Zahˇ yawˬ zahˇ na luꞈ-ahˇ, nui ma yaw dawˇ deuˬ jiˇ jawˇ meh. Aˬ yawꞈ maꞈ-ahˇ Miˬyehˇ noeˬ keuˆ luꞈ meh. Heu naˇ muiˬ-eu gaˇ kawˆ meh. Ehˇ k’awꞈ, nui ma nyiˇ laˇ paˬ-ehˇ g’eh-eu jeˬ naˇ, tiˬ deuˬ na-aˬ, zahˇ-ahˇ g’oe-awˇ neh maˬ muiˬ-eu jeˬ-ahˇ mˇ luꞈ meh. (2 Gawˇliˬtu 4:3, 4; 11:13-15) Zahˇ tiˬ deuˬ na-aˬ, yaw haiˬ jeˬ mˇ-eu, sehꞈ-eu, guiˇ deuˆ-eu, zaˬ-ahˇ maˬ muiˬ-eu jeˬ mˇ-eu, gaˇ kawˆ heu deuˬ-ahˇ g’aˬ biꞈ luꞈ meh lehˇ ya gaˬ-euˬ ma. Miˬyehˇ-ahˇ maˇ diˇ jah-eu deuˬ, gaˇ kawˆ heu deuˬ-ahˇ ya gaˬ ngeh jawˇ, nui ma laꞈ k’oeˇ g’awˬ shaˬ-ehˇ g’eh laˇ-eu meh.—Maꞈtehˬ 24:3-5, 11, 12-ahˇ gui-awˬ.

Zahˇ maˇ naˇ, Miˬyehˇ-ahˇ ciˬ huiˬ ciˬ mahˇ-eu meh. Ehˇ k’awꞈ, zahˇ k’awꞈ deuˬ naˇ, Miˬyehˇ-euˬ tsawˇ myahˇ-ahˇ laˆ cawˆ-eu meh. Zahˇ k’awꞈ deuˬ naˇ, Miˬyehˇ-euˬ gaˇ kawˆ hawˇ-eu tsawˇ shiˇ-euˬ gaˇ kawˆ, Jaˇliꞈ laꞈ k’oeˇ ahˇ-eu loꞈ-ehˇ maˬ mehˬ-a. Yeˬhawˇbaˬ Miˬyehˇ naˇ, tsawˇ haˬ zaˬ deuˬ-ahˇ, aˬ yawꞈ-euˬ yaw tsaˬ yaw dawˇ jeˬ bi siˬ nya mawꞈ-eu meh.—Yeˬsaˬgeˬlaˇ 18:4; 1 Tiˆmoˇseˬ 2:3-5-ahˇ gui-awˬ.

Miˬyehˇ-ahˇ gaˬ miˇ-a lehˇ ehˇ gaˇ neh, Saˬdaˬ-euˬ nui k’ahˇ mˇ luꞈ-eu zahˇ deuˬ, Miˬyehˇ-ahˇ maˬ myawꞈ dzeuˇ nya. (Yaˬkoˆ 4:4) Jaˇliꞈ laꞈ k’oeˇ zahˇ k’awꞈ deuˬ-ahˇ, “Baˬbuˇloˬ meuˬ meuˬ ma” lehˇ kuˇ taˬ-euˬ meh. Baˬbuˇloˬ meuˬ-aˬ, meuˬ meuˬ oeˇ pyeuꞈ-awˇ, Noˇaˬ saˇ ka-ahˇ iˇ cuꞈ dahˬ pymˬ dzeuˇ-awˇ k’oeˇ sawˇ miˇ tsa, meuˬ teu meuˬ-ahˇ neh zahˇ k’awꞈ deuˬ doˆ laˇ-euˬ meh. G’awˬ myahˇ maˬ g’eh-ehˇ, tsawˇ haˬ zaˬ-ahˇ sheuˬ bahˬ luꞈ-eu zahˇ k’awꞈ deuˬ-euˬ k’oeˇ taˆ, Miˬyehˇ laˆ cawˆ-eu jeˬ ja pyuˬ ni keuˆ le tehꞈ-a.—Pah mehˬ-eu 17:1, 2, 5, 16, 17; 18:8-ahˇ gui-awˬ.

Muiˬ-eu gaˇ kawˆ heu myaˆ tehꞈ maˬ ngeuˇ-a siˬ. Yeˬhawˇbaˬ miˇ tsaˬ k’oeˇ taˆ k’aˇ jaˆ-eu zahˇ k’awꞈ laꞈ k’oeˇ jawˇ luꞈ-eu tsawˇ haˬ nui ma dawˇ coe ni g’eh-awˇ, aˬ yawꞈ-ahˇ shaˇ poˆ luꞈ-eu deuˬ-ahˇ, Miˬyehˇ maˬ ngehˇ-a. Aˬ yawꞈ maꞈ-ahˇ yaw tsaˬ yaw dawˇ gaˇ kawˆ mehˬ nehˬ-awˇ neh bi uiˬ laˇ luꞈ meh.—Miˇkaˬ 4:2, 5-ahˇ gui-awˬ.

Yaw tsaˬ yaw dawˇ jeˬ hawˇ-eu muiˬ-eu jeˬ-ahˇ gaˬ-eu tsawˇ haˬ deuˬ-ahˇ, Yeˬhawˇbaˬ haw luꞈ meh. Zahˇ k’awꞈ laꞈ k’oeˇ neh doˆ laˇ-awˬ lehˇ, Miˬyehˇ ehˇ luꞈ meh. Miˬyehˇ-ahˇ gaˬ-eu deuˬ naˇ, aˬ yawꞈ maꞈ-euˬ dehꞈ ziˇ Miˬyehˇ nui k’ahˇ shiˇ ni dehꞈ paˇ mawꞈ-eu meh.—Pah mehˬ-eu 18:4-ahˇ gui-awˬ.

Gaˇ hu-euˬ tsawˇ haˬ nui ma yaw dawˇ deuˬ, g’aˬ k’ehˇ deuˬ jawˇ gaˇ neh muiˬ-eu gaˇ kawˆ-ahˇ ya gaˬ ngeh, laꞈ k’aˬ tiˬ cehˇ ha geuꞈ-euˬ meh. Yeˬhawˇbaˬ aˬ yawꞈ maꞈ-ahˇ, dehꞈ ziˇ gaˇ ma yaw shuiꞈ mehˬ nehˬ-euˬ meh. Teu miˇ neh, aˬ yawꞈ maꞈ laꞈ k’aˬ cehˇ laˇ-awˇ, noeˬ tmˬ-eu jeˬ jaˆ laˇ-euˬ meh. Miˬyehˇ-euˬ muiˬ-eu gaˇ kawˆ-ahˇ aˬ yawꞈ maꞈ ya gaˬ ngeh, ha geuꞈ-awˇ Miˇyehˇ-ahˇ jeˬ huˬ taˬ-eu heu naˇ, aˬ dui dzaw geuꞈ paˬ-ehˇ g’eh-eu jeˬ pyeuꞈ meh.—1 Teˇsaˬloˇni 1:8, 9; 2:13-ahˇ gui-awˬ.

Zahˇ k’awꞈ laꞈ k’oeˇ neh doˆ laˇ-euˬ deuˬ-ahˇ, Yeˬhawˇbaˬ aˬ yawꞈ-euˬ nymˇ jiˇ laꞈ k’oeˇ laꞈ k’aˬ tiˬ cehˇ ha geuꞈ-eu meh. Yeˬhawˇbaˬ g’awˬ shaˬ gaˬ-awˇ kuˇ gaˇ ha geuꞈ naˇ, aˬ yawꞈ-euˬ nymˇ jiˇ laꞈ k’oeˇ tsawˇ shuiꞈ pyeuꞈ laˇ-awˇ, Yeˬhawˇbaˬ-ahˇ uˬ duˬ tahˬ-eu laꞈ k’oeˇ, cawˬ cawˬ nya laˇ-eu uˬ taꞈ, mˬ maˬ maˬ byaˆ zaˇ ziˇ dehꞈ-eu jeˬ k’awꞈ za-eu meh.—Maˬkuˆ 10:29, 30; 2 Gawˇliˬtu 6:17, 18-ahˇ gui-awˬ.

Zahˇ k’awꞈ deuˬ-ahˇ laˆ cawˆ-eu aˇ yamˬ keuˆ le shaw-iˬ meh lehˇ ehˇ-eu dawˬ heu naˇ, muiˬ-eu gaˇ kawˆ pyeuꞈ meh. Aˬ jeˬ miˇ neh ehˇ naˇ, tsawˇ haˬ zaˬ k’ehˬ-eu k’aˆ-eu laꞈ k’oeˇ neh ya buˬ iˇ-eu miˇ neh meh. Zahˇ k’awꞈ deuˬ tsawˇ haˬ zaˬ-ahˇ maˬ paˇ sheuˬ bahˬ nya, maˬ paˇ laˆ pyaˆ nya meh. Yawˬ g’aˬ na luꞈ mehˬ bawˬ gm -awˇ, maˇ maˇ ni Miˬyehˇ pyeuꞈ-eu g’aˬ-ahˇ tehꞈ-ehˇ uˬ duˬ tahˬ-eu meh.—Pah mehˬ-eu 18:20, 21; 21:3, 4-ahˇ gui-awˬ.