Gaˇ kawˆ 15
Miˬyehˇ ha geuꞈ-eu uˬ duˬ tahˬ-eu jeˬ
1. Miˬyehˇ-ahˇ uˬ duˬ aˬ joˆ-ehˇ ya tahˬ-eu lehˇ, aˬ suˇ g’aˬ tehꞈ-ehˇ ehˇ nehˬ nya-eu nga?
Zahˇ myaˬ ni maˇ maˇ ni Miˬyehˇ-euˬ gaˇ kawˆ mehˬ-eu ma lehˇ ehˇ-eu meh. Ehˇ k’awꞈ, aˬ joˆ-ehˇ pyeuꞈ nya-eu, Miˬyehˇ aˬ suˇ g’aˬ pyeuꞈ-awˇ, Miˬyehˇ-ahˇ uˬ duˬ aˬ joˆ-ehˇ ya tahˬ-eu lehˇ mehˬ-eu maˬ duˇ leˇ gaˇ. Toˆ-ehˇ jeˬ maˇ-iˬ, Miˬyehˇ ha geuꞈ-eu uˬ duˬ tahˬ-eu jeˬ-ahˇ aˬ dui aˬ joˆ-ehˇ siˬ nya-eu nga? Yeˬhawˇbaˬ tiˬ g’aˬ tehꞈ-ehˇ, aˬ yawꞈ-ahˇ uˬ duˬ aˬ joˆ-ehˇ ya tahˬ-eu lehˇ ehˇ nehˬ nya-eu meh.
2. Miˬyehˇ ha geuꞈ-eu uˬ duˬ tahˬ-eu jeˬ-ahˇ, aˬ dui aˬ gaˇ neh ya siˬ nya-eu nga?
2 Yeˬhawˇbaˬ aˬ yawꞈ ha geuꞈ-eu uˬ duˬ tahˬ-eu jeˬ bi siˬ-eu g’aˇ duˬ, Jaˇliꞈ biꞈ nehˬ taˬ-euˬ meh. Teu miˇ neh, aˬ dui Jaˇliꞈ ya dzaw-eu meh. Yeˬhawˇbaˬ aˬ dui-ahˇ gaˬ-awˇ k’ahˬ lahˇ-eu miˇ neh, aˬ yawꞈ mehˬ-eu jeˬ-ahˇ neh gaˇ dahˇ tsoeˬ-eu jeˬ bi za mawꞈ-eu meh.—Iˇsaˬyaˇ 48:17.
3. Miˬyehˇ aˬ dui-ahˇ aˬ jeˬ bi jahˇ mawꞈ-eu nga?
3 Miˬyehˇ zahˇ yawˬ zahˇ na luꞈ-ahˇ ha geuꞈ meh lehˇ tiˬ g’aˬ na ehˇ-eu meh. Ehˇ k’awꞈ, Yeˬsuˇ teu loꞈ-ehˇ maˬ mehˬ-a. “Ngaˬ-ahˇ Sahˬpaˬ-oˇ, Sahˬpaˬ-oˇ’ lehˇ k’aˇ kuˇ-eu tsawˇ haˬ yawˬ g’aˬ na luꞈ, mˬ taˆ Miˇk’ahˬ-ahˇ ya uˇ leˇ-eu maˬ ngeuˇ-a. Mˬ k’oeˇ taˆ jawˇ-eu ngaˬ Da nui ma tsaˬ-eu jeˬ mˇ-eu tsawˇ haˬ deuˬ tehꞈ-ehˇ ya uˇ leˇ-eu meh” lehˇ Yeˬsuˇ ehˇ-eu meh. Miˬyehˇ-euˬ dawˬ maˬ naˇ haˬ-eu deuˬ-ahˇ, Yeˬsuˇ “yaw haiˬ mˇ-eu tsawˇ haˬ” lehˇ sawˇ-eu miˇ neh, Miˬyehˇ bi mˇ mawꞈ-eu jeˬ dzaw-awˇ, mˇ caw-eu heu naˇ aˇ yeˇ huiˬ dui dui-eu jeˬ pyeuꞈ meh.—Maꞈtehˬ 7:21-23, Jaˇliꞈ Yaw shuiꞈ 1997.
4. Miˬyehˇ nui k’ahˇ mˇ-eu jeˬ nehˬ-ehˇ taꞈ leˇ-awˇ, Yeˬsuˇ aˬ jeˬ ehˇ-eu nga?
4 Aˬ dui Miˬyehˇ-euˬ nui k’ahˇ mˇ ngeh, laˆ tsoeˬ laˇ-eu jeˬ-ahˇ ya puˬ meh lehˇ Yeˬsuˇ ehˇ-eu meh. “G’oˆ k’ehˬ yaw suꞈ-ahˇ uˇ leˇ-awˬ. Luˬ iˇ seˇ iˇ-eu gaˇ ma-euˬ g’oˆ k’ehˬ-aˬ, jeˇ dui dui-awˇ, gaˇ ma saˇ lehˆ ni dahˇ-eu miˇ neh, uˇ leˇ-eu tsawˇ haˬ yaw myaˬ meh. Ehˇ k’awꞈ, dehꞈ-eu saꞈ laˇ gaˇ ma-euˬ g’oˆ k’ehˬ-aˬ, suꞈ dui dui-awˇ, gaˇ ma shaˬ dui dui-eu miˇ neh, gaˇ ma k’oeˇ kahˇ poˆ mawˇ-eu tsawˇ haˬ yaw cuiˆ meh” lehˇ Yeˬsuˇ ehˇ-eu meh. (Maꞈtehˬ 7:13, 14) G’oˆ k’ehˬ yaw suꞈ heu naˇ, Miˬyehˇ ha geuꞈ-eu uˬ duˬ tahˬ-eu jeˬ pyeuꞈ-awˇ, mˬ maˬ maˬ byaˆ zaˇ ziˇ dehꞈ-eu gaˇ ma meh. G’oˆ k’ehˬ yaw jeˇ naˇ, Miˬyehˇ maˬ ha geuꞈ-eu uˬ duˬ tahˬ-eu jeˬ pyeuꞈ-awˇ, cawˆ iˇ-eu gaˇ ma pyeuꞈ meh. Yeˬhawˇbaˬ tiˬ g’aˬ-ahˇ-iˬ maˬ bi shiˇ mawꞈ-eu miˇ neh, yawˬ g’aˬ na luꞈ-ahˇ aˬ yawꞈ-euˬ gaˇ kawˆ dzaw-eu aˇ yamˬ biꞈ nehˬ taˬ-euˬ meh.—2 Beˬtuˆluˆ 3:9.
Miˬyehˇ ha geuꞈ-eu uˬ duˬ tahˬ-eu jeˬ
5. Zahˇ maˇ laꞈ k’oeˇ jawˇ-eu deuˬ-ahˇ, aˬ joˆ-ehˇ siˬ nya-eu nga?
5 Zahˇ maˇ-ahˇ jawˇ-eu deuˬ-ahˇ, aˬ yawꞈ maꞈ-euˬ jah-eu jeˬ hawˇ-eu mˇ-eu jeˬ-ahˇ haw naˇ, siˬ laˇ meh lehˇ Yeˬsuˇ ehˇ-eu meh. “Aˬ yawꞈ maꞈ mˇ doˆ shaˇ doˆ laꞈ gaˇ haw naˇ, aˬ yawꞈ maꞈ aˬ joˆ-ehˇ g’eh-eu tsawˇ haˬ pyeuꞈ-eu gaˇ kawˆ, naw maꞈ-ahˇ siˬ laˇ tehꞈ-a” lehˇ Yeˬsuˇ ehˇ-awˇ, “aˇ bawˇ yaw muiˬ-ahˇ aˇ siˬ yaw muiˬ siˬ le” meh lehˇ paˇ ehˇ-eu meh. (Maꞈtehˬ 7:16, 17) Heu naˇ, zahˇ maˇ laꞈ k’oeˇ jawˇ-eu tsawˇ haˬ deuˬ maˬ lehˬ iˇ nya-a lehˇ ehˇ mawꞈ-eu maˬ ngeuˇ-a. Aˬ yawꞈ maꞈ aˬ myah luꞈ tsaˬ-eu jeˬ-ahˇ mˇ nya ni leh jeh-eu meh. Zahˇ maˇ laꞈ k’oeˇ jawˇ-eu deuˬ-ahˇ, aˬ jeˬ-ahˇ haw-awˇ siˬ laˇ-eu nga lehˇ haw iˇ ma.
6, 7. Zahˇ maˇ, aˬ jeˬ miˇ neh Jaˇliꞈ-ahˇ dawˬ pehˬ taˬ-eu nga? Yeˬsuˇ aˬ dui-ahˇ aˬ jeˬ mˇ mehˬ yaꞈ-euˬ nga?
6 Uˬ duˬ tahˬ-eu jeˬ Jaˇliꞈ-ahˇ dawˬ pehˬ ya taˬ. “Jaˇliꞈ dawˬ kawˬ dawˬ tawˆ luꞈ Miˬyehˇ neh bi noeˬ doˆ-eu laꞈ k’oeˇ boꞈ doˆ taˬ-euˬ” meh. (2 Tiˆmoˇseˬ 3:16, 17) Tsaˬ-eu jeˬ mehˬ-eu, iˬ baˇ-ahˇ toeˬ mehˬ-eu, maˬ tsaˬ-eu jeˬ-ahˇ mehˬ paˇ-eu, Miˬyehˇ gaˇ mˇ zaˬ byah dui nya dui dui-awˇ, yaw muiˬ jeˬ dawˬ tawˆ luꞈ mˇ nya ni mehˬ-eu g’aˇ duˬ gaˇ dahˇ tsoeˬ-eu meh. Pawˇluˆ Ka li zaˬ deuˬ-ahˇ “naw maꞈ jawˇ gaˇ nga maꞈ Miˬyehˇ dawˬ kawˬ hehˇ leꞈ ngeh, tsawˇ haˬ-euˬ dawˬ loꞈ-ehˇ sawˇ-awˇ naw maꞈ ha geuꞈ-euˬ maˬ ngeuˇ-a. Maˇ maˇ ni Miˬyehˇ-euˬ dawˬ pyeuꞈ-eu miˇ neh, Miˬyehˇ-euˬ dawˬ loꞈ-ehˇ sawˇ-awˇ ha geuꞈ-euˬ meh” lehˇ boꞈ nehˬ-euˬ meh. (1 Teˇsaˬloˇni 2:13) Zahˇ maˇ Miˬyehˇ-euˬ dawˬ-ahˇ tehꞈ-ehˇ dawˬ pehˬ taˬ-awˇ mehˬ-eu meh. Tsawˇ haˬ-euˬ nui noeˬ, zahˇ sahˇ k’oꞈ, yawˬ jeˬ yawˬ heu deuˬ-ahˇ dawˬ pehˬ maˬ taˬ-a.
7 Yeˬsuˇ k’aˇ mehˬ-eu jeˬ Miˬyehˇ-euˬ dawˬ-ahˇ dawˬ pehˬ taˬ-eu meh. (Yoˇhaˬ 17:17-ahˇ gui.) Aˬ yawꞈ tiˬ k’ehˬ maˬ taˬ Jaˇliꞈ-ahˇ ngehˬ keuˆ-eu meh. (Maꞈtehˬ 4:4, 7, 10) Miˬyehˇ gaˇ mˇ zaˬ maˇ diˇ deuˬ Yeˬsuˇ-ahˇ dzaw geuꞈ-awˇ, yawˬ jeˬ na luꞈ Jaˇliꞈ-ahˇ dawˬ pehˬ taˬ-awˇ mehˬ-eu meh.
8. Yeˬhawˇbaˬ-ahˇ uˬ duˬ tahˬ-eu jeˬ nehˬ-ehˇ taꞈ leˇ-awˇ, Yeˬsuˇ aˬ jeˬ mehˬ-eu nga?
8 Yeˬhawˇbaˬ-ahˇ tehꞈ-ehˇ uˬ duˬ ya tahˬ. Ja ceuˬ 83:18 Miˇ shuiꞈ dawˬ paˇ Jaˇliꞈ “Yeˬhawˇbaˬ lehˇ kuˇ-eu g’aˬ tehꞈ-ehˇ, miˇ tsaˬ tiˬ siˬ siˬ lah ni-ahˇ huiˬ dzehˬ dzehˬ-awˇ uˆ lahˇ-eu g’aˬ pyeuꞈ” meh lehˇ ehˇ-eu meh. Yeˬsuˇ tsawˇ haˬ-ahˇ maˇ diˇ Miˬyehˇ pyeuꞈ-eu g’aˬ-ahˇ bi siˬ mawꞈ-awˇ, Miˬyehˇ-euˬ tsawˇ myahˇ jiˇ mehˬ-eu meh. (Heˬbyehˇ 2:12, YS97-ahˇ gui.) ‘Nawˬ-euˬ Miˬyehˇ pyeuꞈ-eu [“Yeˬhawˇbaˬ,”MS]-ahˇ tehꞈ-ehˇ nawˇ uˬ duˬ ya tahˬ-awˇ, aˬ yawꞈ-euˬ nui k’ahˇ tehꞈ-ehˇ ya mˇ meh’ lehˇ Yeˬsuˇ ehˇ-eu meh. (Maꞈtehˬ 4:10) Teu miˇ neh, Miˬyehˇ gaˇ mˇ zaˬ deuˬ Yeˬsuˇ-ahˇ dzaw geuꞈ-awˇ, Yeˬhawˇbaˬ-ahˇ tehꞈ-ehˇ uˬ duˬ ya tahˬ-awˇ aˬ yawꞈ-euˬ tsawˇ myahˇ jiˇ ya zmˬ meh. Miˬyehˇ tsawˇ myahˇ hawˇ-eu aˬ dui g’aˇ duˬ aˬ jeˬ jeˇ jahˇ-eu lehˇ, aˬ cawˬ-ahˇ ya ehˇ nehˬ-a siˬ.
9, 10. Aˬ dui nui gaˬ aˬ joˆ-ehˇ ya mˇ mawˇ-eu nga?
9 Tsawˇ haˬ-ahˇ maˇ diˇ ya gaˬ. Yeˬsuˇ aˬ yawꞈ-euˬ zaˬ lahˇ deuˬ-ahˇ tiˬ g’aˬ tiˇ g’aˬ ya gaˬ meh lehˇ mehˬ-eu meh. (Yoˇhaˬ 13:35-ahˇ gui.) Smˇ muiˬ iˇ shaˬ maˬ ehˇ, aˬ gaˇ neh oe-euˬ maˬ ehˇ, dehꞈ jeˬ dehꞈ kawˆ maˬ duˇ leˇ-eu maˬ ehˇ, mehˇ nmˇ loꞈ-ehˇ maˇ diˇ ya gaˬ-eu meh. (Gawˇlawˇsehˇ 3:14) Nga maꞈ guiˇ deuˆ gaˇ hawˇ-eu tsawˇ haˬ-ahˇ sehꞈ gaˇ maˬ keuˬ leˇ. Jaˇliꞈ “Miˬyehˇ-euˬ zaˬ hawˇ-eu Nehꞈ sahˬ paˬ-euˬ zaˬ yaw kaˬ k’oeˇ naˆ ni beu gaˇ-eu meh. Yaw tsaˬ yaw dawˇ jeˬ maˬ mˇ-ehˇ, Ka li zaˬ cawˬ cawˬ maˬ gaˬ-eu tsawˇ haˬ-aˬ, Miˬyehˇ-euˬ zaˬ maˬ ngeuˇ-a” lehˇ ehˇ-awˇ, “tiˬ g’aˬ tiˇ g’aˬ ya gaˬ meh . . . Gaˬiˇnaˆ loꞈ-ehˇ maˬ ya g’eh-a. Aˬ yawꞈ-aˬ, haiˬ dui dui-eu g’aˬ-ahˇ taꞈ-eu tsawˇ haˬ pyeuꞈ-awˇ, aˬ yawꞈ-euˬ aˬ nyiˇ tsi tsi ni g’eh-eu Aˬbeˬlaˆ-ahˇ sehꞈ-euˬ meh” lehˇ paˇ ehˇ-eu meh.—1 Yoˇhaˬ 3:10-12; 4:20, 21.
10 Aˬ dui tiˬ g’aˬ tiˇ g’aˬ caw ba-eu g’aˇ duˬ, aˇ yamˬ, g’aˬ, pyuˇ shuiˇ heu deuˬ ya zmˬ meh. (Heˬbyehˇ 10:24, 25) Yawˬ g’aˬ na luꞈ-ahˇ “muiˬ-eu jeˬ” ya mˇ nehˬ meh.—Gaˬlaˬtiˆ 6:10.
11. Yeˬsuˇ bi buˬ iˇ-eu g’aˬ pyeuꞈ-eu lehˇ, aˬ jeˬ miˇ neh jah-eu nga?
11 Yeˬsuˇ aˬ dui-ahˇ bi buˬ iˇ-euˬ g’aˬ pyeuꞈ-eu miˇ neh, aˬ yawꞈ-euˬ dawˬ-ahˇ ya naˇ haˬ. Mˬ heu siˬ-euˬ uˬ moˆ “aˬ yawꞈ maˬ ngeuˇ naˇ, aˬ dui-ahˇ ka k’oꞈ nya-eu tiˬ g’aˬ-iˬ maˬ jawˇ-a” lehˇ Jaˇliꞈ ehˇ-eu meh. (G’aˬk’ehˇ 4:12) Yeˬhawˇbaˬ-euˬ ehˇ dawˬ naˇ haˬ-eu deuˬ-ahˇ ka k’oꞈ le-eu g’aˇ duˬ, Yeˬsuˇ-euˬ dehꞈ ziˇ bi lawˇ le-euˬ lehˇ, Gaˇ kawˆ 5-ahˇ aˬ dui ya dzaw dzeuˇ-euˬ ma. (Maꞈtehˬ 20:28) Yeˬhawˇbaˬ Yeˬsuˇ-ahˇ tseˇ-awˇ miˇ tsaˬ-ahˇ uˆ lahˇ-eu Sahˬpaˬ bi geuꞈ-euˬ meh. Aˬ dui mˬ maˬ maˬ byaˆ zaˇ ziˇ dehꞈ-eu jeˬ za mawꞈ naˇ, Yeˬsuˇ ehˇ dawˬ ya naˇ haˬ meh lehˇ Jaˇliꞈ ehˇ-eu meh.—Yoˇhaˬ 3:36-ahˇ gui.
12. Uˆ lahˇ-eu gaˇ kawˆ-ahˇ, aˬ jeˬ miˇ neh maˬ ya suˬ saˬ nga?
12 Miˇ k’ahˬ-ahˇ uˆ lahˇ-eu gaˇ kawˆ-ahˇ maˬ suˬ saˬ. Yeˬsuˇ miˇ tsaˬ-ahˇ uˆ lahˇ-eu gaˇ kawˆ-ahˇ maˬ suˬ saˬ-a. Aˬ yawꞈ yaˇ k’aˬ daˇ gaˇ ya daˬ ngeh, Piˇlaˆ-ahˇ “ngaˬ-euˬ miˇ k’ahˬ-aˬ, miˇ tsaˬ heu-ahˇ maˬ taꞈ” lehˇ ehˇ nehˬ-euˬ meh. (Yoˇhaˬ 18:36-ahˇ gui.) Aˬ dui Yeˬsuˇ loꞈ-ehˇ mˬ taˆ jaˆ-eu Miˬyehˇ-euˬ Miˇk’ahˬ-ahˇ saˇ jaˇ ya ziꞈ meh. Teu miˇ neh, aˬ dui aˬ gaˇ jawˇ k’awꞈ, uˆ lahˇ-eu gaˇ kawˆ-ahˇ maˬ ya suˬ saˬ-a. Jaˇliꞈ laꞈ k’oeˇ “miˇ k’ahˬ sahˬ paˬ-euˬ uˬ moˆ ya jawˇ meh” lehˇ ehˇ taˬ-euˬ heu naˇ, miˇ k’ahˬ-ahˇ uˆ lahˇ-eu deuˬ-euˬ dawˬ-ahˇ naˇ haˬ gaˇ ehˇ mawꞈ-eu meh. (Loˇmaˆ 13:1) Aˬ dui miˇ k’ahˬ-euˬ zahˇ sahˇ k’oꞈ-ahˇ ya naˇ haˬ meh. Ehˇ k’awꞈ, Miˬyehˇ-euˬ zahˇ-ahˇ maˬ tsaˬ naˇ, “tsawˇ haˬ-euˬ dawˬ-ahˇ naˇ haˬ-eu naˆ maˬ tseˇ, Miˬyehˇ-euˬ dawˬ-ahˇ nga maꞈ ya naˇ haˬ meh” lehˇ g’aˬ k’ehˇ deuˬ neh ehˇ-euˬ loꞈ-ehˇ ya jahˇ meh.—G’aˬk’ehˇ 5:29; Maˬkuˆ 12:17.
13. Miˬyehˇ-euˬ Miˇk’ahˬ nehˬ-ehˇ taꞈ leˇ-awˇ, aˬ dui aˬ jeˬ gaˇ kawˆ tsaꞈ gaˬ-eu nga?
13 Miˬyehˇ-euˬ Miˇk’ahˬ tehꞈ-ehˇ shaˬ zahˬ-ahˇ laˆ byoˆ nya meh lehˇ jah-awˇ tsaꞈ gaˬ. Yeˬsuˇ “Miˬyehˇ Miˇk’ahˬ gaˇ kawˆ laˬ k’aˬ cehˇ-eu guiˬ lahˬ dawˬ” miˇ k’ahˬ doe ni tsaꞈ gaˬ doe tehꞈ-a lehˇ ehˇ-eu meh. (Maꞈtehˬ 24:14-ahˇ gui.) Tsawˇ haˬ zaˬ uˆ lahˇ-eu jeˬ-aˬ, Miˬyehˇ-euˬ Miˇk’ahˬ loꞈ-ehˇ maˬ mˇ muiˬ nehˬ nya-a. (Ja ceuˬ 146:3) Yeˬsuˇ “Nawˬ-euˬ Miˇk’ahˬ keuˆ le luꞈ-uˇ. Nawˇ nui k’ahˇ shiˇ-eu jeˬ, mˬ k’oeˇ taˆ mˇ byah-euˬ loꞈ-ehˇ, miˇ tsaˬ k’oeˇ taˆ mˇ byah luꞈ-uˇ” lehˇ guiˬ lahˬ shaˇ lehˇ ehˇ-eu meh. (Maꞈtehˬ 6:10) Miˬyehˇ-euˬ Miˇk’ahˬ tsawˇ haˬ zaˬ uˆ lahˇ-eu jeˬ-ahˇ laˆ cawˆ jiˇ-awˇ, “mˬ maˬ maˬ byaˆ zaˇ ziˇ ziꞈ-eu miˇ k’ahˬ pyeuꞈ” meh lehˇ Jaˇliꞈ ehˇ-eu meh.—Daˬyeˬlaˇ 2:44.
14. Miˬyehˇ ha geuꞈ-eu jeˬ-ehˇ uˬ duˬ tahˬ-eu aˬ geu deuˬ nga?
14 Gaˇ kawˆ heu deuˬ-ahˇ ya siˬ dzeuˇ ngeh, nawˇ shaˇ noeˬ haw sheˇ. Jaˇliꞈ-ahˇ dawˬ pehˬ taˬ-awˇ mehˬ-eu aˬ geu deuˬ nga? Miˬyehˇ-euˬ tsawˇ myahˇ mehˬ nehˬ-eu aˬ geu deuˬ nga? Tiˬ g’aˬ tiˇ g’aˬ maˇ diˇ gaˬ-awˇ aˬ dui-ahˇ bi caw ba-eu g’aˇ duˬ, Miˬyehˇ neh Yeˬsuˇ-ahˇ bi oe-euˬ meh lehˇ jah-eu aˬ geu deuˬ nga? Uˆ lahˇ-eu gaˇ kawˆ-ahˇ maˬ suˬ saˬ-eu aˬ geu deuˬ nga? Miˬyehˇ-euˬ Miˇk’ahˬ maˬ ngeuˇ naˇ shaˬ zahˬ-ahˇ maˬ laˆ byoˆ nya-a lehˇ tsaꞈ gaˬ-eu aˬ geu deuˬ nga? Yeˬhawˇbaˬ-euˬ Saˇ kiˇ tehꞈ meh.—Iˇsaˬyaˇ 43:10-12.
Nawˇ aˬ jeˬ jahˇ paˬ-ehˇ g’eh-eu nga?
15. Aˬ dui-euˬ uˬ duˬ tahˬ-eu jeˬ-ahˇ Miˬyehˇ bi ha geuꞈ mawꞈ naˇ, aˬ jeˬ ya jahˇ-eu nga?
15 Miˬyehˇ jawˇ meh lehˇ jah-awˇ neh tehꞈ-ehˇ maˬ jiˇ-a. Nehꞈ deuˬ k’awꞈ teu loꞈ-ehˇ jah-eu meh. Ehˇ k’awꞈ, aˬ yawꞈ maꞈ Miˬyehˇ-euˬ dawˬ-ahˇ maˬ naˇ haˬ-a. (Yaˬkoˆ 2:19) Aˬ dui-euˬ uˬ duˬ tahˬ-eu jeˬ-ahˇ Miˬyehˇ bi ha geuꞈ mawꞈ naˇ, mehˬ boeˬ tehꞈ-ehˇ jah ma lehˇ maˬ ehˇ ni, ya mˇ caw-eu meh.
16. Aˬ jeˬ miˇ neh zahˇ k’awꞈ nehˬ-ehˇ maˬ ya keuˬ leˇ-eu nga?
16 Aˬ dui-euˬ uˬ duˬ tahˬ-eu jeˬ-ahˇ Miˬyehˇ bi ha geuꞈ mawꞈ naˇ, zahˇ k’awꞈ deuˬ nehˬ-ehˇ maˬ ya keuˬ leˇ-a. Iˇsaˬyaˇ “Teu gaˇ neh maˬ oe doˆ ni taˬ byehˇ . . . yawˬ ha-euˬ g’awˇ mawˇ shawˇ”-awˬ lehˇ ehˇ-eu meh. (Iˇsaˬyaˇ 52:11; 2 Gawˇliˬtu 6:17) Teu miˇ neh, zahˇ k’awꞈ nehˬ-ehˇ taꞈ-eu aˬ geu jeˬ-ahˇ maˬ kaˬ, laꞈ maˬ ya daˬ-a.
17, 18. “Baˬbuˇloˬ meuˬ meuˬ ma,” aˬ jeˬ-ahˇ ehˇ-eu nga? Aˬ jeˬ miˇ neh teu gaˇ neh yaw kawˇ-ehˇ ya doˆ laˇ-eu nga?
17 Zahˇ k’awꞈ aˬ jeˬ-ahˇ ehˇ-eu nga? Jaˇliꞈ ehˇ-eu loꞈ-ehˇ Miˬyehˇ-ahˇ uˬ duˬ maˬ tahˬ-eu zahˇ deuˬ-ahˇ ehˇ-eu meh. Jaˇliꞈ zahˇ k’awꞈ deuˬ-ahˇ “Baˬbuˇloˬ meuˬ meuˬ ma” lehˇ kuˇ-eu meh. (Pah mehˬ-eu 17:5) Aˬ jeˬ miˇ neh teu loꞈ-ehˇ kuˇ-eu nga? Noˇaˬ saˇ ka-ahˇ iˇ cuꞈ dahˬ pymˬ g’aˬ ngeh, zahˇ k’awꞈ deuˬ-euˬ mehˬ jeˬ Baˬbuˇloˬ meuˬ-ahˇ neh doˆ le-awˇ, miˇ k’ahˬ doe ni byaˆ iˇ-euˬ miˇ neh meh. Yaw jeˬ ma jeˬ, Baˬbuˇloˬ-euˬ tsawˇ haˬ smˇ g’aˬ tiˬ poeˬ miˬ yehˇ-ahˇ jah-eu meh. Nymˬ-mˇ k’awꞈ teu gaˇ duˇ ni, zahˇ myaˬ ni Miˬyehˇ-aˬ, smˇ g’aˬ tiˬ poeˬ miˬ yehˇ pyeuꞈ meh lehˇ mehˬ-eu meh. Ehˇ k’awꞈ, maˇ diˇ Miˬyehˇ tiˬ g’aˬ jawˇ-eu tehꞈ meh lehˇ, Jaˇliꞈ-ahˇ maˇ jawˆ ni ehˇ taˬ-euˬ meh. Teu-aˬ, Yeˬhawˇbaˬ meh. Yeˬsuˇ-aˬ, aˬ yawꞈ-euˬ Zaˬ pyeuꞈ meh. (Yoˇhaˬ 17:3) Baˬbuˇloˬ tsawˇ haˬ deuˬ, tsawˇ haˬ shiˇ naˇ tiˬ jeˬ paˬ dehꞈ luꞈ-a siˬ lehˇ jah-awˇ, shiˬ buiˇ lah ma-ahˇ bi k’ehˬ luꞈ-a siˬ lehˇ k’awꞈ jah-eu meh. Maˇ diˇ naˇ teu loꞈ-ehˇ maˬ ngeuˇ-a.—Dzaw lahˬ 14, 17 hawˇ-eu 18-ahˇ haw.
18 G’awˬ myahˇ maˬ g’eh-ehˇ zahˇ k’awꞈ deuˬ-ahˇ laˆ cawˆ jiˇ ma lehˇ Miˬyehˇ ehˇ taˬ-euˬ meh. (Pah mehˬ-eu 18:8) Aˬ jeˬ miˇ neh teu laꞈ k’oeˇ neh yaw kawˇ-ehˇ ya doˆ laˇ-eu lehˇ, nawˇ g’oˆ shaw dzeuˇ-euˬ maˬ ngeuˇ loˇ? Yeˬhawˇbaˬ Miˬyehˇ nawˬ-ahˇ jeˬ nahˬ maˬ ga iˇ mi naˆ-ehˇ bi doˆ laˇ mawꞈ meh.—Pah mehˬ-eu 18:4.
Yeˬhawˇbaˬ-euˬ zaˬ lahˇ deuˬ nehˬ-ehˇ Miˬyehˇ gaˇ mˇ-eu heu neh, miˇ tsaˬ k’oeˇ taˆ jaˆ-eu Miˬyehˇ-euˬ nymˇ jiˇ laꞈ k’oeˇ tiˬ g’aˬ pyeuꞈ laˇ
19. Nawˇ Yeˬhawˇbaˬ-euˬ gaˇ mˇ-eu lehˇ noeˬ tsehˆ ngeh, aˬ yawꞈ nawˬ-ahˇ aˬ joˆ-ehˇ haw piˇ-eu nga?
19 Nawˇ zahˇ k’awꞈ laꞈ k’oeˇ neh doˆ le-awˇ Yeˬhawˇbaˬ-euˬ gaˇ mˇ-eu lehˇ noeˬ tsehˆ ngeh, nawˬ-euˬ cawˬ hawˇ-eu nymˇ jiˇ laꞈ k’oeˇ-euˬ deuˬ, maˬ g’oˆ shaw nya-eu miˇ neh, laˆ tsoeˬ laˇ nya meh. Ehˇ k’awꞈ, Yeˬhawˇbaˬ nawˬ-ahˇ maˬ byehˇ dzeh-a. Miˬyehˇ-euˬ huiˬ-eu nymˇ jiˇ miˇ k’ahˬ doe ni g’awˬ mya lam g’aˬ jawˇ-eu meh. Teu laꞈ k’oeˇ nawˇ k’awꞈ tiˬ g’aˬ pyeuꞈ laˇ-awˇ, Miˬyehˇ-euˬ miˇ shuiꞈ-ahˇ k’awꞈ aˬ myah luꞈ dehꞈ-eu jeˬ paˇ za-a siˬ. (Maˬkuˆ 10:28-30) Myahˇ laˇ ngeh, nawˇ noeˬ tsehˆ ngeh saˇ pawˇ maˬ ga-eu deuˬ k’awꞈ, Jaˇliꞈ-ahˇ dzaw mawꞈ-eu nui ma ahˇ laˇ nya-eu meh.
20. Miˬyehˇ ha geuꞈ-eu jeˬ-ehˇ uˬ duˬ tahˬ-eu, aˬ jeˬ miˇ neh aˇ yeˇ huiˬ-eu nga?
20 G’awˬ myahˇ maˬ g’eh-ehˇ, Miˬyehˇ yaw haiˬ yaw doeˇ jeˬ-ahˇ laˆ cawˆ jiˇ-awˇ, aˬ yawꞈ-euˬ Miˇk’ahˬ miˇ tsaˬ-ahˇ bi uˆ lahˇ le meh. Teu ngeh muiˬ dui dui-eu aˇ yamˬ pyeuꞈ meh. (2 Beˬtuˆluˆ 3:9, 13) Yawˬ g’aˬ na luꞈ Yeˬhawˇbaˬ geuꞈ mawꞈ-eu jeˬ-ehˇ uˬ duˬ tahˬ-eu miˇ neh, nymˬ-mˇ mi naˆ-ehˇ aˬ dui aˬ yawꞈ geuꞈ mawꞈ-eu jeˬ-ehˇ uˬ duˬ tahˬ-eu aˇ yeˇ huiˬ meh.
