Beˬdeˬlaˇ lehˇ ehˇ-eu heu naˇ, Heˬbyehˇ-euˬ dawˬ pyeuꞈ-awˇ, “Miˬyehˇ-euˬ nymˇ” lehˇ ehˇ-eu dawˬ tsuiꞈ meh. (Aˇdahˬbeh-eu 28:17, 19) Tsawˇ myahˇ heu hmˬ naˇ, tsaꞈ gaˬ-eu gaˇ-ahˇ caw ba-eu g’aˇ duˬ, Yeˬhawˇbaˬ-euˬ Saˇ kiˇ deuˬ neh miˇ k’ahˬ doe ni tsoˆ taˬ-euˬ, nymˇ deuˬ nehˬ-ehˇ geuˇ leˇ-eu tsawˇ myahˇ pyeuꞈ meh. Uˆ lahˇ-eu aˇ muˇ naˇ, Aˬmeˬliˇkaˬ miˇ k’ahˬ Neˬ-yuˬyawˇ meuˬ-ahˇ jaˆ-eu, aˇ maꞈ aˇ muˇ-euˬ saˇ naˇ dawˬ pehˬ hmˬ-ahˇ jawˇ-awˇ neh gaˇ mˇ luꞈ-eu meh. Aˬ yawꞈ maꞈ miˇ k’ahˬ doe ni jaˆ-eu saˇ naˇ deuˬ-ahˇ haw piˇ luꞈ-eu meh. Beˬdeˬlaˇ laꞈ k’oeˇ gaˇ mˇ luꞈ-eu deuˬ-ahˇ, Beˬdeˬlaˇ nymˇ jiˇ lehˇ kuˇ-eu meh. Nymˇ jiˇ tiˬ jiˇ loꞈ-ehˇ aˬ yawꞈ maꞈ mehˬ bawˬ gm-eu laꞈ k’oeˇ, tiˬ kawˆ loꞈ-ehˇ jawˇ, tiˬ kawˆ loꞈ-ehˇ dzaˬ, tiˬ kawˆ loꞈ-ehˇ mˇ, tiˬ kawˆ loꞈ-ehˇ Jaˇliꞈ dzaw lehˇ jawˇ luꞈ-eu meh.—Ja ceuˬ 133:1.

Yawˬ ha-euˬ g’aˇ duˬ tehꞈ-ehˇ maˬ shaˇ noeˬ ni, nymˇ jiˇ tiˬ jiˇ loꞈ-ehˇ nui ma gm-awˇ, gaˇ mˇ-eu jawˇ duˬ pyeuꞈ meh. Beˬdeˬlaˇ nymˇ yawˬ tsahˇ na luꞈ, Miˬyehˇ-euˬ nui noeˬ-ahˇ mˇ caw-awˇ, Miˬyehˇ Miˇ k’ahˬ gaˇ-ahˇ aˇ yamˬ tiˬ byah zmˬ-awˇ neh gaˇ mˇ luꞈ-eu, Ka li zaˬ aˬ buˇ aˬ li deuˬ jawˇ luꞈ meh. (Maꞈtehˬ 6:33) Aˬ yawꞈ maꞈ gaˇ mˇ-eu, ba la aˇ siˬ poeˬ maˬ za k’awꞈ ni, aˬ yawꞈ maꞈ-euˬ g’aˇ duˬ dzaˬ duˬ jawˇ duˬ hawˇ-eu yawˬ ha loˬ-eu jeˬ-ahˇ zmˬ-eu g’aˇ duˬ ui cuiˆ na za meh. Beˬdeˬlaˇ-ahˇ jawˇ luꞈ-eu deuˬ naˇ, yawˬ ha-euˬ gaˇ yawˬ ha baw-eu meh. Aˇ boꞈ boꞈ-eu, hawˬ mˇ dzaˇ saꞈ g’eh-eu, paˬ dmˬ jahˇ doˆ-eu, paˇ dmˬ guꞈ-eu, laˆ luiˆ laˆ buˇ-eu, moeˬ tsoeˬ lehˬ tsiˬ-eu, myawˬ gahˬ-ahˇ laˆ saˆ-eu maˬ ngeuˇ naˇ yawˬ jeˬ yawˬ-ahˇ mˇ luꞈ meh.

Miˬyehˇ Miˇ k’ahˬ tsaꞈ gaˬ-eu gaˇ-ahˇ caw ba nehˬ-eu jawˇ duˬ pyeuꞈ meh. Yawˬ gaˇ na luꞈ Beˬdeˬlaˇ tsoˆ taˬ-euˬ heu naˇ, yawˬ g’aˬ na luꞈ jawˇ gaˇ Jaˇliꞈ-euˬ yaw tsaˬ yaw dawˇ jeˬ bi gaˬ keuˆ iˇ-eu g’aˇ duˬ meh. Paˇ dmˬ heu dmˬ naˇ, gaˇ kawˆ heu kawˆ-euˬ yaw jeˬ ma jeˬ pyeuꞈ-eu meh. Paˇ dmˬ heu dmˬ-ahˇ, Uˆ lahˇ-eu aˇ muˇ haw teˬ-eu laꞈ k’oeˇ boꞈ doˆ taˬ-awˇ, miˇ k’ahˬ doe ni Jaˆ-eu dawˬ yuˇ paˇ-eu deuˬ jawˇ gaˇ, Kah pyuˇ teuˬ-ahˇ zmˬ-awˇ neh bi iˇ k’awˬ-eu meh. K’oeˇ naˇ, Beˬdeˬlaˇ yaw myaˬ tsahˇ-ahˇ jaˆ-eu caˆ keu ka yaw kawˇ deuˬ neh paˇ dmˬ heu-ahˇ jahˇ doˆ-awˇ, aˇ muˇ 110,000 tsahˇ dzehˬ ni-ahˇ biˇ k’awˬ g’eh-eu meh. Yaw kawˇ ma-ehˇ mˇ paˬ-ehˇ g’eh-eu gaˇ nehˬ-ehˇ taꞈ leˇ-eu, aˇ yehˇ huiˬ-eu gaˇ yawˬ deuˆ na luꞈ-ahˇ, Beˬdeˬlaˇ nymˇ jiˇ deuˬ caw ba luꞈ meh. Teu naˇ, muiˬ-eu gaˇ kawˆ tsaꞈ gaˬ-eu jeˬ pyeuꞈ meh.—Maˬkuˆ 13:10.

• Beˬdeˬlaˇ-ahˇ aˬ suˇ suˇ g’aˬ mˇ luꞈ-eu nga, aˬ yawꞈ maꞈ-ahˇ aˬ jeˬ jeˇ caw ba nehˬ-eu nga?

• Beˬdeˬlaˇ yawˬ tsahˇ na luꞈ, aˬ jeˬ aˇ yehˇ huiˬ-eu gaˇ-ahˇ, caw ba nehˬ luꞈ-eu nga?