Nga maꞈ-euˬ aˇ muˇ laꞈ k’oeˇ, ba la aˇ siˬ poeˬ dzaˬ-eu saˬ laˬ lehˇ maˬ jawˇ. Dahˬ beh-euˬ Ka li zaˬ aˇ muˇ-ahˇ duˇ ni, “Ka li zaˬ aˇ muˇ-ahˇ yawˇ bo-eu loꞈ-ehˇ” bi bo-eu g’aˇ duˬ, noeˬ dahˇ doe laˇ-euˬ aˇ muˇ-ahˇ sheuˬ g’eh-eu deuˬ-ahˇ tseˇ taˬ-euˬ ma. (G’aˬk’ehˇ 20:28) Aˇ muˇ-ahˇ sheuˬ g’eh-eu noeˬ dahˇ doe laˇ-euˬ deuˬ aˇ muˇ-ahˇ haw piˇ ngeh jawˇ, “maˬ bo saˆ-ehˇ maˬ geuꞈ nya-eu miˇ neh, bo saˆ-eu maˬ ngeuˇ-a, yawˬ ha smˇ muiˬ muiˬ laˇ ni bo saˆ-eu k’awꞈ maˬ ngeuˇ-a, nui ma keuˆ-eu miˇ neh, bo saˆ-eu jeˬ pyeuꞈ meh.” (1 Beˬtuˆluˆ 5:1-3) Nga maꞈ-euˬ g’aˇ duˬ, aˬ yawꞈ maꞈ aˬ jeˬ jeˇ mˇ-eu nga?

Nga maꞈ-ahˇ k’ahˬ lahˇ-awˇ, haw piˇ nehˬ. Aˇ muˇ-ahˇ sheuˬ g’eh-eu deuˬ, mehˬ nehˬ-awˇ, aˇ muˇ-euˬ jah jeˬ g’aˬ k’aˆ ni caw ba nehˬ-eu meh. Aˇ yehˇ huiˬ-eu gaˇ heu, Miˬyehˇ neh aˬ yawꞈ maꞈ-ahˇ a nehˬ taˬ-euˬ lehˇ siˬ nya-eu miˇ neh, Miˬyehˇ-euˬ zaˬ lahˇ deuˬ-ahˇ maˬ ka tiˇ-eu uˬ taꞈ, laꞈ k’aˬ cehˇ nui saˇ oꞈ-eu jeˬ jaˆ ni caw ba nehˬ-eu meh. (2 Gawˇliˬtu 1:24) Yawˇ bo-eu yaw sahˇ, yawˇ yawˬ mawˇ na luꞈ-ahˇ, yaw muiˬ paˬ-ehˇ haw piˇ-eu loꞈ-ehˇ, aˇ muˇ-ahˇ sheuˬ g’eh-eu deuˬ k’awꞈ, aˇ muˇ laꞈ k’oeˇ jawˇ-eu yawˬ g’aˬ na luꞈ-euˬ gaˇ kawˆ-ahˇ, siˬ nya laˇ ni leh jeh-eu meh.—Dawˬdaˬ 27:23.

Miˬyehˇ nui ma tsaˬ-eu jeˬ mˇ nya ni mehˬ nehˬ. Aˇ muˇ-ahˇ sheuˬ g’eh-eu deuˬ naˇ, nga maꞈ jah-eu jeˬ g’aˬ k’aˆ laˇ ni, jawˇ nah yawˬ jaw na luꞈ aˇ muˇ bawˬ dzaˬ gaˇ sheuˬ g’eh nehˬ laꞈ-eu meh. (G’aˬk’ehˇ 15:32) Miˬyehˇ-ahˇ a nehˬ taˬ-euˬ, aˇ muˇ-ahˇ sheuˬ g’eh-eu deuˬ naˇ, tsaꞈ gaˬ-eu gaˇ-ahˇ sheuˬ g’eh nehˬ laꞈ-awˇ, loˬ-eu mehˬ jeˬ mehˬ kawˆ yaw myaˬ jeˬ-ahˇ k’awꞈ, dzaw mehˬ nehˬ laꞈ-eu meh.

Yawˬ g’aˬ na luꞈ-ahˇ g’aˬ biꞈ nehˬ. Nga maꞈ yawˬ g’aˬ na luꞈ-ahˇ, jah-eu jeˬ g’aˬ k’aˆ laˇ ni caw ba nehˬ-eu g’aˇ duˬ, Bawˬ dzaˬ nymˇ-ahˇ mehˬ-eu tehꞈ-ehˇ maˬ g’aˬ ni, iˇ kahˇ keuˆ ni g’a laˇ-awˇ, Jaˇliꞈ neh g’aˬ biꞈ nehˬ laꞈ-eu meh.—Yaˬkoˆ 5:14, 15.

Aˇ muˇ-ahˇ sheuˬ g’eh-eu deuˬ naˇ, aˇ muˇ-euˬ gaˇ mˇ-eu tehꞈ-ehˇ maˬ g’aˬ ni, yawˬ ha-euˬ gaˇ hawˇ-eu nymˇ jiˇ laꞈ k’oeˇ loˬ-eu jeˬ-ahˇ k’awꞈ ya shaˇ noeˬ-eu meh. Gaˇ mˇ-eu leh jeh-eu mehˇ nmˇ heu deuˬ-ahˇ, aˬ dui yaw zeu baw-eu tsaˬ meh.—1 Teˇsaˬloˇni 5:12, 13.

• Aˇ muˇ-ahˇ sheuˬ g’eh-eu deuˬ, aˬ jeˬ jeˇ gaˇ jaˆ-eu nga?

• Aˇ muˇ-ahˇ sheuˬ g’eh-eu deuˬ, yawˬ g’aˬ na luꞈ-ahˇ k’ahˬ lahˇ-eu lehˇ, aˬ joˆ-ehˇ mˇ mawˇ-eu nga?