Gaˇ kawˆ 6
Aˬ dui shiˇ naˇ, aˬ gaˇ iˇ-eu nga?
1-3. Shiˇ-eu jeˬ nehˬ-ehˇ taꞈ leˇ-awˇ, tsawˇ haˬ zaˬ aˬ jeˬ siˬ nya mawꞈ-eu nga, zahˇ deuˬ aˬ joˆ-ehˇ mehˬ-eu nga?
G’awˬ myahˇ maˬ g’eh-ehˇ “shiˇ-eu jeˬ maˬ paˇ jaˆ” meh lehˇ, Jaˇliꞈ-ahˇ saˇ jaˇ dzaˬ taˬ-euˬ meh. (Pah mehˬ-eu 21:4) Ka k’oꞈ-eu jeˬ aˬ myah luꞈ dehꞈ-eu jeˬ biꞈ-eu lehˇ, Gaˇ kawˆ 5-ahˇ aˬ dui dzaw dzeuˇ-euˬ ma. Ehˇ k’awꞈ, nymˬ-mˇ tsawˇ haˬ shiˇ luꞈ-a siˬ. (Dawˬtsoˆ 9:5) Teu miˇ neh, aˬ dui shiˇ naˇ aˬ jeˬ pyeuꞈ iˇ-eu nga? lehˇ, aˇ yeˇ huiˬ-eu gaˇ kawˆ heu hmˬ-ahˇ aˬ dui siˬ nya mawꞈ meh.
2 Aˬ dui gaˬ-eu tsawˇ haˬ shiˇ ngeh ngehˬ-ehˇ dzehˬ, gaˇ kawˆ heu hmˬ-ahˇ siˬ nya mawꞈ-eu meh. ‘Aˬ yawꞈ aˬ gaˇ iˇ-euˬ nga? Aˬ dui-ahˇ haw luꞈ ngaˇ loˇ? Aˬ dui-ahˇ caw ba nya ngaˇ loˇ?’ lehˇ, aˬ dui noeˬ nya-eu meh.
3 Zahˇ deuˬ gaˇ kawˆ heu hmˬ-ahˇ tiˬ g’aˬ tiˬ jeˬ-ehˇ mehˬ-eu meh. Zahˇ tiˬ deuˬ na, tsawˇ haˬ yaw muiˬ deuˬ mˬ k’oeˇ taˆ ya le-awˇ, yaw doeˇ deuˬ shiˬ buiˇ lah ma-ahˇ ya iˇ meh lehˇ mehˬ-eu meh. Tiˬ deuˬ na naˇ, shiˇ naˇ nehꞈ, maˬ ngeuˇ naˇ yaw sahˇ pyeuꞈ iˇ-awˇ, aˬ poeˬ aˬ piˬ nehˬ-ehˇ jawˇ iˇ meh lehˇ mehˬ-eu meh. K’oeˇ naˇ, tsawˇ haˬ, maˬ ngeuˇ naˇ jeˬ zaˬ pyeuꞈ iˇ-awˇ paˇ dehꞈ poˆ le meh lehˇ mehˬ-eu deuˬ jiˇ jawˇ-eu meh.
4. Shiˇ-eu gaˇ kawˆ-ahˇ zahˇ deuˬ mehˬ-eu duˇ leˇ-eu aˬ geu jeˬ nga?
4 Shiˇ-eu jeˬ nehˬ-ehˇ taꞈ leˇ-awˇ, zahˇ deuˬ mehˬ-eu maˬ duˇ leˇ-a. Ehˇ k’awꞈ duˇ leˇ-eu tiˬ jeˬ naˇ, tsawˇ haˬ shiˇ dzeuˇ-euˬ k’awꞈ tiˬ jeˬ paˬ dehꞈ yaꞈ-a siˬ lehˇ mehˬ-eu heu meh. Teu loꞈ-ehˇ mehˬ-eu tsaˬ ngaˇ loˇ?
Aˬ dui shiˇ naˇ aˬ gaˇ iˇ-eu nga?
5, 6. Aˬ dui shiˇ naˇ, aˬ jeˬ pyeuꞈ iˇ-eu nga?
5 Tsawˇ haˬ shiˇ naˇ aˬ jeˬ pyeuꞈ iˇ-eu lehˇ Yeˬhawˇbaˬ siˬ nya meh. Aˬ dui shiˇ ngeh, ziˇ jiˇ-euˬ meh lehˇ aˬ yawꞈ ehˇ meh. Teu miˇ neh, tsawˇ haˬ shiˇ naˇ, tiˬ jeˬ-iˬ maˬ paˇ dehꞈ yaꞈ meh. * Aˬ yawꞈ maꞈ maˬ paˇ mawˇ nya, naˬ bawˇ maˬ paˇ gaˬ nya, tiˬ jeˬ-iˬ maˬ paˇ noeˬ nya meh.
6 “Shiˇ dzeuˇ-euˬ deuˬ siˬ nya-eu aˬ jeˬ paˇ jaˆ ta” lehˇ, sahˬ paˬ Sawˇlaˬmoˬ boꞈ taˬ-euˬ meh. Shiˇ-euˬ tsawˇ haˬ maˬ gaˬ nya-eu loꞈ-ehˇ bye jiˇ maˬ bye nya-a. Lmˬ bymˇ-ahˇ “mˇ myawˬ mˇ-eu, nui noeˬ noeˬ-eu, hawˇ-eu zaˬ siˬ tsawˇ gahˇ heu deuˬ maˬ jaˆ-a.” (Dawˬtsoˆ 9:5, 6, 10-ahˇ gui.) K’oeˇ naˇ, “aˬ yawꞈ maꞈ neh k’aˇ noeˬ tmˬ-euˬ jeˬ, shiˇ ngeh nah byoˆ jiˇ” meh lehˇ, Ja ceuˬ 146:4-ahˇ ehˇ taˬ-euˬ meh.
Shiˇ-eu jeˬ nehˬ-ehˇ taꞈ leˇ-awˇ, Yeˬsuˇ ehˇ-eu jeˬ
Yeˬhawˇbaˬ tsawˇ haˬ zaˬ-ahˇ aˬ myah luꞈ miˇ tsaˬ-ahˇ bi dehꞈ-eu lehˇ beh-euˬ meh
7. Shiˇ-eu jeˬ nehˬ-ehˇ taꞈ leˇ-awˇ Yeˬsuˇ aˬ jeˬ ehˇ-eu nga?
7 Yeˬsuˇ-euˬ cawˬ Laˬzaˬluˇ shiˇ ngeh, “aˬ dui-euˬ cawˬ Laˬzaˬluˇ yuꞈ k’aˆ taˬ-euˬ meh” lehˇ, Yeˬsuˇ ehˇ-eu meh. Ehˇ k’awꞈ, Laˬzaˬluˇ yuꞈ k’aˆ-awˇ, g’aˬ naˬ naˬ luꞈ gaˇ ehˇ-eu maˬ ngeuˇ-a. “Laˬzaˬluˇ shiˇ-euˬ meh” lehˇ ehˇ mawꞈ-eu meh. (Yoˇhaˬ 11:11-14) Shiˇ-eu jeˬ-ahˇ Yeˬsuˇ yuꞈ k’aˆ taˬ-euˬ jeˬ nehˬ-ehˇ sheu cehˆ taˬ-euˬ meh. Yeˬsuˇ Laˬzaˬluˇ-ahˇ mˬ k’oeˇ taˆ jawˇ-eu, maˬ ngeuˇ naˇ aˬ yawꞈ-euˬ aˬ poeˬ aˬ piˬ nehˬ-ehˇ jawˇ-eu lehˇ maˬ ehˇ-a. K’oeˇ naˇ, shiˬ buiˇ lah ma-ahˇ bi k’ehˬ luꞈ-eu, maˬ ngeuˇ naˇ dehꞈ poˆ le-euˬ lehˇ jiˇ maˬ ehˇ-a. Laˬzaˬluˇ yuꞈ k’aˆ byoˆ-euˬ loꞈ-ehˇ duˇ-eu meh lehˇ, Yeˬsuˇ ehˇ-eu meh. Jaˇliꞈ yawˬ deuˆ yawˬ-ahˇ k’awꞈ, shiˇ-eu jeˬ-ahˇ yuꞈ k’aˆ taˬ-euˬ jeˬ nehˬ-ehˇ sheu cehˆ taˬ-euˬ meh. Yeˬsuˇ Yaˬiˇluˆ-euˬ aˬ buˇ-ahˇ g’eu tuˇ ngeh k’awꞈ, “shiˇ-euˬ maˬ ngeuˇ-a. Yuꞈ k’aˆ taˬ-euˬ tehꞈ meh” lehˇ ehˇ-eu meh.—Luˇkaꞈ 8:52,53.
8. Miˬyehˇ tsawˇ haˬ zaˬ-ahˇ bi shiˇ-eu lehˇ beh-euˬ maˬ ngeuˇ-a lehˇ, aˬ dui aˬ joˆ-ehˇ siˬ nya-eu nga?
8 Aˬdaˬ hawˇ-eu Eˇbaˆ-ahˇ bi shiˇ-eu lehˇ beh-euˬ nga loˇ? Maˬ ngeuˇ-a. Yeˬhawˇbaˬ aˬ yawꞈ nyaꞈ-ahˇ, jawˇ saˇ doˆ-awˇ, laˬ k’aˬ tiˬ cehˇ aˬ myah luꞈ bi dehꞈ-eu lehˇ beh-euˬ meh. Yeˬhawˇbaˬ tsawˇ haˬ zaˬ-ahˇ aˬ myah luꞈ dehꞈ mawꞈ-eu nui ma beh ahˇ nehˬ taˬ-euˬ meh. Aˬ da aˬ ma deuˬ, zaˬ mawˬ iˇ-awˇ shiˇ gaˇ maˬ mawˇ mawꞈ-eu loꞈ-ehˇ, Yeˬhawˇbaˬ k’awꞈ teu gaˇ duˇ meh. Ehˇ k’awꞈ, Miˬyehˇ aˬ dui-ahˇ aˬ myah luꞈ bi dehꞈ-eu lehˇ beh-euˬ jeˬ maˇ-iˬ, aˬ jeˬ miˇ neh ya shiˇ-eu nga?
Aˬ dui aˬ jeˬ miˇ neh shiˇ-eu nga?
9. Aˬdaˬ hawˇ-eu Eˇbaˆ Yeˬhawˇbaˬ-euˬ dawˬ-ahˇ aˬ jeˬ miˇ neh naˇ haˬ paˬ-ehˇ g’eh-eu nga?
9 Eˬdeˬ yaˇ kmˇ laꞈ k’oeˇ Yeˬhawˇbaˬ Aˬdaˬ-ahˇ “aˇ bawˇ aˬ geu bawˇ-euˬ aˇ siˬ maˬ kaˬ, nawˇ pyaˆ dzaˬ nya tehꞈ-a. Ehˇ k’awꞈ, yaw muiˬ yaw doeˇ tseˇ paˆ nya-eu zaˬ siˬ tsawˇ gahˇ biꞈ-eu aˇ bawˇ k’oeˇ bawˇ-euˬ aˇ siˬ nawˇ maˬ ya pyaˆ dzaˬ-a. Pyaˆ dzaˬ naˇ, dzaˬ ngeh nah neh nawˇ ya shiˇ tehꞈ-a lehˇ ehˇ nehˬ-euˬ meh.” (Aˇdahˬbeh-eu 2:9, 16, 17) Miˬyehˇ-euˬ dawˬ-ahˇ mˇ caw-eu maˬ shaˬ-a. Yeˬhawˇbaˬ Aˬdaˬ hawˇ-eu Eˇbaˆ-ahˇ muiˬ-eu jeˬ hawˇ-eu maˬ muiˬ-eu jeˬ ehˇ nehˬ-eu aˬ kawˬ-aˬ jaˆ meh. Aˬ yawꞈ nyaꞈ Yeˬhawˇbaˬ-euˬ dawˬ-ahˇ naˇ haˬ-eu heu naˇ, aˬ yawꞈ-euˬ baoˬ-ahˇ yaw zeu taˬ-eu uˬ taꞈ, yawˬ jeˬ na luꞈ biꞈ nehˬ laꞈ-euˬ guiˬ lahˬ-ahˇ noeˬ keuˆ gaˇ duˇ-eu meh.
10, 11. (a) Saˬdaˬ Aˬdaˬ hawˇ-eu Eˇbaˆ-ahˇ muˇ juˇ aˬ joˆ-ehˇ juˇ-euˬ nga? (b) Aˬ nyaꞈ neh mˇ-euˬ jeˬ-ahˇ, aˬ jeˬ miˇ neh iˬ baˇ pyehˬ nehˬ paˬ-ehˇ maˬ g’eh-eu nga?
10 Aˬdaˬ hawˇ-eu Eˇbaˆ Yeˬhawˇbaˬ-euˬ dawˬ-ahˇ maˬ naˇ haˬ-eu lehˇ tseˇ-euˬ meh. Saˬdaˬ Eˇbaˆ-ahˇ “aˬ diˇ aˬ maˇ yaˇ kmˇ laꞈ k’oeˇ siˬ-eu aˇ siˬ tiˬ siˬ-iˬ taˬ pyaˆ dzaˬ lehˇ nawˬ nyaꞈ-ahˇ Miˬyehˇ ehˇ ta loˇ?” lehˇ naˇ haˬ-euˬ meh. “Yaˇ kmˇ g’ahˇ ceh jaˆ-eu aˇ siˬ aˇ bawˇ k’oeˇ bawˇ-euˬ aˇ siˬ maˬ ngeuˇ naˇ, . . . pyaˆ dzaˬ nya meh. Ehˇ k’awꞈ . . . aˇ bawˇ k’oeˇ bawˇ-euˬ aˇ siˬ pyaˆ dzaˬ-eu taˬ ehˇ. Toeˬ-eu tehꞈ-ehˇ k’awꞈ taˬ toeˬ ciˆ leˇ. Toeˬ ciˆ leˇ naˇ ya shiˇ meh lehˇ nga nyaꞈ-ahˇ Miˬyehˇ ehˇ taˬ-euˬ meh” lehˇ Eˇbaˆ ehˇ k’oꞈ nehˬ-euˬ meh.—Aˇdahˬbeh-eu 3:1-3.
11 Saˬdaˬ ehˇ-eu “naw nyaꞈ maˬ ya shiˇ-a. Aˇ bawˇ k’oeˇ bawˇ-euˬ aˇ siˬ naw nyaꞈ pyaˆ dzaˬ naˇ, naw nyaꞈ k’awꞈ Miˬyehˇ-ahˇ duˇ laˇ-awˇ, yaw muiˬ yaw doeˇ tseˇ paˆ nya laˇ tehꞈ-a lehˇ Miˬyehˇ siˬ nya-eu miˇ neh, k’oeˇ loꞈ-ehˇ ehˇ-eu meh.” (Aˇdahˬbeh-eu 3:4-6) Saˬdaˬ Eˇbaˆ-ahˇ yaw muiˬ yaw doeˇ yawˬ ha naꞈ-i tseˇ nya meh lehˇ bi noeˬ mawꞈ-awˇ, Miˬyehˇ-euˬ dawˬ maˬ naˇ haˬ k’awꞈ, maˬ shiˇ-a lehˇ jaˬ myawꞈ myawꞈ nehˬ-euˬ meh. Teu miˇ neh, Eˇbaˆ pyaˆ dzaˬ-awˇ k’aˬ dzeˇ zaˬ g’aˬ-ahˇ k’awꞈ bi dzaˬ-euˬ meh. Yeˬhawˇbaˬ neh taˬ pyaˆ dzaˬ lehˇ ehˇ-euˬ dawˬ-ahˇ aˬ nyaꞈ siˬ luꞈ meh. Aˇ siˬ pyaˆ dzaˬ-eu teu naˇ, Miˬyehˇ-euˬ dawˬ-ahˇ maˬ naˇ haˬ lehˇ tseˇ-awˇ, aˬ yawꞈ maꞈ-ahˇ gaˬ-eu mˬ taˆ jawˇ-eu Aˬda-ahˇ, yaw zeu maˬ baw lehˇ mˇ mawˇ-eu jeˬ pyeuꞈ meh. Aˬ nyaꞈ neh mˇ-euˬ jeˬ-ahˇ iˬ baˇ pyehˬ nehˬ paˬ-ehˇ maˬ g’eh-a.
12. Aˬdaˬ aˬ nyaꞈ Yeˬhawˇbaˬ-euˬ dawˬ-ahˇ maˬ naˇ haˬ-eu heu naˇ, aˬ jeˬ miˇ neh nui ma nyiˇ laˇ paˬ-ehˇ g’eh-eu nga?
12 Dahˬ beh-euˬ aˬ da aˬ ma, aˬ yawꞈ nyaꞈ-ahˇ Beh-euˬ g’aˬ-ahˇ maˬ naˇ haˬ-eu heu naˇ, nui ma nyiˇ laˇ paˬ-ehˇ g’eh-eu meh. Yaw jeˬ ma jeˬ, aˬ da aˬ ma deuˬ zaˬ-ahˇ shaˬ shaˬ zahˬ zahˬ-ehˇ cu huiˬ laꞈ k’awꞈ, zaˬ deuˬ ehˇ dawˬ maˬ naˇ haˬ ngeh jawˇ, nui ma aˇ naˆ ni nyiˇ laˇ-eu nya lehˇ shaˇ noeˬ haw sheˇ.
Aˬdaˬ miˇ tsaˬ-ahˇ neh laˇ-awˇ miˇ tsaˬ-ahˇ ya g’oꞈ k’oꞈ-iˇ meh
13. “Miˇ tsaˬ paˇ ya pyeuꞈ k’oꞈ iˇ tehꞈ-a” lehˇ Yeˬhawˇbaˬ ehˇ-eu heu, aˬ jeˬ-ahˇ ehˇ mawꞈ-eu nga?
13 Aˬdaˬ hawˇ-eu Eˇbaˆ ehˇ dawˬ maˬ naˇ haˬ ngeh jawˇ, mˬ maˬ maˬ byaˆ zaˇ ziˇ dehꞈ-eu jeˬ smˇ iˇ-euˬ meh. “Miˇ tsaˬ shaˬ jehˆ yuˇ-awˇ nawˬ-ahˇ tehˆ taˬ-euˬ loꞈ-ehˇ, nawˇ miˇ tsaˬ paˇ ya pyeuꞈ k’oꞈ iˇ tehꞈ-a” lehˇ Yeˬhawˇbaˬ Aˬdaˬ-ahˇ ehˇ nehˬ-euˬ meh. (Aˇdahˬbeh-eu 3:19-ahˇ gui.) Aˬdaˬ-ahˇ maˬ beh ngeh, miˇ tsaˬ pyeuꞈ-euˬ loꞈ-ehˇ, miˇ tsaˬ paˇ ya pyeuꞈ k’oꞈ iˇ meh lehˇ ehˇ mawꞈ-eu meh. (Aˇdahˬbeh-eu 2:7) Aˬdaˬ iˬ baˇ mˇ g’aˬ ngeh, shiˇ-awˇ byoˆ k’aꞈ jiˇ-euˬ meh.
14. Aˬ dui aˬ jeˬ miˇ neh shiˇ-eu nga?
14 Aˬdaˬ hawˇ-eu Eˇbaˆ Miˬyehˇ-euˬ dawˬ naˇ haˬ law nmˇ-aˬ, iˬ nah keuˆ ni dehꞈ luꞈ-a siˬ. Aˬ yawꞈ nyaꞈ Miˬyehˇ-euˬ dawˬ maˬ naˇ haˬ-eu miˇ neh, iˬ baˇ zaˬ pyeuꞈ iˇ-awˇ uˬ duˬ duˬ leˇ ngeh ya shiˇ-euˬ meh. Iˬ baˇ heu naˇ, dahˬ beh-euˬ aˬ da aˬ ma-ahˇ neh za-euˬ guˆ laˇ paˬ-ehˇ g’eh-eu naˇ gawˇ-ahˇ duˇ meh. Aˬ dui yawˬ g’aˬ na luꞈ iˬ baˇ laꞈ k’oeˇ dehꞈ le-euˬ miˇ neh, ya shiˇ-eu meh. (Loˇmaˆ 5:12) Ehˇ k’awꞈ, Miˬyehˇ heu loꞈ-ehˇ maˬ bi pyeuꞈ mawꞈ-a. Tsawˇ haˬ-ahˇ maˬ bi shiˇ mawꞈ-a. Jaˇliꞈ-ahˇ k’awꞈ shiˇ-eu jeˬ-ahˇ “muiˇ-eu g’aˬ” lehˇ kuˇ taˬ-euˬ meh.—1 Gawˇliˬtu 15:26.
Yaw tsaˬ yaw dawˇ jeˬ, aˬ dui-ahˇ bi buˬ iˇ
15. Shiˇ-eu jeˬ-euˬ gaˇ kawˆ-ahˇ siˬ duˬ-eu heu naˇ, aˬ dui-ahˇ aˬ jeˬ-ahˇ neh bi buˬ iˇ-eu nga?
15 Shiˇ-eu jeˬ-euˬ gaˇ kawˆ-ahˇ siˬ duˬ-eu heu naˇ, jah bahˬ taˬ-euˬ jeˬ-ahˇ neh bi buˬ iˇ-eu meh. Shiˇ-euˬ tsawˇ haˬ, naˇ-eu hawˇ-eu noeˬ shaˬ-eu maˬ baw-a lehˇ Jaˇliꞈ mehˬ-eu meh. Aˬ dui aˬ yawꞈ-ahˇ maˬ ngehˬ cawˬ nya, maˬ caw ba nehˬ nya, aˬ yawꞈ maꞈ k’awꞈ aˬ dui-ahˇ maˬ ngehˬ cawˬ nya, maˬ caw ba nehˬ nya, tiˬ jeˬ-iˬ maˬ jahˇ laˇ nya-eu miˇ neh, guˆ-eu maˬ loˬ-a. Ehˇ k’awꞈ, zahˇ g’awˬ mya ni, shiˇ-euˬ deuˬ tiˬ gaˇ paw dehꞈ luꞈ-awˇ, baoˬ ahˇ-eu deuˬ-ahˇ pyuˇ biꞈ nehˬ naˇ, shiˇ-euˬ deuˬ-ahˇ caw ba nehˬ nya meh lehˇ ehˇ-eu meh. Ehˇ k’awꞈ, gaˇ kawˆ heu aˬ dui siˬ duˬ taˬ-euˬ miˇ neh, aˬ dui-ahˇ maˬ shuiˇ tawˆ laˇ nya.
16. Zahˇ deuˬ shiˇ-eu gaˇ kawˆ-ahˇ, aˬ joˆ-ehˇ mehˬ bahˬ-eu nga?
16 Shiˇ dzeuˇ-euˬ deuˬ dehꞈ luꞈ-a siˬ lehˇ aˬ dui-ahˇ bi noeˬ-eu g’aˇ duˬ, Saˬdaˬ zahˇ k’awꞈ deuˬ-ahˇ zmˬ-awˇ muˇ juˇ juˇ-eu meh. Yaw jeˬ ma jeˬ, zahˇ tiˬ deuˬ na-aˬ, tsawˇ haˬ shiˇ k’awꞈ tiˬ jeˬ paˬ dehꞈ yaꞈ-a siˬ lehˇ mehˬ-eu meh. Nawˬ-euˬ zahˇ teu loꞈ-ehˇ mehˬ meh loˇ, maˬ ngeuˇ naˇ Jaˇliꞈ loꞈ-ehˇ mehˬ-a laˬ? Saˬdaˬ jaˬ myawꞈ myawꞈ-eu jeˬ-ahˇ zmˬ-awˇ, tsawˇ haˬ zaˬ Yeˬhawˇbaˬ nehˬ-ehˇ kaˬ iˇ ni mˇ-eu meh.
17. Shiˬ buiˇ lah ma-ahˇ k’ehˬ-eu lehˇ ehˇ-eu heu, aˬ jeˬ miˇ neh Yeˬhawˇbaˬ-ahˇ ja bu-eu jeˬ pyeuꞈ-eu nga?
17 Zahˇ deuˬ mehˬ-eu teu naˇ, guˆ laˇ paˬ-ehˇ g’eh-eu meh. Yaw jeˬ ma jeˬ, maˬ muiˬ-eu tsawˇ haˬ aˬ myah luꞈ shiˬ buiˇ lah ma-ahˇ bi k’ehˬ meh lehˇ mehˬ-eu meh. Teu-aˬ, Yeˬhawˇbaˬ-ahˇ ja bu ja doeˇ-eu jeˬ pyeuꞈ meh. Miˬyehˇ tsawˇ haˬ zaˬ-ahˇ teu loꞈ-ehˇ k’ehˬ-eu lehˇ tiˬ jawˇ-iˬ maˬ noeˬ haw-aˬ. (1 Yoˇhaˬ 4:8-ahˇ gui.) Zaˬ-euˬ aˬ laꞈ miˬ dzaˬ-ahˇ baꞈ puiˆ-eu tsawˇ haˬ-ahˇ nawˇ aˬ joˆ-ehˇ noeˬ nya? Nawˇ aˬ yawꞈ yaw-ehˇ haiˬ nga lehˇ noeˬ-awˇ, aˬ yawꞈ-ahˇ maˬ siˬ nya mawꞈ-eu paˬ. Saˬdaˬ aˬ dui-ahˇ Yeˬhawˇbaˬ k’awꞈ teu loꞈ-ehˇ g’eh meh lehˇ bi noeˬ mawꞈ-eu meh.
18. Aˬ dui aˬ jeˬ miˇ neh shiˇ-euˬ deuˬ-ahˇ guˆ-eu maˬ loˬ-eu nga?
18 Zahˇ tiˬ deuˬ na, tsawˇ haˬ shiˇ ngeh, yaw sahˇ pyeuꞈ-iˇ meh lehˇ mehˬ-eu meh. Shiˇ-euˬ deuˬ muiˬ-eu cawˬ, maˬ ngeuˇ naˇ muiˇ-eu g’aˬ k’awꞈ pyeuꞈ laˇ nya-eu miˇ neh, aˬ yawꞈ maꞈ-ahˇ guˆ-awˇ, yaw zeu ya baw meh lehˇ zahˇ deuˬ mehˬ-eu meh. Tsawˇ haˬ myaˬ ni dawˬ heu deuˬ-ahˇ jah-eu miˇ neh, Yeˬhawˇbaˬ-ahˇ uˬ duˬ maˬ tahˬ ni, shiˇ-euˬ deuˬ-ahˇ tahˬ-eu meh. Maˇ diˇ naˇ, shiˇ-euˬ deuˬ tiˬ jeˬ-iˬ maˬ paˇ siˬ nya-euˬ miˇ neh, aˬ yawꞈ maꞈ-ahˇ guˆ-eu maˬ loˬ-a. Yeˬhawˇbaˬ aˬ dui-ahˇ Beh-euˬ yaw sahˇ pyeuꞈ-awˇ, aˬ yawꞈ tiˬ g’aˬ tehꞈ-ehˇ maˇ diˇ Miˬyehˇ pyeuꞈ-eu miˇ neh, aˬ yawꞈ-ahˇ tehꞈ-ehˇ uˬ duˬ tahˬ-eu tsaˬ meh.—Pah mehˬ-eu 4:11.
19. Shiˇ-euˬ gaˇ kawˆ-ahˇ siˬ duˬ-eu heu, aˬ joˆ-ehˇ caw ba nga?
19 Shiˇ-eu jeˬ-euˬ gaˇ kawˆ-ahˇ siˬ duˬ-eu heu naˇ, jah bahˬ taˬ-euˬ jeˬ-ahˇ neh bi buˬ iˇ-awˇ, Yeˬhawˇbaˬ neh saˇ jaˇ dzaˬ taˬ-euˬ gaˇ kawˆ hawˇ-eu mehˬ hu paw-euˬ gaˇ kawˆ-ahˇ k’awꞈ g’oˆ shaw laˇ ni caw ba nehˬ meh.
20. Nyaˆ taꞈ kawˆ-ahˇ, aˬ jeˬ-euˬ gaˇ kawˆ dzaw-eu nga?
20 “Tsawˇ haˬ shiˇ dzeuˇ shaw naˇ, paˇ dehꞈ laˇ nya ta loˇ?” lehˇ, gaˇ hu-euˬ Miˬyehˇ gaˇ mˇ zaˬ Yawˇbaˆ naˇ haˬ-euˬ meh. (Yawˇbaˆ 14:14) Shiˇ dzeuˇ-euˬ deuˬ g’oꞈ dehꞈ laˇ-eu lehˇ ehˇ-eu teu pyeuꞈ leˇ nya meh laˬ? Miˬyehˇ neh Jaˇliꞈ laꞈ k’oeˇ ehˇ taˬ-euˬ jeˬ, nui ma cehˇ tahˬ tahˬ laˇ paˬ-ehˇ g’eh-eu meh. Heu nyaˆ taꞈ kawˆ-ahˇ dzaw ma.
^ Yaw zaˬ 5 Tiˬ deuˬ na, mawˇ do shiˇ k’awꞈ yaw sahˇ maˬ shiˇ-a lehˇ jah-eu meh. Gaˇ kawˆ heu nehˬ-ehˇ taꞈ leˇ-awˇ, Dzaw lahˬ 17 hawˇ-eu 18-ahˇ haw iˇ-awˬ.
