Laꞈ k’aˬ cehˇ-eu Miˬyehˇ Yeˬhawˇbaˬ jawˇ gaˇ neh oe-euˬ muiˬ-eu gaˇ kawˆ tiˬ hmˬ naˇ, nymˇ jiˇ yawˬ jiˇ na luꞈ-ahˇ laꞈ k’aˬ bi cehˇ mawꞈ-eu gaˇ kawˆ meh. (1 Tiˆmoˇseˬ 1:11) Nymˇ jiˇ-ahˇ aˇ dahˬ beh-euˬ g’aˬ Miˬyehˇ meh. Miˇ k’ahˬ-euˬ zahˇ k’aˇ jaˆ-eu loꞈ-ehˇ laꞈ ma dehˬ-eu heu naˇ, zaˬ deuˬ-euˬ g’aˇ duˬ gaˇ dahˇ tsoeˬ-awˇ, nymˇ jiˇ laꞈ k’oeˇ k’awꞈ laꞈ k’aˬ cehˇ-eu meh. Teu miˇ neh, Ka li zaˬ deuˬ oeˇ mˇ baˇ dzaˬ ngeh laꞈ ma dehˬ-eu loˬ meh.—Luˇkaꞈ 2:1, 4, 5-ahˇ gui-awˬ.

Oeˇ mˇ baˇ dzaˬ-eu jeˬ-ahˇ, Miˬyehˇ aˬ jeˬ lehˇ noeˬ-eu nga? Oeˇ mˇ baˇ dzaˬ dzeuˇ-euˬ yawˬ g’aˬ na luꞈ-ahˇ, Yeˬhawˇbaˬ Miˬyehˇ tiˬ g’aˬ-ahˇ tiˬ g’aˬ saˇ jaˇ ziꞈ-eu laꞈ k’oeˇ, maˬ shiˇ tiˬ ziˇ maˬ g’awˬ iˇ ni bi dehꞈ mawꞈ-eu meh. (Heˬbyehˇ 13:4) K’oꞈ dzeh-eu jeˬ-ahˇ, Miˬyehˇ bye dui dui-eu meh. (Maˬlaˬkiˇ 2:16) Ka li zaˬ-euˬ nymˇ jiˇ-aˬ, aˬ cawˬ nehˬ-ehˇ dehꞈ bahˬ iˇ-euˬ maˬ ngeuˇ taꞈ naˇ, k’oꞈ-awˇ neh yaw shuiꞈ yuˇ paˇ-eu maˬ za.—Maꞈtehˬ 19:3-6, 9-ahˇ gui-awˬ.

Yeˬhawˇbaˬ k’aˬ dzeˇ zaˬ hawˇ-eu miˬ zaˬ-ahˇ beh-euˬ heu naˇ, tiˬ g’aˬ tiˇ g’aˬ bi caw ba-eu lehˇ meh. (Aˇdahˬbeh-eu 2:18) K’aˬ dzeˇ zaˬ naˇ, nymˇ sahˇ aˬ da pyeuꞈ-eu miˇ neh, nymˇ jiˇ laꞈ k’oeˇ k’aˇ loˬ-eu jeˬ-ahˇ, aˬ yawꞈ ya poˆ nehˬ meh. K’oeˇ uˬ taꞈ, Miˬyehˇ-euˬ gaˇ kawˆ k’awꞈ ya mehˬ nehˬ meh. Yawˬ ha-euˬ g’aˇ duˬ tehꞈ-ehˇ maˬ shaˇ noeˬ ni, miˬ zaˬ-ahˇ k’awꞈ ya gaˬ meh. K’aˬ dzeˇ zaˬ hawˇ-eu miˬ zaˬ, tiˬ g’aˬ tiˇ g’aˬ gaˬ-awˇ yaw zeu ya baw meh. Nyiˬ g’aˬ luꞈ maˬ byah kuꞈ-eu miˇ neh lehˬ laˇ nya meh. Teu miˇ neh, nyiˬ g’aˬ luꞈ iˬ baˇ pyehˬ nehˬ-eu jeˬ-ahˇ dzaw geuꞈ naˇ, nymˇ jiˇ laꞈ k’oeˇ laꞈ k’aˬ cehˇ meh.—Eˇpeˇsu 4:31, 32; 5:22-25, 33; 1 Beˬtuˆluˆ 3:7-ahˇ gui-awˬ.

Nymˇ jiˇ laꞈ k’oeˇ gaˇ kawˆ doˆ laˇ ngeh jawˇ, nyiˬ dzeˇ zaˬ luꞈ g’oeˇ-eu gaˬ-eu laꞈ k’oeˇ nui ma jeˇ lo ni taˬ-awˇ, ya ja sawˇ geuꞈ-eu meh. (1 Gawˇliˬtu 13:4, 5) Nymˇ jiˇ laꞈ k’oeˇ doˆ laˇ-euˬ gaˇ kawˆ deuˬ-ahˇ dehˬ lehꞈ-awˇ g’awˬ iˇ gaˇ, Miˬyehˇ g’aˬ maˬ biꞈ-a.—1 Gawˇliˬtu 7:10-13-ahˇ gui-awˬ.

Yeˬhawˇbaˬ zaˬ deuˬ-ahˇ, laꞈ k’aˬ tiˬ cehˇ bi dehꞈ mawꞈ-eu meh. Teu miˇ neh, zaˬ guˬ guˬ ngeh, laꞈ k’aˬ tiˬ cehˇ bi dehꞈ-eu g’aˇ duˬ, muiˬ dzehˬ-eu jeˬ-ahˇ mehˬ nehˬ-eu meh. K’oeˇ naˇ, aˬ da aˬ ma deuˬ-euˬ zaˬ siˬ nui gahˇ hawˇ-eu dehꞈ jeˬ dehꞈ kawˆ-ahˇ neh jiˇ, bi dzaw geuꞈ mawꞈ-eu meh. (Gawˇlawˇsehˇ 3:20) Nawˬ-ahˇ Beh-euˬ Yeˬhawˇbaˬ hawˇ-eu Yeˬsuˇ-euˬ nui ma tsaˬ-eu jeˬ-ahˇ mˇ-eu heu gaˇ neh, nui saˇ bi oꞈ mawꞈ-eu meh.—Dawˬtsoˆtsoˆ-eu 11:9–12:1; Maꞈtehˬ 19:13-15; 21:15, 16-ahˇ gui-awˬ.

Aˬ da aˬ ma deuˬ, zaˬ dzaˬ-eu, dm-eu, jawˇ-eu g’aˇ duˬ, gaˇ mˇ-eu ya leh jeh-eu meh. (1 Tiˆmoˇseˬ 5:8) K’oeˇ tehꞈ-ehˇ maˬ g’aˬ ni, zaˬ deuˬ laꞈ k’aˬ bi cehˇ-eu g’aˇ duˬ, Miˬyehˇ-ahˇ gaˬ-awˇ aˬ yawꞈ-euˬ zaˬ siˬ nui gahˇ-ahˇ dzaw geuꞈ nya ni ya mehˬ nehˬ-eu meh. (Eˇpeˇsu 6:4) Nawˇ Miˬyehˇ-ahˇ gaˬ-eu jeˬ, zaˬ deuˬ-ahˇ mˇ mawˇ nehˬ ngeh, zaˬ deuˬ k’awꞈ mˇ caw mawꞈ laˇ-eu meh. Nawˇ Jaˇliꞈ-ahˇ g’oe-awˇ neh zaˬ-ahˇ mehˬ ngeh, zaˬ-euˬ nui ma laꞈ k’oeˇ yaw tsaˬ yaw dawˇ jeˬ-ahˇ siˬ nya laˇ-eu meh.—Dawˬmehˬmehˬ-eu 6:4-7; Dawˬdaˬ 22:6-ahˇ gui-awˬ.

Zaˬ deuˬ-ahˇ ja ceuˬ-awˇ g’aˬ biꞈ nehˬ-eu heu naˇ, zaˬ-ahˇ gaˇ dahˇ tsoeˬ meh. K’oeˇ naˇ, zaˬ deuˬ-ahˇ mehˬ nehˬ-awˇ laˆ tsaˬ nehˬ-eu loˬ meh. Mehˬ nehˬ tsoˆ nehˬ-eu heu naˇ, zaˬ deuˬ-euˬ laꞈ k’aˬ cehˇ-eu jeˬ-ahˇ maˬ bi cawˆ iˇ ni, laˆ piˇ nehˬ-eu jeˬ pyeuꞈ meh. (Dawˬdaˬ 22:15) Ehˇ k’awꞈ ni zaˬ-ahˇ mehˬ ngeh jawˇ, aˇ dzehˬ dzeuˇ ni taˬ jahˇ.—Gawˇlawˇsehˇ 3:21-ahˇ gui-awˬ.

Aˬ da aˬ ma hawˇ-eu zaˬ deuˬ-ahˇ caw ba nehˬ-eu g’aˇ duˬ, Jaˇliꞈ-ahˇ g’oe-awˇ Yeˬhawˇbaˬ Saˇ kiˇ deuˬ neh yuˇ doˆ taˬ-euˬ paˇ dmˬ yaw myaˬ jeˬ jaˆ ma.—Ja ceuˬ 19:7, 11-ahˇ gui-awˬ.