Yeˬsuˇ shiˇ dzeuˇ naˇ, Ka li zaˬ aˇ maꞈ laꞈ k’oeˇ neh, mehˬ bahˬ-eu deuˬ doˆ laˇ meh lehˇ, Jaˇliꞈ laꞈ k’oeˇ maˬ keuˆ laˇ mi na-ehˇ ehˇ taˬ-euˬ meh. (G’aˬk’ehˇ 20:29, 30) Gaˇ kawˆ heu ehˇ taˬ-euˬ loꞈ-ehˇ pyeuꞈ laˇ-euˬ meh. Mehˬ bahˬ-eu deuˬ naˇ, Yeˬsuˇ neh mehˬ-euˬ loꞈ-ehˇ maˬ mehˬ ni, laꞈ nyiˇ paw-euˬ zahˇ jiˇ mehˬ keuˬ-eu miˇ neh, Ka li zaˬ aˇ k’awꞈ lehˇ doˆ laˇ-euˬ meh. (2 Tiˆmoˇseˬ 4:3, 4) Nymˇ iˬ nah Jaˇliꞈ maˇ maˇ ni mehˬ-eu jeˬ-ahˇ, nga maꞈ g’oˆ shaw taˬ maˬ lehˇ, aˬ joˆ-ehˇ jahˇ neh siˬ duˬ-eu nga?

Yaw tsaˬ yaw dawˇ jeˬ-ahˇ, Yeˬhawˇbaˬ pah mehˬ nehˬ-eu aˇ yamˬ tsaˬ laˇ-euˬ meh. “Aˇ saˬ saˬ-eu aˇ yamˬ-ahˇ, maˇ maˇ ni g’eh-eu nui gahˇ byah laˇ tehꞈ-a” lehˇ, Miˬyehˇ maˬ keuˆ laˇ mi na-ehˇ ehˇ taˬ-euˬ meh. (Daˬyeˬlaˇ 12:4 Miˇ shuiꞈ Dawˬ paˇ Jaˇliꞈ) 1870 k’oꞈ-ahˇ yaw tsaˬ yaw dawˇ jeˬ-ahˇ poˆ tseˇ-eu aˇ muˇ muˇ zaˬ tiˬ muˇ, uˬ duˬ tahˬ nymˇ yaw myaˬ gaˇ mehˬ luꞈ-eu jeˬ, Jaˇliꞈ nehˬ-ehˇ maˬ tsaˬ gaˇ ya mawˇ-euˬ meh. K’oeˇ miˇ neh, Jaˇliꞈ maˇ maˇ ni mehˬ-eu jeˬ-ahˇ g’oˆ shaw nya-eu g’aˇ duˬ, aˬ yawꞈ maꞈ dahˬ beh-awˇ poˆ tseˇ-euˬ meh. Yeˬhawˇbaˬ k’awꞈ, aˬ yawꞈ maꞈ-ahˇ guiˬ lahˬ biꞈ nehˬ-euˬ meh.

Nui ma yaw dawˇ deuˬ, Jaˇliꞈ-ahˇ yaw duˬ duˬ-ehˇ pyehˆ tseˇ-euˬ meh. Gaˇ hu-euˬ Jaˇliꞈ Dzaw zaˬ deuˬ neh zmˬ yaꞈ-euˬ, pyehˆ tseˇ jeˬ pyehˆ tseˇ kawˆ-ahˇ, iˬ nah keuˆ ni nga maꞈ zmˬ luꞈ ma. Aˬ yawꞈ maꞈ Jaˇliꞈ-euˬ gaˇ kawˆ, aˬ yawꞈ kawˆ aˬ yawꞈ-ehˇ ja sawˇ-euˬ meh. G’oˆ shaw-eu yaw shaˬ tsahˇ-ahˇ tahˬ puˬ ngeh jawˇ, yawˬ deuˆ yawˬ-ahˇ haw iˇ-awˇ tsaˬ leˇ naˇ boꞈ doˆ taˬ-eu meh. K’oeˇ naˇ, Jaˇliꞈ aˬ yawꞈ neh paˇ pah mehˬ nehˬ laꞈ-euˬ miˇ neh, Miˬyehˇ-euˬ tsawˇ myahˇ hawˇ-eu Miˬyehˇ Miˇ k’ahˬ gaˇ kawˆ, tsawˇ haˬ zaˬ nehˬ-ehˇ taꞈ leˇ-awˇ Miˬyehˇ neh noeˬ taˬ-euˬ jeˬ, shiˇ dzeuˇ-euˬ deuˬ-euˬ gaˇ kawˆ hawˇ-eu g’oꞈ dehꞈ laˇ-eu deuˬ-euˬ gaˇ kawˆ, heu deuˬ nehˬ-ehˇ taꞈ leˇ-eu yaw tsaˬ yaw dawˇ jeˬ-ahˇ, paˇ ya siˬ nya-euˬ meh. Aˬ yawꞈ maꞈ neh poˆ tseˇ-euˬ baˬ da neh, maˬ tsaˬ-eu zahˇ hawˇ-eu maˬ tsaˬ-eu mˇ jeˬ shaˇ kawˆ deuˬ-ahˇ neh doˆ laˇ nya-euˬ ma.—Yoˇhaˬ 8:31, 32.

1879 k’oꞈ-ahˇ Jaˇliꞈ Dzaw zaˬ deuˬ, tsawˇ haˬ zaˬ-ahˇ, yaw tsaˬ yaw dawˇ bi siˬ-eu aˇ yamˬ tsaˬ laˇ ngaˇ lehˇ g’oˆ shaw-euˬ meh. K’oeˇ ngeh k’oꞈ-ahˇ neh naˇ, Loꞈ-eu nymˇgoˇ Yeˬhawˇbaˬ-euˬ Miˇ k’ahˬ gaˇ kawˆ tsaꞈ gaˬ-eu paˇ dmˬ jahˇ doˆ-euˬ meh. Iˬ nah keuˆ ni jahˇ doˆ luꞈ ma. Nymˇ iˬ nah Jaˇliꞈ-euˬ yaw tsaˬ yaw dawˇ, miˇ k’ahˬ 240 k’ahˬ-ahˇ iˇ keuˆ taˬ-awˇ, tsawˇ jeuˬ-euˬ dawˬ 750 jeˬ dzehˬ ni biˇ k’awˬ luꞈ ma. Maˇ maˇ ni g’eh-eu zaˬ siˬ nui gahˇ, miˇ tsaˬ k’oeˇ taˆ nymˇ poˆ loꞈ-ehˇ, tiˬ jawˇ-iˬ maˬ jaˆ byah laˇ haw-aˬ.

• Yeˬsuˇ shiˇ dzeuˇ naˇ, Jaˇliꞈ-euˬ yaw tsaˬ yaw dawˇ, aˬ jeˬ pyeuꞈ iˇ-euˬ nga?

• Jaˇliꞈ-euˬ yaw tsaˬ yaw dawˇ, aˬ joˆ-ehˇ paˇ poˆ mawˇ k’oꞈ-euˬ nga?