Miˬyehˇ yawˬ g’aˬ na luꞈ-ahˇ, guiˬ lahˬ shaˇ-eu jeˬ neh, aˬ yawꞈ-euˬ dawˬ peh jiˆ peh laˇ-awˬ lehˇ kuˇ luꞈ meh. (Ja ceuˬ 65:2) Ehˇ k’awꞈ, yawˬ g’aˬ na luꞈ-euˬ shaˇ dawˬ-ahˇ, Miˬyehˇ naˇ haˬ-eu maˬ ngeuˇ-a. Yaw jeˬ ma jeˬ, miˬ zaˬ-ahˇ yehˬ bawˬ sehˇ lu-ehˇ jahˇ-eu k’aˬ dzeˇ zaˬ deuˬ-euˬ shaˇ dawˬ-ahˇ, Miˬyehˇ maˬ naˇ haˬ-a. (1 Beˬtuˆluˆ 3:7) Maˬ muiˬ-eu jeˬ-ahˇ mˇ poˆ mˇ poˆ-ehˇ dehꞈ luꞈ-eu Iˇsaˬleˬlaˆ tsawˇ haˬ deuˬ-euˬ shaˇ dawˬ-ahˇ, Miˬyehˇ maˬ naˇ haˬ-a. Ehˇ k’awꞈ, iˬ baˇ mˇ-euˬ tsawˇ haˬ maˇ diˇ noeˬ paˇ-awˇ neh shaˇ naˇ, Miˬyehˇ naˇ haˬ nehˬ-eu meh. Guiˬ lahˬ shaˇ-eu heu naˇ, yaw-ehˇ muiˬ-eu tiˬ jeˬ pyeuꞈ-eu meh.—Iˇsaˬyaˇ 1:15; 55:7-ahˇ gui-awˬ.

Biˬdiˬoˬ haw Miˬyehˇ yawˬ g’aˬ na luꞈ-euˬ shaˇ dawˬ-ahˇ, naˇ haˬ ngaˇ loˇ?

Yeˬhawˇbaˬ Miˬyehˇ-aˬ, Beh-euˬ yaw sahˇ pyeuꞈ-eu miˇ neh, aˬ dui maꞈ aˬ yawꞈ-ahˇ tehꞈ-ehˇ guiˬ lahˬ shaˇ-eu tsaˬ meh. (Maꞈtehˬ 4:10; 6:9) Aˬ dui maˬ byah kuꞈ-eu tsawˇ haˬ zaˬ pyeuꞈ-eu miˇ neh, Yeˬsuˇ shiˇ dah nehˬ le-euˬ meh. Teu miˇ neh guiˬ lahˬ shaˇ ngeh, Yeˬsuˇ-euˬ tsawˇ myahˇ-ahˇ ya g’oe-eu meh. (Yoˇhaˬ 14:6) Aˬ dui guiˬ lahˬ shaˇ ngeh, nehꞈ toˇ toˇ-eu loꞈ-ehˇ aˬ yawꞈ yaw oeˇ tehꞈ-ehˇ shaˇ poˆ gaˇ, Yeˬhawˇbaˬ maˬ ya leˇ-a. Yawˬ ha-euˬ nui ma laꞈ k’oeˇ neh shaˇ-eu jeˬ-ahˇ tehꞈ-ehˇ, Miˬyehˇ geuꞈ mawꞈ-eu meh.—Maꞈtehˬ 6:7; Piˇliˇpiˆ 4:6, 7-ahˇ gui-awˬ.

Aˬ dui-ahˇ Beh-euˬ Miˬyehˇ, nui ma laꞈ k’oeˇ neh guiˬ lahˬ shaˇ gaˇ k’awꞈ gaˬ nya-eu meh. (1 Saˬmeuˬlaˆ 1:12, 13) Aˇ yamˬ aˇ law maˬ baw ni, Miˬyehˇ-ahˇ guiˬ lahˬ shaˇ nya meh. Yaw jeˬ ma jeˬ, yuꞈ leˇ ngeh yamˬ, noeˬ laˇ ngeh yamˬ, hawˬ dzaˬ ngeh yamˬ, shaˬ zahˬ puˬ le ngeh yamˬ-ahˇ meh.—Ja ceuˬ 55:22; Maꞈtehˬ 15:36-ahˇ gui-awˬ.

Miˬyehˇ-euˬ dawˬ peh jiˆ peh leˇ-eu yaw awˬ maˬ ngeuˇ-a. Aˬ jeˬ miˇ neh ehˇ naˇ, Miˬyehˇ-ahˇ maˬ jah-eu uˬ taꞈ, miˇ k’ahˬ bi saˇ laˇ ma lehˇ Miˬyehˇ neh ngehˬ taˬ-euˬ saˇ jaˇ dawˬ-ahˇ, cehꞈ lehꞈ ka-eu tsawˇ haˬ deuˬ nehˬ-ehˇ ya jawˇ-eu miˇ neh meh. (2 Tiˆmoˇseˬ 3:1, 4; 2 Beˬtuˆluˆ 3:3, 13) Teu miˇ neh, Miˬyehˇ-ahˇ jah-eu deuˬ nehˬ-ehˇ uiˬ leˇ-awˇ, tiˬ g’aˬ tiˇ g’aˬ cawˬ cawˬ-eu laꞈ k’oeˇ g’aˬ yuˇ geuꞈ-eu loˬ meh.—Heˬbyehˇ 10:24, 25-ahˇ gui-awˬ.

 Miˬyehˇ-ahˇ gaˬ-eu deuˬ nehˬ-ehˇ cawˬ cawˬ ngeh jawˇ, aˬ dui-ahˇ Miˬyehˇ-euˬ dawˬ peh jiˆ peh leˇ nya ni, caw ba nehˬ laꞈ-eu meh. Yeˬhawˇbaˬ Saˇ kiˇ deuˬ bawˬ dzaˬ gaˇ, tiˬ g’aˬ tiˇ g’aˬ-euˬ jah jeˬ laꞈ k’oeˇ neh, g’aˬ yuˇ geuꞈ nya-eu meh.—Loˇmaˆ 1:11, 12-ahˇ gui-awˬ.

Jaˇliꞈ laꞈ k’oeˇ neh ya siˬ nya-euˬ jeˬ-ahˇ, shaˇ noeˬ shaˇ sawˇ-eu baˬ da neh, Yeˬhawˇbaˬ-euˬ dawˬ peh jiˆ peh leˇ nya-eu meh. Miˬyehˇ-euˬ mˇ jeˬ shaˇ kawˆ, mehˬ jeˬ mehˬ kawˆ hawˇ-eu aˬ yawꞈ-euˬ saˇ jaˇ dawˬ-ahˇ, yaw muiˬ paˬ-ehˇ shaˇ noeˬ shaˇ sawˇ-awˬ. K’aˇ shaˇ sawˇ ngeh guiˬ lahˬ shaˇ naˇ, Miˬyehˇ-euˬ nui gaˬ hawˇ-eu zaˬ siˬ nui gahˇ-ahˇ, aˇ poeˬ taˬ baw nya laˇ meh.—Yawˇshuˆ 1:8; Ja ceuˬ 1:1-3-ahˇ gui-awˬ.

Nawˇ Miˬyehˇ-ahˇ jah-awˇ nui ma taˬ coeˇ laˇ ngeh tehꞈ-ehˇ, Miˬyehˇ-euˬ dawˬ peh jiˆ peh leˇ nya-eu meh. Ehˇ k’awꞈ jah-eu jeˬ-aˬ, iˇ cuꞈ loˬ-eu aˇ bawˬ tiˬ bawˬ-ahˇ duˇ meh. K’oeˇ loꞈ-ehˇ duˇ ni, nawˬ neh jah taˬ-euˬ jeˬ-ahˇ, shaˇ noeˬ shaˇ sawˇ poˆ-eu heu naˇ, nawˇ jah luꞈ-eu jeˬ-ahˇ g’aˬ dawˆ lahˬ nehˬ-eu jeˬ pyeuꞈ meh.—Maꞈtehˬ 4:4; Heˬbyehˇ 11:1, 6-ahˇ gui-awˬ.

Yeˬhawˇbaˬ, aˬ yawꞈ-ahˇ gaˬ-eu deuˬ-ahˇ haw piˇ nehˬ meh. Aˬ yawꞈ maꞈ jah-eu jeˬ hawˇ-eu dehꞈ ziˇ-euˬ noeˬ tmˬ-eu jeˬ-ahˇ, laˆ cawˆ laˇ-eu aˬ geu jeˬ-ahˇ maˬ kaˬ, Miˬyehˇ laˆ piˇ nehˬ-eu meh. (Ja ceuˬ 91:1, 2, 7-10) Aˬ dui-euˬ mawˇ do-ahˇ, deuˬ laˇ paˬ-ehˇ g’eh-eu yawˬ jeˬ na luꞈ-ahˇ yahˇ nya laˇ ni, Yeˬhawˇbaˬ dehꞈ ziˇ gaˇ ma yaw-ehˇ muiˬ-eu kahˇ-ahˇ mehˬ nehˬ laꞈ-eu meh.—Ja ceuˬ 73:27, 28; Yaˬkoˆ 4:4, 8-ahˇ gui-awˬ.