Yeˬhawˇbaˬ nymˇ jiˇ˗ahˇ dahˬ beh ngeh neh, aˬ da aˬ ma deuˬ zaˬ˗ahˇ bi bo saˆ˗eu lehˇ meh. (Gawˇlawˇsehˇ 3:20) Aˬ da aˬ ma deuˬ zaˬ Yeˬhawˇbaˬ˗ahˇ gaˬ ni maˬ ehˇ, huiˬ laˇ ngeh yawˬ ha˗euˬ gaˇ deuˬ˗ahˇ mˇ piˇ nya ni maˬ ehˇ ya mehˬ nehˬ˗eu meh. (2 Tiˆmoˇseˬ 1:5; 3:15) Zaˬ˗euˬ nui ma laꞈ kʼoeˇ aˬ joˆ˗ehˇ pyeuꞈ luꞈ nga lehˇ siˬ nya ni leh jeh˗awˬ. Nawˬ˗euˬ zaˬ˗ahˇ yaw muiˬ jeˬ mˇ mawˇ nehˬ˗eu aˇ yehˇ huiˬ meh. Yeˬhawˇbaˬ˗euˬ dawˬ, nawˬ˗euˬ nui ma laꞈ kʼoeˇ dawˆ ahˇ taˬ naˇ, zaˬ˗ahˇ yaw muiˬ paˬ˗ehˇ mehˬ nehˬ nya meh.—Ja ceuˬ 40:8.

Jaˇliꞈ ehˇ˗eu: “Ehˇ gaˇ yaw kawˇ˗ehˇ naˇ haˬ˗awˬ. Ehˇ kʼawꞈ, dawˬ ngehˬ˗eu taˬ tehˬ.” (Yaˬkoˆ 1:19) Zaˬ˗ahˇ maˬ bi guˆ ni bi ngehˬ cawˬ laˇ mawꞈ naˇ, nawˇ aˬ yawꞈ ngehˬ gaˇ aˬ myah luꞈ naˇ haˬ mawꞈ meh lehˇ bi siˬ nya˗awˬ. Zaˬ deuˬ ngehˬ cawˬ laˇ mawꞈ paˬ˗ehˇ jawˇ naˇ, aˬ yawꞈ neh kʼaˇ noeˬ˗euˬ jeˬ ehˇ nehˬ laꞈ˗eu meh. (Yaˬkoˆ 3:18) Aˬ da aˬ ma deuˬ zaˬ˗ahˇ aˬ myah luꞈ diˬ˗awˇ dehˬ naˇ, zaˬ deuˬ kʼaˇ ngeuˇ˗eu loꞈ˗ehˇ maˬ paˇ ehˇ peuˬ meh. Zaˬ˗ahˇ oˇ nehˬ˗awˇ, aˬ yawꞈ˗ahˇ gaˬ miˇ˗a lehˇ tiˬ kʼehˬ maˬ kaˬ ehˇ nehˬ˗awˬ.—Maꞈtehˬ 3:17; 1 Gawˇliˬtu 8:1.

Nawˇ mˇ nya˗eu jeˬ:

• Zaˬ deuˬ nawˬ˗ahˇ dawˬ ngehˬ cawˬ mawꞈ ngeh, naˇ haˬ nehˬ˗eu gʼaˇ duˬ lehˬ hmˬ taˬ˗awˬ

• Gaˇ kawˆ doˆ laˇ ngeh tehꞈ˗ehˇ maˬ ngeuˇ˗eu, aˬ myah luꞈ ngehˬ cawˬ˗awˬ

Jaˇliꞈ ehˇ˗eu: “Tsawˇ haˬ nui noeˬ tmˬ naꞈ dawˬ dah pahˬ kʼawꞈ, zaˬ siˬ tsawˇ siˬ beuˬ doˆ laꞈ nya˗eu meh.” (Dawˬdaˬ 20:5) Zaˬ aˬ jeˬ˗ahˇ ehˇ mawꞈ˗eu nga lehˇ gʼoˆ shaw nya ni ya leh jeh˗eu meh. Aˬ jeˬ miˇ neh ehˇ naˇ zaˬ tiˬ deuˬ na˗aˬ, maˬ ngeuˇ gaˇ keuˆ ni ngehˬ˗awˇ, maˬ shaˇ sawˇ ni kʼawꞈ ngehˬ nya˗eu miˇ neh meh. “Yaˇ kʼaˬ maˬ daˇ mi naˆ˗ehˇ maˬ naˇ haˬ duˬ˗eu tsawˇ haˬ, aˬ dzawˬ aˇ gah˗ahˇ duˇ˗eu meh.” (Dawˬdaˬ 18:13) Teu miˇ neh, zaˬ deuˬ˗ahˇ nui ma pehˇ˗eu taˬ kawˇ.—Dawˬdaˬ 19:11.

Nawˇ mˇ nya˗eu jeˬ:

• Zaˬ aˬ jeˬ lehˇ ngehˬ kʼawꞈ, maˬ ngehˬ bahˬ iˇ, nui ma pehˇ˗eu maˬ tehˬ lehˇ, yaw muiˬ˗ehˇ noeˬ taˬ

• Aˬ yawꞈ maꞈ shehˆ˗ahˇ gʼeh ngeh nawˇ aˬ joˆ˗ehˇ noeˬ nya, nawˬ˗euˬ gʼaˇ duˬ aˬ jeˬ jeˇ aˇ yehˇ huiˬ˗eu lehˇ noeˬ mawˇ˗awˬ

Jaˇliꞈ ehˇ˗eu: “Ngaˬ li˗oˇ, nawˬ da dawˬ mehˬ dawˬ tsoˆ tsoˆ gaˇ naˇ haˬ geuꞈ˗awˬ, nawˬ ma neh mehˬ nehˬ laꞈ˗euˬ dawˬ˗ahˇ taˬ byehˇ.” (Dawˬdaˬ 1:8) Yeˬhawˇbaˬ Miˬyehˇ zaˬ deuˬ˗ahˇ bi haw piˇ˗eu lehˇ, aˬ da aˬ ma deuˬ˗ahˇ ehˇ nehˬ taˬ˗euˬ meh. Teu miˇ neh, aˬ da aˬ ma˗ahˇ yaw zeu baw˗awˇ, ehˇ dawˬ naˇ haˬ ni ya mehˬ nehˬ˗eu meh. (Eˇpeˇsu 6:1-3) Aˬ da aˬ ma deuˬ “nui ma tiˬ siˬ tehꞈ˗ehˇ” maˬ taꞈ naˇ, zaˬ deuˬ haw siˬ nya˗eu meh. (1 Gawˇliˬtu 1:10) Naw nyaꞈ noeˬ˗eu jeˬ maˬ duˇ leˇ kʼawꞈ, zaˬ˗euˬ mehˬ shi taˬ ceh dzaˬ, teu loꞈ˗ehˇ jahˇ naˇ, zaˬ deuˬ yaw zeu maˬ baw ni pyeuꞈ iˇ nya˗eu meh.

Nawˇ mˇ nya˗eu jeˬ:

• Zaˬ˗ahˇ aˬ joˆ˗ehˇ mehˬ le lehˇ ja tsaˬ taˬ˗awˬ

• Naw nyaꞈ zaˬ˗ahˇ mehˬ˗eu maˬ duˇ leˇ naˇ, aˬ jeˬ miˇ neh teu loꞈ˗ehˇ beu gaˇ nga lehˇ shaˇ noeˬ˗awˬ

Jaˇliꞈ ehˇ˗eu: “Zaˬ˗ahˇ dehꞈ jeˬ dehꞈ kawˆ mehˬ nehˬ˗awˬ.” (Dawˬdaˬ 22:6) Zaˬ deuˬ maˬ mehˬ gaˇ, maˬ bym laˇ nya˗a. Aˬ da aˬ ma deuˬ zaˬ˗ahˇ mehˬ˗eu ya lehˬ hmˬ meh. (Ja ceuˬ 127:4; Dawˬdaˬ 29:17) Zaˬ˗ahˇ dzaw˗eu lehˇ ehˇ˗eu heu naˇ, diˬ gaˇ tehꞈ˗ehˇ ehˇ˗eu maˬ ngeuˇ˗a. Aˬ jeˬ miˇ neh diˬ˗awˇ mehˬ˗eu lehˇ kʼawꞈ, zaˬ˗ahˇ gʼoˆ shaw leˇ ni ya ehˇ nehˬ˗eu meh. (Dawˬdaˬ 28:7) Kʼoeˇ naˇ, Yeˬhawˇbaˬ˗euˬ dawˬ˗ahˇ gaˬ laˇ˗awˇ Jaˇliꞈ mehˬ nehˬ˗eu jeˬ˗ahˇ kʼawꞈ gʼoˆ shaw nya ni ya mehˬ nehˬ˗eu meh. (Ja ceuˬ 1:2) Toˆ˗ehˇ jahˇ naˇ, zaˬ deuˬ muiˬ˗eu jeˬ hawˇ˗eu maˬ muiˬ˗eu jeˬ tseˇ paˆ nya laˇ˗eu meh.—Heˬbyehˇ 5:14.

Nawˇ mˇ nya˗eu jeˬ:

• Miˬyehˇ maˇ diˇ ni jawˇ˗awˇ, nui ma taˬ nya meh lehˇ, zaˬ˗ahˇ bi siˬ˗awˬ

• Iˇ teuꞈ nehꞈ (Internet) laꞈ kʼoeˇ ahˇ˗eu maˬ muiˬ˗eu jeˬ hawˇ˗eu yuꞈ taꞈ jawˇ taꞈ˗eu lehˇ muˇ juˇ juˇ˗eu maˬ muiˬ˗eu deuˬ˗ahˇ, yahˇ nya ni mehˬ nehˬ˗awˬ