Miˬyehˇ tsawˇ haˬ zaˬ-ahˇ, miˇ tsaˬ k’oeˇ taˆ yaw byawˬ byawˬ lehˇ bi jawˇ mawꞈ-eu meh. Miˇ tsaˬ hawˇ-eu yawˬ jeˬ na luꞈ-ahˇ beh-euˬ heu naˇ, tsawˇ haˬ zaˬ-ahˇ gaˬ-eu miˇ neh meh. G’awˬ myahˇ maˬ g’eh-ehˇ, Miˬyehˇ tsawˇ haˬ zaˬ deuˬ-euˬ dehꞈ ziˇ muiˬ daˆ laˇ ni lehˬ hmˬ taˬ-euˬ meh. Tsawˇ haˬ-ahˇ bi suˬ saˬ luꞈ-eu gaˇ kawˆ heu deuˬ-ahˇ k’awꞈ, Miˬyehˇ laˆ cawˆ jiˇ meh.—Yeˬlaˬmiˇ 29:11-ahˇ gui-awˬ.

Miˇ tsaˬ-ahˇ uˆ lahˇ-eu aˬ yuiꞈ deuˬ aˇ naˆ ni leh jeh k’awꞈ, shiˇ-eu, naˇ-eu, shaˬ-eu zahˬ-eu jeˬ-ahˇ, maˬ laˆ byoˆ nehˬ nya. Ehˇ k’awꞈ muiˬ-eu gaˇ kawˆ jaˆ meh. G’awˬ myahˇ maˬ g’eh-ehˇ, Miˬyehˇ miˇ tsaˬ k’oeˇ taˆ uˆ lahˇ luꞈ-eu deuˬ-ahˇ laˆ cawˆ jiˇ-awˇ, Miˬyehˇ uˆ lahˇ le ma lehˇ ehˇ taˬ-euˬ meh. Miˬyehˇ uˆ lahˇ-eu uꞈ moˆ jawˇ-eu deuˬ naˇ, zaˬ muiˬ jawˇ saˇ doˆ-awˇ, nui saˇ oꞈ-eu jeˬ za meh.—Iˇsaˬyaˇ 25:8; 33:24; Daˬyeˬlaˇ 2:44-ahˇ gui-awˬ.

Miˇ tsaˬ k’oeˇ taˆ tsawˇ haˬ yaw haiˬ yaw doeˇ deuˬ-ahˇ, laˆ cawˆ jiˇ-awˇ neh tehꞈ-ehˇ, shaˬ-eu zahˬ-eu jeˬ byoˆ iˇ jiˇ-eu meh. (Zeˬpaˬniˇ 2:3) Miˬyehˇ aˇ myah laˆ cawˆ-eu nga? Nymˇ tsawˇ haˬ zaˬ suˬ saˬ luꞈ-eu gaˇ kawˆ heu deuˬ, Jaˇliꞈ laꞈ k’oeˇ ehˇ dzeuˇ taˬ-euˬ meh. Nymˇ miˇ tsaˬ k’oeˇ taˆ pyeuꞈ luꞈ-eu gaˇ kawˆ heu deuˬ, yaw haiˬ yaw doeˇ deuˬ-ahˇ, laˆ cawˆ-eu aˇ yamˬ tsaˬ laˇ shaw-iˬ meh lehˇ, toeˬ mehˬ-eu jeˬ pyeuꞈ-eu meh.—2 Tiˆmoˇseˬ 3:1-5-ahˇ gui-awˬ.

Jaˇliꞈ-a, Miˬyehˇ-euˬ dawˬ meh. Jaˇliꞈ laꞈ k’oeˇ neh Miˬyehˇ-euˬ gaˇ kawˆ-ahˇ dzaw-eu loˬ meh. Jaˇliꞈ-aˬ, gaˬ-eu aˬ da neh biꞈ leꞈ-euˬ sahˬ boꞈ tiˬ taꞈ-ahˇ duˇ-eu meh. Jaˇliꞈ dzaw naˇ, aˬ dui-euˬ dehꞈ ziˇ muiˬ daˆ laˇ ni, aˬ joˆ-ehˇ ya jahˇ-eu lehˇ siˬ nya laˇ-awˇ, mehˬ hu paw dehꞈ-eu jeˬ za ni aˬ joˆ-ehˇ ya jahˇ-eu lehˇ k’awꞈ siˬ nya laˇ-eu meh. Tiˬ deuˬ na-aˬ, nawˇ Jaˇliꞈ dzaw gaˇ maˬ ya leˇ-eu jiˇ jawˇ tehꞈ-a. Ehˇ k’awꞈ teu deuˬ baˬ da neh, Miˬyehˇ dawˬ kawˬ dzaw-eu jeˬ-ahˇ taˬ byehˇ dzeh, nawˬ-euˬ g’aˇ duˬ mehˬ hu paw muiˬ dui dui-eu jeˬ jaˆ-eu meh lehˇ, Miˬyehˇ saˇ jaˇ dzaˬ taˬ-euˬ meh.—Dawˬdaˬ 29:25; Pah mehˬ-eu 14:6, 7-ahˇ gui-awˬ.