Nymˇ jiˇ laꞈ kʼoeˇ zaˬ jawˇ le shaw naˇ, laꞈ kʼaˬ cehˇ laˇ˗eu loꞈ˗ehˇ, kʼaˆ behˆ kʼawꞈ myaˬ laˇ˗eu meh. Aˬ da aˬ ma pyeuꞈ dahˬ beh ngeh, zaˬ˗ahˇ ya bo saˆ˗eu aˇ naˆ ni aˇ yamˬ jiˇ˗awˇ, aˇ naˆ ni gʼaˬ doeˇ doeˇ˗eu lehˇ ya siˬ nya ngeh jawˇ zahˬ leˇ tehꞈ˗a. Nui noeˬ paˇ laˇ˗eu maˬ ehˇ, maˬ ya yuꞈ kʼaˆ dehˆ˗eu maˬ ehˇ, gaˇ kawˆ heu deuˬ baˬ da neh, dawˬ ja doˆ laˇ nya˗eu meh. Zaˬ˗ahˇ cu jawˬ˗ehˇ, nyiˬ gʼaˬ˗euˬ gaˬ jeˬ kʼawꞈ aˬ joˆ˗ehˇ bi ziꞈ˗eu lehˇ bawˬ dzaˬ˗eu loˬ meh. Shaˬ˗eu zahˬ˗eu jeˬ˗ahˇ laˆ piˇ˗eu gʼaˇ duˬ, Jaˇliꞈ mehˬ˗eu jeˬ nawˬ˗ahˇ aˬ joˆ˗ehˇ caw ba nehˬ nya˗eu nga?

Jaˇliꞈ ehˇ˗eu: “Gʼoeˇ˗eu gaˬ˗eu jeˬ˗aˬ, nui ma gʼawˬ mahˇ ni taˬ˗awˇ, aˬ cawˬ˗ahˇ gʼawˬ shaˬ gaˬ nya˗eu meh.” Kʼoeˇ naˇ, “yawˬ ha˗euˬ nui kʼahˇ maˬ poˆ˗a, nui ma pehˇ laˇ˗eu maˬ kawˇ˗a.” (1 Gawˇliˬtu 13:4, 5) Zaˬ nahˬ aˬ ma naˇ, zaˬ˗ahˇ tehꞈ˗ehˇ kaꞈ gʼa luꞈ meh. Teu miˇ neh kʼaˬ dzeˇ zaˬ naˇ, aˬ yawꞈ˗ahˇ sawˇ dzeh nehˬ laꞈ nya lehˇ noeˬ leˇ˗eu meh. Kʼoeˇ miˇ neh, aˬ yawꞈ˗ahˇ jiˇ maˬ ya ngehˇ˗a. Zaˬ cu huiˬ˗eu heu naˇ, kʼaˬ dzeˇ zaˬ kʼawꞈ loˬ meh lehˇ ya bi siˬ nya˗eu meh.

“Kʼaˬ dzeˇ zaˬ deuˬ . . . siˬ nya˗eu laꞈ kʼoeˇ, yawˬ ha˗euˬ miˬ zaˬ nehˬ˗ehˇ dehꞈ˗awˬ.” (1 Beˬtuˆluˆ 3:7) Nawˬ˗euˬ miˬ zaˬ nah ga ni zaˬ˗ahˇ kaꞈ gʼa luꞈ˗eu miˇ neh, gʼaˬ doeˇ doeˇ meh lehˇ ya gʼoˆ shaw nehˬ meh. Aˬ yawꞈ˗euˬ kʼaˆ behˆ myaˬ laˇ˗euˬ miˇ neh, uˬ duˬ kawꞈ laˇ, gʼaˬ juˬ laˇ, dawˬ maˬ ngehˬ nahˇ ni kʼawꞈ pyeuꞈ laˇ nya˗eu meh. Tiˬ poˆ na nawˬ˗ahˇ ngehˬ deuˬ laˇ kʼawꞈ ya oˇ nehˬ meh. Aˬ jeˬ miˇ neh ehˇ naˇ, “oˇ dzeuˇ nya˗eu jeˬ˗aˬ, aˬ cawˬ˗ahˇ gʼaˬ leˇ˗eu naˆ maˬ tseˇ muiˬ” dzehˬ˗eu miˇ neh meh. (Dawˬdaˬ 16:32) Haw siˬ nya˗eu laꞈ kʼoeˇ, aˬ yawꞈ loˬ˗eu jeˬ˗ahˇ caw ba nehˬ˗awˬ.—Dawˬdaˬ 14:29.

Nawˇ mˇ nya˗eu jeˬ:

• Aˬ da gʼaˬ: Uˬ ciꞈ paw dzeˇ kʼawꞈ ni, nawˬ˗euˬ miˬ zaˬ˗ahˇ zaˬ haw caw nehˬ˗awˬ. Zaˬ hawˇ˗eu miˬ zaˬ nehˬ˗ehˇ jawˇ˗eu gʼaˇ duˬ, aˇ yamˬ doˆ laˇ ni leh jeh˗awˬ

• Aˬ ma gʼaˬ: Kʼaˬ dzeˇ zaˬ gʼaˬ zaˬ˗ahˇ haw caw laˇ ngeh jawˇ taˬ laˆ tsoeˬ.Yaw muiˬ muiˬ lehˇ maˬ mˇ nya nga lehˇ kʼawꞈ taˬ toˇ. Nahˬ yu ni a lawˆ lawˆ˗ehˇ mehˬ nehˬ˗awˬ

Jaˇliꞈ ehˇ˗eu: “Nyiˬ gʼaˬ˗euˬ tiˬ shiˬ tiˬ shaˬ tehꞈ˗ehˇ ya pyeuꞈ laˇ˗eu meh.” (Aˇdahˬbeh˗eu 2:24) Naw nyaꞈ zaˬ jawˇ le˗euˬ kʼawꞈ ni, “tiˬ shiˬ tiˬ shaˬ” tehꞈ˗ehˇ pyeuꞈ luꞈ˗a siˬ lehˇ maˬ ya ngehˇ˗a. Naw nyaꞈ dahˬ dzaˬ˗eu jeˬ ziꞈ ni leh jeh˗awˬ.

Zaˬ miˬ zaˬ gʼaˬ, kʼaˬ dzeˇ zaˬ neh caw ba nehˬ laꞈ˗euˬ jeˬ˗ahˇ, guiˬ lahˬ huiˬ miˇ˗a lehˇ ehˇ nehˬ˗eu heu naˇ, “dawˬ muiˬ jaˆ gʼaˬ˗ahˇ duˇ˗eu meh.” (Dawˬdaˬ 12:18) Kʼaˬ dzeˇ zaˬ gʼaˬ kʼawꞈ miˬ zaˬ˗ahˇ aˇ naˆ ni gaˬ˗awˇ, aˇ naˆ ni aˇ poeˬ taˬ baw˗eu lehˇ ehˇ mawˇ nehˬ˗awˬ. Nymˇ jiˇ˗ahˇ yaw muiˬ˗ehˇ haw piˇ gaˇ ja ceuˬ nehˬ˗awˬ.—Dawˬdaˬ 31:10, 28.

“Tsawˇ haˬ tiˬ gʼaˬ˗iˬ yawˬ ha gʼaˇ duˬ muiˬ˗eu jeˬ˗ahˇ maˬ poˆ ni, aˬ cawˬ gʼaˇ duˬ muiˬ˗eu jeˬ˗ahˇ poˆ˗eu tsaˬ meh.” (1 Gawˇliˬtu 10:24) Yawˬ ha˗euˬ aˇ gu˗ahˇ muiˬ˗eu jeˬ aˬ myah luꞈ mˇ nehˬ˗awˬ. Nyiˬ gʼaˬ tehꞈ˗ehˇ dawˬ ngehˬ cawˬ˗eu, ja ceuˬ˗eu, tiˬ gʼaˬ ngehˬ gaˇ tiˬ gʼaˬ naˇ haˬ˗eu, aˇ yamˬ yuˇ˗awˬ. Nyiˬ gʼaˬ yuꞈ taꞈ˗eu jeˬ˗ahˇ taˬ jahˇ gʼeh. Aˇ gu loˬ˗eu jeˬ˗ahˇ noeˬ keuˆ nehˬ˗awˬ. “Tiˬ gʼaˬ tiˇ gʼaˬ nui kʼahˇ mˇ byah˗eu tsaˬ meh” lehˇ, Jaˇliꞈ ehˇ˗eu meh. (1 Gawˇliˬtu 7:3-5) Teu miˇ neh, gaˇ kawˆ heu hmˬ˗ahˇ nyiˬ gʼaˬ luꞈ bya cehˆ ni bawˬ dzaˬ˗awˬ. Oˇ oꞈ˗awˇ tiˬ gʼaˬ tiˇ gʼaˬ gʼoˆ shaw nehˬ naˇ, naw nyaꞈ˗euˬ gaˬ jeˬ ziꞈ dah ni pyeuꞈ laˇ˗eu meh.

Nawˇ mˇ nya˗eu jeˬ:

• Nyiˬ gʼaˬ tehꞈ˗ehˇ jawˇ˗eu aˇ yamˬ yuˇ doˆ taˬ˗eu maˬ ya ngehˇ˗a

• Nawˬ˗euˬ aˇ gu˗ahˇ gaˬ miˇ˗a lehˇ, sahˬ boꞈ lawˬ muˇ laꞈ sawˬ lawˬ muˇ ui cuiˆ na biꞈ nehˬ˗awˬ

Jaˇliꞈ ehˇ˗eu: “Nawˇ nyiˇ ngeh neh muiˬ˗eu shawˇ˗eu Jaˇliꞈ˗ahˇ siˬ nya˗euˬ . . . ka kʼoꞈ˗eu jeˬ za ni sheuˬ gʼeh˗eu zaˬ siˬ tsawˇ gahˇ nawˬ˗ahˇ biꞈ nehˬ laꞈ˗euˬ meh.” (2 Tiˆmoˇseˬ 3:15) Zaˬ˗ahˇ aˬ joˆ˗ehˇ mehˬ nehˬ˗eu lehˇ ya lehˬ hmˬ taˬ˗eu meh. Uˬ maˆ laꞈ kʼoeˇ jawˇ ngeh neh, zahˬ leˇ paˬ˗ehˇ dzaw geuꞈ nya˗eu meh. Aˬ ma˗euˬ teˇ saˇ noeˬ taˬ nya˗awˇ, aˬ ma˗euˬ nui ma aˬ jeˬ lehˇ pyeuꞈ luꞈ nga lehˇ kʼawꞈ siˬ nya˗eu meh. Yaw nyiˇ ngeh neh sahˬ boꞈ gui mehˬ nehˬ˗awˬ. Aˬ yawꞈ maˬ gʼoˆ shaw nya kʼawꞈ ni, huiˬ laˇ ngeh sahˬ boꞈ gui mawꞈ˗eu nui ma ahˇ laˇ˗eu meh.

Zaˬ yaw nyiˇ kʼawꞈ, Miˬyehˇ gaˇ kawˆ dzaw nya˗eu meh. Yeˬhawˇbaˬ Miˬyehˇ˗ahˇ guiˬ lahˬ shaˇ˗eu teˇ saˇ bi naˇ haˬ˗awˬ. (Dawˬmehˬmehˬ˗eu 11:19) Zaˬ nehˬ˗ehˇ niˇ gʼa ngeh kʼawꞈ, Miˬyehˇ neh beh˗euˬ jeˬ˗ahˇ ja nehˬ˗awˬ. (Ja ceuˬ 78:3, 4) Teu loꞈ˗ehˇ jahˇ naˇ, zaˬ huiˬ laˇ ngeh, nawˇ Yeˬhawˇbaˬ˗ahˇ gaˬ ngaˇ lehˇ siˬ leˇ˗awˇ, aˬ yawꞈ kʼawꞈ Miˬyehˇ˗ahˇ gaˬ nya ni dzaw geuꞈ mawꞈ laˇ˗eu meh.

Nawˇ mˇ nya˗eu jeˬ:

• Zaˬ˗ahˇ yaw muiˬ˗ehˇ mehˬ nehˬ nya˗eu zaˬ siˬ nui gahˇ biꞈ nehˬ laꞈ lehˇ guiˬ lahˬ shaˇ˗awˬ

• Zaˬ˗ahˇ mehˬ ngeh, yaw myaˬ poˆ lehˇ ehˇ nehˬ˗awˬ. Toˆ˗ehˇ naˇ, zaˬ dzaw geuꞈ˗eu yaw kawˇ meh