Yeˬhawˇbaˬ miˇ tsaˬ-ahˇ tsawˇ haˬ zaˬ bi jawˇ-eu lehˇ beh-euˬ meh. Aˬdaˬ hawˇ-eu Eˇbaˆ-ahˇ, mˬ k’oeˇ taˆ bi jawˇ-eu lehˇ beh-euˬ maˬ ngeuˇ-a. Mˬ naˇ, mˬ taˆ g’aˬ k’ehˇ bi jawˇ-eu lehˇ beh-euˬ meh. (Yawˇbaˆ 38:4, 7) Teu miˇ neh, Miˬyehˇ dahˬ beh-euˬ k’aˬ dzeˇ zaˬ g’aˬ-ahˇ, muiˬ-eu jawˇ duˬ Eˬdeˬ yaˇ kmˇ-ahˇ bi jawˇ-euˬ meh. (Aˇdahˬbeh-eu 2:15-17) Yeˬhawˇbaˬ Aˬdaˬ hawˇ-eu aˬ yawꞈ-euˬ oeˬ paˬ oeˬ ma deuˬ-ahˇ, miˇ tsaˬ k’oeˇ taˆ mˬ maˬ maˬ byaˆ zaˇ ziˇ byawˬ byawˬ-ehˇ dehꞈ-eu aˬ kawˬ-aˬ biꞈ nehˬ-euˬ meh.—Ja ceuˬ 37:29; 115:16-ahˇ gui-awˬ.

Aˇ dahˬ beh ngeh, Eˬdeˬ yaˇ kmˇ maˬ ngeuˇ naˇ muiˬ-eu jawˇ duˬ maˬ jaˆ. Miˇ tsaˬ k’oeˇ taˆ aˬ nyaꞈ dzeˇ zaˬ-euˬ oeˬ paˬ oeˬ ma ya bi byah laˇ-eu meh. K’oeˇ naˇ, aˬ yawꞈ maꞈ miˇ k’ahˬ dawˬ tawˆ luꞈ-ahˇ uˆ lahˇ-awˇ, muiˬ-eu jawˇ duˬ pyeuꞈ laˇ ni, aˬ yawꞈ maꞈ ya mˇ-eu meh. (Aˇdahˬbeh-eu 1:28) Miˇ tsaˬ heu siˬ tiˬ jawˇ-iˬ maˬ cawˆ iˇ-a, mˬ maˬ maˬ byaˆ zaˇ ziˇ tsawˇ haˬ zaˬ-euˬ jawˇ duˬ pyeuꞈ-eu meh.—Ja ceuˬ 104:5-ahˇ gui-awˬ.

Biˬdiˬoˬ haw Miˬyehˇ miˇ tsaˬ-ahˇ aˬ jeˬ miˇ neh beh-euˬ nga?

Aˬdaˬ hawˇ-eu Eˇbaˆ Yeˬhawˇbaˬ Miˬyehˇ-euˬ dawˬ maˬ naˇ haˬ-eu miˇ neh, Eˬdeˬ yaˇ kmˇ-ahˇ neh bi teh doˆ-euˬ meh. K’oeˇ gaˇ neh naˇ, Baˬlaˬdiˇsuˆ k’awꞈ byoˆ iˇ-awˇ, muiˬ k’oꞈ laˇ ni mˇ nya-eu g’aˬ jiˇ maˬ jawˇ-a. “Haiˬ-eu tsawˇ haˬ-ahˇ miˇ k’ahˬ bi dzaˬ” taˬ-euˬ meh lehˇ, Jaˇliꞈ ehˇ-eu meh.—Yawˇbaˆ 9:24.—Aˇdahˬbeh-eu 3:23, 24-ahˇ gui-awˬ.

Yaw beh Yeˬhawˇbaˬ neh tsawˇ haˬ zaˬ deuˬ-euˬ g’aˇ duˬ, noeˬ taˬ-euˬ jeˬ k’oeˇ byehˇ dzeh mehˬ loˇ? Maˬ byehˇ dzeh-aˬ. Aˬ yawꞈ baoˬ huiˬ-eu Miˬyehˇ miˇ neh, maˬ mˇ pyeuꞈ nya-eu tiˬ jeˬ-iˬ maˬ jaˆ. (Iˇsaˬyaˇ 45:18) Yaw beh aˬ yawꞈ neh noeˬ taˬ-euˬ loꞈ-ehˇ, paˇ ya pyeuꞈ k’oꞈ laˇ tehꞈ-a.—Ja ceuˬ 37:11, 34-ahˇ gui-awˬ.

Miˬyehˇ neh tseˇ doˆ-euˬ, Sahˬpaˬ Yeˬsuˇ uˆ lahˇ le ngeh, miˇ tsaˬ heu siˬ Baˬlaˬdiˇsuˆ pyeuꞈ k’oꞈ laˇ meh. Aˬmaˬgeˬdoˬ lehˇ kuˇ-eu guiˇ  heu hmˬ mˇ ngeh, Yeˬsuˇ mˬ taˆ g’aˬ k’ehˇ sheuˬ-awˇ, Miˬyehˇ-ahˇ muiˇ-eu deuˬ-ahˇ laˆ cawˆ le meh. K’oeˇ naˇ, Yeˬsuˇ Saˬdaˬ-ahˇ nyehꞈ-awˇ 1,000 k’oꞈ paꞈ tawꞈ taˬ-eu meh. Miˬyehˇ-euˬ tsawˇ haˬ deuˬ naˇ, Yeˬsuˇ laˆ piˇ nehˬ-eu baˬ da neh, laˆ cawˆ-eu jeˬ-ahˇ neh buˬ iˇ-awˇ, muiˬ-eu jawˇduˬ miˇ tsaˬ k’oeˇ taˆ laꞈ k’aˬ tiˬ cehˇ ya dehꞈ g’eh meh.—Pah mehˬ-eu 20:1-3; 21:3, 4-ahˇ gui-awˬ.

Miˬyehˇ maˬ muiˬ-eu jeˬ-ahˇ, aˇ myah laˆ byoˆ jiˇ-eu nga? Aˇ saˬ saˬ yamˬ keuˆ le shaw-iˬ meh lehˇ “bi siˬ” nya-eu g’aˇ duˬ, gaˇ kawˆ yaw myaˬ jeˬ-ahˇ, Yeˬsuˇ toeˬ mehˬ taˬ yaꞈ-euˬ meh. Nymˇ pyeuꞈ luꞈ-eu gaˇ kawˆ heu deuˬ, aˬ dui maꞈ “aˇ saˬ saˬ-eu” aˇ yamˬ laꞈ k’oeˇ jawˇ luꞈ meh lehˇ, toeˬ mehˬ nehˬ-eu jeˬ pyeuꞈ meh.—Maꞈtehˬ 24:3, 7-14, 21, 22-ahˇ gui-awˬ.

Yeˬsuˇ mˬ k’oeˇ taˆ neh miˇ tsaˬ heu siˬ-ahˇ, 1,000 k’oꞈ uˆ lahˇ-eu aˇ yamˬ laꞈ k’oeˇ, shaˬ-eu zahˬ-eu jeˬ byoˆ iˇ jiˇ tehꞈ-a. (Iˇsaˬyaˇ 9:6, 7; 11:9) Yeˬsuˇ-aˬ, Sahˬpaˬ k’awꞈ ngeuˇ, Piˇma yaw huiˬ k’awꞈ ngeuˇ meh. Teu miˇ neh, Miˬyehˇ-ahˇ gaˬ-eu tsawˇ haˬ deuˬ-euˬ iˬ baˇ-ahˇ, bi buˬ bi law iˇ nya-eu meh. K’oeˇ naˇ, Miˬyehˇ Yeˬsuˇ-ahˇ g’oe-awˇ, naˇ-eu gawˇ-eu, mawˬ iˇ-eu, shiˇ-eu jeˬ,heu deuˬ-ahˇ laˆ byoˆ jiˇ nehˬ-eu meh. Iˇsaˬyaˇ 25:8; 33:24-ahˇ gui-awˬ.

Miˬyehˇ ehˇ dawˬ naˇ haˬ-eu deuˬ ya jawˇ-eu meh. (1 Yoˇhaˬ 2:17) Nui ma nahˬ yu ni g’eh-eu deuˬ-ahˇ poˆ iˇ-awˇ, Miˬyehˇ nui ma tsaˬ-eu jeˬ-ahˇ bi mˇ-eu g’aˇ duˬ mehˬ nehˬ iˇ-awˬ lehˇ, Yeˬsuˇ aˬ yawꞈ-euˬ g’aˬ k’ehˇ deuˬ-ahˇ k’ehˇ g’eh-euˬ meh. Nymˇ iˬ nah tsawˇ haˬ yaw myaˬ lam g’aˬ, mehˬ hu paw Baˬlaˬdiˇsuˆ-ahˇ bi jawˇ-eu g’aˇ duˬ, Yeˬhawˇbaˬ lehˬ hmˬ luꞈ meh. (Zeˬpaˬniˇ 2:3) Yeˬhawˇbaˬ Saˇ kiˇ-euˬ Miˬyehˇ Miˇ k’ahˬ Bawˬ dzaˬ nymˇ laꞈ k’oeˇ, muiˬ-eu aˬ da aˬ ma pyeuꞈ nya-eu g’aˇ duˬ, dzaw geuꞈ luꞈ meh. Zaˬ hawˇ-eu aˬ da aˬ ma tiˬ kawˆ loꞈ-ehˇ guiˬ lahˬ shaˇ-awˇ, Jaˇliꞈ laꞈ k’oeˇ-euˬ zaˬ siˬ nui gahˇ deuˬ za nya ni, dzaw geuꞈ luꞈ-eu meh.—Miˇkaˬ 4:1-4-ahˇ gui-awˬ.