Yeˬhawˇbaˬ-euˬ Saˇ kiˇ lehˇ ehˇ-eu heu naˇ, zahˇ yaw shuiꞈ-euˬ tsawˇ myahˇ nya lehˇ, tsawˇ haˬ zaˬ myaˬ tiˬ paˆ noeˬ-eu meh. Dzeuˇ yaꞈ-euˬ 2,700 k’oꞈ-ahˇ, aˬ diˇ aˬ maˇ pyeuꞈ-eu Miˬyehˇ-euˬ g’aˬ k’ehˇ deuˬ-ahˇ, Miˬyehˇ-euˬ “saˇ kiˇ” lehˇ kuˇ eu meh. (Iˇsaˬyaˇ 43:10-12) 1931 k’oꞈ-ahˇ keuˆ ni, nga maꞈ-ahˇ Jaˇliꞈ Dzaw zaˬ deuˬ lehˇ, tsawˇ haˬ zaˬ deuˬ siˬ nya yaꞈ-euˬ meh. Yeˬhawˇbaˬ-euˬ Saˇ kiˇ lehˇ kuˇ-eu tsawˇ myahˇ heu hmˬ-ahˇ, aˬ jeˬ miˇ neh ha geuꞈ-euˬ nga?

Yeˬhawˇbaˬ, nga maꞈ Miˬyehˇ-euˬ tsawˇ myahˇ pyeuꞈ meh. Gaˇ hu-euˬ Jaˇliꞈ yaw oeˇ laꞈ k’oeˇ, Yeˬhawˇbaˬ lehˇ kuˇ-eu Miˬyehˇ-euˬ tsawˇ myahˇ heu hmˬ 7,000 poˆ dawˬ peh ahˇ-eu meh. Jaˇliꞈ-ahˇ dawˬ yuˇ paˇ-euˬ deuˬ Miˬyehˇ-euˬ tsawˇ myahˇ yuˇ doˆ-awˇ, Sahˬpaˬ maˬ ngeuˇ naˇ, Miˬyehˇ lehˇ dawˆ ahˇ-euˬ meh. Miˬyehˇ Moˇseˬ-ahˇ ehˇ nehˬ-euˬ, ngaˬ-euˬ tsawˇ myahˇ-aˬ, Yeˬhawˇbaˬ lehˇ kuˇ ma. Tsawˇ myahˇ “heu-aˬ, mˬ maˬ maˬ byaˆ zaˇ ziˇ ngaˬ-euˬ tsawˇ myahˇ pyeuꞈ-eu ma.” (Doˆ-iˇ-eu 3:15) Heu naˇ, Miˬyehˇ nui deuˬ nehˬ-ehˇ maˬ duˇ leˇ-eu lehˇ mawˇ shawˇ laˇ-eu meh. Nga maꞈ muiˬ-eu shawˇ-eu Miˬyehˇ-euˬ tsawˇ myahˇ-ahˇ ya ha geuꞈ-euˬ miˇ neh, nui k’ahˇ shiˇ dui dui miˇ-a.

Tsawˇ myahˇ heu hmˬ, nga maꞈ ya mˇ-eu gaˇ deuˬ-ahˇ, pah mehˬ nehˬ-eu meh. Yaw tsaˬ yaw dawˇ pyeuꞈ-eu, Aˬbeˬlaˆ-ahˇ neh dahˬ beh-awˇ, gaˇ hu ba-euˬ tsawˇ haˬ yaw myaˬ g’aˬ, Yeˬhawˇbaˬ-ahˇ jah-eu gaˇ kawˆ saˇ kiˇ kamˬ-euˬ meh. Yaw myaˬ ziˇ laꞈ k’oeˇ, Noˇaˬ, Aˬbyaˬhaˬ, Saˬlaˇ, Moˇseˬ, Daˬbiˇ hawˇ-eu nui deuˬ k’awꞈ, “saˇ kiˇ kamˬ-eu tsawˇ haˬ . . . g’awˬ mya” laꞈ k’oeˇ ahˇ-eu meh. (Heˬbyehˇ 11:4–12:1) Iˬ baˇ maˬ ahˇ-eu tsawˇ haˬ-euˬ g’aˇ duˬ, saˇ naˇ mehˬ shi saˇ kiˇ geuꞈ nehˬ mawꞈ-eu loꞈ-ehˇ, Miˬyehˇ-euˬ yaw tsaˬ yaw dawˇ jeˬ-ahˇ k’awꞈ, tsawˇ haˬ zaˬ deuˬ siˬ nya laˇ ni, saˇ kiˇ kamˬ nehˬ mawꞈ-eu ma.

Nga maꞈ Yeˬsuˇ-ahˇ dzaw geuꞈ-eu ma. Jaˇliꞈ laꞈ k’oeˇ Yeˬsuˇ-ahˇ “saˇ jaˇ ziꞈ-eu laꞈ k’oeˇ dawˇ coe ni saˇ kiˇ kamˬ-eu g’aˬ” lehˇ kuˇ-euˬ meh. (Pah mehˬ-eu 3:14) ‘Miˬyehˇ-euˬ tsawˇ myahˇ bi siˬ-awˇ,’ Miˬyehˇ-euˬ “yaw tsaˬ yaw dawˇ jeˬ-euˬ gaˇ kawˆ saˇ kiˇ kamˬ” ma lehˇ Yeˬsuˇ ehˇ-eu meh. (Yoˇhaˬ 17:26; 18:37) K’oeˇ miˇ neh Yeˬsuˇ-euˬ g’aˬ k’ehˇ maˇ diˇ deuˬ naˇ, Yeˬhawˇbaˬ-euˬ tsawˇ myahˇ-ahˇ ha geuꞈ-awˇ, tsawˇ myahˇ heu hmˬ-ahˇ, tsawˇ haˬ zaˬ deuˬ siˬ nya laˇ ni ya mˇ-eu meh. Gaˇ heu hmˬ-ahˇ, nymˇ Yeˬhawˇbaˬ-euˬ Saˇ kiˇ deuˬ leh jeh-awˇ mˇ luꞈ ma.

• Jaˇliꞈ dzaw zaˬ deuˬ, aˬ jeˬ miˇ neh Yeˬhawˇbaˬ-euˬ Saˇ kiˇ lehˇ kuˇ-eu tsawˇ myahˇ heu hmˬ-ahˇ, ha geuꞈ-euˬ nga?

• Yeˬhawˇbaˬ-euˬ g’aˇ duˬ saˇ kiˇ kamˬ nehˬ-eu deuˬ, miˇ tsaˬ k’oeˇ taˆ jawˇ luꞈ-eu aˇ myah ni myahˇ laˇ-euˬ nga?

• Yeˬhawˇbaˬ-euˬ g’aˇ duˬ, Saˇ kiˇ kamˬ gaˇ neh huiˬ dzehˬ-eu aˬ suˇ g’aˬ nga?