Yeˬhawˇbaˬ-euˬ Saˇ kiˇ deuˬ, Miˬyehˇ gaˇ mˇ-eu dzaw mehˬ-eu nymˇ-ahˇ, mehˬ nehˬ luꞈ-eu myahˇ laˇ-euˬ meh. Miˬyehˇ Miˇ k’ahˬ gaˇ kawˆ tsaꞈ gaˬ-eu gaˇ-ahˇ, aˇ yamˬ tiˬ byah ni zmˬ-awˇ mˇ-eu lehˇ, yawˬ ha-euˬ mawˇ do damˬ nehˬ taˬ-euˬ deuˬ-euˬ g’aˇ duˬ, dzaw nymˇ heu lehˬ hmˬ nehˬ taˬ-euˬ meh. Teu miˇ neh, aˬ yawꞈ maꞈ ‘gaˇ-ahˇ yaw muiˬ-ehˇ mˇ’ nya-eu meh.—2 Tiˆmoˇseˬ 4:5.

Huˬ mehˬ mehˬ-eu g’aˬ-euˬ Dzaw nymˇ. Aˬ myah luꞈ mˇ-eu huˬ mehˬ mehˬ-eu g’aˬ geuꞈ luꞈ-eu tiˬ k’oꞈ byah laˇ naˇ, dawˬ peh jaˆ-eu Bawˬ dzaˬ nymˇ-ahˇ, koꞈ nah byah ni mehˬ-eu teu gaˇ iˇ nya laˇ meh. Dzaw nymˇ heu naˇ, huˬ mehˬ mehˬ-eu deuˬ Yeˬhawˇbaˬ nehˬ-ehˇ g’oeˇ-eu gaˬ-eu jeˬ bi myaˬ laˇ-awˇ, tsaꞈ gaˬ-eu gaˇ deuˬ-ahˇ yaw duꞈ duꞈ lehˇ saˇ jaˇ ziꞈ-eu laꞈ k’oeˇ, paˇ bi mˇ daˆ leꞈ-eu g’aˇ duˬ meh.

Miˬyehˇ Miˇ k’ahˬ gaˇ kawˆ tsaꞈ gaˬ-eu deuˬ-euˬ Dzaw nymˇ. Ba la nyiˬ siˬ ga leˇ-eu dzaw-eu jeˬ heu naˇ, loˬ-eu jawˇ duˬ aˬ geu tsahˇ maˬ kaˬ, iˇ kahˇ nehˬ-ehˇ gaˇ mahˇ kaˬ k’awꞈ iˇ-eu lehˇ g’eh-eu noeˬ dahˇ doe laˇ-euˬ huˬ mehˬ mehˬ-eu deuˬ-euˬ g’aˇ duˬ meh. Aˬ yawꞈ maꞈ naˇ, miˇ tsaˬ k’oeˇ taˆ tsaꞈ gaˬ gaˇ neh huiˬ dzehˬ-eu Yeˬsuˇ Ka li-ahˇ dzaw geuꞈ-awˇ, “ngaˇ heu gaˇ jawˇ ma, ngaˇ iˇ ma” lehˇ ehˇ luꞈ-eu jeˬ pyeuꞈ meh. (Iˇsaˬyaˇ 6:8; Yoˇhaˬ 7:29) Iˇ kahˇ nehˬ-ehˇ gaˇ mahˇ kaˬ gaˇ ya jawˇ iˇ-eu miˇ neh, yaw awˬ awˬ-ehˇ dehꞈ dzaw-eu loˬ meh. Jawˇ oeˇ-ahˇ maˬ duˇ leˇ-eu zahˇ, uˬ jeˬ jaˬ lehˇ, dzaˇ heu deuˬ-ahˇ k’awꞈ ya tahˬ puˬ meh. Dawˬ yaw shuiꞈ-ahˇ k’awꞈ siˬ nya-eu loˬ meh. Aˇ k’oꞈ 23-ahˇ neh 65 k’oꞈ-ahˇ keuˆ ni byah laˇ-euˬ aˬ li aˬ buˇ, miˬ zaˬ yo zaˬ deuˬ-ahˇ, dzaw nymˇ laꞈ k’oeˇ mehˬ nehˬ-eu heu naˇ, aˬ yawꞈ maꞈ loˬ-eu zaˬ siˬ nui gahˇ deuˬ lahˬ laˇ ni maˬ ehˇ, Yeˬhawˇbaˬ hawˇ-eu aˇ maꞈ aˇ muˇ deuˬ-ahˇ, caw ba nya ni maˬ ehˇ, dzaw mehˬ nehˬ-eu jeˬ pyeuꞈ meh.

Giˇlaˆ Loꞈ-eu nymˇgoˇ Jaˇliꞈ Dzaw nymˇ. “Giˇlaˆ” Heˬbyehˇ dawˬ heu naˇ, “Saˇ kiˇ aˇ maꞈ” lehˇ ehˇ mawꞈ-eu meh.1943 K’oꞈ-ahˇ neh dahˬ beh-awˇ, Giˇlaˆ dzaw mehˬ-eu nymˇ heu gaˇ neh, Miˬyehˇ gaˇ mˇ zaˬ 8,000 g’aˬ dzehˬ ni-ahˇ dzaw mehˬ nehˬ-euˬ meh. Gaˇ mˇ zaˬ deuˬ-ahˇ “mˬ dzeˇ miˇ dzeˇ” keuˆ ni pyehˬ k’awˬ g’eh-awˇ, saˇ kiˇ bi kamˬ ngeh tiˬ jawˇ, zaˬ lahˇ myaˬ laˇ dui dui-euˬ meh. (G’aˬk’ehˇ 13:47) Peˆlu miˇ k’ahˬ-ahˇ, Miˬyehˇ gaˇ mˇ zaˬ deuˬ iˇ keuˆ beh beh ngeh, aˇ muˇ tiˬ hmˬ-iˬ maˬ jaˆ, ehˇ k’awꞈ nymˇ naˇ, aˇ muˇ 1,000 muˇ dzehˬ ni jaˆ laˇ taˬ-euˬ meh. Jaˬpaˬ miˇ k’ahˬ-ahˇ k’awꞈ, Miˬyehˇ gaˇ mˇ zaˬ deuˬ le keuˆ beh beh ngeh, Yeˬhawˇbaˬ-euˬ Saˇ kiˇ deuˬ tseˇ g’aˬ jiˇ maˬ jawˇ-a, ehˇ k’awꞈ nymˇ naˇ 200,000 g’aˬ dzehˬ ni byah laˇ taˬ-euˬ meh. Dzaw nymˇ heu hmˬ-ahˇ, Jaˇliꞈ duꞈ yawˇ ni ba la ngaˬ siˬ dzaw-eu meh. Heu gaˇ dzaw iˇ-eu deuˬ naˇ, tiˬ byah ni mˇ-eu huˬ mehˬ mehˬ-eu g’aˬ, Beˬdeˬlaˇ-ahˇ mˇ-eu deuˬ, aˇ maꞈ-ahˇ sheuˬ g’eh-eu aˬ yuiꞈ deuˬ pyeuꞈ meh. Aˬ yawꞈ maꞈ miˇ tsaˬ k’oeˇ taˆ tsaꞈ gaˬ-eu gaˇ heu hmˬ, bi huiˬ bi mahˇ laˇ-eu g’aˇ duˬ leh jeh-awˇ dzaw-eu meh.

• Huˬ mehˬ mehˬ-eu deuˬ-euˬ dzaw nymˇ, aˬ jeˬ miˇ neh bi jaˆ-euˬ nga?

• Miˬyehˇ Miˇ k’ahˬ-euˬ gaˇ kawˆ tsaꞈ gaˬ-eu dzaw nymˇ-ahˇ, aˬ geu deuˬ dzaw iˇ-eu nga?