“Huˬ mehˬ mehˬ-eu g’aˬ” lehˇ ehˇ-eu heu naˇ, aˬ cawˬ laˇ nya ni gaˇ ma yaw shuiꞈ shaˇ dahˇ nehˬ-eu g’aˬ-ahˇ ehˇ-eu meh. Yeˬsuˇ huˬ mehˬ mehˬ-eu g’aˬ loꞈ-ehˇ duˇ-eu meh. Miˇ tsaˬ k’oeˇ taˆ bi oe-euˬ heu naˇ, dehꞈ ziˇ za-eu gaˇ-ahˇ mˇ-awˇ neh, ka k’oꞈ-eu jeˬ gaˇ ma pah dahˇ nehˬ le-euˬ meh. (Maꞈtehˬ 20:28) Nymˇ iˬ nah Yeˬsuˇ-ahˇ dzaw geuꞈ-awˇ caw teh luꞈ-eu deuˬ, k’aˇ g’eh nya-eu loꞈ-ehˇ aˇ yamˬ zmˬ-awˇ neh, ‘zaˬ lahˇ’ bi pyeuꞈ laˇ-eu gaˇ heu hmˬ-ahˇ mˇ luꞈ meh. (Maꞈtehˬ 28:19, 20) Tiˬ deuˬ na-aˬ, huˬ mehˬ mehˬ-eu g’aˬ pyeuꞈ nya meh.

Huˬ mehˬ mehˬ-eu g’aˬ naˇ, aˇ yamˬ tiˬ byah ni tsaꞈ gaˬ-eu deuˬ-ahˇ ehˇ-eu meh. Yeˬhawˇbaˬ-euˬ Saˇ kiˇ deuˬ yawˬ g’aˬ na luꞈ, guiˬ lahˬ dawˬ tsaꞈ gaˬ luꞈ meh. Ehˇ k’awꞈ, tiˬ deuˬ na-aˬ dehꞈ jeˬ dehꞈ kawˆ yaw myaˬ jeˬ-ahˇ laˆ paˇ-awˇ, aˬ myah luꞈ huˬ mehˬ mehˬ-eu g’aˬ geuꞈ iˇ-euˬ meh. Aˬ yawꞈ maꞈ yawˬ ha-euˬ gaˇ tiˬ byah tiˬ loꞈ maˬ mˇ ni, ba la tiˬ siˬ naˬ liˬ 70 laꞈ tsaꞈ gaˬ luꞈ meh. Tiˬ deuˬ na-ahˇ Aˇ maꞈ aˇ muˇ neh tseˇ-awˇ, dzehˬ-eu huˬ mehˬ mehˬ-eu g’aˬ bi pyeuꞈ-euˬ meh. Aˬ yawꞈ maꞈ ba la tiˬ siˬ-ahˇ naˬ liˬ 130 laꞈ, maˬ ngeuˇ naˇ heu taꞈ-ehˇ dzehˬ ni mˇ-awˇ, tsaꞈ gaˬ-eu tsawˇ haˬ loˬ dui dui-eu jawˇ duˬ-ahˇ iˇ-eu meh. Huˬ mehˬ mehˬ-eu deuˬ naˇ, yaw dehꞈ dehꞈ gaˇ loˬ-eu yawˬ jeˬ na luꞈ-ahˇ, Yeˬhawˇbaˬ caw ba nehˬ laꞈ meh lehˇ jah-eu meh. (Maꞈtehˬ 6:31-33; 1 Tiˆmoˇseˬ 6:6-8) Tiˬ deuˬ na, aˇ yamˬ ti byah tiˬ loꞈ maˬ tsaꞈ gaˬ nya k’awꞈ, tiˬ poˆ na huˬ mehˬ mehˬ-eu g’aˬ pyeuꞈ nya meh. Heu naˇ, ba la tiˬ siˬ naˬ liˬ 30 laꞈ maˬ ngeuˇ naˇ, naˬ liˬ 50 laꞈ tsaꞈ gaˬ-eu meh.

Huˬ mehˬ mehˬ-eu g’aˬ geuꞈ-eu deuˬ naˇ, Miˬyehˇ hawˇ-eu tsawˇ haˬ-ahˇ gaˬ-eu miˇ neh meh. Tsawˇ haˬ zaˬ Miˬyehˇ hawˇ-eu Miˬyehˇ-euˬ nui noeˬ-ahˇ siˬ nya-eu loˬ ngaˇ lehˇ, Yeˬsuˇ loꞈ-ehˇ nga maꞈ k’awꞈ haw mawˇ-euˬ ma. (Maˬkuˆ 6:34) Nymˇ aˬ yawꞈ maꞈ-ahˇ caw ba nehˬ-eu zaˬ siˬ nui gahˇ hawˇ-eu mehˬ hu paw noeˬ tmˬ-eu jeˬ nga maꞈ jawˇ gaˇ jaˆ ma. Huˬ mehˬ mehˬ-eu deuˬ naˇ, tsawˇ haˬ zaˬ-ahˇ gaˬ-eu miˇ neh aˇ yamˬ hawˇ-eu g’aˬ tiˬ byah zmˬ-awˇ, aˬ cawˬ Miˬyehˇ-ahˇ siˬ nya laˇ ni cawˬ ba nehˬ luꞈ-eu meh. (Maꞈtehˬ 22:39; 1 Teˇsaˬloˇni 2:8) Teu miˇ neh, huˬ mehˬ mehˬ-eu deuˬ nui jah ziꞈ dah ni pyeuꞈ laˇ-awˇ, Miˬyehˇ nehˬ-ehˇ g’oeˇ-eu gaˬ-eu jeˬ myaˬ laˇ-eu uˬ taꞈ, nui saˇ oꞈ-eu jeˬ k’awꞈ za-eu meh.—G’aˬk’ehˇ 20:35.

• Huˬ mehˬ mehˬ-eu deuˬ lehˇ, aˬ geu deuˬ-ahˇ kuˇ-eu nga?

• Tiˬ deuˬ na, aˬ jeˬ miˇ neh aˇ yamˬ tiˬ byah ni huˬ mehˬ mehˬ-eu deuˬ geuꞈ mawꞈ-eu nga?