Nawˇ Jaˇliꞈ laꞈ k’oeˇ-euˬ zaˬ siˬ nui gahˇ siˬ nya laˇ ni poˆ tseˇ mawꞈ miˇ-a loˇ? Jaˇliꞈ aˇ deuˆ-euˬ gaˇ kawˆ, tsawˇ haˬ-euˬ gaˇ kawˆ, jawˇ duˬ-euˬ gaˇ kawˆ, maˬ ngeuˇ naˇ myawˬ gahˬ-euˬ gaˇ kawˆ deuˬ-ahˇ siˬ nya mawꞈ miˇ-a loˇ? Nawˬ-euˬ shaˬ zahˬ-ahˇ, Miˬyehˇ-euˬ dawˬ heu aˬ joˆ-ehˇ caw ba nehˬ nya-eu lehˇ siˬ nya mawꞈ miˇ-a loˇ? Toˆ-ehˇ naˇ, Bawˬ dzaˬ nymˇ-euˬ sahˬ boꞈ taˬ duˬ-ahˇ haw iˇ-awˬ.

Poˆ tseˇ gaˇ caw ba-eu keu ka. Nawˬ-euˬ tsawˇ jeuˬ dawˬ-ahˇ neh, Yeˬhawˇbaˬ-euˬ Saˇ kiˇ deuˬ neh Jaˇliꞈ-ahˇ g’oe-awˇ neh jahˇ doˆ taˬ-euˬ aˇ boꞈ deuˬ dawˬ tawˆ luꞈ nawˇ jawˇ gaˇ maˬ jaˆ jiˇ-eu paˬ. Ehˇ k’awꞈ Bawˬ dzaˬ nymˇ-euˬ sahˬ boꞈ taˬ duˬ-ahˇ naˇ, jahˇ doˆ-euˬ maˬ myahˇ laˇ-euˬ sahˬ boꞈ deuˬ dawˬ tawˆ luꞈ jaˆ jiˇ meh. Sahˬ boꞈ taˬ duˬ-ahˇ, yaw myaˬ jeˬ-euˬ dawˬ yuˇ paˇ taˬ-euˬ Jaˇliꞈ hawˇ-eu dawˬ tsuiꞈ puiˇ k’awˬ nehˬ taˬ-euˬ paˇ dmˬ, k’oeˇ naˇ, gaˇ dahˇ tsoeˬ-eu sahˬ boꞈ paˇ dmˬ nui jeˬ k’awꞈ jaˆ meh. Sahˬ boꞈ taˬ duˬ-ahˇ, bawˬ dzaˬ-eu yamˬ maˬ keuˆ laˇ-euˬ yaw kaˬ zmˬ nya-awˇ, bawˬ dzaˬ g’aˬ naˇ k’awꞈ paˇ zmˬ tawꞈ nya meh. Sahˬ boꞈ taˬ duˬ-ahˇ kahˬ pyuˇ teuˬ jaˆ naˇ, teu gaˇ Loꞈ-eu nymˇgoˇ Sahˬ boꞈ taˬ duˬ, ahˇ nya meh. Teu-aˬ, nga maꞈ-euˬ sahˬ boꞈ yaw myaˬ jeˬ dawˆ ahˇ taˬ-euˬ kahˬ pyuˇ teuˬ poˆ gaˬ-lamˬ pyeuꞈ-awˇ neh, nawˇ siˬ nya mawꞈ-eu gaˇ kawˆ deuˬ hawˇ-eu Jaˇliꞈ aˇ deuˆ deuˬ-ahˇ, yaw awˬ awˬ-ehˇ poˆ mawˇ nya paˬ-ehˇ jahˇ doˆ taˬ-euˬ meh.

Dehꞈ ziˇ hawˇ-eu tsaꞈ gaˬ-eu gaˇ mˇ-eu bawˬ dzaˬ gaˇ dzaw zaˬ deuˬ-euˬ g’aˇ duˬ gaˇ dahˇ tsoeˬ meh. Nawˬ-ahˇ biˇ nehˬ-euˬ gaˇ deuˬ-ahˇ lehˬ hmˬ ngeh, Bawˬ dzaˬ nymˇ-euˬ sahˬ boꞈ taˬ duˬ-ahˇ zmˬ nya meh. Teu gaˇ haw piˇ-eu g’aˬ naˇ, Dehꞈ ziˇ hawˇ-eu tsaꞈ gaˬ-eu gaˇ mˇ-eu gaˇ haw piˇ-eu g’aˬ pyeuꞈ meh. Aˬ yawꞈ naˇ, sahˬ boꞈ taˬ duˬ-ahˇ, doˆ saˬ saˬ laˇ-euˬ sahˬ boꞈ deuˬ bi jaˆ-eu g’aˇ duˬ hawˇ-eu aˬ yawꞈ jeˬ aˬ yawꞈ yaw luiˆ luiˆ lehˇ bi jaˆ-eu g’aˇ duˬ haw piˇ nehˬ-eu meh. Nawˇ loˬ-eu gaˇ kawˆ deuˬ-ahˇ aˬ joˆ-ehˇ ya poˆ-eu lehˇ, sahˬ boꞈ taˬ duˬ-ahˇ haw piˇ-eu g’aˬ maˬ ngeuˇ naˇ nawˬ-ahˇ Jaˇliꞈ mehˬ-eu g’aˬ mehˬ nehˬ nya meh. Ehˇ k’awꞈ, paˇ dmˬ laꞈ nyiˇ paw yuˇ doˆ g’eh-eu maˬ tsaˬ-a. Nga maꞈ paˇ dmˬ-ahˇ maˬ kawˆ byawꞈ ni yaw muiˬ-ehˇ yahˇ yahˇ-ehˇ zmˬ-eu ma.

Miˬyehˇ-euˬ“tsawˇ gahˇ” deuˬ-ahˇ za mawꞈ naˇ, “pyuˇ shuiˇ”-ahˇ poˆ-eu loꞈ-ehˇ, poˆ mawꞈ-eu nui ma ya ahˇ meh lehˇ, Jaˇliꞈ aˬ dui-ahˇ mehˬ nehˬ laꞈ-eu meh. (Dawˬdaˬ 2:1-5) Nawˇ dahˬ beh-awˇ poˆ nya ni, Bawˬ dzaˬ nymˇ-euˬ sahˬ boꞈ taˬ duˬ heu, nawˬ-ahˇ caw ba nehˬ nya-eu meh.

• Bawˬ dzaˬ nymˇ-euˬ sahˬ boꞈ taˬ duˬ-ahˇ, nawˇ poˆ tseˇ gaˇ caw ba nehˬ nya-eu aˬ jeˬ jaˆ-eu nga?

• Sahˬ boꞈ taˬ duˬ-ahˇ yaw muiˬ-ehˇ zmˬ nya ni, nawˬ-ahˇ aˬ suˇ g’aˬ caw ba nehˬ-eu nga?