Nga maꞈ-euˬ aˇ maꞈ aˇ muˇ naˇ, yawˬ k’oꞈ na luꞈ Jaˇliꞈ paˇ dmˬ hawˇ-eu paˇ dmˬ yawˬ jeˬ yawˬ-ahˇ, yaw myaˬ yaˇ lam dmˬ jahˇ doˆ-awˇ, yawˬ ngehꞈ-ehˇ biˇ k’awˬ nehˬ luꞈ ma. Bawˬ dzaˬ nymˇ hawˇ-eu saˇ naˇ deuˬ-ahˇ tsoˆ-awˇ laˆ saˆ-eu ma. Beˬdeˬlaˇ-ahˇ jawˇ-eu mehˇ nmˇ deuˬ hawˇ-eu miˇ shiˬ naˬ liˬ deuˬ-ahˇ k’awꞈ caw ba nehˬ-awˇ, maˬ noeˬ-euˬ gaˇ shaˬ zahˬ puˬ le-euˬ mehˇ nmˇ deuˬ-ahˇ k’awꞈ caw ba-eu ma. ‘Nga maꞈ aˬ gaˇ-euˬ pyuˇ neh mˇ luꞈ nga?’ lehˇ nawˇ noeˬ tehꞈ-a.

Tseˇ bymˇ tiˬ bymˇ hawˇ-eu pyuˇ damˬ oˆ-eu lehˇ nga maꞈ maˬ jahˇ. Tsaꞈ gaˬ-eu gaˇ g’aˇ duˬ pyuˇ yaw myaˬ jiˇ leˇ k’awꞈ, nga maꞈ naˇ pyuˇ maˬ shaˇ. Yeˬhawˇbaˬ nga maꞈ-ahˇ caw ba nehˬ laꞈ luꞈ meh lehˇ jah-eu miˇ neh, “tsawˇ haˬ zaˬ caw ba nehˬ laꞈ gaˇ maˬ noeˬ tmˬ” lehˇ, dzeuˇ laꞈ-euˬ tiˬ yaˇ k’oꞈ-ahˇ-euˬ Loꞈ-eu nymˇgoˇ paˇ dmˬ nyiˬ dmˬ aˬ yawꞈ dmˬ laꞈ k’oeˇ, heu loꞈ-ehˇ boꞈ taˬ-euˬ meh. Ehˇ loꞈ-ehˇ tiˬ jawˇ-iˬ maˬ shaˇ haw-aˬ.—Maꞈtehˬ 10:8.

Nui ma keuˆ-awˇ damˬ nehˬ laꞈ-euˬ pyuˇ deuˬ neh mˇ luꞈ-eu ma. Nga maꞈ Jaˇliꞈ mehˬ-eu gaˇ-ahˇ, tsawˇ haˬ yaw myaˬ g’aˬ aˇ poeˬ taˬ baw-eu miˇ neh, heu-euˬ g’aˇ duˬ pyuˇ damˬ dawˆ-eu meh. Miˇ tsaˬ k’oeˇ taˆ Miˬyehˇ neh noeˬ taˬ-euˬ loꞈ-ehˇ bi pyeuꞈ laˇ-eu g’aˇ duˬ, Saˇ kiˇ deuˬ k’awꞈ, yawˬ ha-euˬ aˇ yamˬ, yawˬ ha-euˬ g’aˬ, yawˬ ha-euˬ pyuˇ shuiˇ myawˬ gahˬ hawˇ-eu yawˬ jeˬ yawˬ-ahˇ k’awꞈ nui ma keuˆ-eu laꞈ k’oeˇ laꞈ k’aˬ tiˬ cehˇ damˬ-eu meh. (1 Laˬsaˬbaˬ 29:9) Nui ma keuˆ-eu laꞈ k’oeˇ pyuˇ damˬ dawˆ mawꞈ-eu deuˬ-euˬ g’aˇ duˬ, Bawˬ dzaˬ nymˇ hawˇ-eu bawˬ dzaˬ gaˇ, pyuˇ damˬ bahˬ keuˆ bi jaˆ taˬ-euˬ ma. Maˬ ngeuˇ naˇ, jw.org-ahˇ neh k’awꞈ damˬ nya meh. Pyuˇ heu myaˬ tiˬ paˆ smˇ muiˬ jawˇ gaˇ neh tehꞈ-ehˇ oe-euˬ maˬ ngeuˇ-a. Aˬ yawꞈ maꞈ naˇ, Uˬ duˬ tahˬ nymˇ-ahˇ jaˆ-eu pyuˇ damˬ bahˬ keuˆ-ahˇ, pyuˇ nyiˬ byaˆ dawˆ ahˇ-euˬ shaˬ-eu miˬ coeˬ miˬ ma k’oeˇ g’aˬ loꞈ-ehˇ duˇ meh. Miˬ coeˬ miˬ ma heu g’aˬ neh mˇ-euˬ jeˬ-ahˇ, Yeˬsuˇ ja ceuˬ-eu meh. (Luˇkaꞈ 21:1-4) K’oeˇ miˇ neh aˬ suˇ g’aˬ maˬ kaˬ, “yawˬ ha neh k’aˇ noeˬ tsehˆ”-euˬ loꞈ-ehˇ biꞈ nya ni “yuˇ doˆ” taˬ nya-eu meh.—1 Gawˇliˬtu 16:2; 2 Gawˇliˬtu 9:7.

Yeˬhawˇbaˬ aˬ yawꞈ-euˬ nui noeˬ byah laˇ ni, Miˬyehˇ Miˇ k’ahˬ-euˬ gaˇ g’aˇ duˬ, ‘pyuˇ shuiˇ myawˬ gahˬ damˬ nehˬ’ mawꞈ-eu deuˬ-euˬ nui ma-ahˇ, paˇ laˆ noeˬ nehˬ laꞈ meh lehˇ nga maꞈ jah-eu ma.—Dawˬdaˬ 3:9.

• Nga maꞈ-euˬ aˇ maꞈ aˇ muˇ, zahˇ yawˬ deuˬ yawˬ nehˬ-ehˇ aˬ jeˬ lehˇ beu gaˇ-eu nga?

• Nui ma keuˆ-awˇ neh dawˆ taˬ-euˬ pyuˇ deuˬ-ahˇ, aˬ joˆ-ehˇ zmˬ-eu nga?