬ dui dui˗eu uˬ taꞈ, kah dui dui˗eu kʼaˆ behˆ pyeuꞈ meh. Aˬ dui Yeˬhawˇbaˬ˗euˬ gaˇ kawˆ heu, nymˇ jiˇ laꞈ kʼoeˇ maˬ ehˇ, aˇ muˇ laꞈ kʼoeˇ maˬ ehˇ, tsaꞈ gaˬ duˬ˗ahˇ maˬ ehˇ ya mehˬ˗eu meh. Aˬ dui gaˇ heu aˬ joˆ˗ehˇ mˇ byah nya˗eu nga?
Dawˬ kʼoꞈ Pawˇluˆ neh Tiˆmoˇseˬ˗ahˇ boꞈ nehˬ˗euˬ sahˬ boꞈ laꞈ kʼoeˇ ahˇ meh. Teu gaˇ, “Nawˬ˗euˬ aˇ yamˬ hawˇ˗eu gʼaˬ dawˬ tawˆ luꞈ, tsawˇ haˬ aˇ maꞈ˗ahˇ Jaˇliꞈ gui mehˬ˗eu, dawˬ mehˬ mehˬ˗eu, mehˬ nehˬ tsoˆ nehˬ˗eu, heu deuˬ˗euˬ gʼaˇ duˬ zmˬ˗awˬ” lehˇ ehˇ taˬ˗awˇ, “Nawˇ kʼoeˇ loꞈ˗ehˇ mˇ˗eu kʼoeˇ˗aˬ, nawˬ˗euˬ gʼawˇ mawˇ˗ahˇ maˬ ehˇ, nawˬ neh mehˬ nehˬ tsoˆ nehˬ˗euˬ tsawˇ haˬ deuˬ˗ahˇ maˬ ehˇ, ka kʼoꞈ˗eu jeˬ pyeuꞈ˗eu meh” lehˇ jiˇ paˇ ehˇ taˬ˗euˬ meh. (1 Tiˆmoˇseˬ 4:13, 16) Nawˇ dehꞈ ziˇ˗ahˇ, bi buˬ bi law iˇ˗eu guiˬ lahˬ dawˬ aˬ cawˬ˗ahˇ ya biˇ nehˬ˗eu miˇ neh, gui˗eu paw hawˇ˗eu mehˬ˗eu paw huiˬ laˇ mahˇ laˇ˗eu heu naˇ, aˇ yeˇ huiˬ dui dui˗eu meh. Paˇ dmˬ heu dmˬ nawˬ˗ahˇ heu loꞈ˗ehˇ jahˇ nya ni caw ba nehˬ nya meh. Aˬ dui paˇ dmˬ heu dmˬ˗euˬ laꞈ kʼoeˇ haw taˬ paˬ˗ehˇ gʼeh˗eu jeˬ˗ahˇ haw ma.
Sahˬ boꞈ myaˆ pyawˬ yawˬ taꞈ na luꞈ laꞈ kʼoeˇ ahˇ˗eu Jaˇliꞈ aˇ deuˆ naˇ, teu kawˆ laꞈ kʼoeˇ aˇ yeˇ huiˬ˗eu tsahˇ nehˬ˗ehˇ taꞈ˗eu, maˬ ngeuˇ naˇ aˇ yeˇ huiˬ˗eu tsahˇ˗ahˇ aˬ joˆ˗ehˇ zmˬ iˇ˗eu lehˇ bi siˬ˗eu yaw jeˬ ma jeˬ pyeuꞈ meh
Yeˬhawˇbaˬ “huiˬ˗eu mehˬ˗eu tsoˆ˗eu gʼaˬ” pyeuꞈ meh. (Yawˇbaˆ 36:22) Paˇ dmˬ heu dmˬ nawˬ˗ahˇ yaw muiˬ˗ehˇ gui nya laˇ˗awˇ, mehˬ nya laˇ ni caw ba nehˬ kʼawꞈ, aˬ dui kʼaˇ mehˬ˗eu jeˬ dawˬ tawˆ luꞈ Yeˬhawˇbaˬ jawˇ gaˇ neh oe˗awˇ, tsawˇ haˬ deuˬ˗ahˇ sheuˬ laꞈ˗eu aˬ yawꞈ pyeuꞈ˗eu lehˇ aˬ myah luꞈ ya noeˬ taˬ meh. (Yoˇhaˬ 6:44) Teu miˇ neh, muiˬ˗eu shawˇ˗eu yaw sahˇ tiˬ kʼehˬ maˬ taˬ shaˇ˗awˇ, mehˬ ngeh Jaˇliꞈ˗ahˇ yaw kʼaˆ kʼaˆ˗ehˇ zmˬ. Aˬ yawꞈ maꞈ˗euˬ nui ma aˬ dui jawˇ gaˇ maˬ ngeuˇ˗eu, Yeˬhawˇbaˬ jawˇ gaˇ ya bi jaˆ˗awˇ, Yeˬhawˇbaˬ˗ahˇ ziꞈ dah ni gaˬ ni leh jeh˗awˇ ya caw ba nehˬ˗eu meh.
Aˇ yeˇ kʼaˇ huiˬ˗eu gaˇ kawˆ˗ahˇ mehˬ laˇ lehˇ nawˬ˗ahˇ kuˇ˗eu meh. Nawˇ “Miˬyehˇ neh biꞈ˗euˬ baoˬ˗ahˇ gʼoe” naˇ, mˇ byah nya meh lehˇ nga maꞈ jah ziꞈ ma.—1 Beˬtuˆluˆ 4:11.
Nawˇ loꞈ˗ehˇ tiˬ kawˆ loꞈ˗ehˇ mehˬ luꞈ˗eu cawˬ
Yeˬhawˇbaˬ˗euˬ Saˇ kiˇ deuˬ˗euˬ Uˆ lahˇ˗eu aˇ muˇ
