Yeˬluˇsaˬlehˬ meuˬ Beˬtaˬniˇ pu-ahˇ Yeˬsuˇ oe keuˆ ngeh, aˬ yawꞈ-euˬ cawˬ Laˬzaˬluˇ shiˇ dzeuˇ-euˬ oeˬ nah byah laˇ-euˬ meh. Yeˬsuˇ Maˬliˇ hawˇ-eu Maˬta nehˬ-ehˇ, tiˬ kawˆ loꞈ-ehˇ lmˬ bymˇ-ahˇ iˇ-euˬ meh. Aˬ yawꞈ nyaꞈ naˇ Laˬzaˬluˇ-euˬ aˇ yuiꞈ meh. G’awˬ myahˇ maˬ g’eh-ehˇ, k’oeˇ gaˇ tsawˇ haˬ tiˬ deuˬ uiˬ laˇ-euˬ meh. Nawˇ shaˇ noeˬ haw sheˇ, Yeˬsuˇ Laˬzaˬluˇ-ahˇ laˆ dehꞈ nehˬ ngeh, Maˬliˇ hawˇ-eu Maˬta laꞈ k’aˬ aˇ naˆ ni cehˇ-eu nga?—Yoˇhaˬ 11:21-24, 38-44-ahˇ gui-awˬ.

Shiˇ dzeuˇ-euˬ deuˬ noeˬ tmˬ k’aˇ za meh lehˇ, Maˬta siˬ nya taˬ-euˬ meh. Yeˬhawˇbaˬ shiˇ dzeuˇ-euˬ deuˬ-ahˇ, miˇ tsaˬ k’oeˇ taˆ tiˬ poˆ paˇ bi g’oꞈ dehꞈ laˇ meh lehˇ, aˬ yawꞈ siˬ nya dzeuˇ taˬ-euˬ meh.—Iˇsaˬyaˇ 26:19-ahˇ gui-awˬ.

Miˇ tsaˬ yuˇ-awˇ tsawˇ haˬ-ahˇ beh-euˬ meh. (Aˇdahˬbeh-eu 2:7; 3:19) Shiˇ dzeuˇ-euˬ deuˬ mawˇ do laꞈ k’oeˇ, saꞈ laˇ lehˇ maˬ paˇ jaˆ meh. Tsawˇ haˬ shiˇ naˇ, iˇ nmꞈ gaˇ maˬ paˇ mˇ-eu baˬ da neh, tiˬ jeˬ-iˬ maˬ paˇ shaˇ noeˬ nya meh. Teu miˇ neh, Laˬzaˬluˇ shiˇ dzeuˇ-euˬ gaˇ kawˆ-ahˇ tiˬ jeˬ-iˬ maˬ dzawˇ nehˬ nya. Aˬ jeˬ miˇ neh ehˇ naˇ, shiˇ dzeuˇ-euˬ tsawˇ haˬ tiˬ jeˬ-iˬ maˬ paˇ siˬ nya-euˬ miˇ neh meh.—Ja ceuˬ 146:4; Dawˬtsoˆtsoˆ-eu 9:5, 6, 10-ahˇ gui-awˬ.

Miˬyehˇ shiˇ dzeuˇ-euˬ deuˬ-ahˇ, shiˬ buiˇ lah ma laꞈ k’oeˇ k’ehˬ ngaˇ laˬ? Shiˇ dzeuˇ-euˬ tsawˇ haˬ tiˬ jeˬ-iˬ maˬ paˇ siˬ nya meh lehˇ, Jaˇliꞈ laꞈ k’oeˇ ehˇ taˬ-euˬ meh. Teu miˇ neh, shiˬ buiˇ lah ma jaˆ meh lehˇ mehˬ-eu teu naˇ, Miˬyehˇ-ahˇ ja cawˆ-eu jeˬ pyeuꞈ-eu meh. Shiˬ buiˇ lah ma laꞈ k’oeˇ, tsawˇ haˬ zaˬ-ahˇ k’ehˬ-eu lehˇ ehˇ-eu dawˬ-ahˇ, Miˬyehˇ bye dui dui-eu meh.—Yeˬlaˬmiˇ 7:31-ahˇ gui-awˬ.

Biˬdiˬoˬ haw Shiˇ dzeuˇ-euˬ deuˬ aˬ joˆ-ehˇ pyeuꞈ luꞈ-eu nga?

Shiˇ dzeuˇ-euˬ tsawˇ haˬ dawˬ maˬ ngehˬ nya-eu loꞈ-ehˇ, naˬ bawˇ jiˇ maˬ gaˬ nya. (Ja ceuˬ 115:17) Ehˇ k’awꞈ mˬ taˆ g’aˬ k’ehˇ yaw doeˇ deuˬ, shiˇ dzeuˇ-euˬ k’oeˇ g’aˬ-euˬ aˇ baˇ-ahˇ laˆ duˇ-awˇ neh, tsawˇ haˬ nehˬ-ehˇ dawˬ ngehˬ cawˬ laˇ-eu meh. (2 Beˬtuˆluˆ 2:4) Yeˬhawˇbaˬ Miˬyehˇ shiˇ dzeuˇ-euˬ tsawˇ haˬ deuˬ nehˬ-ehˇ, aˬ geu paw dzeˇ neh maˬ kaˬ, taˬ ngehˬ cawˬ lehˇ ehˇ-eu meh.—Dawˬmehˬmehˬ-eu 18:10, 11 -ahˇ gui-awˬ.

Shiˇ dzeuˇ-euˬ tsawˇ haˬ deuˬ, aˇ lam aˇ lam g’aˬ-ahˇ neh, miˇ tsaˬ k’oeˇ taˆ paˇ ya g’oꞈ dehꞈ laˇ meh. Miˬyehˇ-ahˇ maˬ ya siˬ nya ni, maˬ muiˬ-eu jeˬ-ahˇ mˇ-awˇ shiˇ-euˬ deuˬ k’awꞈ, tiˬ poˆ paˇ ya g’oꞈ dehꞈ laˇ meh.—Luˇkaꞈ 23:43; G’aˬk’ehˇ 24:15-ahˇ gui-awˬ.

Shiˇ-awˇ g’oꞈ dehꞈ laˇ-eu deuˬ-aˬ, Miˬyehˇ nehˬ-ehˇ taꞈ-eu yaw tsaˬ yaw dawˇ jeˬ-ahˇ dzaw geuꞈ-awˇ, Yeˬsuˇ ehˇ dawˬ naˇ haˬ-eu laꞈ k’oeˇ, aˬ yawꞈ-ahˇ jah ma lehˇ mˇ mawˇ-eu aˬ kawˬ-aˬ za meh. (Pah mehˬ-eu 20:11-13) Shiˇ-awˇ g’oꞈ dehꞈ laˇ-euˬ deuˬ, Miˬyehˇ nui ma tsaˬ-eu jeˬ-ahˇ mˇ naˇ, miˇ tsaˬ heu siˬ k’oeˇ taˆ, mˬ maˬ maˬ byaˆ zaˇ ziˇ ya dehꞈ meh.—Yoˇhaˬ 5:28, 29-ahˇ gui-awˬ.

Miˬyehˇ neh, Zaˬmaˇ Yeˬsuˇ-ahˇ bi shiˇ dah le-euˬ heu naˇ, shiˇ dzeuˇ-euˬ deuˬ-euˬ g’aˇ duˬ noeˬ tmˬ-eu jeˬ jaˆ laˇ-euˬ meh. Shiˇ dzeuˇ-euˬ deuˬ-ahˇ bi g’oꞈ dehꞈ laˇ-eu heu naˇ, Yeˬhawˇbaˬ tsawˇ haˬ zaˬ-ahˇ, g’awˬ shaˬ aˇ naˆ ni gaˬ-eu nga lehˇ ya siˬ nya-eu meh. Shiˇ dzeuˇ-euˬ deuˬ g’oꞈ dehꞈ laˇ ngeh, nawˇ aˬ suˇ g’aˬ-ahˇ jeˬ hu mawˇ mawꞈ nya?—Yoˇhaˬ 3:16; Loˇmaˆ 6:23-ahˇ gui-awˬ.