Gaˬ˗euˬ mehˇ nmˇ deuˬ˗oˇ,

Miˬyehˇ hawˇ˗eu tsawˇ haˬ deuˬ˗ahˇ gaˬ˗eu nui gaˬ heu naˇ, aˬ dui˗ahˇ ‘miˇ tsaˬ tsawˇ jeuˬ dawˬ tawˆ luꞈ jawˇ gaˇ iˇ doe˗awˇ, zaˬ lahˇ pyeuꞈ laˇ ni, iˇ cuꞈ shawˇ ni’ mehˬ˗eu g’aˇ duˬ laˆ noeˬ nehˬ laꞈ˗eu meh. (Maꞈtehˬ 28:19, 20; Maˬkuˆ 12:28-31) Yawˬ ha˗euˬ g’aˇ duˬ tehꞈ˗ehˇ maˬ shaˇ noeˬ˗eu nui gaˬ heu naˇ baoˬ ahˇ dui dui˗awˇ, ‘Miˬyehˇ˗ahˇ poˆ˗eu tsawˇ haˬ˗euˬ’ nui ma˗ahˇ zaw leˇ nya˗eu meh.—Heˬbyehˇ 11:6.

Yaw beh naˇ aˬ dui ngehˬ jeˬ ngehˬ kawˆ˗ahˇ maˬ haw ni ngehˬ nya˗eu g’aˇ duˬ hawˇ˗eu paˇ dmˬ deuˬ biꞈ˗eu g’aˇ duˬ leh jeh˗euˬ ma. Ehˇ k’awꞈ nymˬ˗mˇ naˇ aˬ dui tsawˇ haˬ deuˬ nehˬ˗ehˇ dawˬ yaw muiˬ˗ehˇ ngehˬ nya˗eu g’aˇ duˬ ya leh jeh˗eu meh. Aˬ dui aˬ cawˬ˗ahˇ nui gaˬ mˇ mawˇ nya˗eu tiˬ jeˬ naˇ aˬ yawꞈ maꞈ nui ma ahˇ˗eu gaˇ kawˆ˗ahˇ ja nehˬ˗eu heu meh. Toˆ˗ehˇ ngehˬ nya˗eu g’aˇ duˬ naˇ, tsawˇ haˬ deuˬ aˬ yawꞈ g’aˬ yawˬ aˬ jeˬ˗ahˇ k’ahˬ lahˇ luꞈ˗eu nga, aˬ jeˬ˗ahˇ nui ma ahˇ˗eu nga lehˇ ya shaˇ noeˬ˗awˇ, aˬ dui mehˬ˗eu gaˇ kawˆ laˆ poˆ laˆ paˇ ya mˇ˗eu k’awꞈ pyeuꞈ nya meh. Paˇ dmˬ heu dmˬ naˇ aˬ dui˗ahˇ aˬ joˆ˗ehˇ caw ba nehˬ˗eu nga?

Tsawˇ haˬ deuˬ˗ahˇ nui gaˬ mˇ mawˇ˗awˇ, zaˬ lahˇ pyeuꞈ laˇ ni caw ba nehˬ nya˗eu g’aˇ duˬ aˬ dui laꞈ k’oeˇ ya ahˇ˗eu seuˆ dzeuꞈ aˇ g’ehˇ deuˬ˗ahˇ paˇ dmˬ heu dmˬ˗euˬ dzaw deuˆ 12 hmˬ˗ahˇ pah mehˬ taˬ˗euˬ meh. Dzaw deuˆ aˬ yawꞈ hmˬ yawꞈ˗ahˇ Yeˬsuˇ maˬ ngeuˇ naˇ dahˬ beh˗eu Ka li zaˬ saˇ ka˗ahˇ˗euˬ guiˬ lahˬ dawˬ tsaꞈ gaˬ˗eu tiˬ g’aˬ g’aˬ neh Miˬyehˇ˗euˬ gaˇ mˇ ngeh maˇ jawˆ ni g’eh˗eu seuˆ dzeuꞈ aˇ g’ehˇ tiˬ hmˬ mˇ mawˇ˗euˬ Jaˇliꞈ laꞈ k’oeˇ˗euˬ gaˇ kawˆ˗ahˇ dawˬ pehˬ taˬ taˬ˗euˬ meh. Aˬ dui neh noeˬ tsoˆ taˬ˗euˬ jeˬ naˇ ngehˬ jeˬ ngehˬ kawˆ˗ahˇ maˬ haw ni ngehˬ nya˗eu g’aˇ duˬ maˬ ngeuˇ. Tsawˇ haˬ deuˬ˗ahˇ nui gaˬ aˬ joˆ˗ehˇ mˇ mawˇ nya˗eu nga lehˇ poˆ˗eu g’aˇ duˬ ma. Seuˆ dzeuꞈ aˇ g’ehˇ yawˬ hmˬ na luꞈ Miˬyehˇ˗euˬ gaˇ mˇ ngeh loˬ˗eu nmˇ ngeuˇ meh. Ehˇ k’awꞈ aˬ dui seuˆ dzeuꞈ aˇ g’ehˇ aˬ yawꞈ hmˬ yawꞈ aˬ cawˬ nehˬ˗ehˇ dawˬ ngehˬ cawˬ dahˬ beh ngeh maˬ ehˇ, g’a k’oꞈ˗iˇ ngeh maˬ ehˇ, Jaˇliꞈ mehˬ ngeh maˬ ehˇ, aˬ joˆ˗ehˇ caw ba nehˬ nya˗eu nga lehˇ ja sawˇ ma.

Dzaw deuˆ aˬ yawꞈ hmˬ yawꞈ˗ahˇ ja sawˇ ngeh, ‘Ngaˬ˗euˬ jawˇ k’ahˬ˗ahˇ˗euˬ tsawˇ haˬ deuˬ nehˬ˗ehˇ dawˬ ngehˬ cawˬ ngeh seuˆ dzeuꞈ aˇ g’ehˇ heu˗ahˇ ngaˇ aˬ joˆ˗ehˇ mˇ mawˇ nya˗eu nga?’ lehˇ yaw muiˬ˗ehˇ shaˇ noeˬ shaˇ sawˇ. Yeˬhawˇbaˬ Miˬyehˇ hawˇ˗eu tsawˇ haˬ deuˬ˗ahˇ gaˬ nya dzehˬ laˇ ni leh jeh. Nui gaˬ heu naˇ bym˗eu nya˗eu jeˬ naˆ maˬ tseˇ aˇ yeˇ huiˬ dzehˬ meh. Aˬ jeˬ miˇ neh ehˇ naˇ nui gaˬ heu naˇ tsawˇ haˬ deuˬ˗ahˇ zaˬ lahˇ pyeuꞈ laˇ ni caw ba nehˬ nya˗eu miˇ neh meh.

Aˬ dui mehˇ nmˇ deuˬ nehˬ˗ehˇ kuiˇ ciˬ laꞈ ciˬ gm˗awˇ tiˬ kawˆ loꞈ˗ehˇ ya mˇ gaˇ aˇ poeˬ taˬ baw dui dui˗eu ma. (Zeˬpaˬniˇ 3:9) Tsawˇ haˬ deuˬ˗ahˇ gaˬ˗eu g’aˇ duˬ hawˇ˗eu zaˬ lahˇ pyeuꞈ laˇ ni caw ba nehˬ˗eu g’aˇ duˬ nawˇ maˬ tsehˆ leˇ ni leh jeh luꞈ gaˇ Yeˬhawˇbaˬ guiˬ lahˬ tiˬ byah tiˬ loꞈ biꞈ luꞈ˗uˇ.