Dawˬ ngehˬ cawˬ dahˬ beh˗eu
Dzaw deuˆ 2
Aˬ myah myah ngehˬ˗eu loꞈ˗ehˇ ngehˬ
Jaˇliꞈ zahˇ: “Gaˇ kawˆ shawˇ jehˆ ni ja duˬ ja mawˇ nehˬ nya˗eu jeˬ˗aˬ, pyuˇ kʼoeˇ taˆ shuiˇ neh aˇ boꞈ aˇ yehˆ yehˆ daˆ taˬ˗euˬ gaˇ duˇ tehꞈ˗a.”—Dawˬdaˬ 25:11.
Piˇliˇpuˆ aˬ jeˬ jahˇ˗euˬ nga?
1. Biˬdiˬoˬ˗ahˇ haw, maˬ ngeuˇ naˇ Gʼaˬkʼehˇ 8:30, 31-ahˇ gui. Jiˇ naˇ, naˇ haˬ˗eu jeˬ heu deuˬ˗ahˇ shaˇ noeˬ:
Piˇliˇpuˆ˗ahˇ neh aˬ jeˬ ya siˬ˗eu nga?
2. Aˬ myah myah ngehˬ˗eu loꞈ˗ehˇ ngehˬ naˇ, aˬ cawˬ jiˇ aˬ dui nehˬ˗ehˇ dawˬ ngehˬ cawˬ˗eu nui ma saˇ laˇ˗awˇ, aˬ dui ngehˬ gaˇ naˇ haˬ mawꞈ dzehˬ laˇ˗eu meh.
Piˇliˇpuˆ˗ahˇ dzaw geuꞈ
3. Yaw muiˬ˗ehˇ haw. Tsawˇ haˬ tiˬ g’aˬ˗euˬ myaˆ pyawˬ hawˇ˗eu mˇ jeˬ shaˇ kawˆ˗ahˇ haw naˇ, aˬ yawꞈ aˬ jeˬ noeˬ luꞈ˗eu lehˇ siˬ laˇ˗eu meh. Aˬ yawꞈ aˬ dui˗ahˇ dawˬ ngehˬ cawˬ mawꞈ gaˬ duˇ ngaˇ˗a laˬ? Dawˬ ngehˬ cawˬ mawꞈ gaˇ duˇ naˇ, “Gaˇ kawˆ heu˗ahˇ nawˇ siˬ nya ma loˇ?” lehˇ yaw awˬ awˬ lehˇ naˇ haˬ˗awˇ, Jaˇliꞈ laꞈ k’oeˇ˗euˬ gaˇ kawˆ tiˬ kawˆ na˗ahˇ ja nehˬ nya meh. Dawˬ maˬ ngehˬ cawˬ mawꞈ gaˇ duˇ naˇ, ngehˬ cawˬ˗eu g’aˇ duˬ aˇ dzehˬ˗ehˇ taˬ leh jeh.
4. Nui ma mahˇ. Jaˇliꞈ laꞈ k’oeˇ˗euˬ gaˇ kawˆ˗ahˇ taˆ lehˇ ya ehˇ nehˬ meh lehˇ taˬ noeˬ. Dawˬ ngehˬ˗eu yehꞈ laˇ˗eu aˇ yamˬ˗ahˇ dawˬ. Tiˬ poˆ na, nyaˆ taꞈ poˆ mawˇ ngeh dawˬ ngehˬ˗eu yehꞈ laˇ˗eu k’awꞈ pyeuꞈ nya meh.
5. Laˆ poˆ laˆ paˇ mˇ. Aˬ dui nehˬ˗ehˇ ngehˬ cawˬ luꞈ˗eu g’aˬ yawˬ kawˆ yawˬ˗ahˇ ngehˬ pyawˇ g’eh˗eu k’awꞈ pyeuꞈ nya meh. Yawˬ ha neh lehˬ hmˬ leꞈ˗euˬ gaˇ kawˆ naˇ tiˬ jeˬ, ngehˬ luꞈ˗eu gaˇ kawˆ naˇ tiˬ jeˬ lehˇ pyeuꞈ naˇ k’awꞈ, aˬ yawꞈ nehˬ˗ehˇ tsaˇ leˇ˗eu gaˇ kawˆ˗ahˇ Jaˇliꞈ laꞈ k’oeˇ neh bi haw.
