Aˬ diˇ aˬ maˇ Miˬyehˇ pyeuꞈ-eu g’aˬ, yawˬ jeˬ na luꞈ-ahˇ Beh-euˬ g’aˬ meh. Miˬyehˇ-aˬ, aˇ dahˬ beh-euˬ maˬ baw-eu loꞈ-ehˇ, aˇ saˬ saˬ-eu k’awꞈ maˬ baw-a. (Ja ceuˬ 90:2) Jaˇliꞈ laꞈ k’oeˇ ahˇ-eu muiˬ-eu gaˇ kawˆ, Miˬyehˇ jawˇ gaˇ neh oe-euˬ meh. (1 Tiˆmoˇseˬ 1:11) Miˬyehˇ aˬ dui-ahˇ dehꞈ ziˇ biꞈ-euˬ miˇ neh, aˬ yawꞈ-ahˇ tehꞈ-ehˇ uˬ duˬ tahˬ-eu tsaˬ meh.—Pah mehˬ-eu 4:11-ahˇ gui-awˬ.

Miˬyehˇ-ahˇ tiˬ g’aˬ-iˬ maˬ mawˇ haw-aˬ. Aˬ jeˬ miˇ neh ehˇ naˇ, tsawˇ haˬ zaˬ naˆ maˬ tseˇ dzehˬ-eu yaw sahˇ mawˇ do pyeuꞈ-eu miˇ neh meh. (Yoˇhaˬ 1:18; 4:24) Ehˇ k’awꞈ ni, Miˬyehˇ neh beh taˬ-euˬ jeˬ-ahˇ haw ngeh jawˇ, aˬ yawꞈ-euˬ nui noeˬ nui duˇ deuˬ-ahˇ ya siˬ nya-eu meh. Yaw jeˬ ma jeˬ, aˇ siˬ hawˇ-eu aˇ yehˆ deuˬ-ahˇ haw ngeh, Miˬyehˇ-euˬ nui gaˬ hawˇ-eu zaˬ siˬ nui gahˇ deuˬ-ahˇ ya mawˇ-euˬ ma. K’oeˇ naˇ, miˇ tsaˬ tahˬ k’awˇ-ahˇ haw ngeh, Miˬyehˇ-euˬ baoˬ huiˬ dui dui-eu ya siˬ nya-euˬ ma.—Loˇmaˆ 1:20-ahˇ gui-awˬ.

Jaˇliꞈ gui-eu baˬ da neh, Miˬyehˇ-euˬ nui noeˬ nui duˇ deuˬ-ahˇ, paˇ siˬ nya dzehˬ laˇ-eu meh. Yaw jeˬ ma jeˬ, Jaˇliꞈ laꞈ k’oeˇ Miˬyehˇ ya leˇ-eu jeˬ hawˇ-eu maˬ ya leˇ-eu jeˬ-ahˇ ehˇ nehˬ taˬ-awˇ, tsawˇ haˬ-euˬ dehꞈ jeˬ dehꞈ kawˆ-ahˇ haw haw-ehˇ, Miˬyehˇ mˇ k’oꞈ nehˬ-eu meh.—Ja ceuˬ 103:7-10-ahˇ gui-awˬ.

“Mˬ k’oeˇ taˆ jawˇ-eu, nga maꞈ-euˬ Aˬda-oˇ, nawˬ-euˬ tsawˇ myahˇ-ahˇ yaw zeu baw luꞈ-uˇ” lehˇ, Yeˬsuˇ ehˇ taˬ yaꞈ-euˬ meh. (Maꞈtehˬ 6:9) Miˬyehˇ-ahˇ kuˇ jeˬ kuˇ kawˆ yaw myaˬ jeˬ jaˆ k’awꞈ, tsawˇ myahˇ myahˇ maˇ naˇ, tiˬ myahˇ jaˆ-eu tehꞈ meh. Tsawˇ myahˇ teu hmˬ-ahˇ, yawˬ ha-euˬ tsawˇ jeuˬ dawˬ neh, kawˬ sheu teˇ saˇ g’awˬ mya jeˬ lehˇ doˆ laˇ k’awꞈ, aˬ dui Aˬkaˬ paw neh naˇ, “Jeˬhoˇbaˬ [‘Yeˬhawˇbaˬ,’ Miˇ Shuiꞈ Dawˬ Paˇ Jaˇliꞈ]” maˬ ngeuˇ naˇ “Yaˬg’oeˬ” lehˇ kuˇ-eu meh.—Doˆ-iˇ-eu 3:14 laꞈ oˆ oˆ saˬ aˇ boꞈ yaw nyiˇ-ahˇ gui-awˬ.

Jaˇliꞈ myaˬ ni Miˬyehˇ-euˬ tsawˇ myahˇ yuˇ doˆ dzeh-awˇ, Sahˬpaˬ maˬ ngeuˇ naˇ Miˬyehˇ lehˇ boꞈ ahˇ taˬ-euˬ meh. Boꞈ beh beh-euˬ Jaˇliꞈ-ahˇ, Miˬyehˇ-euˬ tsawˇ myahˇ 7,000 poˆ dawˬ peh ahˇ-eu meh. Yeˬsuˇ Miˬyehˇ-euˬ gaˇ kawˆ mehˬ ngeh, Miˬyehˇ-euˬ tsawˇ myahˇ-ahˇ  k’awꞈ mehˬ nehˬ-euˬ meh.—Yoˇhaˬ 12:28, Jaˇliꞈ Yaw shuiꞈ 1997-ahˇ gui-awˬ.

Biˬdiˬoˬ haw Miˬyehˇ tsawˇ myahˇ baw meh loˇ?

Nymˇ iˬ nah shaˬ zahˬ myaˬ laˇ taˬ-euˬ heu, Yeˬhawˇbaˬ Miˬyehˇ aˬ dui-ahˇ byehˇ dzeh taˬ-euˬ miˇ neh nga loˇ? Tsawˇ haˬ tiˬ deuˬ na-aˬ, shaˬ zahˬ keuˆ le ngeh, Miˬyehˇ ngaˬ-ahˇ lawˬ haw nya lehˇ ehˇ-eu meh. Heu loꞈ-ehˇ ehˇ-eu maˬ tsaˬ-a.—Yaˬkoˆ 1:13-ahˇ gui-awˬ.

Miˬyehˇ tsawˇ haˬ zaˬ-ahˇ yawˬ ha naꞈ-i bi tseˇ geuꞈ mawꞈ-eu meh. Miˬyehˇ gaˇ mˇ-eu hawˇ-eu maˬ mˇ-eu yawˬ ha naꞈ-i bi tseˇ laꞈ-euˬ miˇ neh, Miˬyehˇ-ahˇ guiˬ lahˬ huiˬ paˬ-ehˇ g’eh-eu meh. (Yawˇshuˆ 24:15) Ehˇ k’awꞈ tsawˇ haˬ myaˬ ni, maˬ muiˬ-eu jeˬ-ahˇ tseˇ geuꞈ-eu miˇ neh, shaˬ zahˬ myaˬ laˇ-eu meh. Maˬ tsaˬ maˬ dawˇ-eu jeˬ-ahˇ, Yeˬhawˇbaˬ ya mawˇ ngeh, nui ma-ahˇ naˇ leˇ-eu meh.—Aˇdahˬbeh-eu 6:5, 6-ahˇ gui-awˬ.

Yeˬhawˇbaˬ aˬ dui-ahˇ ngehˬ g’eh luꞈ-eu Miˬyehˇ pyeuꞈ-eu meh. Aˬ dui-ahˇ laꞈ k’aˬ cehˇ taˆ ni bi dehꞈ mawꞈ-eu meh. Teu miˇ neh g’awˬ myahˇ maˬ g’eh-ehˇ, shaˬ zahˬ-ahˇ laˆ byoˆ jiˇ-awˇ, shaˬ zahˬ bi pyeuꞈ laˇ-eu g’aˬ-ahˇ k’awꞈ laˆ cawˆ-eu meh. Nymˇ mehˬ k’ehˬ-ahˇ shaˬ zahˬ tiˬ k’ehˬ bi jaˆ taˬ-euˬ heu naˇ, Miˬyehˇ laꞈ k’oeˇ gaˇ kawˆ tiˬ jeˬ paˬ jaˆ-eu miˇ neh meh. Gaˇ kawˆ heu, gaˬ naˇ yaw huiˬ 8 laꞈ k’oeˇ ehˇ shaw nehˬ laꞈ tehꞈ-a.—2 Beˬtuˆluˆ 2:9; 3:7, 13-ahˇ gui-awˬ.

Guiˬ lahˬ shaˇ-eu jeˬ neh, aˬ yawꞈ jawˇ gaˇ jiˆ peh laˇ-awˬ lehˇ, Yeˬhawˇbaˬ kuˇ luꞈ-eu meh. Aˬ dui yawˬ g’aˬ na luꞈ-ahˇ, aˬ yawꞈ ngehˬ g’eh luꞈ-eu meh. (Ja ceuˬ 65:2; 145:18) Aˬ yawꞈ iˬ baˇ pyehˬ nehˬ mawꞈ-eu meh. Miˬyehˇ nui ma tsaˬ-eu jeˬ-ahˇ mˇ-eu lehˇ, leh jeh luꞈ gaˇ neh, lehˬ iˇ luꞈ-eu deuˬ-ahˇ Miˬyehˇ mawˇ luꞈ meh. Teu miˇ neh, aˬ dui iˬ baˇ zaˬ pyeuꞈ-eu k’awꞈ, Miˬyehˇ-euˬ dawˬ peh jiˆ peh leˇ nya-eu meh.—Ja ceuˬ 103:12-14; Yaˬkoˆ 4:8-ahˇ gui-awˬ.

Yeˬhawˇbaˬ aˬ dui-ahˇ dehꞈ ziˇ biꞈ laꞈ-euˬ g’aˬ pyeuꞈ-eu miˇ neh, yawˬ g’aˬ yawˬ-ahˇ naˆ maˬ tseˇ, aˬ yawꞈ-ahˇ gaˬ-eu geuˇ meh. (Maˬkuˆ 12:30) Nawˇ Miˬyehˇ-ahˇ gaˬ naˇ, aˬ yawꞈ-euˬ gaˇ kawˆ deuˬ-ahˇ dzaw geuꞈ-awˇ, Miˬyehˇ nui ma tsaˬ-eu jeˬ-ahˇ ya mˇ meh. Toˆ-ehˇ naˇ, Miˬyehˇ-euˬ dawˬ peh peh leˇ nya meh.—1 Tiˆmoˇseˬ 2:4; 1 Yoˇhaˬ 5:3-ahˇ gui-awˬ.