Yeˬsuˇ Ka li aˬ yawꞈ-euˬ g’aˬ k’ehˇ deuˬ-ahˇ ehˇ nehˬ-euˬ, “naw maꞈ neh mˇ-euˬ yaw muiˬ jeˬ-ahˇ aˬ cawˬ mawˇ-awˇ, mˬ k’oeˇ taˆ jawˇ-eu naw maꞈ-euˬ Aˬda-ahˇ ja ceuˬ ni, aˬ cawˬ mehˬ shi naw maꞈ-euˬ yaw shehꞈ yaw k’aˆ-ehˇ bi bya-awˬ.” (Maꞈtehˬ 5:16) Heu loꞈ-ehˇ mˇ-eu g’aˇ duˬ, nymˇ saˇ ka-ahˇ doˆ laˇ-euˬ keu ka deuˬ-ahˇ zmˬ luꞈ ma. Teu laꞈ k’oeˇ iˇ teuꞈ nehꞈ hawˇ-eu nga maꞈ-euˬ maˇ maˇ ni g’eh-eu G’oeˇ saiˇ jw.org, k’awꞈ ahˇ-eu meh. Teu gaˇ Yeˬhawˇbaˬ-euˬ Saˇ kiˇ deuˬ jah-eu jeˬ hawˇ-eu mˇ jeˬ shaˇ kawˆ deuˬ-ahˇ ehˇ mawˇ nehˬ taˬ-euˬ meh. G’oeˇ saiˇ laꞈ k’oeˇ aˬ jeˬ jeˇ-euˬ gaˇ kawˆ ahˇ-eu nga?

Naˇ haˬ luꞈ-eu dawˬ deuˬ-ahˇ, Jaˇliꞈ ehˇ k’oꞈ nehˬ-eu. Tsawˇ haˬ zaˬ naˇ haˬ luꞈ-eu aˇ yehˇ huiˬ-eu gaˇ kawˆ deuˬ-ahˇ, ehˇ k’oꞈ taˬ gaˇ ya mawˇ meh. Yaw jeˬ ma jeˬ, Shaˬ-eu zahˬ-eu jeˬ byoˆ iˇ-eu aˇ nah jaˆ meh loˇ? hawˇ-eu Shiˇ-euˬ tsawˇ haˬ paˇ g’oꞈ dehꞈ laˇ nya meh loˇ? aˇ boꞈ heu nyiˬ taꞈ iˇ teuꞈ nehꞈ laꞈ k’oeˇ dawˬ 600 jeˬ dzehˬ ni gui nya meh. K’oeˇ naˇ Miˇ Shuiꞈ Dawˬ paˇ Jaˇliꞈ k’awꞈ dawˬ 130 jeˬ dzehˬ ni ya mawˇ-awˇ neh, Maˇ maˇ ni Jaˇliꞈ aˬ jeˬ mehˬ-eu nga? lehˇ ehˇ-eu paˇ dmˬ hawˇ-eu doˆ saˬ saˬ laˇ-euˬ Loꞈ-eu nymˇgoˇ, Noeˬlaˇ-awˬ lehˇ ehˇ-eu paˇ dmˬ loꞈ-ehˇ duˇ leˇ-eu, Jaˇliꞈ dzaw ngeh caw ba nehˬ-eu aˇ boꞈ deuˬ-ahˇ k’awꞈ ya mawˇ meh. Sahˬ boꞈ heu yaw myaˬ jeˬ-ahˇ, iˇ teuꞈ nehꞈ laꞈ k’oeˇ gui nya-awˇ, MP3, PDF, EPUB, heu jeˬ neh k’awꞈ yuˇ doˆ nya meh. Tiˬ g’aˬ na-ahˇ biꞈ nehˬ mawꞈ naˇ, aˬ yawꞈ maꞈ-euˬ dawˬ paw neh k’awꞈ yuˇ doˆ nya meh. Aˇ boꞈ deuˬ-ahˇ, laꞈ dzawˇ dzawˇ-eu dawˬ paw neh, yaw myaˬ jeˬ-euˬ dawˬ jahˇ taˬ-euˬ Biˬ diˬ oˬ k’awꞈ jaˆ meh. G’aˬ naˬ naˬ ngeh naˇ haˬ-eu g’aˇ duˬ, muiˬ-eu caˇ dawˬ hawˇ-eu Jaˇliꞈ gui-eu teˇ saˇ heu deuˬ yuˇ doˆ nya meh.

Yeˬhawˇbaˬ-euˬ Saˇ kiˇ deuˬ nehˬ-ehˇ taꞈ-eu gaˇ kawˆ. Doˆ saˬ saˬ laˇ-euˬ gaˇ kawˆ hawˇ-eu nga maꞈ-euˬ miˇ k’ahˬ gaˇ-ahˇ taꞈ-eu biˬ diˬ oˬ yaw nymˇ ahˇ-awˇ, Yeˬhawˇbaˬ-euˬ Saˇ kiˇ-ahˇ taꞈ-eu gaˇ kawˆ hawˇ-eu mehˇ nmˇ deuˬ-ahˇ caw ba-eu gaˇ kawˆ heu deuˬ k’awꞈ ahˇ-eu meh. K’oeˇ naˇ, keuˆ laˇ-eu huiˬ-eu mehˬ bawˬ-ahˇ poˆ nya-awˇ, saˇ naˇ deuˬ nehˬ-ehˇ k’awꞈ ngehˬ cawˬ nya meh.

Heu deuˬ-ahˇ zmˬ-awˇ neh, miˇ tsaˬ k’oeˇ taˆ yaw tsaˬ yaw dawˇ-euˬ yaw shehꞈ bya keuˆ iˇ ni, nymˇ nga maꞈ mˇ luꞈ ma. K’oeˇ miˇ neh, miˇ tsaˬ k’oeˇ taˆ jawˇ-eu tsawˇ haˬ zaˬ dawˬ tawˆ luꞈ, Miˬyehˇ-euˬ yaw tsaˬ yaw dawˇ jeˬ-ahˇ ya gaˬ-eu meh. Miˬyehˇ-euˬ yaw shehꞈ k’ahˬ sehˇ jaˆ-eu g’aˇ duˬ, Yeˬhawˇbaˬ-euˬ dawˬ kawˬ “yaw kawˇ-ehˇ gaˬ doe iˇ” luꞈ-uˇ lehˇ, nga maꞈ guiˬ lahˬ shaˇ-eu ma.—2 Teˇsaˬloˇni 3:1.

• Jaˇliꞈ-euˬ yaw tsaˬ yaw dawˇ jeˬ-ahˇ tsawˇ haˬ zaˬ siˬ nya laˇ ni, jw.org heu, aˬ joˆ-ehˇ caw ba luꞈ-eu nga?

• Nga maꞈ-euˬ G’oeˇ saiˇ laꞈ k’oeˇ, aˬ geu jeˬ-euˬ gaˇ kawˆ-ahˇ haw leˇ mawꞈ nya?