Yeˬsuˇ miˇ tsaˬ k’oeˇ taˆ maˬ dehꞈ le-euˬ mi na-ehˇ, mˬ k’oeˇ taˆ yaw sahˇ-euˬ g’awˇ mawˇ neh dehꞈ luꞈ-eu meh. Teu miˇ neh, Yeˬsuˇ tsawˇ haˬ zaˬ deuˬ nehˬ-ehˇ beu gaˇ-eu meh. (Yoˇhaˬ 8:23) Yeˬsuˇ-aˬ, Miˬyehˇ neh beh dahˬ beh-euˬ g’aˬ pyeuꞈ-awˇ, Miˬyehˇ yawˬ jeˬ yawˬ-ahˇ beh ngeh, aˬ yawꞈ caw ba nehˬ-euˬ meh. Yeˬhawˇbaˬ Miˬyehˇ-euˬ aˬ laꞈ neh toeˬ ciˆ-awˇ beh-euˬ g’aˬ, Yeˬsuˇ tiˬ g’aˬ tehꞈ-ehˇ pyeuꞈ-eu miˇ neh, aˬ yawꞈ-ahˇ “Zaˬmaˇ tiˬ g’aˬ tehꞈ” lehˇ kuˇ-eu geuˇ meh. (Yoˇhaˬ 1:14) Yeˬsuˇ-aˬ, Miˬyehˇ-euˬ g’aˇ duˬ ngehˬ dah-eu g’aˬ pyeuꞈ-eu miˇ neh, aˬ yawꞈ-ahˇ “Dawˬ” lehˇ k’awꞈ kuˇ-eu meh.—Dawˬdaˬ 8:22, 23, 30; Gawˇlawˇsehˇ 1:15, 16-ahˇ gui-awˬ.

Miˬyehˇ aˬ yawꞈ-euˬ Zaˬmaˇ-ahˇ, Yuˇdaˆ tsawˇ haˬ zaˬ miˬ yaw shawˇ Maˬliˇ uꞈ maˆ laꞈ k’oeˇ dawˆ ahˇ nehˬ-awˇ, bi dehꞈ le-euˬ meh. K’oeˇ miˇ neh Yeˬsuˇ-aˬ, shiˬ shaˬ jiˇ-euˬ aˬ da lehˇ maˬ baw-a. (Luˇkaꞈ 1:30-35) Yeˬsuˇ miˇ tsaˬ k’oeˇ taˆ ya oe-euˬ gaˇ kawˆ -aˬ, (1) Miˬyehˇ nehˬ-ehˇ taꞈ leˇ-eu yaw tsaˬ yaw dawˇ jeˬ-ahˇ mehˬ nehˬ-eu g’aˇ duˬ meh. (2) Shaˬ-eu zahˬ-eu jeˬ puˬ le k’awꞈ, Miˬyehˇ nui ma tsaˬ-eu jeˬ mˇ nya meh lehˇ, mˇ mawˇ nehˬ le-euˬ meh. (3) Byah kuꞈ-eu g’awˇ mawˇ iˬ baˇ zaˬ deuˬ-euˬ g’aˇ duˬ, “ka k’oꞈ” le-euˬ meh.—Maꞈtehˬ 20:28-ahˇ gui-awˬ.

Ka k’oꞈ-eu jeˬ heu naˇ, tsawˇ haˬ tiˬ g’aˬ shiˇ-eu jeˬ-ahˇ neh maˬ bi shiˇ ni, zeuˇ k’oꞈ-eu aˇ poeˬ-ahˇ ehˇ-eu meh. (Doˆ-iˇ-eu 21:29, 30) Miˬyehˇ-euˬ nui noeˬ naˇ, tsawˇ haˬ zaˬ-ahˇ heu loꞈ-ehˇ bi mawˬ iˇ-awˇ, bi shiˇ-eu lehˇ beh-euˬ maˬ ngeuˇ-a. Aˬ dui aˬ joˆ-ehˇ siˬ nya-eu nga? “Iˬ baˇ” lehˇ ehˇ-eu jeˬ-ahˇ mˇ naˇ ya shiˇ meh lehˇ, Aˬdaˬ-ahˇ Miˬyehˇ ehˇ nehˬ-euˬ meh. Aˬdaˬ iˬ baˇ maˬ mˇ law nmˇ-aˬ, maˬ ya shiˇ-a. (Aˇdahˬbeh-eu 2:16, 17; 5:5) Jaˇliꞈ laꞈ k’oeˇ ehˇ-eu, Aˬdaˬ baˬ da neh tsawˇ haˬ zaˬ yawˬ g’aˬ na luꞈ shiˇ-eu jeˬ “keuˆ le-euˬ”meh. Aˬdaˬ aˬ yawꞈ-euˬ oeˬ paˬ oeˬ ma deuˬ-ahˇ, shiˇ-eu jeˬ biˇ, biꞈ taˬ yaꞈ-euˬ meh. Teu baˬ da  neh, shiˇ-eu jeˬ-ahˇ neh law iˇ-eu g’aˇ duˬ, ka k’oꞈ-eu aˇ poeˬ loˬ-eu meh.—Loˇmaˆ 5:12; 6:23-ahˇ gui-awˬ.

Aˬ suˇ g’aˬ ka k’oꞈ nehˬ nya-eu nga? Aˬ dui shiˇ ngeh iˬ baˇ-euˬ g’aˇ duˬ lawˇ nehˬ-eu aˇ poeˬ pyeuꞈ-eu meh. K’oeˇ miˇ neh, iˬ baˇ zaˬ cawˬ cawˬ maˬ ka k’oꞈ nehˬ nya.—Ja ceuˬ 49:7-9-ahˇ gui-awˬ.

Yeˬsuˇ aˬ dui nehˬ-ehˇ maˬ duˇ leˇ-eu heu naˇ, byah kuꞈ-eu g’aˬ pyeuꞈ-eu miˇ neh meh. Yeˬsuˇ tiˬ jawˇ-iˬ, iˬ baˇ maˬ mˇ haw-euˬ miˇ neh, aˬ yawꞈ-euˬ g’aˇ duˬ shiˇ dah-eu maˬ loˬ-a. Aˬ cawˬ-euˬ g’aˇ duˬ shiˇ dah le-euˬ jeˬ pyeuꞈ-eu meh. Miˬyehˇ tsawˇ haˬ zaˬ-ahˇ gaˬ-eu miˇ neh, aˬ yawꞈ-euˬ Zaˬmaˇ bi shiˇ dah le-euˬ meh. Yeˬsuˇ k’awꞈ aˬ dui maꞈ-ahˇ gaˬ-eu miˇ neh, aˬ yawꞈ-euˬ Aˬda k’ehˇ-eu loꞈ-ehˇ, aˬ dui-euˬ g’aˇ duˬ shiˇ dah le-euˬ meh.—Yoˇhaˬ 3:16; Loˇmaˆ 5:18, 19-ahˇ gui-awˬ.

Biˬdiˬoˬ haw Yeˬsuˇ aˬ jeˬ miˇ neh ya shiˇ-eu nga?

Yeˬsuˇ miˇ tsaˬ k’oeˇ taˆ jawˇ ngeh, naˇ-eu gawˇ-eu deuˬ-ahˇ laˆ saˆ nehˬ-awˇ, shiˇ-euˬ deuˬ-ahˇ k’awꞈ bi g’oꞈ dehꞈ laˇ-euˬ meh. K’oeˇ naˇ, shaˬ-eu zahˬ-eu deuˬ-ahˇ jiˇ caw ba nehˬ-euˬ meh. Gaˇ kawˆ heu deuˬ-aˬ, ehˇ dawˬ naˇ haˬ-eu tsawˇ haˬ deuˬ-ahˇ, mehˬ hu paw heu loꞈ-ehˇ mˇ nehˬ ma lehˇ, aˇ baˇ baˇ mawˇ nehˬ yaꞈ-euˬ jeˬ pyeuꞈ-eu meh. (Maꞈtehˬ 15:30, 31; Yoˇhaˬ 5:28) Yeˬsuˇ shiˇ dzeuˇ naˇ, Yeˬhawˇbaˬ Miˬyehˇ aˬ yawꞈ-ahˇ saꞈ laˇ g’awˇ mawˇ neh bi g’oꞈ dehꞈ laˇ-euˬ meh. (1 Beˬtuˆluˆ 3:18) Yeˬsuˇ g’oꞈ dehꞈ laˇ g’aˬ naˇ, Miˬyehˇ-euˬ aˇ maˇ paw nuiˇ leˇ-awˇ, miˇ tsaˬ k’oeˇ taˆ Sahˬpaˬ geuꞈ-awˇ uˆ lahˇ-eu aˬ kawˬ-aˬ biꞈ laꞈ gaˇ dawˬ luꞈ meh. (Heˬbyehˇ 10:12, 13) Nymˇ Yeˬsuˇ mˬ k’oeˇ taˆ Sahˬpaˬ geuꞈ-awˇ uˆ lahˇ luꞈ meh. Aˬ yawꞈ-euˬ g’aˬ k’ehˇ deuˬ k’awꞈ, miˇ k’ahˬ doe ni iˇ-awˇ, gaˇ kawˆ heu deuˬ-ahˇ tsaꞈ gaˬ luꞈ meh.—Daˬyeˬlaˇ 7:13, 14; Maꞈtehˬ 24:14-ahˇ gui-awˬ.

G’awˬ myahˇ maˬ g’eh-ehˇ, Yeˬsuˇ aˬ yawꞈ euˬ aˇ yaˬ-ahˇ zmˬ-awˇ neh, miˇ tsaˬ k’oeˇ taˆ shaˬ-eu zahˬ-eu jeˬ bi pyeuꞈ laˇ luꞈ-eu g’aˬ-ahˇ laˆ byoˆ nehˬ meh. Yeˬsuˇ-ahˇ jah-awˇ neh ehˇ dawˬ naˇ haˬ-eu deuˬ yawˬ g’aˬ na luꞈ, miˇ tsaˬ k’oeˇ taˆ jaˆ-eu Baˬlaˬdiˇsuˆ-ahˇ laꞈ k’aˬ tiˬ cehˇ ya jawˇ g’eh meh.—Ja ceuˬ 37:9-11-ahˇ gui-awˬ.