Beh-euˬ yaw sahˇ g’aˬ, aˬ dui naˆ maˬ tseˇ zaˬ siˬ nui gahˇ ahˇ dzehˬ-eu meh. Miˬyehˇ-aˬ nui gaˬ ahˇ-eu aˬ da loꞈ-ehˇ, aˬ dui-ahˇ k’ahˬ lahˇ-eu meh. Miˬyehˇ-ahˇ maˬ g’oe ni, yawˬ ha tehꞈ-ehˇ bi dehꞈ-eu lehˇ beh-euˬ maˬ ngeuˇ-a. (Yeˬlaˬmiˇ 10:23) Zaˬ aˬ da aˬ ma sheuˬ g’eh-eu jeˬ-ahˇ loˬ-eu loꞈ-ehˇ, aˬ dui k’awꞈ Miˬyehˇ sheuˬ g’eh-eu jeˬ-ahˇ loˬ meh. (Iˇsaˬyaˇ 48:17, 18) Sheuˬ g’eh nehˬ laꞈ-eu Jaˇliꞈ zahˇ heu naˇ, Miˬyehˇ jawˇ gaˇ neh oe-euˬ laꞈ sawˬ pyeuꞈ meh.—2 Tiˆmoˇseˬ 3:16-ahˇ gui-awˬ.

Yeˬhawˇbaˬ Miˬyehˇ-euˬ zahˇ dawˬ k’oꞈ dawˬ hawˇ-eu Jaˇliꞈ zahˇ heu naˇ, nymˇ aˇ yamˬ-ahˇ dehꞈ ziˇ gaˇ ma muiˬ dzehˬ-eu kahˇ-ahˇ toeˬ mehˬ-awˇ, mehˬ hu paw dehꞈ ziˇ za ni aˬ joˆ-ehˇ ya mˇ-eu lehˇ k’awꞈ mehˬ nehˬ laꞈ-eu meh. Miˬyehˇ aˬ dui-ahˇ beh-euˬ miˇ neh, aˬ yawꞈ neh sheuˬ g’eh laꞈ-euˬ jeˬ-ahˇ, guiˬ lahˬ huiˬ-awˇ mˇ caw-eu tsaˬ meh.—Ja ceuˬ 19:7, 11; Pah mehˬ-eu 4:11-ahˇ gui-awˬ.

Jaˇliꞈ zahˇ heu naˇ, yaw tsaˬ yaw dawˇ-euˬ dawˬ pehˬ-ahˇ ehˇ-eu meh. Zahˇ sahˇ k’oꞈ naˇ, aˬ yawꞈ kawˆ aˬ yawꞈ-ahˇ tehꞈ-ehˇ zmˬ-eu meh. (Dawˬmehˬmehˬ-eu 22:8) Jaˇliꞈ zahˇ-ahˇ zmˬ-eu g’aˇ duˬ, yawˬ ha-euˬ laꞈ k’oeˇ jaˆ-eu noeˬ siˬ noeˬ mawˇ nya-eu jeˬ-ahˇ ya zmˬ-eu meh. (Dawˬdaˬ 2:10-12) Yaw jeˬ ma jeˬ dehꞈ ziˇ-aˬ, Miˬyehˇ neh biꞈ-euˬ laꞈ sawˬ meh lehˇ, Jaˇliꞈ-ahˇ ehˇ taˬ-euˬ meh. Jaˇliꞈ zahˇ heu hmˬ naˇ, iˇ kahˇ jawˇ ngeh maˬ ehˇ, gaˇ mˇ ngeh maˬ ehˇ, gaˇ ma doˆ iˇ ngeh maˬ ehˇ shaˬ laˇ-eu lehˇ g’eh-eu jeˬ-ahˇ neh bi buˬ iˇ-eu meh.—G’aˬk’ehˇ 17:28-ahˇ gui-awˬ.

Aˇ yehˇ huiˬ-eu Jaˇliꞈ zahˇ nyiˬ kawˆ jaˆ meh lehˇ, Yeˬsuˇ ehˇ-eu meh. Aˇ dahˬ beh-eu kawˆ naˇ, tsawˇ haˬ-euˬ dehꞈ ziˇ laꞈ k’oeˇ aˇ yehˇ huiˬ dzehˬ-eu jeˬ-aˬ, Miˬyehˇ-ahˇ siˬ nya-awˇ gaˬ-eu, saˇ jaˇ ziꞈ-eu laꞈ k’oeˇ aˬ yawꞈ-euˬ gaˇ mˇ-eu jeˬ pyeuꞈ meh. Aˬ dui k’aˇ noeˬ tsehˆ ngeh, heu kawˆ-ahˇ noeˬ mawˇ-eu loˬ meh. (Dawˬdaˬ 3:6) Heu kawˆ-ahˇ mˇ caw-eu deuˬ naˇ, Miˬyehˇ-euˬ cawˬ  pyeuꞈ-awˇ, maˇ diˇ nui saˇ oꞈ-eu jeˬ hawˇ-eu aˬ myah luꞈ dehꞈ-eu jeˬ za meh.—Maꞈtehˬ 22:36-38-ahˇ gui-awˬ.

Jaˇliꞈ zahˇ nyiˬ kawˆ aˬ yawꞈ kawˆ naˇ, aˬ cawˬ nehˬ-ehˇ tsaˬ leˇ dzoeˇ leˇ ni caw ba nehˬ laꞈ-eu meh. (1 Gawˇliˬtu 13:4-7) Heu kawˆ-ahˇ zmˬ ngeh jawˇ, Miˬyehˇ neh tsawˇ haˬ zaˬ-ahˇ mˇ mehˬ nehˬ-euˬ jeˬ-ahˇ, dzaw geuꞈ-eu jeˬ pyeuꞈ meh.—Maꞈtehˬ 7:12; 22:39, 40-ahˇ gui-awˬ.

Jaˇliꞈ zahˇ deuˬ naˇ, nymˇ jiˇ laꞈ k’oeˇ tiˬ g’aˬ tiˇ g’aˬ gaˬ nya-awˇ, mehˬ bawˬ gm nya ni mehˬ nehˬ-eu meh. (Gawˇlawˇsehˇ 3:12-14) Nymˇ jiˇ maˬ bi pyaˆ-iˇ ni laˆ piˇ nehˬ-eu, nyaˆ taꞈ Jaˇliꞈ zahˇ tiˬ hmˬ nga lehˇ ngeuˇ naˇ, oeˇ mˇ baˇ dzaˬ-eu jeˬ-aˬ, maˬ shiˇ tiˬ ziˇ tiˬ kawˆ loꞈ-ehˇ ya dehꞈ sehꞈ meh lehˇ ehˇ-eu gaˇ kawˆ meh.—Aˇdahˬbeh-eu 2:24-ahˇ gui-awˬ.

Jaˇliꞈ mehˬ gaˇ mˇ caw naˇ, aˬ dui dzaˬ loꞈ dawˇ loꞈ-awˇ nui saˇ oꞈ meh. Yaw jeˬ ma jeˬ, smˇ muiˬ deuˬ nui ma taˬ nya-awˇ, Jaˇliꞈ zahˇ-ahˇ mˇ caw-eu zaˬ k’aˆ deuˬ-ahˇ geuꞈ mawꞈ-eu meh. (Dawˬdaˬ 10:4, 26; Heˬbyehˇ 13:18) K’oeˇ naˇ, Miˬyehˇ-euˬ dawˬ-aˬ, yawˬ ha jaˆ-eu jeˬ-ahˇ nui k’ahˇ shiˇ-awˇ neh, pyuˇ shuiˇ myawˬ gahˬ-ahˇ naˆ maˬ tseˇ, Miˬyehˇ nehˬ-ehˇ cawˬ cawˬ-eu jeˬ-ahˇ, aˇ poeˬ taˬ baw-awˬ lehˇ mehˬ-eu meh.—Maꞈtehˬ 6:24, 25, 33; 1 Tiˆmoˇseˬ 6:8-10-ahˇ gui-awˬ.

Jaˇliꞈ zahˇ-ahˇ mˇ caw naˇ, jawˇ saˇ doˆ-eu meh. (Dawˬdaˬ 14:30; 22:24, 25) Yaw jeˬ ma jeˬ, jiˇ baˬ maˬ ya dawˇ yehꞈ-a lehˇ ehˇ-eu Miˬyehˇ-euˬ zahˇ dawˬ-ahˇ mˇ caw naˇ, naˇ gawˇ hawˇ-eu lehˬ laˇ ca laˇ-eu jeˬ-ahˇ neh buˬ iˇ-eu meh. (Dawˬdaˬ 23:20) Yeˬhawˇbaˬ-aˬ, jiˇ baˬ ui cuiˆ na dawˇ gaˇ tiˬ jeˬ-iˬ maˬ ehˇ-a, aˇ dzehˬ maˬ dzeuˇ naˇ. (Ja ceuˬ 104:15; 1 Gawˇliˬtu 6:10) Aˬ dui maꞈ-euˬ mˇ jeˬ shaˇ kawˆ hawˇ-eu noeˬ jeˬ noeˬ kawˆ, maˬ noeˬ maˬ du-ehˇ maˬ bi pyeuꞈ-eu g’aˇ duˬ, Jaˇliꞈ zahˇ heu aˬ dui-ahˇ caw ba nehˬ-eu meh. (Ja ceuˬ 119:97-100) Ka li zaˬ maˇ diˇ deuˬ Jaˇliꞈ zahˇ-ahˇ zmˬ-eu heu naˇ, yawˬ ha-euˬ g’aˇ duˬ tehꞈ maˬ ngeuˇ-a, Yeˬhawˇbaˬ-ahˇ k’awꞈ ciˬ huiˬ ciˬ mahˇ mawꞈ-eu miˇ neh meh.—Maꞈtehˬ 5:14-16-ahˇ gui-awˬ.