Saˬdaˬ neh dahˬ beh-awˇ jaˬ myawꞈ myawꞈ-euˬ gaˇ neh naˇ, miˇ tsaˬ k’oeˇ taˆ maˬ muiˬ-eu jeˬ pyeuꞈ doˆ laˇ-euˬ meh. Aˇ dahˬ beh ngeh, Saˬdaˬ byah kuꞈ-eu mˬ taˆ g’aˬ k’ehˇ pyeuꞈ k’awꞈ “yaw tsaˬ yaw dawˇ laꞈ k’oeˇ, aˬ yawꞈ maˬ jawˇ nya-a”. (Yoˇhaˬ 8:44, YS97) Aˬ yawꞈ-aˬ, Miˬyehˇ-ahˇ uˬ duˬ maˬ bi tahˬ ni, aˬ yawꞈ-ahˇ bi tahˬ-eu lehˇ noeˬ taˬ-euˬ nui noeˬ k’oeˇ huiˬ laˇ-awˇ, Eˇbaˆ-ahˇ mehˇ shuiˇ shuiˇ iˇ-euˬ meh. Aˬdaˬ jiˇ ni Eˇbaˆ nehˬ-ehˇ gm leˇ-awˇ, Miˬyehˇ-euˬ dawˬ-ahˇ maˬ naˇ haˬ-a. Aˬdaˬ neh tseˇ-euˬ teu naˇ, shaˬ zahˬ hawˇ-eu shiˇ-eu jeˬ pyeuꞈ doˆ laˇ-euˬ meh.—Aˇdahˬbeh-eu 3:1-6, 19-ahˇ gui-awˬ.

Miˬyehˇ dawˬ-ahˇ maˬ bi naˇ haˬ-eu lehˇ, Saˬdaˬ Eˇbaˆ-ahˇ mehˇ shuiˇ shuiˇ-euˬ teu naˇ, Miˬyehˇ uˆ lahˇ-eu jeˬ-ahˇ laꞈ maˬ daˬ lehˇ ehˇ-eu meh. Tsawˇ haˬ myaˬ ni Saˬdaˬ nehˬ-ehˇ gm leˇ-awˇ, Miˬyehˇ uˆ lahˇ-eu jeˬ-ahˇ maˬ ha geuꞈ lehˇ ehˇ-eu meh. Teu miˇ neh Saˬdaˬ-aˬ, “miˇ tsaˬ-ahˇ uˆ lahˇ-eu g’aˬ” pyeuꞈ-eu meh.—Yoˇhaˬ 14:30; 1 Yoˇhaˬ 5:19-ahˇ gui-awˬ.

Miˬyehˇ neh k’aˇ beh-euˬ jeˬ maˬ muiˬ-eu jeˬ lehˇ maˬ jaˆ. Tsawˇ haˬ maˬ ehˇ, mˬ taˆ g’aˬ k’ehˇ maˬ ehˇ, Miˬyehˇ-ahˇ tiˬ byah tiˬ loꞈ naˇ haˬ nya-eu jeˬ ahˇ-eu meh. (Dawˬmehˬmehˬ-eu 32:4, 5) Muiˬ-eu hawˇ-eu maˬ muiˬ-eu jeˬ-ahˇ yawˬ ha naꞈ ni tseˇ geuꞈ nya-eu jeˬ, Miˬyehˇ aˬ dui-ahˇ beh ahˇ nehˬ taˬ-euˬ meh. Yawˬ ha naꞈ ni bi tseˇ laꞈ-euˬ heu neh, Miˬyehˇ-ahˇ gaˬ miˇ-a lehˇ, mˇ mawˇ nehˬ nya-eu meh.—Yaˬkoˆ 1:13-15; 1 Yoˇhaˬ 5:3-ahˇ gui-awˬ.

Yeˬhawˇbaˬ Miˬyehˇ aˬ yawꞈ-ahˇ muiˇ-eu deuˬ-ahˇ maˬ laˆ cawˆ ni, iˬ nah keuˆ ni aˬ jeˬ miˇ neh bi jawˇ-euˬ nga? Miˬyehˇ-ahˇ maˬ g’oe-ni yawˬ haˇ yawˬ ha uˆ lahˇ-eu aˇ naˆ ni shiꞈ ma naꞈ-eu nya lehˇ, bi siˬ nya-eu g’aˇ duˬ bi jawˇ-euˬ meh. (Dawˬtsoˆtsoˆ-eu  7:29; 8:9) Tsawˇ haˬ zaˬ neh uˆ lahˇ-euˬ jeˬ-aˬ, guiˇ deuˆ-eu, maˬ muiˬ maˬ jaˬ-eu, maˬ tsaˬ maˬ dawˇ-eu, naˇ-eu gawˇ-eu jeˬ-ahˇ, maˬ laˆ byoˆ nya nga lehˇ, tsawˇ haˬ zaˬ-euˬ dehꞈ jeˬ dehꞈ kawˆ 6,000 k’oꞈ byah laˇ ngeh jawˇ, mawˇ shawˇ laˇ-eu meh.—Yeˬlaˬmiˇ 10:23; Loˇmaˆ 9:17-ahˇ gui-awˬ.

Miˬyehˇ uˆ lahˇ-eu jeˬ-ahˇ ha geuꞈ-eu deuˬ naˇ guiˬ lahˬ baw meh. (Iˇsaˬyaˇ 48:17, 18) G’awˬ myahˇ maˬ g’eh-ehˇ, tsawˇ haˬ zaˬ uˆ lahˇ-eu jeˬ dawˬ tawˆ luꞈ-ahˇ, Yeˬhawˇbaˬ laˆ cawˆ jiˇ-eu meh. Miˬyehˇ uˆ lahˇ-eu jeˬ-ahˇ ha geuꞈ-eu deuˬ tehꞈ-ehˇ, miˇ tsaˬ k’oeˇ taˆ ya dehꞈ g’eh meh.—Iˇsaˬyaˇ 11:9. Daˬyeˬlaˇ 2:44-ahˇ gui-awˬ.

Biˬdiˬoˬ haw Miˬyehˇ aˬ jeˬ miˇ neh shaˬ zahˬ-ahˇ bi jaˆ-euˬ nga?

Tsawˇ haˬ zaˬ Yeˬhawˇbaˬ-ahˇ uˬ duˬ tahˬ-eu heu naˇ, yawˬ ha-euˬ g’aˇ duˬ muiˬ laˇ-eu jeˬ jaˆ-eu miˇ neh tehꞈ meh lehˇ Saˬdaˬ ehˇ-eu meh. Dawˬ teu maˬ tsaˬ-a lehˇ, nawˇ mˇ mawˇ nehˬ mawꞈ miˇ-a loˇ? Mˇ mawˇ nya meh. Miˬyehˇ oˇ-eu miˇ neh, Miˬyehˇ neh bi uˆ lahˇ le laˬ maˬ ngeuˇ naˇ tsawˇ haˬ neh bi uˆ lahˇ le laˬ lehˇ, mˇ mawˇ-eu aˬ kawˬ-aˬ za-euˬ ma. Aˬ dui dehꞈ jeˬ-ahˇ haw ngeh, aˬ geu g’aˬ-ahˇ tseˇ taˬ-euˬ lehˇ siˬ laˇ-eu meh.—Yawˇbaˆ 1:8-12; Dawˬdaˬ 27:11-ahˇ gui-awˬ.

Tseˇ geuꞈ nya-eu jeˬ naˇ, Jaˇliꞈ-ahˇ dawˬ pehˬ taˬ-eu zahˇ maˇ-ahˇ poˆ-awˇ ya caw teh-eu meh. (Yoˇhaˬ 4:23) Yeˬsuˇ-ahˇ duˇ ni, aˬ dui k’awꞈ miˇ tsaˬ-ahˇ uˆ lahˇ-eu jeˬ hawˇ-eu guiˇ beuˆ gaˇ maˬ gm leˇ-eu heu naˇ, Saˬdaˬ uˆ lahˇ-eu jeˬ-ahˇ laꞈ maˬ daˬ lehˇ, mˇ mawˇ-eu jeˬ pyeuꞈ meh.—Yoˇhaˬ 17:14-ahˇ gui-awˬ.

Saˬdaˬ aˬ yawꞈ-euˬ baoˬ-ahˇ g’oe-awˇ, maˬ muiˬ-eu jeˬ mˇ-eu paw g’aˬ biꞈ luꞈ meh. Aˬ dui teu loꞈ-ehˇ maˬ mˇ ngeh, cawˬ hawˇ-eu yuiꞈ nyiˇ deuˬ k’awꞈ ehˇ doeˇ laˇ-eu meh. (1 Beˬtuˆluˆ 4:3, 4) Teu miˇ neh, aˬ dui ya tseˇ geuꞈ meh. Miˬyehˇ-ahˇ gaˬ-eu deuˬ nehˬ-ehˇ cawˬ-awˇ, Miˬyehˇ-euˬ nui gaˬ ahˇ-eu zahˇ dawˬ-ahˇ caw teh naˇ, tsawˇ haˬ zaˬ shaˬ zahˬ keuˆ le ngeh, Miˬyehˇ-ahˇ byehˇ dzeh tehꞈ-a lehˇ, Saˬdaˬ neh ehˇ-euˬ dawˬ k’oeˇ, jaˬ myawꞈ nga lehˇ siˬ duˬ laˇ-eu meh.—1 Gawˇliˬtu 6:9, 10; 15:33-ahˇ gui-awˬ.

Miˬyehˇ tsawˇ haˬ zaˬ-ahˇ gaˬ-eu miˇ neh, maˬ muiˬ-eu jeˬ hawˇ-eu shaˬ-eu zahˬ-eu jeˬ dawˬ tawˆ luꞈ-ahˇ, laˆ byoˆ jiˇ nehˬ ma lehˇ saˇ jaˇ dzaˬ taˬ-euˬ meh. Miˬyehˇ-euˬ saˇ jaˇ dawˬ-ahˇ jah-eu deuˬ, miˇ tsaˬ k’oeˇ taˆ mˬ maˬ maˬ byaˆ zaˇ ziˇ ya dehꞈ meh.—Yoˇhaˬ 3:16-ahˇ gui-awˬ.