Gaˇ kawˆ 4
Nga maꞈ aˬ jeˬ miˇ neh Miˇ Shuiꞈ Dawˬ paˇ Jaˇliꞈ jahˇ doˆ-euˬ nga?
Kahˇgoˬ (Kiˬshaˇsaˬ)
Laˬg’awˇdaˬ
Smˬ yaˇ oeˬ yaˇ k’oꞈ heu yaw kaˬ-ahˇ, Siˬmaˬkuˇ Jaˇliꞈ aˇ tsehˆ tiˬ tsehˆ laꞈ k’oeˇ ahˇ-eu, Miˬyehˇ-euˬ tsawˇ myahˇ. Ja ceuˬ 69:31
Yeˬhawˇbaˬ-euˬ Saˇ kiˇ deuˬ, Jaˇliꞈ paˇ dmˬ yaw myaˬ jeˬ-ahˇ, g’awˬ mya k’oꞈ zmˬ-awˇ neh aˬ cawˬ-ahˇ k’awꞈ biˇ k’awˬ nehˬ-euˬ ma. Ehˇ k’awꞈ myahˇ laˇ ngeh jawˇ, “[‘aˬ diˇ aˬ maˇ,’ MS] yaw tsaˬ yaw dawˇ jeˬ-ahˇ” tsawˇ haˬ zaˬ deuˬ bi siˬ nya-eu g’aˇ duˬ, Jaˇliꞈ yaw shuiꞈ yuˇ doˆ-eu loˬ nga lehˇ haw siˬ-euˬ ma. Heu-aˬ, yawˬ g’aˬ na luꞈ-euˬ g’aˇ duˬ, Miˬyehˇ neh noeˬ taˬ-euˬ jeˬ pyeuꞈ meh. (1 Tiˆmoˇseˬ 2:3, 4) K’oeˇ miˇ neh 1950 k’oꞈ-ahˇ neh dahˬ beh-awˇ, nymˇ saˇ ka-ahˇ zmˬ-eu dawˬ deuˬ neh, Miˇ Shuiꞈ Dawˬ paˇ Jaˇliꞈ yuˇ doˆ-euˬ ma. Jaˇliꞈ heu dmˬ tsawˇ jeuˬ-euˬ dawˬ 130 jeˬ dzehˬ ni, yaw duˬ duˬ lehˇ paˇ yuˇ doˆ k’oꞈ taˬ-euˬ ma.
Yaw awˬ awˬ-ehˇ g’oˆ shaw nya-eu Jaˇliꞈ loˬ-eu meh. Saˇ ka paˇ laˇ-eu loꞈ-ehˇ, dawˬ deuˬ k’awꞈ paˇ laˇ-euˬ meh. Jaˇliꞈ myaˬ tiˬ paˆ nymˇ saˇ ka-ahˇ maˬ zmˬ-eu gaˇ hu-euˬ dawˬ oeˇ deuˬ neh boꞈ taˬ-euˬ miˇ neh, g’oˆ shaw-eu yaw shaˬ meh. K’oeˇ tehꞈ-ehˇ maˬ g’aˬ ni, aˇ dahˬ beh-euˬ Jaˇliꞈ yaw oeˇ dmˬ nehˬ-ehˇ duˇ leˇ-eu laꞈ zaˇ-ahˇ paˇ poˆ mawˇ-euˬ miˇ neh, Heˬbyehˇ dawˬ, Aˬlaˬmaˬya dawˬ, Heˬlaˬsaˇ (Gaˬ-liˇ) dawˬ heu deuˬ-ahˇ, paˇ g’oˆ shaw dzehˬ laˇ-euˬ meh.
Miˬyehˇ-euˬ dawˬ-ahˇ dawˇ coe ni yuˇ doˆ-eu loˬ meh. Jaˇliꞈ dawˬ yuˇ paˇ-eu deuˬ, Miˬyehˇ neh bi noeˬ doˆ-awˇ boꞈ taˬ-euˬ Jaˇliꞈ dawˬ kawˬ-ahˇ, maˬ laˆ paˇ ni aˬ yawꞈ yaw oeˇ loꞈ-ehˇ dawˇ coe ni yuˇ paˇ-eu tsaˬ meh. Ehˇ k’awꞈ, dawˬ yuˇ paˇ taˬ-euˬ Jaˇliꞈ myaˬ tiˬ paˆ, Yeˬhawˇbaˬ lehˇ kuˇ-eu Miˬyehˇ-euˬ tsawˇ myahˇ heu hmˬ-ahˇ, yuˇ doˆ dzeh taˬ-euˬ meh.
Noeˬ doˆ-euˬ yaw sahˇ g’aˬ-ahˇ, ciˬ huiˬ ciˬ mahˇ-eu Jaˇliꞈ loˬ meh. (2 Saˬmeuˬlaˆ 23:2) Miˇ Shuiꞈ Dawˬ paˇ Jaˇliꞈ laꞈ k’oeˇ, Yeˬhawˇbaˬ Miˬyehˇ-euˬ tsawˇ myahˇ 7,000 poˆ aˬ yawꞈ yaw oeˇ loꞈ-ehˇ, dawˆ ahˇ k’oꞈ taˬ-euˬ ma. Oeˇ dzehˬ dzehˬ-eu Jaˇliꞈ paˇ dmˬ, laꞈ oˆ paw jaˆ-eu aˇ baˇ. (Doˆ-iˇ-eu 4:13) Aˇ k’oꞈ aˇ la-ahˇ neh leh jeh dui dui-awˇ, poˆ tseˇ doˆ taˬ-euˬ Jaˇliꞈ paˇ dmˬ heu hmˬ naˇ, Miˬyehˇ-euˬ nui noeˬ nui duˇ-ahˇ shawˇ jehˆ ni bi mawˇ shawˇ laˇ-awˇ, gui-eu k’awꞈ yaw-awˬ meh. Yawˬ ha-euˬ tsawˇ jeuˬ dawˬ neh boꞈ doˆ taˬ-euˬ, Miˇ Shuiꞈ Dawˬ paˇ Jaˇliꞈ maˬ jaˆ k’awꞈ ni, Yeˬhawˇbaˬ-euˬ dawˬ kawˬ-ahˇ, yawˬ nah na luꞈ leh jeh-awˇ gui-awˬ lehˇ g’aˬ biꞈ-eu ma.—Yawˇshuˆ 1:8; Ja ceuˬ 1:2, 3.
-
Miˇ shuiꞈ dawˬ paˇ Jaˇliꞈ-ahˇ jahˇ doˆ-eu g’aˇ duˬ, nga maꞈ aˬ jeˬ miˇ neh noeˬ tsehˆ-euˬ nga?
-
Miˬyehˇ-euˬ nui noeˬ-ahˇ siˬ nya-eu g’aˇ duˬ yawˬ nah na luꞈ, aˬ jeˬ ya jahˇ-eu nga?
