Miˬyehˇ Miˇ k’ahˬ heu naˇ, mˬ k’oeˇ taˆ jawˇ-eu uˆ lahˇ-eu aˇ maꞈ-ahˇ ehˇ-eu meh. Uˆ lahˇ-eu aˇ maꞈ heu naˇ, miˇ tsaˬ k’oeˇ taˆ uˆ lahˇ luꞈ-eu deuˬ-ahˇ laˆ cawˆ le-awˇ, Miˬyehˇ-euˬ nui noeˬ mˬ k’oeˇ taˆ byah-eu loꞈ-ehˇ, miˇ tsaˬ k’oeˇ taˆ k’awꞈ byah laˇ ni mˇ nehˬ le-eu meh. Gaˇ kawˆ heu naˇ, yaw-ehˇ muiˬ-eu tiˬ jeˬ pyeuꞈ meh. G’awˬ myahˇ maˬ g’eh-ehˇ, Miˬyehˇ-euˬ uˆ lahˇ-eu aˇ maꞈ miˇ tsaˬ k’oeˇ taˆ uˆ lahˇ le-awˇ, tsawˇ haˬ zaˬ k’aˇ loˬ-eu jeˬ-ahˇ mˇ nehˬ le-eu meh. K’oeˇ naˇ tsawˇ haˬ zaˬ dawˬ tawˆ luꞈ tsaˬ leˇ dzoeˇ leˇ jiˇ-awˇ, mehˬ bawˬ gm laˇ jiˇ-eu meh.—Daˬyeˬlaˇ 2:44; Maꞈtehˬ 6:9, 10; 24:14-ahˇ gui-awˬ.

Uˆ lahˇ-eu aˇ maꞈ laꞈ k’oeˇ, aˬ yuiꞈ tiˬ g’aˬ ya jawˇ meh. Teu miˇ neh, Yeˬhawˇbaˬ Miˬyehˇ uˆ lahˇ-eu aˇ maꞈ laꞈ k’oeˇ Sahˬ paˬ bi geuꞈ-eu g’aˇ duˬ, Zaˬmaˇ Yeˬsuˇ-ahˇ tseˇ-euˬ meh.—Pah mehˬ-eu 11:15-ahˇ gui-awˬ.

Biˬdiˬoˬ haw Miˬyehˇ Miˇ k’ahˬ heu, aˬ jeˬ-ahˇ ehˇ mawꞈ-eu nga?

Aˬ jeˬ miˇ neh ehˇ naˇ, Miˬyehˇ-euˬ Zaˬmaˇ-aˬ, g’awˬ shaˬ gaˬ-eu jeˬ ahˇ-awˇ, yaw tsaˬ yaw dawˇ jeˬ-ahˇ ziꞈ dah ni tuˆ tehˬ taˬ-euˬ miˇ neh meh. (Maꞈtehˬ 11:28-30) K’oeˇ naˆ maˬ tseˇ Yeˬsuˇ-aˬ mˬ k’oeˇ taˆ jawˇ-awˇ, miˇ tsaˬ zaˬ-ahˇ uˆ lahˇ-eu baˬ da neh, tsawˇ haˬ zaˬ-ahˇ caw ba nehˬ-eu baoˬ yaw shehꞈ tiˬ byah ni ahˇ-eu meh. Yeˬsuˇ g’oꞈ dehꞈ laˇ g’aˬ naˇ, mˬ k’oeˇ taˆ daˆ leˇ-awˇ, Yeˬhawˇbaˬ-euˬ aˇ maˇ paw nuiˇ-awˇ neh, uˆ lahˇ-eu baoˬ biꞈ nehˬ laꞈ gaˇ dawˬ luꞈ meh. (Heˬbyehˇ 10:12, 13) K’oeˇ naˇ, aˇ saˬ saˬ leˇ ngeh, Miˬyehˇ Yeˬsuˇ-ahˇ uˆ lahˇ-eu baoˬ biꞈ nehˬ-eu meh.—Daˬyeˬlaˇ 7:13, 14-ahˇ gui-awˬ.

“Miˬyehˇ-euˬ tsawˇ haˬ [‘Yaw muiˬ yaw shawˇ tsawˇ haˬ,’ MS]” lehˇ kuˇ-eu aˇ muˇ tiˬ muˇ, mˬ k’oeˇ taˆ Yeˬsuˇ nehˬ-ehˇ tiˬ kawˆ loꞈ-ehˇ uˆ lahˇ tehꞈ-a. (Daˬyeˬlaˇ 7:27) Yaw muiˬ yaw shawˇ aˇ maꞈ aˇ muˇ laꞈ k’oeˇ neh, tseˇ doˆ beh beh-euˬ deuˬ naˇ, Yeˬsuˇ-ahˇ saˇ jaˇ ziꞈ-eu g’aˬ  k’ehˇ deuˬ meh. Saˇ jaˇ ziꞈ-eu aˬ buˇ aˬ li yaw muiˬ yaw shawˇ deuˬ-ahˇ, Yeˬhawˇbaˬ iˬ nah keuˆ ni tseˇ luꞈ meh. Aˬ yawꞈ maꞈ k’awꞈ Yeˬsuˇ loꞈ-ehˇ, saꞈ laˇ g’awˇ mawˇ neh g’oꞈ dehꞈ laˇ-eu meh.—Yoˇhaˬ 14:1-3; 1 Gawˇliˬtu 15:42-44-ahˇ gui-awˬ.

Mˬ k’oeˇ taˆ aˇ myaˆ g’aˬ ya le-eu nga? Yeˬsuˇ heu deuˬ-ahˇ “nyiˇ dui dui-eu [‘cuiˆ-eu,’ MS] yawˇ yawˇ maꞈ” lehˇ kuˇ-eu meh. (Luˇkaꞈ 12:32) Aˬ yawꞈ maꞈ 144,000 g’aˬ byah-awˇ, Yeˬsuˇ nehˬ-ehˇ tiˬ kawˆ loꞈ-ehˇ miˇ tsaˬ heu siˬ-ahˇ uˆ lahˇ-eu meh.—Pah mehˬ-eu 14:1-ahˇ gui-awˬ.

1914 k’oꞈ-ahˇ neh, Miˬyehˇ Miˇ k’ahˬ dahˬ beh-euˬ meh. Yeˬsuˇ Sahˬ paˬ pyeuꞈ laˇ-awˇ, mˇ dahˬ beh-euˬ gaˇ nga lehˇ ngeuˇ naˇ, Saˬdaˬ hawˇ-eu aˬ yawꞈ-euˬ g’aˬ k’ehˇ deuˬ-ahˇ, miˇ tsaˬ k’oeˇ taˆ teh ka leꞈ-euˬ meh. Teu miˇ neh Saˬdaˬ nui ma pehˇ dui dui-awˇ, miˇ k’ahˬ doe ni tsawˇ haˬ zaˬ-ahˇ laˆ cawˆ-eu g’aˇ duˬ, leh jeh luꞈ meh. (Pah mehˬ-eu 12:7-10, 12) K’oeˇ gaˇ neh taꞈ naˇ, shaˬ-eu zahˬ-eu jeˬ myaˬ laˇ behˇ laˇ-euˬ meh. Guiˇ deuˆ-eu, mehꞈ-eu shuꞈ-eu, naˇ-eu gawˇ-eu, miˇ luˆ luˆ-eu gaˇ kawˆ heu deuˬ naˇ, Miˬyehˇ Miˇ k’ahˬ keuˆ le shaw-iˬ meh lehˇ, “bi siˬ” nehˬ laꞈ-eu jeˬ pyeuꞈ meh.—Luˇkaꞈ 21:7, 10, 11, 31-ahˇ gui-awˬ.

Miˬyehˇ Miˇ k’ahˬ, miˇ tsaˬ doe ni dawˬ mehˬ mehˬ-eu gaˇ heu neh, tsawˇ jeuˬ tsawˇ ca dawˬ tawˆ luꞈ-ahˇ, tiˬ gaˇ bi uiˬ laˇ luꞈ meh. Nui ma nahˬ yu ni g’eh-eu tsawˇ haˬ yaw myaˬ lam g’aˬ, Yeˬsuˇ uˆ lahˇ-eu uꞈ moˆ jawˇ laˇ luꞈ meh. Miˬyehˇ Miˇ k’ah maˬ muiˬ-eu yaw doeˇ deuˬ-ahˇ laˆ cawˆ le ngeh, aˬ yawꞈ maꞈ-ahˇ naˇ, uˆ kaˬ uˆ lahˇ nehˬ-eu meh. Teu miˇ neh, Miˬyehˇ Miˇ k’ahˬ-ahˇ neh muiˬ-eu jeˬ za mawꞈ naˇ, Yeˬsuˇ-euˬ dawˬ-ahˇ naˇ haˬ-eu tsawˇ haˬ ya pyeuꞈ meh.—Pah mehˬ-eu 7:9, 14, 16, 17-ahˇ gui-awˬ.

Yeˬsuˇ uˆ lahˇ-eu 1,000 k’oꞈ laꞈ k’oeˇ, yaw beh Miˬyehˇ neh tsawˇ haˬ zaˬ deuˬ-euˬ g’aˇ duˬ noeˬ taˬ-euˬ jeˬ-ahˇ, pyeuꞈ leˇ ni mˇ nehˬ-eu meh. Miˇ tsaˬ heu siˬ Baˬlaˬdiˇsuˆ pyeuꞈ k’oꞈ laˇ meh. Aˇ saˬ saˬ leˇ ngeh, Yeˬsuˇ Miˬyehˇ Miˇ k’ahˬ heu, aˬ yawꞈ-euˬ Aˬda-ahˇ biꞈ k’oꞈ nehˬ-eu meh. (1 Gawˇliˬtu 15:24-26) Nawˇ tiˬ g’aˬ na-ahˇ Miˬyehˇ Miˇ k’ahˬ gaˇ kawˆ, maˬ ja nehˬ mawꞈ nya loˇ?—Ja ceuˬ 37:10, 11, 29-ahˇ gui-awˬ.