Yeˬhawˇbaˬ-euˬ Saˇ kiˇ deuˬ-euˬ Bawˬ dzaˬ nymˇ yawˬ gaˇ na luꞈ, Miˬyehˇ-euˬ muiˬ-eu shawˇ-eu tsawˇ myahˇ-ahˇ ha geuꞈ taˬ-euˬ ma. K’oeˇ miˇ neh, nga maꞈ Bawˬ dzaˬ nymˇ-ahˇ shawˇ jehˆ ni haw muiˬ paˬ-ehˇ ya mˇ-eu heu naˇ, nga maꞈ-euˬ g’aˇ duˬ Miˬyehˇ-ahˇ uˬ duˬ tahˬ-eu laꞈ k’oeˇ neh, aˇ yehˇ huiˬ-eu tiˬ jeˬ miˇ-a lehˇ noeˬ-eu ma. Gaˇ heu mˇ gaˇ yawˬ g’aˬ na luꞈ caw ba nya-eu meh.

Bawˬ dzaˬ g’aˬ naˇ, laˆ luiˆ gaˇ caw ba. Bawˬ dzaˬ g’aˬ naˇ, mehˇ nmˇ deuˬ Bawˬ dzaˬ nymˇ-ahˇ haw muiˬ ni laˆ luiˆ taˬ-eu meh. Tiˬ jaw-ahˇ tiˬ poˆ duꞈ yawˇ ni laˆ saˆ-eu meh. Aˇ muˇ-ahˇ sheuˬ g’eh-eu deuˬ maˬ ngeuˇ naˇ, aˇ muˇ-euˬ gaˇ-ahˇ caw ba-eu deuˬ, aˬ myah luꞈ k’aˇ biˇ nehˬ taˬ-euˬ gaˇ deuˬ-ahˇ haw piˇ-awˇ mˇ luiˆ-eu meh. Mehˇ nmˇ deuˬ yawˬ g’aˬ na luꞈ k’aˇ g’eh nya-eu loꞈ-ehˇ yaˆ pyawˇ yaˆ, jawˇ duˬ jeˬ buˇ, k’aˬ lehˇ shuˆ dzeh, nuiˇ boˆ laˆ tsaˬ, gaˇ nyiˇ kuˆ joˆ, laˇ oˆ zaˬ tsiˬ shawˇ, jaˆ guˆ jaˆ meuˬ biˬ dzeh, Bawˬ dzaˬ nymˇ-euˬ laꞈ nyiˇ paw laˆ saˆ-awˇ, laˆ luiˆ lehˇ mˇ caw luꞈ meh. Tiˬ k’oꞈ-ahˇ tiˬ poˆ Bawˬ dzaˬ nymˇ-ahˇ, yaw duꞈ duꞈ lehˇ laˆ buˇ-eu meh. Bawˬ dzaˬ nymˇ-ahˇ yaw zeu bi baw-eu g’aˇ duˬ mehˬ nehˬ ba jawˬ-ehˇ, zaˬ deuˬ-ahˇ k’awꞈ gaˇ tiˬ jeˬ na bi mˇ caw luꞈ meh.—Dawˬtsoˆtsoˆ-eu 5:1.

Bawˬ dzaˬ nymˇ laˆ saˆ gaˇ caw ba-eu. Yawˬ k’oꞈ na luꞈ Bawˬ dzaˬ nymˇ ziꞈ ngaˇ laˬ lehˇ, laꞈ k’oeˇ laꞈ nyiˇ yaw muiˬ-ehˇ goˬ haw-eu heu naˇ, Bawˬ dzaˬ nymˇ-euˬ myawˬ gahˬ yaw muiˬ paˬ-ehˇ bi jaˆ-awˇ, pyuˇ maˬ loˬ gaˇ maˬ bi jiˇ leˇ-eu g’aˇ duˬ meh. (2 Laˬsaˬbaˬ 24:13; 34:10) Miˬyehˇ-ahˇ uˬ duˬ tahˬ-eu jawˇ duˬ heu naˇ, buˇ coeˆ ni g’eh-eu laꞈ k’oeˇ yaw muiˬ-ehˇ bo saˆ taˬ-euˬ jawˇ duˬ pyeuꞈ paˬ-ehˇ g’eh-eu meh. Bawˬ dzaˬ nymˇ laˆ saˆ gaˇ caw ba-eu heu naˇ, Yeˬhawˇbaˬ-ahˇ gaˬ miˇ-a lehˇ ehˇ-eu jeˬ pyeuꞈ-awˇ, Bawˬ dzaˬ nymˇ-ahˇ yaw zeu baw-eu jeˬ jiˇ pyeuꞈ-eu meh. (Ja ceuˬ 122:1) Heu loꞈ-ehˇ mˇ-eu heu naˇ, aˬ dui jawˇ k’ahˬ laꞈ k’oeˇ, Miˬyehˇ-euˬ tsawˇ myahˇ-ahˇ aˬ cawˬ ja ceuˬ laˇ-eu meh.—2 Gawˇliˬtu 6:3.

• Nga maꞈ Bawˬ dzaˬ nymˇ-ahˇ, aˬ jeˬ miˇ neh yaw muiˬ-ehˇ bo saˆ-eu nga?

• Bawˬ dzaˬ nymˇ-ahˇ, yawˬ jawˇ na luꞈ buˇ coeˆ ni bi jaˆ-eu g’aˇ duˬ, aˬ jeˬ jeˇ lehˬ hmˬ taˬ-euˬ nga?