Tsawˇ haˬ zaˬ miˇ tsaˬ k’oeˇ taˆ, mˬ maˬ maˬ byaˆ zaˇ ziˇ ya dehꞈ meh lehˇ, muiˬ-eu gaˇ kawˆ Jaˇliꞈ laꞈ k’oeˇ boꞈ ahˇ taˬ-euˬ meh. (Ja ceuˬ 37:29) Jaˇliꞈ-aˬ, sahˬ boꞈ paˇ dmˬ yaw nyiˇ 66 dmˬ yuˇ dzoeˇ taˬ-euˬ meh. Miˬyehˇ Jaˇliꞈ heu boꞈ-eu g’aˇ duˬ, saˇ jaˇ ziꞈ-eu tsawˇ haˬ 40 g’aˬ dawˬ peh zmˬ-euˬ meh. Jaˇliꞈ boꞈ dahˬ beh-euˬ ngaˬ dmˬ-aˬ, dzeuˇ yaꞈ-euˬ 3,500 k’oꞈ-ahˇ, Moˇseˬ neh boꞈ taˬ yaꞈ-euˬ meh. Boꞈ saˬ saˬ-euˬ paˇ dmˬ nga lehˇ ngeuˇ naˇ, dzeuˇ yaꞈ-euˬ 1,900 k’oꞈ-ahˇ, kuiˇ laꞈ Yoˇhaˬ neh boꞈ taˬ yaꞈ-euˬ meh. Jaˇliꞈ boꞈ-euˬ deuˬ, aˬ suˇ g’aˬ-euˬ nui noeˬ boꞈ-euˬ nga? Miˬyehˇ-euˬ muiˬ-eu shawˇ-eu yaw sahˇ neh, aˬ yawꞈ maꞈ-ahˇ bi noeˬ doˆ-awˇ boꞈ-euˬ meh. (2 Saˬmeuˬlaˆ 23:2) Aˬ yawꞈ maꞈ-euˬ nui noeˬ boꞈ-euˬ maˬ ngeuˇ-a, Miˬyehˇ-euˬ nui noeˬ boꞈ-euˬ meh. Teu miˇ neh, noeˬ doˆ-euˬ yaw sahˇ g’aˬ naˇ, Yeˬhawˇbaˬ pyeuꞈ-eu meh.—2 Tiˆmoˇseˬ 3:16; 2 Beˬtuˆluˆ 1:20, 21-ahˇ gui-awˬ.

Biˬdiˬoˬ haw Jaˇliꞈ dawˬ kawˬ heu, aˬ suˇ g’aˬ-euˬ nui noeˬ nga?

Jaˇliꞈ-aˬ, Miˬyehˇ jawˇ gaˇ neh oe-eu meh lehˇ aˬ dui jah nya-eu meh. Aˬ jeˬ miˇ neh ehˇ naˇ, mehˬ hu paw pyeuꞈ laˇ-eu gaˇ kawˆ deuˬ-ahˇ, mehˬ duˬ taˬ-euˬ miˇ neh meh. Tsawˇ haˬ tiˬ g’aˬ-iˬ teu loꞈ-ehˇ maˬ ehˇ duˬ nya-a. (Yawˇshuˆ 23:14) Baoˬ huiˬ-eu Miˬyehˇ tiˬ g’aˬ tehꞈ-ehˇ, mehˬ hu paw tsawˇ haˬ zaˬ-ahˇ pyeuꞈ laˇ-eu gaˇ kawˆ deuˬ-ahˇ, mehˬ duˬ nehˬ nya-eu meh.—Iˇsaˬyaˇ 42:9; 46:10-ahˇ gui-awˬ.

Miˬyehˇ jawˇ gaˇ neh oe-euˬ sahˬ boꞈ-aˬ, aˬ cawˬ naˆ maˬ tseˇ muiˬ dzehˬ meh lehˇ noeˬ-euˬ loꞈ-ehˇ, maˇ diˇ muiˬ dzehˬ gaˇ ya mawˇ-euˬ ma. Miˇ k’ahˬ doe ni, tsawˇ jeuˬ tsawˇ ca-euˬ sahˬ boꞈ yaw myaˬ jeˬ jahˇ doˆ-awˇ, yaw myaˬ lam dmˬ pyehˬ k’awˬ taˬ-euˬ meh. Jaˇliꞈ-aˬ, oeˇ dui dui k’awꞈ, miˇ tsaˬ tahˬ k’awˇ-euˬ gaˇ kawˆ-ahˇ ngehˬ keuˆ ngeh k’awꞈ, nymˇ-euˬ zaˬ siˬ nui gahˇ deuˬ nehˬ-ehˇ tsaˬ leˇ-eu meh. Jaˇliꞈ-ahˇ 40 g’aˬ boꞈ-euˬ k’awꞈ tiˬ gaˇ tsaˬ jiˇ-eu meh. Miˬyehˇ-euˬ nui gaˬ-ahˇ taꞈ-eu gaˇ kawˆ maˇ jawˆ ni boꞈ taˬ-euˬ uˬ taꞈ, Jaˇliꞈ-aˬ, baoˬ ahˇ-eu baˬ  da neh, tsawˇ haˬ-euˬ dehꞈ ziˇ-ahˇ bi paˇ laˇ nya-eu meh. Teu miˇ neh, Jaˇliꞈ-aˬ maˇ maˇ ni Miˬyehˇ-euˬ dawˬ nga lehˇ, tsawˇ haˬ g’awˬ mya lam g’aˬ jah-eu meh.—1 Teˇsaˬloˇni 2:13-ahˇ gui-awˬ.

Biˬdiˬoˬ haw Jaˇliꞈ Miˬyehˇ jawˇ gaˇ neh oe-euˬ meh lehˇ, aˬ dui aˬ joˆ-ehˇ jah nya-eu nga?

Jaˇliꞈ laꞈ k’oeˇ ahˇ-eu aˇ yehˇ huiˬ-eu gaˇ kawˆ naˇ, Miˬyehˇ tsawˇ haˬ zaˬ-ahˇ gaˬ-awˇ, muiˬ dui dui-eu jeˬ mˇ nehˬ ma lehˇ ehˇ taˬ-euˬ heu meh. K’oeˇ naˇ, nymˇ tsawˇ haˬ zaˬ deuˬ aˬ jeˬ miˇ neh Baˬlaˬdiˇsuˆ-ahˇ maˬ ya jawˇ-eu gaˇ kawˆ hawˇ-eu mehˬ hu paw tsawˇ haˬ zaˬ deuˬ aˬ joˆ-ehˇ jahˇ-awˇ neh, Baˬlaˬdiˇsuˆ muiˬ-eu jawˇ duˬ-ahˇ paˇ ya jawˇ k’oꞈ-eu gaˇ kawˆ heu deuˬ ahˇ-eu meh.—Pah mehˬ-eu 21:4, 5-ahˇ gui-awˬ.

Jaˇliꞈ laꞈ k’oeˇ, zahˇ dawˬ k’oꞈ dawˬ, dawˬ mehˬ dawˬ tsoˆ, Jaˇliꞈ zahˇ lehˇ ahˇ-eu meh. K’oeˇ naˇ Miˬyehˇ, aˇ hu ba-euˬ tsawˇ haˬ deuˬ nehˬ-ehˇ, cawˬ cawˬ taꞈ-euˬ gaˇ haw ngeh, aˬ yawꞈ-euˬ nui noeˬ nui duˇ, aˬ joˆ-ehˇ g’eh-eu lehˇ, aˬ dui ya siˬ nya-euˬ ma. Teu miˇ neh Jaˇliꞈ-aˬ, nawˇ Miˬyehˇ-ahˇ siˬ nya laˇ ni caw ba nehˬ nya-eu meh. Nawˇ aˬ yawꞈ-euˬ cawˬ pyeuꞈ laˇ nya ni aˬ joˆ-ehˇ ya jahˇ-eu lehˇ Jaˇliꞈ laꞈ koeˇ ehˇ nehˬ taˬ-euˬ meh.—Ja ceuˬ 19:7, 11; Yaˬkoˆ 2:23; 4:8-ahˇ gui-awˬ.

Nawˇ Jaˇliꞈ-ahˇ g’oˆ shaw nya ni, paˇ dmˬ heu dmˬ nawˬ-ahˇ caw ba nya-eu meh. Yeˬsuˇ Jaˇliꞈ aˇ deuˆ k’aˇ gui ngeh, dawˬ tsuiꞈ yaw naꞈ deuˬ-ahˇ puiˇ k’awˬ nehˬ-euˬ loꞈ-ehˇ, paˇ dmˬ heu dmˬ k’awꞈ, “Jaˇliꞈ aˇ deuˆ dawˬ tsuiꞈ” deuˬ-ahˇ, siˬ nya laˇ ni caw ba nya-eu meh.—Luˇkaꞈ 24:27, 45-ahˇ gui-awˬ.

Miˬyehˇ jawˇ gaˇ neh oe-euˬ muiˬ-eu gaˇ kawˆ naˇ, yaw-ehˇ muiˬ-eu tiˬ jeˬ pyeuꞈ-eu meh. Ehˇ k’awꞈ tsawˇ haˬ myaˬ ni, maˬ ha geuꞈ mawꞈ-a. Tsawˇ haˬ tiˬ deuˬ na maˬ ya leˇ-a. Ehˇ k’awꞈ nui ma g’aˬ taˬ baˬ. Nawˇ dehꞈ ziˇ za-eu g’aˇ duˬ-aˬ, Miˬyehˇ-ahˇ siˬ nya-eu hawˇ-eu maˬ siˬ nya-eu gaˇ iˇ-eu tehꞈ meh.—Yoˇhaˬ 17:3-ahˇ gui-awˬ.