Zahˇ maˇ tiˬ zahˇ jaˆ-eu tehꞈ meh lehˇ, Yeˬsuˇ aˬ yawꞈ-euˬ zaˬ lahˇ deuˬ-ahˇ mehˬ nehˬ-euˬ meh. Zahˇ heu naˇ, mˬ maˬ maˬ byaˆ zaˇ ziˇ dehꞈ-eu miˇ k’ahˬ-ahˇ sheuˬ g’eh-eu gaˇ ma-ahˇ duˇ-eu meh. Yeˬsuˇ ehˇ-eu gaˇ ma heu kahˇ-ahˇ “poˆ mawˇ-eu tsawˇ haˬ yaw cuiˆ meh.” (Maꞈtehˬ 7:14) Jaˇliꞈ-ahˇ dawˬ pehˬ taˬ-awˇ uˬ duˬ tahˬ-eu zahˇ tehꞈ-ehˇ, Miˬyehˇ ha geuꞈ-eu meh. Zahˇ maˇ heu laꞈ k’oeˇ jawˇ-eu deuˬ nui jah tiˬ jeˬ tehꞈ meh.—Yoˇhaˬ 4:23, 24; 14:6; Eˇpeˇsu 4:4, 5-ahˇ gui-awˬ.

Biˬdiˬoˬ haw Miˬyehˇ zahˇ yawˬ zahˇ na luꞈ-ahˇ nui ma tsaˬ ngaˇ loˇ?

Mehˬ bahˬ-eu deuˬ, Ka li zaˬ zahˇ-ahˇ laˆ cawˆ laˇ meh lehˇ Yeˬsuˇ ehˇ taˬ-euˬ meh. Laꞈ nyiˇ paw haw naˇ maˇ maˇ ni Miˬyehˇ-ahˇ uˬ duˬ tahˬ-eu deuˬ-ahˇ duˇ leˇ-eu meh. Aˬ yawꞈ maꞈ naˇ, yawˬ haˇ yawˬ ha Ka li zaˬ ma lehˇ ehˇ-eu meh. Ehˇ k’awꞈ Ka li zaˬ ngeuˇ-eu maˬ ngeuˇ-eu aˬ joˆ-ehˇ siˬ laˇ-eu nga? Aˬ yawꞈ maꞈ-euˬ nui noeˬ nui duˇ hawˇ-eu mˇ jeˬ shaˇ kawˆ-ahˇ haw ngeh jawˇ, maˇ maˇ ni Ka li zaˬ ngeuˇ-eu maˬ ngeuˇ-eu siˬ duˬ laˇ-eu meh.—Maꞈtehˬ 7:13-23-ahˇ gui-awˬ.

Aˬ yawꞈ maꞈ-ahˇ haw siˬ nya-eu, gaˇ kawˆ ngaˬ kawˆ jaˆ-eu meh.

• Aˬ yawꞈ maꞈ, Jaˇliꞈ-aˬ Miˬyehˇ-euˬ dawˬ pyeuꞈ meh lehˇ jah-eu meh. Aˬ yawꞈ maꞈ-euˬ dehꞈ ziˇ, Jaˇliꞈ zahˇ nehˬ-ehˇ tsaˬ leˇ ni leh jeh-eu meh. Teu miˇ neh zahˇ maˇ naˇ, tsawˇ haˬ-euˬ zaˬ siˬ nui gahˇ-ahˇ g’oe-awˇ neh, uˬ duˬ tahˬ-eu zahˇ nehˬ-ehˇ beu gaˇ meh. (Maꞈtehˬ 15:7-9) Ka li zaˬ maˇ diˇ deuˬ naˇ, ngehˬ-eu tiˬ jeˬ mˇ-eu tiˬ jeˬ lehˇ maˬ jahˇ-a. Yoˇhaˬ 17:17; 2 Tiˆmoˇseˬ 3:16, 17-ahˇ gui-awˬ.

•   Aˬ yawꞈ maꞈ, Yeˬhawˇbaˬ Miˬyehˇ-euˬ tsawˇ myahˇ-ahˇ, ciˬ huiˬ ciˬ mahˇ-eu meh. Yeˬsuˇ tsawˇ haˬ zaˬ-ahˇ, Miˬyehˇ-euˬ tsawˇ myahˇ mehˬ nehˬ-eu heu naˇ, Miˬyehˇ-ahˇ ciˬ huiˬ ciˬ mahˇ-eu jeˬ pyeuꞈ-eu meh. K’oeˇ naˇ tsawˇ haˬ zaˬ deuˬ Miˬyehˇ-ahˇ siˬ nya laˇ ni caw ba nehˬ-awˇ, Miˬyehˇ-euˬ tsawˇ myahˇ-ahˇ yaw zeu baw-eu laꞈ k’oeˇ, guiˬ lahˬ shaˇ-awˬ lehˇ mehˬ taˬ yaꞈ-euˬ meh. (Maꞈtehˬ 6:9) Nawˬ-euˬ jawˇ k’ahˬ-ahˇ, Miˬyehˇ-euˬ tsawˇ myahˇ siˬ nya laˇ ni, caw ba nehˬ luꞈ-eu aˬ geu zahˇ nga?—Yoˇhaˬ 12:28, YS97; Loˇmaˆ 10:13, 14-ahˇ gui-awˬ.

• Aˬ yawꞈ maꞈ, Miˬyehˇ Miˇ k’ahˬ-euˬ gaˇ kawˆ mehˬ nehˬ luꞈ-eu meh. Miˬyehˇ Yeˬsuˇ-ahˇ bi oe-euˬ heu naˇ, Miˬyehˇ Miˇ k’ahˬ-euˬ gaˇ kawˆ bi mehˬ nehˬ le-euˬ meh. Tsawˇ haˬ zaˬ noeˬ tmˬ k’aˇ za-eu naˇ, Miˬyehˇ Miˇ k’ahˬ tiˬ hmˬ tehꞈ meh. Yeˬsuˇ shiˇ leˇ ngeh keuˆ ni, miˇ k’ahˬ teu-euˬ gaˇ kawˆ ehˇ-eu meh. (Luˇkaꞈ 4:43; 8:1; 23:42, 43) Aˬ yawꞈ-euˬ g’aˬ k’ehˇ deuˬ k’awꞈ ni, Miˬyehˇ Miˇ k’ahˬ gaˇ kawˆ mehˬ tehꞈ-a lehˇ Yeˬsuˇ ehˇ-eu meh. Tiˬ g’aˬ na nawˬ-ahˇ, Miˬyehˇ Miˇ k’ahˬ gaˇ kawˆ ja sawˇ laˇ ngeh, aˬ yawꞈ aˬ geu muˇ-euˬ tsawˇ haˬ pyeuꞈ paˬ-ehˇ g’eh-eu nga?—Maꞈtehˬ 24:14-ahˇ gui-awˬ.

• Aˬ yawꞈ maꞈ, haiˬ-eu miˇ k’ahˬ nehˬ-ehˇ maˬ taꞈ-a. Aˬ yawꞈ maꞈ miˬ beuˆ mi cehˇ maˬ nyehꞈ tehˬ-eu uˬ taꞈ, miˇ k’ahˬ-ahˇ dzoeˬ dzaˬ-eu aˬ yuiꞈ geuꞈ-eu gaˇ kawˆ-ahˇ k’awꞈ maˬ ceh-a. (Yoˇhaˬ 17:16; 18:36) K’oeˇ naˇ miˇ tsaˬ k’oeˇ taˆ jaˆ-eu, tsawˇ haˬ zaˬ-euˬ dehꞈ jeˬ dehꞈ kawˆ maˬ muiˬ-eu jeˬ-ahˇ k’awꞈ, maˬ dzaw geuꞈ-a.—Yaˬkoˆ 4:4-ahˇ gui-awˬ.

• Aˬ yawꞈ maꞈ, tiˬ g’aˬ tiˇ g’aˬ g’oeˇ-eu gaˬ-eu jeˬ byah-eu meh. Tsawˇ jeuˬ tsawˇ ca dawˬ tawˆ luꞈ-ahˇ gaˬ-awˇ yaw zeu baw-eu g’aˇ duˬ, Jaˇliꞈ laꞈ k’oeˇ neh aˬ yawꞈ maꞈ dzaw geuꞈ luꞈ meh. Zahˇ k’awꞈ deuˬ naˇ, guiˇ deuˆ gaˇ g’aˬ biꞈ-eu meh. Ehˇ k’awꞈ Ka li zaˬ maˇ diˇ deuˬ naˇ, guiˇ deuˆ gaˇ g’aˬ maˬ biꞈ-a. (Miˇkaˬ 4:1-3) Ka li zaˬ maˇ diˇ deuˬ naˇ, aˬ cawˬ-ahˇ caw ba ngeh, aˇ yamˬ maˬ ehˇ, g’aˬ maˬ ehˇ, g’aˬ yui maˬ yui-a.—Yoˇhaˬ 13:34, 35; 1 Yoˇhaˬ 4:20-ahˇ gui-awˬ.

Jaˇliꞈ-ahˇ dawˬ pehˬ taˬ-awˇ mehˬ-eu laꞈ k’oeˇ, Miˬyehˇ-euˬ tsawˇ myahˇ-ahˇ ciˬ huiˬ ciˬ mahˇ luꞈ-eu aˬ geu muˇ nga? Tsawˇ haˬ zaˬ noeˬ tmˬ k’aˇ za-eu naˇ, Miˬyehˇ Miˇ k’ahˬ tiˬ hmˬ tehꞈ meh lehˇ, mehˬ-euˬ aˬ geu muˇ nga? K’oeˇ naˇ, nui gaˬ-ahˇ zmˬ-awˇ guiˇ deuˆ gaˇ g’aˬ maˬ biꞈ-eu aˬ geu muˇ nga? Nawˇ aˬ joˆ-ehˇ noeˬ nya?— 1 Yoˇhaˬ 3:10-12-ahˇ gui-awˬ.