Nymˇ nawˇ Yeˬhawˇbaˬ-euˬ Saˇ kiˇ deuˬ nehˬ-ehˇ Jaˇliꞈ dzaw luꞈ naˇ, nawˇ dzaw luꞈ-eu gaˇ kawˆ deuˬ-ahˇ, maˬ keuˆ laˇ mi na-ehˇ gui-awˇ neh lehˬ hmˬ taˬ naˇ yaw muiˬ meh. K’oeˇ loꞈ-ehˇ duˇ ni, bawˬ dzaˬ gaˇ iˇ-eu k’awꞈ, maˬ keuˆ laˇ mi na-ehˇ lehˬ hmˬ-awˇ iˇ naˇ, nawˬ-euˬ g’aˇ duˬ gaˇ dahˇ tsoeˬ dui dui meh.

Gui-eu aˇ yamˬ hawˇ-eu jawˇ duˬ-ahˇ, tseˇ geuꞈ-awˬ. Nawˇ aˬ geu ngeh yamˬ-ahˇ gui-eu muiˬ dzehˬ nya? Uˬ shawˬ paw gaˇ maˬ mˇ iˇ mi na-ehˇ laˬ, maˬ ngeuˇ naˇ, uˬ ciꞈ paw zaˬ yuꞈ k’aˆ-awˇ neh la? Nawˇ gui-eu aˇ yamˬ g’awˬ mya ni maˬ jaˆ k’awꞈ, aˇ myaˆ ni tehꞈ-ehˇ gui le lehˇ noeˬ tsehˆ taˬ-awˬ, tiˬ jeˬ paˬ neh taˬ bi laˆ tsoeˬ laˇ. Ciˬ cuˇ ni g’eh-eu jawˇ duˬ-ahˇ poˆ-awˇ, biˬ diˬ oˬ hawˇ-eu naˬ gaˬ jiˇ ni piˬ tehˬ-awˬ. K’oeˇ tehꞈ-ehˇ maˬ g’aˬ ni, nawˬ-ahˇ suˬ saˬ laˇ paˬ-ehˇ g’eh-eu yawˬ jeˬ na luꞈ-ahˇ k’awꞈ piˬ tehˬ jiˇ-awˬ. Gui-eu lehˇ g’eh ngeh k’awꞈ guiˬ lahˬ aˬ hu shaˇ naˇ, tiˬ nah laꞈ k’oeˇ-euˬ shaˬ zahˬ k’ahˬ lahˇ-eu jeˬ k’awꞈ byoˆ iˇ-awˇ neh, Miˬyehˇ-euˬ dawˬ kawˬ-ahˇ, noeˬ tsoˆ taˬ-awˇ gui nya ni, caw ba nehˬ laꞈ-eu meh.—Piˇliˇpiˆ 4:6, 7.

Siˬ laˇ paˬ-ehˇ kawˆ taˬ-awˇ, ja noeˬ ja sawˇ mˇ-eu g’aˇ duˬ lehˬ hmˬ taˬ-awˬ. Gaˇ kawˆ deuˬ-ahˇ gui ngeh, aˬ jeˬ-ahˇ ehˇ keuˆ mawꞈ-eu nga lehˇ shaˇ noeˬ-awˬ, gui-eu lehˇ g’eh-eu gaˬ naˇ yaw huiˬ-euˬ uˬ dzah-ahˇ k’awꞈ shaˇ noeˬ-awˬ, k’oeˇ naˇ, aˇ deuˆ-euˬ uˬ dzah hawˇ-eu gaˬ naˇ yaw huiˬ-euˬ uˬ dzah, aˬ joˆ-ehˇ taꞈ leˇ-eu nga lehˇ jiˇ shaˇ noeˬ-awˬ. Aˇ baˇ hawˇ-eu aˇ yehˇ huiˬ-eu tsahˇ-ahˇ, naˇ haˬ poˆ k’oꞈ-eu dawˬ deuˬ-ahˇ pyehˆ tseˇ haw-awˬ. K’oeˇ gaˇ neh naˇ, aˬ yawꞈ deuˆ aˬ yawꞈ gui gui-ehˇ, naˇ haˬ-eu dawˬ deuˬ-ahˇ ehˇ k’oꞈ-eu g’aˇ duˬ poˆ-awˬ. K’oeˇ naˇ, toeˬ mehˬ nehˬ taˬ-euˬ Jaˇliꞈ aˇ deuˆ deuˬ-ahˇ gui-awˇ neh, Jaˇliꞈ heu deuˆ gaˇ kawˆ heu hmˬ nehˬ-ehˇ, aˬ joˆ-ehˇ taꞈ leˇ-eu nga lehˇ ya shaˇ sawˇ-eu meh. (G’aˬk’ehˇ 17:11) Ehˇ k’oꞈ-eu dawˬ deuˬ-ahˇ siˬ nya shaw-euˬ naˇ, aˇ boꞈ aˇ yehˇ huiˬ-eu tsahˇ-ahˇ siˬ laˇ ni kawˆ taˬ-awˬ. Teu loꞈ-ehˇ jahˇ taˬ naˇ, bawˬ dzaˬ ngeh aˬ laꞈ baꞈ diˇ-awˇ ehˇ k’oꞈ-eu g’aˇ duˬ yaw awˬ meh. Bawˬ dzaˬ gaˇ nawˇ k’awꞈ, aˬ laꞈ baꞈ diˇ-awˇ neh, nawˬ-euˬ nui noeˬ nui duˇ-euˬ dawˬ neh, yaw nymˇ nymˇ lehˇ ja noeˬ ja sawˇ mˇ nya meh.

Yawˬ jaw na luꞈ bawˬ dzaˬ gaˇ ja sawˇ luꞈ-eu gaˇ kawˆ deuˬ-ahˇ, pyehˆ tseˇ-eu baˬ da neh, Jaˇliꞈ-euˬ zaˬ siˬ nui gahˇ “yuˇ taˬ duˬ-ahˇ,” tiˬ nah saˇ-i tiˬ nah myaˬ laˇ-eu meh.—Maꞈtehˬ 13:51, 52.

• Bawˬ dzaˬ-eu g’aˇ duˬ, yawˬ jawˇ na luꞈ aˬ joˆ-ehˇ ya lehˬ hmˬ-eu nga?

• Bawˬ dzaˬ gaˇ nawˇ k’awꞈ, ja noeˬ ja sawˇ mˇ-eu g’aˇ duˬ, aˬ joˆ-ehˇ ya lehˬ hmˬ-eu nga?